Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2014

 SIERRA LEONE LE GUINEA

Re Phonyokgile Mašole a Marabele

Andrew Baun

Re Phonyokgile Mašole a Marabele
  • O BELEGWE KA 1961

  • O KOLOBEDITŠWE KA 1988

  • PEGO YA BOPHELO BJA GAGWE E be e le mmulamadibogo kua Pendembu, Profenseng ya ka Bohlabela bja Sierra Leone, ge go be go thoma ntwa ka 1991.

MANTŠIBOENG a mangwe marabele a ile a hlasela toropo ya rena, a thuntšhetša godimo mo e ka bago diiri tše pedi. Gare ga ona go be go na le bafsa bao ba bego ba thatafalelwa ke go kuka dithunya tša bona. Ba be ba tletše ditšhila, meriri ya bona e hlafile e bile ba bonagala ba tagilwe ke dihlaretagi.

Letšatšing le le latelago ba ile ba thoma go bolaya batho. Batho ba be ba gobatšwa o šoro goba ba bolawa. Basadi ba be ba katwa. E be e le tlhakatlhakano feela. Ngwanabo rena Amara Babawo le lapa la gagwe gotee le batho ba bangwe ba bane bao ba thabelago ba ile ba tšhabela ntlong ya ka. Re be re tšhogile kudu.

Go se go ye kae molaodi wa marabele o ile a tšwelela gomme a re laela gore letšatšing le latelago re tle tlwaetšong ya bošole. Re be re ikemišeditše go kgomarela boemagare bja rena, le ge go gana moo go be go ka dira gore re bolawe. Re ile ra rapela bošego ka moka. Ge re tsoga ka masa, re ile ra ahlaahla temana ya letšatši gomme ra letela marabele gore a boe gape. Ga se a ka a tla.

“Ka gore le bala temana ya letšatši, gona go ra gore le Dihlatse tša Jehofa”

Ka moragonyana molaodi wa marabele le mašole a gagwe a  mane ba ile ba thopa ntlo ya ka, eupša ba re re ka dula go yona. Ka gona re ile ra tšwela pele re swarela diboka ka ntlong yeo le go ahlaahla temana ya letšatši. Mašole a mangwe a ile a re: “Ka gore le bala temana ya letšatši, gona go ra gore le Dihlatse tša Jehofa.” Ba be ba sa kgahlegele Beibele eupša ba be ba re hlompha.

Ka letšatši le lengwe molaodi yo mogolo wa mašole o ile a tla go tlo hlola mašole ao a bego a thopile ntlo ya ka. O ile a dumediša Ngwanabo rena Babawo gomme a mo swara ka letsogo. Ge a be a bolela le mašole a gagwe, molaodi yoo o ile a goeletša a re: “Monna yo ke kgoši ya ka le kgoši ya lena. Ge feela le ka mo kgwatha goba la kgwatha bao a nago le bona, ga gabo lena ke thabeng. Le a nkwa?” Ba ile ba araba ka gore: “Ee mong wa ka!” Ke moka molaodi yoo o ile a re nea lengwalo leo le laelago ditho tša Revolutionary United Front gore di se re tlaiše ka ge re be re le badudi bao ba sa tshwenyanego le batho.

Dikgwedi tše sego kae ka morago, marabele a ile a thoma go lwa seng sa ona, ka gona re ile ra tšhabela Liberia yeo e bego e le kgauswi. Ge re le moo re ile ra tšhošetšwa ke sehlopha se sengwe sa marabele. Re ile ra a botša gore: “Re Dihlatse tša Jehofa.” Ke moka lešole le lengwe le ile la re botšiša gore: “Gona Johane 3:16 e re’ng?” Ge re le botša gore e re’ng, le ile la re tlogela ra sepela.

Ka morago ga moo re ile ra kopana le molaodi yo mongwe wa marabele yoo a ilego a laela nna le Ngwanabo rena Babawo gore re mo felegetše. Re be re nagana gore re tlo hwa. Ke moka o ile a re botša gore o kile a ithuta le Dihlatse pele ga ntwa. O ile a re fa tšhelete gomme a tšea lengwalo leo re bego re le swere a le iša go bana babo rena bao ba lego phuthegong ya kgauswi. Nakwana ka morago ga moo, bana babo rena ba babedi ba ile ba tla le dilo tša go re thuša gomme ba re iša lefelong le le bolokegilego.