Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2014

 SIERRA LEONE LE GUINEA

2002-2013 Ditiragalo tša Morago Bjale (Karolo 1)

2002-2013 Ditiragalo tša Morago Bjale (Karolo 1)

 “Jehofa, ke a Leboga!”

Ge maemo a kaonefala, bana babo rena le dikgaetšedi ba ile ba boela magaeng a bona ao a senyegilego. Diphuthego di ile tša thongwa gape mafelong ao go kilego gwa ba le ntwa, kudukudu lefelong leo le sentšwego ke ntwa la ka bohlabela la Sierra Leone. Babulamadibogo ba kgethegilego ba tšwago lefelong le lengwe ba begile gore: “Go be go na le batho ba 16 dibokeng tša mathomo, ya ba ba 36 dibokeng tša bobedi, ba 56 dibokeng tša boraro gomme ba 77 ba ba gona Segopotšong! E be e le lethabo feela!” Go thomilwe diphuthego tše senyane gomme gona bjale go na le tše 24. Go goroga ga baromiwa ba lesome bao ba tšwago Gilead go ile gwa oketša mafolofolo a rena bodireding. Ka 2004, batho ba 7 594 ba ile ba ba gona Segopotšong, e lego palo e fetago ya bagoeledi ga hlano! Guinea le yona e gotše ka tsela e swanago.

Sehlopha se Bušago se ile sa dira gore re hwetše tšhelete gore re thuše bafaladi bao ba boago gae. (Jak. 2:15, 16) Dihlopha tša baithaopi ba tša tlhakodišo di ile tša aga le go tsošološa Diholo tša Mmušo tše 12 le Holo ya Kopano ya Koindu. Le gona di ile tša agela malapa ao a senyegetšwego ke magae dintlo tše 42 tše itekanetšego tšeo di dirilwego ka ditena. Kgaetšedi yo mongwe wa mohlologadi yo a nago le nywaga e 70, o ile a ntšha megokgo ya lethabo ge a be a eme pele ga ntlo ya gagwe e mpsha ya go rulelwa ka masenke, a re: “Jehofa, ke a leboga! Jehofa, ke a leboga! Bana bešo, ke a leboga!”

Le gona ofisi ya lekala e ile ya thoma go aga Diholo tša Mmušo ka meneelo yeo e tšwago lenaneong la go thuša  dinaga tšeo di diilago. Saidu Juanah, e lego mogolo yoo gape e lego mmulamadibogo Phuthegong ya Bo West, o re: “Kgaetšedi yo mongwe o ile a mpotša gore ‘ge e ba nka kwa ba re ba tlo re agela Holo ya Mmušo, ke tla opa magoswi ka matsogo le maoto!’ Ge ke be ke tsebiša gore re tlo agelwa holo e mpsha, kgaetšedi yoo o ile a emelela setulong a thabile, a bina e bile a opa magoswi!”

Ka 2010, Phuthego ya Waterloo e ile ya neela Holo e mpsha ya Mmušo yeo e ka godišwago gomme ya ba Holo ya Kopano yeo go ka dulago batho ba 800. Ka letšatši leo phuthego e rekilego setsha, batho ba bangwe ba be ba boditše mong wa setsha gore ba ka se reka ka tšhelete ya go feta ya rena. Eupša mong wa sona o ile a re: “Go kaone gore lefelong la ka go kopanele batho ba kereke go e na le gore le dirišetšwe kgwebo.”

Ka baka la lenaneo la go thuša dinaga tšeo di diilago, go agilwe Diholo tša Mmušo tše 17 kua Sierra Leone le tše 6 kua Guinea. Diholo tše tšeo di sa bitšego kudu eupša di na le seriti di tutueditše batho ba bantši gore ba tle dibokeng.

Go Hwetša Dinku tša Jehofa tše di Timetšego

Ge batho ba bantši ba thoma go fišegela bodiredi, ofisi ya lekala e ile ya rulaganya lesolo la dikgwedi tše pedi gore go šongwe tšhemo yeo e sa šongwego gantši. Bagoeledi ba ile ba sepediša dipuku tše e ka bago tše 15 000 gomme ba ba le diphihlelo tše dintši tše kgahlišago. Batho ba bangwe ba ile ba botšiša Dihlatse tša Jehofa ge e ba di tla hloma diphuthego metseng e mengwe ya kgauswi. Mafelelong go ile gwa hlongwa diphuthego tše pedi. Motseng o mongwe wo o lego lekatana, bana babo rena ba ile ba hwetša dikgaetšedi tše pedi tšeo di bego di arogantšwe le mokgatlo ka baka la ntwa. Bana babo rena ba ile ba rulaganya gore go be le diboka ka mehla gomme ba thoma dithuto tše mmalwa tša Beibele motseng woo.

 Ka 2009, ofisi ya lekala e ile ya kwa gore go na le motse o mongwe ka garegare sethokgweng sa Guinea, e bile go na le batho bao ba ipitšago Dihlatse tša Jehofa motseng woo. Ge lekala le romela bana babo rena gore ba yo nyakišiša, le ile la hwetša gore go be go na le ngwanabo rena yo a godilego yo a bego boetše gae ka morago ga go rola modiro. O ithutile Beibele le banna ba mmalwa pele a hlokofala. Yo mongwe wa banna bao o ile a dumela go Jehofa gomme a thoma go abelana le ba bangwe tsebo ya gagwe ka Beibele. Le gona, o be a swara diboka ka dikgatišo tša ngwanabo rena yo a hlokofetšego. Sehlopha se se be se na le ngwaga e 20 se ithuta Beibele pele mogoeledi yo mongwe a ka se lemoga. Ka pelapela lekala le ile la romela bana babo rena gore ba thuše sehlopha seo moyeng. Ka 2012, batho ba lekgolo masomešupa-pedi motseng woo ba ile ba ba gona Segopotšong sa lehu la Kriste.

Dinakong tše sa tšwago go feta, ‘dinku tše di timetšego’ tše dintši di ile tša hwetšwa. Dinku tšeo ke batho bao ba ilego ba tapa goba ba kgaolwa ka phuthegong. Bontši bja batho bao ba swanago le morwa wa lehlaswa ba ile ba itshola gomme ba boela therešong. Batho ba Jehofa ba ile ba ba amogela ka matsogo a mabedi.—Luka 15:11-24.

Mamoseleme a Ikokobeditšego a Amogela Therešo

Ge moapostola Paulo a be a bolela le batho ba bangwe ka ditaba tše dibotse, o ile a ba “dilo tšohle go batho ba mehuta ka moka.” (1 Bakor. 9:22, 23) Ka mo go swanago, bahlanka ba Jehofa kua Sierra Leone le Guinea ba ile ba fetoša tsela yeo ba dirago boboledi ka yona gore ba fihlelele batho ba fapafapanego. Ka mohlala, ela hloko kamoo bagoeledi ba bangwe ba boledišanago le batho bao ba sa kgethollego madumedi a mangwe ba Mamoseleme, e lego bodumedi bjo bo atilego kudu dinageng tšeo tše pedi.

Saidu Juanah, yo peleng e bego e le Momoseleme, o re: “Mamoseleme a dumela gore Adama o bopilwe ka lerole  eupša peleng o be a phela paradeiseng ya legodimong. E le gore ke ba thuše go kwešiša, ke ba botšiša gore: ‘Lerole le hwetšwa kae?’

“Bona ba re: ‘Lefaseng.’

“Nna ka tšwela pele ka gore: ‘Go ya ka seo, Adama o bopilwe kae?’

“Ke moka ba re: ‘Lefaseng.’

“Gore ke kgone go ba phošolla, ke bala Genesi 1:27, 28 gomme ka botšiša gore: ‘Na dibopiwa tša legodimong di ba le bana?’

“Bona ba fetola ba re: ‘Aowa. Barongwa ga se banna goba basadi.’

“Ke moka ka re: ‘Ge Modimo a be a botša Adama le Efa gore ba be le bana, ba be ba le kae?’

“Ba re: ‘Lefaseng.’

“Ka morago ga moo, ke ba botšiša gore: ‘Bjale ge Modimo a tsošološa Paradeise, e swanetše go ba kae?’

“Ba araba ka gore: ‘Mo lefaseng.’”

Mafelelong Saidu o re: “Go bea mabaka ka Mangwalo go dira gore Mamoseleme a ikokobeditšego a theetše le go amogela dikgatišo tša Beibele.”

Ela hloko Momoh, e lego Momoseleme yo a nago le lebenkele yo a bego a nyaka go ba moruti wa Mamoseleme. Ge baromiwa ba Dihlatse ba be ba boledišana le yena ka Mangwalo, seo se ile sa dira gore Momoh a ipotšiše dipotšišo. O ile a ba gona dikarolong tše dingwe tša kopano ya tikologo gomme a rata seo a se kwelego. Ka morago ga matšatši a mane, yena le mosadi wa gagwe e lego Ramatu, le bana ba bona ba bahlano ba ile ba ba gona Segopotšong sa lehu la Jesu. Ke moka Momoh o ile a thoma go ithuta Beibele ka phišego. Ka morago ga go swarelwa thuto ga mmalwa o ile a kgaotša go rekiša motšoko. O ile a botša bareki ba gagwe gore motšoko o kotsi gomme Modimo ga a o dumelele. Le gona o ile a thoma go ithuta Beibele le mosadi  wa gagwe le bana lebenkeleng la gagwe. Ge batho ba be ba etla go reka nakong ya thuto ya lapa, o be a ba kgopela gore ba dule fase ba lete ka ge thuto yeo e be e le bohlokwa kudu go lapa la gagwe. Ge yena le Ramatu ba ngwadišitše lenyalo la bona ka molao, ba leloko ba ile ba thoma go ba ganetša o šoro. Momoh le Ramatu ba ile ba nea bohlatse go meloko ya bona ka sebete ba sa fele pelo gomme mafelelong ba ile ba hlompha seo ba se dirago. Momoh o ile a kolobetšwa ka 2008, ke moka Ramatu a kolobetšwa ka 2011.

Go Hlompha go Kgethega ga Madi

Batho ba Jehofa ba kgomarela ditekanyetšo tša Modimo tša boitshwaro, go akaretša le pono ya gagwe ka madi. (Dit. 15:29) Go dira ga bona seo go dirile gore ba hlompšhe ke batho ba bantši ba tša kalafo kua Sierra Leone le Guinea.

Bana babo rena ba homotša kgaetšedi yo a lego sepetlele

 Ka 1978, bana babo rena ba ile ba sepedišetša dingaka, baoki, balaodi ba dipetlele, boramolao le baahlodi ba kua Sierra Leone pukwana ya Jehovah’s Witnesses and the Question of Blood. Ka moragonyana, kgaetšedi yo a bego a belega o ile a thoma go dutlela madi ka teng, eupša dingaka di ile tša nyaka go mo alafa feela ka go mo tšhela madi. Lega go le bjalo, ngaka e nngwe e ile ya dumela go mo alafa ka baka la tsebišo e lego pukwaneng ye le mabaka a yona a kwagalago. Kgaetšedi yoo o ile a belega ngwana yo a phetšego gabotse wa mošemane gomme a fola.

Ka 1991, Bashiru Koroma, yo e lego ngaka ya go bua Sepetleleng sa Kenema, o ile a bala poroutšha ya Madi a ka Phološa Bjang Bophelo bja Gago? Ka ge a be a kgahlišitšwe ke seo e se bolelago, o ile a thoma go ithuta Beibele le go ya dibokeng tša Bokriste. Ge mošemane wa Hlatse yoo a nago le nywaga e senyane a be a hlagelwa ke kotsi gomme a gobala setho se itšego seo se hlatswago madi, dingaka di ile tša gana go mmua ntle le go diriša madi. Di ile tša ba tša botša batswadi ba gagwe gore: “Išang ngwana wa lena gae a yo hwela gona!” Batswadi ba gagwe ba ile ba kgopela Ngaka Koroma ke moka a mmua ntle le bothata.

Go se go ye kae, Ngaka Koroma ke ge a eba Ngwanabo rena Koroma—yoo a tumilego ka go lwela batho bao ba nyakago go buiwa ntle le go tšhelwa madi. Dingaka tše dingwe di ile tša thoma go se mo rate, eupša balwetši bao a bego a ba thuša ba be ba fola. Ka morago, bašomigotee le yena ba ile ba thoma go kgopela thušo ya gagwe ge ba dira mešomo e raraganego ya go bua.

Go tloga ka 1994, Lefapha la Tsebišo ya Sepetlele la lekala la Freetown le ile la hloma Komiti ya go Hloma Kwano le Sepetlele kua Sierra Leone le Guinea. Dikomiti tše di ile tša thuša Dihlatse tše dintši tšeo di babjago le go kgothaletša batho ba bantši ba tša kalafo gore ba alafe Dihlatse ntle le go diriša madi.