Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2014

 SIERRA LEONE LE GUINEA

1991-2001 ‘Sebešong sa Tlaišo’—Jes. 48:10 (Karolo 2)

1991-2001 ‘Sebešong sa Tlaišo’—Jes. 48:10 (Karolo 2)

Bethele e a Hlaselwa!

Ka February 1998, mašole a mmušo le a Economic Community of West African States Monitoring Group (ECOMOG) a ile a tšwa lesolo la go raka mašole a marabele kua Freetown. Ka maswabi, ngwanabo rena yo mongwe o ile a bolawa ke ditlhase tša dipomo ntweng yeo ya mahlo a mahubedu.

Bagoeledi bao e ka bago ba 150 ba ile ba tšhabela magaeng a baromiwa kua Kissy le Cockerill. Laddie Sandy, yo mongwe wa bahlapetši ba babedi ba Bethele, o anega gore: “Bošegong bjo bongwe, ge nna le Philip Turay re be re le mošomong, marabele a mabedi ao a itlhamilego a RUF a ile a tla Bethele gomme a re gapeletša gore re bule mejako e mebedi ya galase yeo e lego bogorogelong bja baeng. Ge nna le Philip re tšhaba, a ile a thunya leboelela mo go tsenywago senotlelo sa mojako. Se se makatšago ke gore ga se wa ka wa bulega gomme ga se a ka a nagana go thunya galase ya mojako. A ile a tloga a befetšwe.

“Matšatši a mabedi ka morago, marabele ao a ile a boa le a mangwe a ka bago a 20 a swere dibetša. Ka pela re ile ra tsebiša lapa la Bethele ke moka bohle ra tšhabela lefelong la ka tlase la botšhabelo gona moo Bethele. Nna le ba bangwe ba tshelelago re ile ra utama ka morago ga ditanka tše pedi tše dikgolo re thothomela re tšhogile. Marabele ao a ile a thuntšha mo go tsenywago senotlelo sa mojako leboelela gomme a šwahlela ka moagong. Yo mongwe wa marabele o ile a goeletša a re: ‘Tsomang Dihlatsenyana tšeo tša Jehofa gomme le di ripe megolo ye.’ Re ile ra khukhuna ka setu ge a be a dutše a senya dithoto ka diiri tše šupago. Ge a kgotsofetše go senya moago, a ile a tšea seo a se ratago a sepela.

“Re ile ra tšea dilo tša rena ra tšhabela legaeng la baromiwa  kua Cockerill—Bethele ya kgale—leo le sego kgole le Bethele. Marabele a mangwe a ile a re amoga dilo tša rena ge re eya moo. Re ile ra fihla legaeng la baromiwa re tšhogile eupša re leboga gore re sa phela. Ka morago ga go khutša moo ka matšatši a sego kae, re ile ra boela Bethele go yo lokiša tshenyo yeo.”

Ka morago ga dikgwedi tše pedi, ge mašole a ECOMOG a be a laola motse, baromiwa ba ile ba thoma go boa ba etšwa Guinea. Lega go le bjalo, ba be ba sa tsebe gore ba be ba tla dula moo ka nako e nyenyane.

Lesolo la go Bolaya

Ka morago ga dikgwedi tše seswai, ka December 1998, batho ba makgolo bao ba bego ba tlile kopanong kua Freetown National Stadium ba be ba ipshina ka Kopano ya Selete ya “Tsela ya Modimo ya Bophelo.” Ge ba re phaphara, ba ile ba kwa mothuthupo ke moka ba bona go tupa muši o nago le mollo dithabeng. Mašole a marabele a be a boile!

Matšatšing a latelago, bophelo kua Freetown bo ile bja thatafa. Komiti ya Lekala e ile ya rulaganya sefofane se senyenyane se se yago Conakry go tšhabiša baromiwa ba 12, ditho tša Bethele tše 8 tše di tšwago dinageng tše dingwe le baithaopi ba go aga ba 5. Ge go fetile matšatši a mararo, ka January 6, 1999, marabele ao a ile a thoma lesolo la go bolaya batho ka tsela e sehlogo leo le bego le bitšwa Lesolo la go Bolaya. A ile a senya motse wa Freetown o šoro, ba bolaya badudi ba ka bago ba 6 000. Marabele a ile a ripa batho matsogo le maoto okare ga se selo, a thopa bana ba makgolo gomme ba senya meago e dikete.

Ngwanabo rena yo mongwe yo a ratwago kudu, Edward Toby, o ile a bolawa ga sehlogo. Bagoeledi bao ba fetago ba 200 bao ba bego ba tšhogile ba ile ba dula Bethele goba legaeng la baromiwa kua Cockerill. Ba bangwe ba ile ba iphihla malapeng a bona. Dihlatse tšeo di bego di dula legaeng la baromiwa kua Kissy, yeo e lego ka bohlabela bja toropo, di be  di tloga di hloka dihlare. Eupša go tshelela ka mošola wa toropo go be go le kotsi kudu. Ba be ba tla elwa ke mang? Laddie Sandy le Philip Turay, e lego banna bao ba sa boifego bao ba hlapetšago kua Bethele, gateetee ba ile ba ithaopa.

Philip o gopola gore: “Toropo e be e hlakahlakane. Mašole a marabele a be a hlapeditše mafelo a mantši, a swara batho gampe. Gantši a be a sa nyake go bona motho a tšea leeto go tloga thapama go fihla mesong, a be a re palediša go tšea maeto. Ka morago ga matšatši a mabedi re thomile leeto la rena, re ile ra fihla legaeng la baromiwa kua Kissy, ra makatšwa ke ge re le hwetša le sentšwe e bile le tšhumilwe.

“Ge re dikologa legae leo, re ile ra hwetša ngwanabo rena Andrew Caulker, yo a bego a gobaditšwe o šoro hlogong. Marabele a ile a mmofa gomme a mo rema gantši ka selepe. Sa go makatša ke gore ga se a hwa gomme o ile a kgona go  tšhaba. Re ile ra mo kitimišetša sepetlele moo a ilego a fola ka go nanya. Ka morago o ile a hlankela e le mmulamadibogo wa ka mehla.”

(Go Tloga ka go le Letshadi go ya ka go le Letona) Laddie Sandy, Andrew Caulker le Philip Turay

Dihlatse tše dingwe di ile tša phologa lehu le go gobatšwa ka baka la boemagare bja tšona bja Bokriste. Ngwanabo rena yo mongwe o anega gore: “Marabele a ile a re gapeletša go rwala ditukwana tše ditšhweu le go bina mebileng go thekga mediro ya ona. A ile a re botša gore: ‘Ge le ka gana, re tlo le ripa maoto goba matsogo goba ra le bolaya.’ Nna le mosadi wa ka re ile ra emela ka thoko re tšhogile, ke moka ra rapela Jehofa ka setu gore a re thuše. Ka ge moagišani wa rena wa mofsa yo a bego a thekga marabele a be a bona gore re tlalelong, o ile a botša molaodi wa marabele gore: ‘Ke wa gabo rena yo. Ga a thekge dipolotiki, re tla mminela.’ Ka morago ga gore molaodi wa marabele a kgotsofale o ile a re tlogela gomme ra boela ka ntlong.”

Ge boemo bjoo bjo bo tšhošago bo fokotšega toropong yeo, ka šedi bana babo rena ba ile ba thoma go ya dibokeng le tirelong ya tšhemo. Bagoeledi ba be ba apara dipetšhe tša kopano gore ba tsebane ge ba le moo go phuruphutšwago. Bana babo rena bao ba emego mafelong ao go tletšego batho a go phuruphutša ba ile ba ba le bokgoni bja go thoma dipoledišano tša Beibele.

Ka ge motseng go be nyakega dilo tše itšego, lekala la Brithania le ile la thuša ka go romela mapokisi a 200 a nago le dilo tša tlhakodišo ka sefofane. Billie Cowan le Alan Jones ba ile ba tloga ka sefofane Conakry go ya Freetown go iša mapokisi ao gomme ba kgona go feta mafelong a go phuruphutša. Mapokisi ao a ile a fihla Bethele pele ga ge go tšhaišwa mantšiboa. James Koroma o be a fela a eya Conakry go iša dilo tše itšego, a boa le dikgatišo le dilo tše dingwe tše bohlokwa. Tše dingwe tša dijo tše tša moya di ile tša romelwa bagoeledi ba lego lekatana kua Bo le Kenema.

Ge dilo tša tlhakodišo di goroga Freetown

Ka August 9, 1999, baromiwa ba lego Conakry ba ile ba thoma go boela Freetown. Ngwageng o latelago, mašole ao a  romelwago dinageng dišele a Brithania a ile a raka marabele kua Freetown. Ka nako e teletšana go ile gwa fela go tsoga dintwa, eupša ka January 2002, go ile gwa tsebišwa gore ntwa e fedile. Ka baka la ntwa e tšerego nywaga e 11, batho ba 50 000 ba ile ba bolawa, ba 20 000 ba gobatšwa, dintlo tše 300 000 tša senywa gomme batho ba dimilione tše 1,2 ba hudušwa magaeng a bona.

Mokgatlo wa Jehofa o fetile bjang maemong a? Ka kgonthe Jehofa o be a o šireleditše le go o šegofatša. Nakong ya ntwa, mo e ka bago batho ba 700 ba ile ba kolobetšwa. Dihlatse tše makgolo di ile tša tšhaba, eupša bagoeledi kua Sierra Leone ba be ba oketšegile ka 50 lekgolong. Bagoeledi ba Guinea ba be ba oketšegile ka 300 lekgolong! Sa bohlokwa ke gore batho ba Modimo ba be ba dutše ba botega. Ge ba be ba le ‘sebešong sa tlaišo,’ ba ile ba bontšha botee le lerato la Bokriste gomme “ba tšwela pele ba sa kgaotše ba ruta e bile ba tsebatša ditaba tše dibotse.”—Jes. 48:10; Dit. 5:42.