Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2015

 MODIRO WA BOBOLEDI LE WA GO RUTA LEFASENG KA BOPHARA

Yuropa

Yuropa
  • DINAGA 47

  • BAAGI 741 311 996

  • BAGOELEDI 1 611 036

  • DITHUTO TŠA BEIBELE 847 343

Klase e Ile ya Etela Holong ya Mmušo

Finland: Bana ba grade 4 ba etetše Holong ya Mmušo

Ines, e lego morutwana yo a balago grade 4 kua Finland, o ile a kwa gore barutwana ba klaseng ya gagwe ba be ba tlo bolela ka Dihlatse tša Jehofa e le karolo ya go rutwa ka bodumedi, ka gona a ba laletša go etela Holong ya Mmušo. Barutwana le morutiši wa bona ba ile ba re yeo ke kgopolo e botse.

Bekeng e latelago, barutwana ba 38 ba ile ba sepela dikhilomithara tše e ka bago tše hlano ka  dipaesekele tša bona go ya Holong ya Mmušo. Barutiši ba babedi le hlogo ya sekolo le bona ba ile ba tla. Ba ile ba hwetša bana babo rena ba babedi le dikgaetšedi tše tharo Holong ya Mmušo. Ge ba be ba sa thabela dijonyana, barutwana ba ba ile ba botšiša dipotšišo ka holo yeo le ka Dihlatse gore: “Go direga’ng dibokeng?” “Phapoši yela ke ya eng?” Ba be ba botšiša ka bokgobapuku. “Ke ka baka la’ng kua lebotong go na le ‘tshela yeo e arogantšwego ka lesome’”? Temana ya ngwaga e be e le Mateo 6:10.

Ka ge sekolo seo se be se kgatha tema lesolong la go thibela gore go se be le bomphenyašilo sekolong, bana babo rena ba ile ba bontšha klase yeo bidio ya dipopaye ya O ka Fenya Bomphenyašilo Ntle le go lwa, yeo e lego go jw.org/nso. Ba ile ba ba bontšha le dikarolo tše dingwe Wepesaeteng ye gomme ba bapala kopelo ya Mmušo. Ba tšere mo e ka bago iri ba le moo.

Hlogo ya sekolo, barutiši le barutwana bao ba ile ba thabela leeto leo kudu. Hlogo ya sekolo e be e kgahlilwe ke boitsebišo bjo bo lego Wepesaeteng ya rena ka gobane e be e nagana gore bo ka dirišwa dithutong tša sekolo tša mabapi le bodumedi. E ile ya thabišwa ke go kwa gore diklase tše dingwe le tšona di ka etela Holong yeo ya Mmušo. Ka baka leo, morutiši wa klase e nngwe o ile a ikgokaganya le Dihlatse letšatšing le le latelago gomme a botšiša ge e ba le bona ba ka etela holong yeo.

O Ile a Hwetša Letlotlo Lefelong la go Lahlela Matlakala

Cristina, yo a dulago Romania, ga se a ka a tsena sekolo gomme o be a sa tsebe go bala goba go ngwala. O be a diila kudu gomme a iphediša ka go nyaka dikotikoti le mapotlelo a polasetiki moo go lahlwago matlakala motseng woo. Ka letšatši le lengwe ge a dutše a fatafata, o ile a kgahlwa ke selo se itšego—e be e le dikgatišo tše di theilwego Beibeleng tšeo di nago le diswantšho tše dibotse tša batho bao ba thabilego. O ile a ipotša gore: ‘Batho ba mohuta wo ba swanetše go  ba ba le gona kaekae.’ Cristina o be a nyaka go tseba gore dikgatišo tšeo di bolela ka eng, ka gona o ile a kgopela motho yo a itšego gore a mmalele tšona. Ge a ekwa gore dikgatišo tšeo di bolela ka ditaba tša bodumedi, o ile a nyamišwa ke gore batho ba be ba lahlile dilo tše di bolelago ka Lentšu la Modimo matlakaleng. Cristina o ile a tšwela pele a eya lefelong leo go yo tšea diporoutšha, dipampišana le dimakasine. Tše dingwe di be di sa feletše gomme tše dingwe di  gagogane. O ile a ithuta go bala e le gore a tsebe ka mo go oketšegilego ka dikgatišo tšeo.

Ka morago, Dihlatse di ile tša etela Cristina gomme tša thoma thuto ya Beibele le yena. O be a thabile kudu go tseba gore Jehofa o mo gogetše go yena a diriša dikgatišo tšeo batho ba bangwe ba bego ba se na taba le tšona. O ba gona dibokeng tša phuthego gomme o tloga a thabela seo a ithutago sona. Se sengwe sa dilo tšeo di mo thabišago kudu ke gore ga bjale o hwetša dimakasine tše difsa, dipuku le diporoutšha. Ga go sa hlokagala gore a di nyake matlakaleng. Ruri Cristina o hweditše letlotlo lefelong leo go lahlwago matlakala!

Thuto ya Beibele Yeo e Swarelwago Sethokgweng

Jeremane: Margret a swere thuto ya Beibele sethokgweng

Mesong e mengwe le e mengwe Margret o itshepelela le mpša ya gagwe sethokgweng kua Jeremane. O re: “Ke leka go boledišana le batho bao ba iphetelago. Ge e ba ba iketlile, ke boledišana le bona ka Beibele.”

Ka letšatši le lengwe o ile a kopana le mokgekolo yo a lego nywageng ya bo-70 yo le yena a bego a itshepelela le mpša ya gagwe. Margret o ile a thoma poledišano le mokgekolo yo. Mokgekolo yo o ile a thabela poledišano yeo gomme a botša Margret gore o rapela Modimo le gore o bala Beibele letšatši le lengwe le le lengwe. Go tloga letšatšing leo, ba be ba kopana letšatši le lengwe le le lengwe gomme ba boledišana ka Beibele. Ka letšatši le lengwe mokgekolo yoo o ile a botšiša Margret gore: “Go re’ng o tseba Beibele ka tsela ye?” Margret o ile a mmotša gore ke yo mongwe wa Dihlatse tša Jehofa.

Margret o ile a kgopela mokgekolo yo ka makga a mantši gore a mo swarele thuto ya legae ya Beibele, eupša a se dumele. Lega go le bjalo, ba ile ba tšwela pele ka dipoledišano tša bona. Ka morago ga dikgwedi tše itšego, Margret o ile a  botšiša mokgekolo yo gape ge e ba a ka mo swarela thuto ya legae ya Beibele. Mo lekgeng le mokgekolo yo o ile a mmotša gore o tšhaba go ithuta ka gobane monna yo a bego a dula le yena o be a sa rate Dihlatse tša Jehofa.

Nakong e latelago ge Margret a eya sethokgweng seo, o ile a tšea Beibele le puku ya Seo Beibele e se Rutago. Ge a bona mokgekolo yoo, ka sebete Margret o ile a re: “Lekgeng le ga ke nyake go go swarela thuto ya legae ya Beibele eupša ke nyaka go go swarela thuto ya Beibele ya sethokgweng.” Ntle le go senya nako, mokgekolo yoo o ile a dumela a tletše megokgo ka mahlong. O tla thutong ya gagwe ya Beibele yeo e swarelwago sethokgweng matšatši a tshelelago mo bekeng. Go ithekgile ka gore ke sehla sefe le ka boemo bja leratadima, ka dinako tše dingwe Margret o swanelwa ke go swara thuto ya Beibele a swere amporela le thotšhi.

O Ile a Šikinya Hlogo ka Tsela e Gakantšhago

Kgaetšedi yo a bitšwago Delphine o ile a ithuta Beibele le Irina kua Bulgaria. Irina o be a thabela seo a bego a ithuta sona gomme a eba gona dibokeng ka mehla. Lega go le bjalo, monna wa Irina o be a sa nyake gore a ithute le Dihlatse. O ile a hudušetša lapa la gagwe motsaneng o mongwe kua Sweden, ke moka Irina a se sa kgona go ithuta le Delphine. Lega go le bjalo, babulamadibogo ba babedi e lego Alexandra le Rebecca, ba ile ba kopana le Irina, yo a bego a sa tsebe Sesweden. Dikgaetšedi tšeo di ile tša diriša pukwana ya Good News for People of All Nations gomme tša kgopela Irina gore a ipalele molaetša ka Sebulgaria. Ka morago ga moo, di thušwa ke pukwana yeo, di ile tša mmotšiša ge e ba a ka thabela go hwetša dikgatišo ka segagabo. Irina o ile a šikinya hlogo a kgwahlišitše go tloga ka go le letshadi go ya ka go le letona. Dikgaetšedi tšeo di ile tša tloga, di phethile ka gore ga a thabele.

Ka morago Alexandra o ile a gopola gore Linda, e lego kgaetšedi yo a tšwago Sweden gomme a hlankela Bulgaria, o be  a tlo ba etela ka dibeke tše sego kae. O ile a nagana gore mohlomongwe go tla ba kaone ge Irina a ka kwa therešo ka segagabo. Ge Linda a fihla, yena le Alexandra ba ile ba etela Irina. Irina o ile a botša Linda gore o be a dutše a rapela Jehofa bošego bjo bongwe le bjo bongwe a mo kgopela gore a mo thuše gore a kgone go tšwela pele a rutwa Beibele. Gantši o be a sepela le puku ya gagwe ya Sebulgaria ya Seo Beibele e se Rutago. O be a nyaka go e bontšha Dihlatse ge a be a ka kopana le tšona seterateng, eupša ga sa nka a di bona. Irina o ile a thaba kudu ge a be a hwetša dikgatišo tše di oketšegilego ka Sebulgaria!

Linda o ile a botšiša Alexandra gore ke ka baka la eng leetong la bona la pele a ile a phetha ka gore Irina ga a thabele. Alexandra o ile a mo hlalosetša gore Irina o ile a šikinya hlogo go bontšha gore ga a thabele. Linda o ile a myemyela gomme a hlalosa gore batho ba Bulgaria ba šikinyetša hlogo ka mathoko ge ba dumela gomme ge ba gana ba e iša godimo le fase. Ka gona, go fihlela a ithuta Sesweden, Irina o tšwela pele a swarelwa thuto ka Sebulgaria. Bjang? O ile a kopanywa gape le Delphine gomme ba ithuta ba diriša lenaneo la bidio leo le lego Inthaneteng.

Mohlala o Mobotse wa Tate

Jemima, yo a dulago kua Sepania, o rutilwe therešo e sa le ngwana. Eupša ge a na le nywaga e šupago, bophelo bja gagwe bo ile bja fetoga. Mmagwe o ile a kgetha gore ga a sa nyaka go ba yo mongwe wa Dihlatse tša Jehofa gomme a hlala tatagwe. Ge Jemima a be a na le nywaga e 13, o ile a tlogela go kopanela le Dihlatse gomme a gana tatagwe a mo thuša moyeng.

Ge Jemima a godile, o ile a tsenela mekgatlo ya setšhaba le ya dipolotiki, a lwela gore batho feela ba swarwe ka toka. Ka morago, ge a be a lahlegetšwe ke mošomo, tatagwe e lego Domingo, o ile a mo kgopela gore a tlo šoma le yena mošomo wa go penta.

 Ka letšatši le lengwe ge ba be ba šoma gotee, Domingo o ile a kgopela go swarela Jemima thuto ya Beibele. Lega go le bjalo, o ile a gana gomme a re ge e ba a ka tsoga a bile le kgahlego o tla mmotša. Domingo o be a theetša mananeo a go theetšwa a Beibele le dimakasine ge a penta, mola morwedi wa gagwe yena a be a rata go theetša mmino wa pop a diriša di-earphone.

Ka November 2012, Domingo, yo a bego a nyetše gape, o ile a laletšwa Sekolong sa Beibele sa Banyalani ba Bakriste. Jemima o ile a kgahlwa kudu ke gore tatagwe o tlo ya sekolong sa Beibele dikgwedi tše pedi gomme ka morago ga moo a tlogele dilo ka moka a ye moo mokgatlo o tlago go mo romela gona. Jemima o ile a lemoga ka lekga la pele kamoo therešo e bego e nweletše ka gona pelong ya tatagwe, gomme o be a nyaka go tseba lebaka la seo.

Jemima o ile a se sa theetša mmino wa gagwe gomme a thoma go theetša mananeo a Beibele ao tatagwe a bego a a theetša. Le gona o ile a thoma go botšiša dipotšišo. Ka letšatši le lengwe ge Domingo a be a nametše llere a penta, Jemima o ile a re: “Na o sa gopola ge ke be ke re ke tla go botša ge ke nyaka go ithuta Beibele? Ga bjale ke nako ya gore ke ithute.”

Domingo o ile a thabela go kwa se. Ka January 2013, ba ile ba thoma go ithuta gotee gabedi ka beke. Sekolo seo tatagwe a laleditšwego go sona se ile sa thoma ka April, gomme a tšwela pele a mo swarela thuto ba diriša lenaneo la bidio la Inthaneteng. Jemima o bile gona ge tatagwe a be a aloga, gomme a thabela lenaneo leo kudu. Mafelelong ka December 14, 2013, Jemima o ile a kolobetšwa.

Jemima o re: “Jehofa ga se a mphelela pelo, e bile ke a tseba gore ga se a ka a nngala. O nneile selo seo ke sa kago ka se hwetša lefaseng, e lego bagwera ba kgonthe. Borwarre bja lefase ka bophara bo dira gore ke tšeele godimo le go feta lerato la Jehofa le legolo.”

 Tlhompho e Bohlokwa Kudu

Ka March 30, 2014, Vasilii, yo e lego kgale e le setho sa lapa la Bethele kua Russia, o be a nea bohlatse a diriša tafolana ya go nea bohlatse kgauswi le ofisi ya lekala ge koloi ya maphodisa e be e ema pele ga gagwe. Lephodisa le ile la tšwa ka koloing gomme ka boikokobetšo la kgopela Vasilii gore a kgaotše mošomo wa gagwe ka ge ba bangwe tikologong yeo ba be ba lla ka modiro wa gagwe. Lephodisa le lengwe le ile la rekhota poledišano yeo. Vasilii o ile a bona go le kaone gore a kwe lephodisa leo gomme a se leke go lwela ditshwanelo tša gagwe. Ka nako yeo, bafeti-ka-tsela ba bantšinyana ba ile ba ema gore ba bone seo se diregago. Vasilii o ile a sepela, eupša ka morago ga matšatši a mabedi a kgopela go swara seboka le molaodi wa maphodisa. O ile a dumelelwa go tla. Sebokeng seo, Vasilii o ile a leboga molaodi wa maphodisa ka modiro o bohlokwa woo maphodisa a o dirago setšhabeng, a ba a leboga gore a ile a boledišana le yena gabotse matšatšing a mabedi a fetilego. Molaodi yoo wa maphodisa o ile a lebelela mothuši wa gagwe gomme a re: “Nywageng ka moka e 32 ya ge ke le lephodisa, ga se ka ka ka kwa motho a re leboga bakeng sa mošomo wa rena!” Ge ba dutše ba boledišana, Vasilii o ile a thuša molaodi wa maphodisa go kwešiša gore modiro wa rena wa go nea bohlatse phatlalatša o molaong. Molaodi yoo o ile a botšiša Vasilii gore ke ka baka la’ng a se a ka a gana ge maphodisa a be a mo laela gore a kgaotše modiro wa gagwe gaešita le ge a be a tseba gabotse gore o be a na le tshwanelo ya go o dira? Vasilii o ile a araba ka gore: “Ke hlompha maphodisa. Nagana gore batho bao ba bego ba re bogetše ba be ba tla reng ge nkabe ke ile ka latofatša maphodisa ka gore ga a tsebe molao.” Molaodi wa maphodisa le mothuši wa gagwe ba ile ba kgahlwa kudu ke seo Vasilii a se dirilego gomme ba mo kgonthišetša gore nakong e tlago a ka se sa ba le mathata ge a diriša tafolana ya go nea bohlatse.