Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2014

 SIERRA LEONE LE GUINEA

Selo se Sekaone go Phala Ditaamane

Tamba Josiah

Selo se Sekaone go Phala Ditaamane
  • O BELEGWE KA 1948

  • O KOLOBEDITŠWE KA 1972

  • PEGO YA BOPHELO BJA GAGWE O be a šoma moepong wa ditaamane pele a hwetša therešo. Ga bjale ke setho sa Komiti ya Lekala la Sierra Leone.

KA 1970, ke ile ka šoma moepong wa khamphani ya Brithania kua Tongo Fields, e lego lefelo leo le bego le humile ka ditaamane ka leboa la Kenema. Ke be ke fela ke tsoma ditaamane ge ke be ke sa šome. Ge ke di hwetša, ke be ke apara gabotse ka leba Kenema go yo rekiša maswika a a bohlokwa gomme ka ithabiša.

Ka 1972, ke ile ka gahlana le Dihlatse tša Jehofa gomme ka thoma go ithuta Beibele. Ka morago ga dikgwedi tše hlano, ke ile ka kolobetšwa. Ka ge ke be ke se sa na matšatši a go ikhutša mošomong, ke ile ka kgopela mošomigotee le nna gore a ntsenele mošomong e le gore ke kgone go ya kopanong ya selete gore ke kolobetšwe. O ile a re o tla dumela feela ge nka mo nea mogolo wa ka wa beke. Go kolobetšwa go be go le bohlokwa go nna go feta tšhelete, ka gona ke ile ka se dikadike go amogela seo. Ge ke boa kopanong, o ile a mpotša gore ke se ke ka mo nea mogolo ka gobane go hlankela Modimo ke selo se sebotse. Ka morago ga dikgwedi tše tshelelago, ke ile ka tlogela mošomo  woo o bego o lefa gabotse go yo ipolokela matlotlo legodimong ka go ba mmulamadibogo yo a kgethegilego.—Mat. 6:19, 20.

Ke ile ka hlankela ke le mmulamadibogo yo a kgethegilego le molebeledi wa tikologo dikarolong tše fapafapanego ka nywaga e 18. Yona nakong yeo, ke ile ka nyala Christiana, molekane wa ka yo a botegago le yo a nthekgago, gomme ra šegofatšwa ka morwedi wa rena Lynette.

Ke be ke ipotša ke re ka letšatši le lengwe ke tla hwetša ditaamane tša kgonthe, eupša ke hweditše selo seo se di phalago le go feta—mahumo a moya

Nakong ya ntwa ya selegae mo Sierra Leone, nna le Christiana re ile ra bula madibogo kua Bo, yeo e lego lefelong leo go bego go na le moepo o mogolo wa ditaamane. Gona moo re ile ra hwetša moepo wa ditaamane tša moya—barutiwa ba kgonthe ba Kriste. Ka nywaga e mene, phuthego ya rena e ile ya gola ka batho ba fetago 60 lekgolong. Ga bjale Bo go na le diphuthego tše tharo tšeo di golago ka lebelo.

Ka 2002, ke ile ka laletšwa go ba setho sa Komiti ya Lekala la Sierra Leone. Nna le Christiana re dula kgauswi le Bethele. Ke šoma Bethele letšatši le lengwe le le lengwe gomme ke robala gae, mola Christiana yena a hlankela e le mmulamadibogo yo a kgethegilego. Lynette o šoma Bethele e le mofetoledi wa Sekrio.

Ke be ke ipotša ke re ka letšatši le lengwe ke tla hwetša ditaamane tša kgonthe, eupša ke hweditše selo seo se di phalago le go feta—mahumo a moya. E bile ke epolotše le ditaamane tša moya tše 18, goba barutiwa ba kgonthe ba Kriste. Ruri, Jehofa o ntšhegofaditše go feta tekano.