Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2014

 SIERRA LEONE LE GUINEA

Mošemanyana wa Lešole o Fetoga Mmulamadibogo wa ka Mehla

Mošemanyana wa Lešole o Fetoga Mmulamadibogo wa ka Mehla

KE BE ke na le nywaga e 16 ge mašole a marabele a be a nkgapeletša go tsenela bošole. A ile a nnea dihlaretagi le bjala gomme gantši di be di dira gore ke lwe eka ke segaswi. Ke tsenetše dintwa tše dintši gomme ke dirile dilo tše dintši tše šoro. Ke itsholela dilo tšeo.

Ka letšatši le lengwe mokgalabje yo mongwe wa Hlatse o ile a dira boboledi dikampeng tša rena tša mašole. Batho ba bantši ba be ba tšhaba marabele e bile ba re hloile, eupša yena o ile a katanela go re thuša moyeng. Ge a be a ntaletša dibokeng, ke ile ka dumela go tla. Ga ke gopole le setee sa dilo tšeo di boletšwego dibokeng, seo ke se gopolago ke tsela e borutho yeo ke amogetšwego ka yona.

Ge ntwa e be e gakala, ke ile ka se sa kopana le Dihlatse. Ka nako yeo ke be ke gobetše o šoro gomme ka romelwa lefelong la go okela marabele. Pele ntwa e fela, ke ile ka tšhabela lefelong leo le bego le laolwa ke mmušo gomme ka tsenela lenaneo la go kgaotša dintwa setšhabeng ka go amoga mašole dibetša le go a lokolla gore a ye gae.

Ke be ke tloga ke hloka thušo ya moya. Ke be ke tsena kereke ya Pentekoste, eupša ditho tša kereke yeo di be di mpitša Sathane. Ke moka ke ile ka thoma go nyakana le Dihlatse tša Jehofa. Ge ke se na go di hwetša, ke ile ka thoma go ithuta le go ya dibokeng. Ka morago ga go bolela dibe tša ka, bana babo rena ba ile ba mpalela mantšu a homotšago a Jesu a rego: “Batho ba ba phetšego gabotse ga ba nyake ngaka, eupša ba babjago ba a e nyaka. . . . Ke tletše go bitša badiradibe, e sego baloki.”—Mat. 9:12, 13.

Ruri mantšu ao a ile a nkgoma pelo! Ke ile ka nea ngwanabo rena yo ke bego ke ithuta le yena Beibele thipa ya ka, ka re: “Ke be ke dula ke swere thipa ye go itšhireletša ge batho ba be ba  ka nyaka go itefeletša. Eupša ka ge ga bjale ke tseba gore Jehofa le Jesu ba a nthata, ga ke sa e nyaka.”

Bana babo rena ba ile ba nthuta go bala le go ngwala. Mafelelong ke ile ka kolobetšwa ke moka ka ba mmulamadibogo wa ka mehla. Lehono ge ke botša marabele a ditaba tše dibotse, a re a a ntlhompha ka ge ke fetošitše bophelo bja ka. E bile ke ile ka ithuta le mothuši wa molaodi wa sehlopha sa ka sa marabele.

Ge ke be ke le lešole, ke ile ka ba le barwa ba bararo. Ka morago ga go ithuta therešo, ke be ke nyaka go ba ruta yona. Se se kgahlišago ke gore ba babedi ba bona ba ile ba amogela therešo! Yo mongwe wa barwa ba ka ke mogoeledi yo a sa kolobetšwago mola morwa wa ka wa mathomo e le mmulamadibogo wa go thuša.