Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2014

 SIERRA LEONE LE GUINEA

1915-1947 Mehleng ya Pele (Karolo 1)

1915-1947 Mehleng ya Pele (Karolo 1)

 Seetša sa Therešo se a Hlaba

Ditaba tše dibotse di fihlile Sierra Leone ka 1915 ge badudi ba moo ba be ba etšwa Engelane gomme ba tlile le dikgatišo tšeo di theilwego Beibeleng. Mo e ka bago ka July wona ngwageng woo, mohlanka wa Jehofa wa mathomo yo a kolobeditšwego o ile a fihla Freetown. Leina la gagwe e be e le Alfred Joseph. O be a na le nywaga e 31 gomme a etšwa Guyana, Amerika Borwa. O be a kolobeditšwe pejana wona ngwageng woo kua Barbados, West Indies, gomme a hweditše mošomo wa go otlela diterene kua Freetown. Alfred o ile a dula ntlong ya ditereneng kua Toropong ya Cline, yeo e lego dikhilomithara tše e ka bago tše 3,2 go tloga Sehlareng sa Leokodi sa Freetown. Gateetee o ile a thoma go boledišana le bašomigotee le yena ka molaetša wa Beibele.

Ngwageng o latetšego, Alfred o ile a tlatšwa ke yo mongwe wa bao a bego a šoma le bona kua Barbados, e lego Leonard Blackman yoo mmagwe Elvira Hewitt a ilego a thuša Alfred go amogela therešo. Leonard o ile a ba moagišani wa Alfred gomme ka mehla ba be ba kopana gore ba ahlaahle Beibele. Le gona ba be ba nea bagwera ba bona le batho ba bangwe bao ba thabelago dikgatišo tše di theilwego Beibeleng.

Alfred le Leonard ba ile ba lemoga gore mašemo a Freetown a be a “šweufaletše go bunwa.” (Joh. 4:35) Ka 1923, Alfred o ile a ngwalela ntlongkgolo ya lefase kua New York, a re: “Batho ba bantši mo ba thabela molaetša wa Beibele. Na le ka romela motho yo a itšego gore a tle a ba rute Beibele le go thuša go thoma modiro wa boboledi mo Sierra Leone?” O ile a hwetša karabo e rego: “Go tla romelwa motho!”

William “Bible” Brown le mosadi wa gagwe Antonia

Alfred o re: “Ka morago ga dikgwedi tše mmalwa, bošegong bjo bongwe bja Mokibelo, ke ile ka hwetša mogala wo ke bego ke sa o letela.”

 Mothotsoko o ile a mpotšiša gore: “‘Na ke wena o ngwaletšego Mokgatlo wa Watch Tower o kgopela bagoeledi?’”

Ke ile ka araba ka gore: “‘Ee, ke nna.’”

Ke moka motho yoo a re: “‘Ba rometše nna.’

“Motho yoo e be e le William R. Brown. Yena le mosadi wa gagwe Antonia gotee le morwedi wa bona yo monyenyane ba be ba fihlile letšatšing leo gomme ba dula Hoteleng ya Gainford.

“Mesong e latelago, nna le Leonard re be re swere thuto ya rena ya Beibele ya beke le beke ge monna wa senatla a tšwelela mojako. E be e le William R. Brown. O be a fišegela therešo kudu moo a bego a nyaka go nea polelo ya phatlalatša letšatšing le le latelago. Kapejana re ile ra hira holo e kgolo go di feta Freetown, e lego Holo ya Wilberforce Memorial gomme ra rulaganya polelo ya mathomo ya dipolelo tše nne gore e tlo newa bošegong bja Labone le le latelago.

“Sehlopha sa rena se senyenyane se ile sa swarega ka go tsebiša dipolelo tšeo dikuranteng, ka dipampišana le ka go botša batho. Re be re ipotšiša gore batho ba moo ba be ba tlo arabela bjang, eupša re be re sa swanela go tshwenyega. Holo e ile  ya tlala ka batho ba e ka bago ba 500 go akaretša le baruti ba bantši ba Freetown. Re be re thabile kudu!”

Polelong ya gagwe yeo e tšerego iri, Ngwanabo rena Brown o ile a tsopola Mangwalo kudu gomme a diriša diselaete go bontšha ditemana tša Beibele lebotong. Ge a dutše a bolela, o be a boeletša gantšintši gore: “Ga se Brown a bolelago bjalo eupša ke Beibele.” Batheetši ba be ba maketše, ka gona ba be ba betha diatla ka morago ga ntlha e nngwe le e nngwe. Ba be ba sa kgahlwa feela ke tsela e matla yeo Ngwanabo rena Brown a bego a bolela ka yona, eupša ba be ba kgahlilwe le ke tsela yeo a bego a diriša Mangwalo go hlatsela seo a se bolelago. Mofsa yo mongwe yo a bego a le gare ga batheetši yo a bego a ithutela go tlo ba moruti o ile a re: “Morena Brown o tseba Beibele!”

1924

Dipolelo tša Ngwanabo rena Brown di ile tša šišinya motse, gomme batho ba kgeregela go tlo di theetša. Sontaga se se latelago, holo e be e tletše ka batho bao ba bego ba tlo kwa polelo yeo e rego: “Go ya Heleng le go Boa—Ke Bomang ba Lego Moo?” Ditherešo tše matla tšeo Ngwanabo rena Brown a ilego a di bolela bošegong bjoo di ile tša tutueletša le batho bao ba tumilego ba ba tsenago kereke gore ba se sa ya dikerekeng tša bona.

Polelo ya bone le ya mafelelo dipolelong tšeo yeo e bego e na le sehlogo se se rego, “Ba Dimilione ba Phelago Gona Bjale ba ka se ke ba hwa le ka Mohla,” e ile ya gogela mašabašaba a batho moo modudi yo mongwe wa Freetown ka morago a ilego a gopola ka gore: “Dikereke di ile tša swanelwa ke go se be le ditirelo tša thapama letšatšing leo, ka gobane ditho tša tšona ka moka di be di ile go theetša polelo ya Ngwanabo rena Brown.”

Ka baka la ge Ngwanabo rena Brown a be a diriša Beibele ka dinako tšohle, a bontšha gore ke yona re kwago ka yona, batho ba ile ba thoma go mmitša “Bible” Brown. Leina leo le ile la mo kgomarela gomme la tsebja Afrika Bodikela ka moka. William R. Brown o ile a thabela go diriša leina leo go fihlela a fetša bophelo bja gagwe bja mo lefaseng.