Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2014

 SIERRA LEONE LE GUINEA

Jehofa o Nthušitše

Jay Campbell

Jehofa o Nthušitše
  • O BELEGWE KA 1966

  • O KOLOBEDITŠWE KA 1986

  • PEGO YA BOPHELO BJA GAGWE Motho yo a swerwego ke bolwetši bja polio yo a ilego a ba mmulamadibogo wa ka mehla.

KE GODILE ke golofetše go tloga lethekeng go fihla maotong, gomme ke be ke dula le mma gotee le malapa a mangwe a mmalwa ao a bego a diila lefelong le lengwe kua Freetown. Ka ge ke be ke lewa ke dihlong e bile ke boifa gore batho bao ba sa ntsebego ba tla ntšea bjang, ke ile ka beta pelo ya go tšwela ka ntle ga lefelo leo ka lekga la pele ka morago ga nywaga e 18.

Ge ke be ke na le nywaga e 18, Hlatse e nngwe ya moromiwa e lego Pauline Landis, o ile a etela moo ke bego ke dula gona gomme a ithaopela go nthuta Beibele. Ge ke be ke mmotša gore ga ke kgone go bala le go ngwala, Pauline o ile a re o tla nthuta. Ka gona ke ile ka dumela.

Seo ke bego ke ithuta sona ka Beibeleng se ile sa nthabiša. Ka letšatši le lengwe, ke ile ka botšiša Pauline ge e ba nka tla sebokeng sa phuthego seo se bego se swarelwa ntlong ya kgauswi le moo ke dulago. Ke ile ka re: “Ke tla sepela ka dikota tša ka.”

Ge Pauline a be a tlo ntšea, mma le baagišani ba ka ba ile ba ntebelela ba tshwenyegile. Ke ile ka tšea dikota tša ka ka ikokotlela ka tšona gomme ka tšama ke ikgoga. Ge ke etšwa ka jarateng,  baagišani ba ka ba ile ba goeletša Pauline ba re: “O a mo gapeletša. O kile a leka go sepela eupša a palelwa.”

Pauline o ile a mpotšiša ka boleta a re: “Jay, na o nyaka go sepela le nna?”

Ke ile ka araba ka gore: “Ee! Ye ke phetho ya ka.”

Baagišani ba ka ba ile ba ntebelela ka setu ge ke batamela kgorong. Ge ke tšwile, ba ile ba betha diatla ba thabile!

Ruri ke ile ka thabela seboka seo! Ka morago, ke ile ka ikemišetša go fihla Holong ya Mmušo. Seo se be se e ra gore ke tla swanelwa ke go ikgoga go fihla mafelelong a seterata, ke namele thekisi ke moka ke kgopele bana babo rena ba tle ba nkuke re rotoge mmoto wo o namelelago. Gantši ke be ke fihla holong ke kolobile e bile ke na le maraga, ka gona ke be ke swanelwa ke go apara diaparo tše dingwe ge ke fihla holong. Ka morago, kgaetšedi yo mongwe wa kua Switzerland ka botho o ile a nthomela setulo sa digole seo se ilego sa dira gore ke kgone go sepela ka seriti.

Go bala diphihlelo tša Dihlatse tše dingwe tše di golofetšego go ile gwa ntutueletša go hlankela Jehofa ka botlalo. Ka 1988, ke ile ka ba mmulamadibogo wa ka mehla. Ke ile ka rapela Jehofa gore a nthuše go fihlelela pakane ya ka ya gore ke thuše motho yo a itšego ka lapeng lešo le motho yo a itšego tšhemong go ba mohlanka wa Jehofa. Dithapelo tša ka di ile tša arabja ge ke be ke kgona go thuša bana ba babedi ba mogolwake le mosadi yo a itšego yoo ke gahlanego le yena ge ke be ke nea bohlatse setarateng go ithuta therešo.

Ga bjale matsogo a ka ga a sa na matla, ka gona ke ithekgile ka batho ba bangwe gore ba nkiše mo ke nyakago go ya. Le gona ke phela ke na le dihlabi. Eupša ke lemogile gore sehlare se sengwe sa dihlabi tše ke go ruta ba bangwe ka Jehofa. Lethabo leo ke le hwetšago tirelong ya Jehofa le dira gore dihlabi tša ka di be kaone e bile seo se a nkgothatša ka gobane Jehofa o nthušitše, gomme ga bjale bophelo bja ka bo na le morero.