Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2015

 MODIRO WA BOBOLEDI LE WA GO RUTA LEFASENG KA BOPHARA

Amerika

Amerika
  • DINAGA 57

  • BAAGI 980 780 095

  • BAGOELEDI 4 034 693

  • DITHUTO TŠA BEIBELE 4 339 285

Ditšhiwana di ba Gona Dibokeng

Angela, yo a dulago Suriname, o ile a etela legaeng la ditšhiwana kgauswi le moo a dulago. Hlogo ya legae leo la ditšhiwana e be e le kgaetšedi yo a fodilego moyeng, ka gona ka go se dikadike o ile a dumelela Angela gore a boledišane le bana bao ka Beibele. Angela o ile a boledišana le bana ba 85 le go ba bontšha dibidio tše di lego Wepesaeteng ya jw.org. Ka morago ga moo, o ile a thoma go ithuta le ba bantši ba bona. Babulamadibogo ba babedi  ba ile ba mo tlatša, yo mongwe le yo mongwe a ithuta le sehlopha sa gagwe. Kgaetšedi yo yo a fodilego moyeng o ile a ba botša gore o rutile bana bao dikopelo go tšwa go e nngwe ya dipuku tša rena tša dikopelo e bile o be a ba balela dikanegelo tša Beibele bošego. O ile a ba botša gore o nyaka go tla dibokeng, eupša a ka se kgone go tlogela bana bao ba 85 ba le noši legaeng la ditšhiwana. Lega go le bjalo, go ile gwa rulaganywa gore ka moka ga bona ba tle Holong ya Mmušo. Ka ge legae leo la ditšhiwana le be le le kgauswi le Holo ya Mmušo, bana babo rena ba ile ba tla le bona holong. Ga bjale, kgaetšedi yo le bana ka moka ba 85 ba ba gona dibokeng ka mehla.

Gabriel o Ile a Thuša Rakgolo wa Gagwe

Paraguay: Gabriel o boledišana le rakgolo wa gagwe

Ge Gabriel wa nywaga e tshela a be a boela gae go tšwa kopanong kua Paraguay, o be a naganišiša ka bohlokwa bja go bolela ka molaetša wa Mmušo. Ka gona o ile a lemoga gore go na le motho yo a kgethegilego yo a bego a nyaka go ba le yena Paradeiseng—rakgolo wa gagwe. Eupša rakgolo wa gagwe o be a sa rate therešo gomme a ganetša mosadi le bana ba gagwe bao e bego e le Dihlatse.

Lona letšatšing leo, Gabriel o ile a kgopela batswadi ba gagwe gore ba mo dumelele go boledišana ka Inthanete le rakgolo le makgolo wa gagwe bao ba dulago Argentina. Gabriel o ile a hlalosetša rakgolo wa gagwe bohlokwa bja go ithuta Beibele, gomme a mmotšiša ka go lebanya gore: “Rakgolo, na ga o nyake go ithuta le nna?” Rakgolo wa gagwe o ile a dumela. Gabriel o ile a šišinya gore ba ithute poroutšha ya Theetša Modimo Gomme o Phele ka mo go sa Felego. Dikgweding tše sego kae tše di latetšego, ba ile ba ithuta poroutšha yeo mmogo. Ka ge bobedi bja bona ba be ba sa kgone go bala gabotse, ba be ba itlwaetša pele ba ka ithuta. Gabriel o be a lokišetša thuto e nngwe le e nngwe gomme ge ba ithuta a apara hempe le thai.

 Ka morago, rakgolo le makgolo wa Gabriel ba ile ba etela lapa labo ka dibeke tše sego kae. Nakong ya ketelo, rakgolo wa gagwe o ile a ya dibokeng tša phuthego le bona. Ge rakgolo wa Gabriel a boetše Argentina, o ile a tšwela pele a ithuta Beibele le ngwanabo rena wa lefelong leo gomme gona bjale ke mogoeledi yo a sa kolobetšwago. Ga bjale rakgolo le makgolo wa Gabriel ba rapela gotee ka mehla. Gabriel le yena o dirile tšwelopele. Le yena ke mogoeledi yo a sa kolobetšwago. Rakgolo wa gagwe o boletše gore o nyaka go bontšha gore o ineetše go Jehofa ka go kolobetšwa.

“Ga se wa Nketela ka Phošo”

Kua Brazil, ge go be go sepedišwa pampišana ya Na Ruri Bahu ba ka Phela Gape? Jennifer o ile a kokota lebating la mosadi yo a bego a kitimela tirelong ya poloko ya mogwera wa gagwe yo a rategago. Le ge Jennifer a be a sa tsebe gore mosadi yoo o kitimetše kae, o ile a mmotša gore o nyaka go mo nea pampišana yeo e bolelago ka kholofelo yeo re nago le yona ya tsogo ya bahu. Mosadi yoo o ile a tlabja ke sehlogo  seo, eupša a amogela pampišana yeo. Ge Jennifer a be a mmotšiša gore a ka se thabele go tšea dipampišana tše dingwe gore a yo di nea lapa leo le hwetšwego, mosadi yoo o ile a bona seo e le kgopolo e botse gomme a kgopela dipampišana tše dingwe tše senyane.

Ka morago Jennifer o ile a boela go mosadi yoo, yo a itšego go yena: “Letšatšing lela re thomilego go kopana ka lona, ke ile ka lemoga ka morago gore ga se wa nketela ka phošo. Modimo o be a go romile gore o tliše molaetša o homotšago woo ke bego ke tloga ke o hloka.” Mosadi yoo o ile a sepediša dipampišana tšeo ka moka. Setho sa lapa leo le bego le hwetšwe, seo se bego se nea thero ya poloko, se ile sa balela pampišana yeo ka moka godimo. Batho ka moka ba ile ba e leboga, gomme ba leboga mosadi yoo bakeng sa molaetša o homotšago. Mosadi yoo o ile a dumela go swarelwa thuto ya Beibele.

Go Nea Bohlatse Dithekising

Ditho tše tharo tša lapa la Bethele ya kua Haiti di be di sepela ka senamelwa sa batho bohle e lego dithekisi tša mebalabala tše di bitšwago tap-tap. Leetong leo la diiri tše pedi le seripa, di ile tša boledišana le banamedi ba bangwe ka kholofelo ya Mmušo, tša sepediša dimakasine tše 50 le dipampišana tše 30. Yo mongwe wa ditho tšeo tša lapa la Bethele, e lego Gurvitch, o ile a balela yo mongwe wa banamedi karolwana e itšego ka makasineng wa Phafoga! Lesogana leo le bitšwago Pépé le be le theeditše gomme gateetee la tsena poledišanong yeo. Le ile la kgopela thuto ya Beibele, gomme ge di phuthologa, gwa hwetšwa gore le dula tšhemong ya phuthego yeo Gurvitch a bego a le go yona. Ga e sa le go tloga poledišanong yeo ba bilego le yona ka January 2014, Pépé o ba gona mo e ka bago dibokeng le dikopanong ka moka. O boledišana le ba bangwe ka tumelo ya gagwe e mpsha gomme o holofela gore kgauswinyane e tla ba mogoeledi yo a sa kolobetšwago.