Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2015

 MODIRO WA BOBOLEDI LE WA GO RUTA LEFASENG KA BOPHARA

Oceania

Oceania
  • DINAGA 29

  • BAAGI 40 208 390

  • BAGOELEDI 97 583

  • DITHUTO TŠA BEIBELE 64 675

Ba Ile ba Tlogela Diphuthelwana tša Dikgatišo

Ditaba tše dibotse di be di se tša ka tša bolelwa kudu dihlakahlakeng tše dintši tša Micronesia, ka gona sehlopha se itšego sa bagoeledi ba Dihlakahlakeng tša Marshall se ile sa rulaganya leeto la dibeke tše pedi la go ya moo ka sekepe. Bagoeledi bao ba ile ba tloga sehlakahlakeng sa Majuro gomme ba fihla dihlakahlakeng tša Wotje, ke moka ba fetela sehlakahlakeng sa Ormed gona moo dihlakahlakeng tšeo.

 E le gore bagoeledi ba ba nee bohlatse bathong ba bantši ka mo go ka kgonegago, ba ile ba dira diphuthelwana tša dikgatišo pele ba ka tloga. Sephuthelwana se sengwe le se sengwe se be se na le dimakasine tše nne le diporoutšha tše pedi. Ka ge bagoeledi ba ba be ba sa tsebe gore ba tlo boa neng dihlakahlakeng tšeo, ba ile ba nea batho bao ba thabelago diphuthelwana tšeo gore ba abelane dikgatišo tšeo le malapa a bona le bagwera. Leetong leo la dibeke tše pedi, ba ile ba sepediša palomoka ya diporoutšha tše 531, dimakasine tše 756 le dipuku tše 7.

“Re Leboga ge o sa ka wa re Lebala”

Ka February 2014, Dihlatse tše tshelelago tša kua Papua New Guinea di ile tša thoma lesolo la matšatši a lesome la go yo nea bohlatse metseng ya Sehlakahlakeng seo se nago le thabamollo sa Karkar. Di ile tša hwetša batho ba bantši ba ba thabelago gomme tša sepediša dikgatišo tše 1 064. Kgaetšedi yo mongwe yo a bitšwago Relvie o itše: “Letšatšing la mathomo, re be re sa šoma tšhemo le ka iri ya boraro thapama. Ka nako yeo, meetse a rena a go nwa a be a fedile, mehlagare ya rena e lapile e bile melomo ya rena e omile ka baka la go bolela le batho ba bantši. Ke gopola ke boledišana le ngwanenyana yo mongwe gomme ke nyaka go mmalela lengwalo, eupša ka se kgone ka gobane ke be ke nyorilwe kudu. Gateetee o ile a mpha meetse.”

Bošegong bjo bongwe pele re tloga motseng o itšego, re ile ra ba le seboka se segolo le ditho tša motse gotee le baetapele ba kereke ya moo. Relvie o gopola ka gore: “Ke ile ka ikwa go swana le Stefano ge a be a eme ka pele ga Sanhedrine gore a emele therešo, eupša ke feela gore rena batheetši ba rena ba be ba na le bogwera.” Ge bagoeledi bao ba tshelelago ba feditše go bolela, mosadi yo a bego a ikarabela ka Sunday school kerekeng ya Lutere o ile a emelela gomme a leboga mmamogolo wa gagwe, yoo e bego e le yo mongwe wa bagoeledi bao, ge a  dirile maiteko a go tlo ruta batho ba gabo therešo. Mosadi yoo o itše: “Mohlala wa gago o mobotse o swana le wa mosadi wa Mosamaria yoo a ilego a ya gae gomme a fihla a botša ba gabo dilo tše dibotse tšeo a di kwelego go Jesu. Re leboga ge o sa ka wa re lebala.”

Na e sa le ba Banyenyane Kudu Gore ba ka Bolela ka Modimo?

Kiribati: Teariki le Tueti

Mesong e mengwe, Teariki, e lego mošemanyana wa nywaga e šupago sehlakahlakeng sa Tarawa, seo e lego karolo ya Kiribati, o be a le tšhemong le tatagwe e lego Tueti gomme ba tsena legaeng le lengwe moo ba ilego ba hwetša sehlopha sa banna le basadi ba e ka bago ba lesome ba nywageng ya bo-20. Ka morago ga gore tatago Teariki a bolele le bona ka molaetša wa Mmušo, yo mongwe wa bona o ile a re go yena: “Re lemogile gore ka moka ga lena le tšama le bolela ka Beibele le bana ba lena. Ke ka baka la’ng le sepela le bona? E sa le ba banyenyane kudu gore ba ka bolela ka Modimo.”

Tueti o ile a araba ka gore: “Le nyaka go bona gore ngwanaka o bohlale gakaaka’ng? E re nna ke tšwele ka ntle, gomme le šale le ikwela ka noši.” Sehlopha seo se ile sa araba sammaletee ka gore: “Ee, tšwaa re šale re mo kwa.”

Ka morago ga gore Tueti a tšwele ka ntle, Teariki o ile a botšiša sehlopha seo gore: “Na le tseba leina la Modimo?”

Yo mongwe wa bona o ile a re: “Ee. Ke Jesu!” Yo mongwe a re: “Ke Modimo,” gomme yo mongwe yena a re: “Ke Morena.”

Teariki a re: “A re kweng gore Beibele e reng. E re ke buleng lengwalo la Jesaya 42:5, gomme ke le baleleng lona.” Ka morago ga gore Teariki a bale lengwalo leo, o ile a botšiša gore: “Lengwalo le le bolela ka mang?”

Kgarebe e nngwe e ile ya araba ka gore: “Le bolela ka Modimo.” Ke moka Teariki a re: “Ee, le bolela ka Modimo wa therešo. A re kweng seo Modimo wa therešo a re botšago sona go temana ya seswai. O re: ‘Ke nna Jehofa. Ke lona leina la ka; nka se nee yo mongwe letago la ka.’ Na le kwele gore leina la Modimo ke mang?”

Sehlopha seo se ile sa araba ka gore: “Ke Jehofa.”

 Ka ge ga bjale yo mongwe le yo mongwe a be a theeditše ka kelohloko, Teariki o ile a botšiša gore: “Mohola wa go diriša leina la Modimo la Jehofa ke ofe? A re baleng Ditiro 2:21 gore re hwetše karabo. E re: ‘Yo mongwe le yo mongwe yo a bitšago leina la Jehofa o tla phološwa.’ Temana ye e re mohola wa go diriša leina la Modimo ke ofe?”

Kgarebe e nngwe e ile ya araba ka gore: “Ke gore re tle re phološwe.”

Ka nako ye, tatago Teariki o ile a boela ka ntlong yeo. Ke moka o ile a botšiša sehlopha seo gore: “Mpotšeng, le re’ng bjale? Na bana ba rena ba kgona go bolela ka Modimo? Na re dira gabotse ge re sepela le bona?” Sehlopha seo ka moka se ile sa dumela gore bana ba Dihlatse ba tseba Beibele gomme sa re ba a swanelega gore ba tšame ba bolela ka Modimo. Ke moka  Tueti o ile a re: “Ge le ithutile seo Beibele e se bolelago, le lena le ka kgona go botša ba bangwe molaetša wa yona go fo swana le Teariki.”

Ditaba tše Dibotse di Fihla Motsaneng wo o Lego Thabeng

Ka November 2013, Jean-Pierre, yo a hlankelago ofising ya bofetoledi ya Port-Vila Sehlakahlakeng sa Vanuatu, o ile a ya sehlakahlakeng sa gabo ka sefofane gore a yo ba gona kopanong ya tikologo. Ge Jean-Pierre a fihla lefelwaneng la moo leo go kotamago difofane, sehlopha sa batho ba thabelago bao ba tšwago ka borwa bja sehlakahlaka ba ile ba tla go yena gomme ba kgopela dikgatišo tše di theilwego Beibeleng. O ile a sepediša mo e nyakilego go ba dimakasine ka moka tšeo a bego a di swere. Ke moka moruti yo mongwe le yena o ile a batamela Jean-Pierre gomme a kgopela dikgatišo. Moruti yo o ile a mo kgothaletša gore a tle motsaneng wa gabo, a re: “Re bolawa ke tlala ya go kwa Lentšu la Modimo. O swanetše go tla motsaneng wa gabo rena gomme o arabe dipotšišo tša rena ka moka.” Letšatšing la ka morago ga kopano, e sa le mesong kudu, Jean-Pierre o ile a thoma leeto le letelele a rotoga thaba. Mafelelong o ile a fihla godimo ga thaba yeo motsana woo o bego o le gona. Ka morago ga gore batho ba motsaneng woo ba mo amogele ka borutho, Jean-Pierre o ile a boledišana le bona ka Kingdom News No. 38 yeo e nago le sehlogo se se rego, “Na Ruri Bahu ba ka Phela Gape?” O ile a kgothaletša batheetši ka moka ba e ka bago ba 30 gore ba sepedišane le yena ka Dibeibeleng tša bona. Poledišano yeo e ile ya tšea diiri tše e ka bago tše šupago. Ruri batho ba motsaneng wo ba be ba bolawa ke tlala ya moya! Mokgalabje yo mongwe wa nywaga e 70 o ile a re: “Ga e sa le ke belegwa, ke thoma go kwa taba ya mabapi le bahu e hlaloswa gabotse ka tsela ye!”

Jean-Pierre o ile a robala motsaneng woo. O ile a robala ka phapošing e tee le moruti. Mesong ge a tsoga, o ile a hwetša moruti yoo a bala o mongwe wa dimakasine tša rena. Jean-Pierre o ile a mmotšiša gore o bala ka eng, gomme a bolela a thabile gore o bala ka Mmušo wa Modimo. Moruti yoo o ile a  dumela gore Mmušo wa Modimo o be o se ka dipelong tša Bafarisei, bao Jesu a ilego a ba pepentšha go Luka 17:21. O ile a phetha ka gore Mmušo wa Modimo o ka se be ka pelong ya motho, go etša ge kerekeng ya gagwe go rutwa seo. Ka ge Jean-Pierre a boetše Port-Vila, o tšwela pele a founela batho bao ba thabelago ba motsaneng woo gore a tšwetše pele kgahlego. Bana babo rena ba bararo ba phuthegong ya kgauswi le motsaneng wo ba ile ba ithaopela go yo swara Segopotšo gomme gwa tla batho ba 109!

Vanuatu