Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2014

 SIERRA LEONE LE GUINEA

Ba be ba Mmitša “Bible” Brown

William R. Brown

Ba be ba Mmitša “Bible” Brown
  • O BELEGWE KA 1879

  • O KOLOBEDITŠWE KA 1908

  • PEGO YA BOPHELO BJA GAGWE O ile a thoma modiro wa boboledi kua Afrika Bodikela.

GE William a be a šoma Panama Canal ka 1907, o ile a wela polelo seterateng yeo e bego e newa ke Isaiah Richards, e lego Morutwana wa Beibele, ka ge Dihlatse tša Jehofa di be di bitšwa bjalo ka nako yeo. Richards o be a theile polelo ya gagwe go “Chart of the Ages,” e lego seswantšho seo se bego se dirišwa go hlalosa merero ya Modimo. William o ile a amogela therešo kapejana gomme a boela Jamaica gore a yo e botša mmagwe le kgaetšedi ya gagwe. Ge nako e dutše e eya, le bona e ile ya ba Barutwana ba Beibele.

Ngwanabo rena Brown o ile a hlankela lebaka le itšego kua Panama City, Panama. Ge a le moo o ile a kopana le Evander J. Coward, e lego moemedi wa mosepedi wa Barutwana ba Beibele yo a bego a etetše Panama a le leetong la go nea dipolelo. Coward e be e le seboledi se matla le sa go tseba polelo, ka gona mašaba a be a bokana go tlo mo theetša. Ge a be a bona gore William o fišegela therešo, o ile a mo kgopela gore a sepele le yena leetong la boboledi kua Trinidad.

 Nywageng e ka bago e lesome e latetšego, William o ile a sepela go phatša West Indies, a bula madibogo le go matlafatša dihlopha tše dinyenyane. Ka 1920, o ile a nyala kgaetšedi yo a botegago wa Mokriste e lego Antonia. Matšatši a mabedi ka morago ga lenyalo la bona, William le Antonia ba ile ba sepela ka sekepe ba ya sehlakahlakeng se senyenyane sa Montserrat Dihlakahlakeng tša Leeward, ba swere “Photo-Drama of Creation,” e lego filimi ya dikarolo tše nne yeo e theilwego Beibeleng le diselaete. Le gona ba ile ba dira boboledi dihlakahlakeng tša Barbados, Dominica le Grenada. Ba thabetše matšatši a ka morago ga lenyalo ba le tirelong ya Jehofa.

Nywaga e mebedi ka morago, William o ile a ngwalela Joseph F. Rutherford, yoo a bego a okamela modiro wa batho ba Jehofa ka nako yeo, a re: “Ka thušo ya Jehofa ke kgonne go nea bohlatse dihlakahlakeng tše dintši tša Caribbean gomme ke dirile barutiwa go tše dintši tša tšona. Na ke boele go tšona gape?” Ka morago ga matšatši a sego kae, Ngwanabo rena Rutherford o ile a araba a re: “Fetela Sierra Leone, kua Afrika Bodikela, wena le mosadi wa gago le ngwana wa lena.”

Nywageng e 27 yeo Ngwanabo rena Brown a hlanketšego Afrika Bodikela le lapa la gagwe, o be a sa nyake go šoma ka ofising. O be a rata go hlwa tšhemong. Ka baka la ge a be a gatelela bohlokwa bja Beibele, batho ba ile ba thoma go mmitša “Bible” Brown.

Ka 1950, ge a be a na le nywaga e 71, William Brown le mosadi wa gagwe ba ile ba boela Jamaica go yo bula madibogo moo. William e bile mmulamadibogo go fihlela a fetša bophelo bja gagwe bja mo lefaseng ka 1967. Ruri o be a rata bobulamadibogo! O be a nagana gore ke e nngwe ya ditokelo tše kgolo kudu tšeo motho a ka bago le tšona.