Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2014

Lengwalo le le Tšwago go Sehlopha se Bušago

Lengwalo le le Tšwago go Sehlopha se Bušago

Bahlankagotee le Rena ba ba Rategago:

Re thaba kudu go le ngwalela lengwalo le mathomong a ngwaga wo o kgahlišago! Ge 2014 e fela, go tla ba go fedile nywaga e lekgolo Kgoši ya rena e rategago Jesu Kriste a thomile go buša gare ga manaba a gagwe.—Ps. 110:1, 2.

Mathomong a ngwaga wo wa tirelo, Komiti ya Phetolelo ya Beibele ya Lefase le Lefsa e ile ya lokolla kgatišo ya Beibele ya Seisemane sebokeng sa ngwaga le ngwaga sa Watch Tower Bible and Tract Society of Pennsylvania, e lego kgatišo e sa tšwago go kaonefatšwa le yeo e kwagalago kudu. Jehofa o dirišitše barwa ba gagwe bao ba tswetšwego ka moya go tšweletša Phetolelo ya Lefase le Lefsa. (Baroma 8:15, 16) Na ga o dumele gore seo ka bosona se dira gore phetolelo ye e be ya moswananoši?

Ka nywaga e mentši, Komiti ya Bongwadi ya Sehlopha se Bušago e ile ya etiša pele go fetolelwa ga Beibele.  Lehono, Phetolelo ya Lefase le Lefsa e hwetšagala e feletše goba ka karolo ya yona ka maleme a 121. Re le kgopela gore le bontšhe Jehofa kamoo le tlogago le leboga Beibele ye. E baleng le be le naganišišeng ka yona letšatši le letšatši. Ka go dira bjalo, le tla batamela kgauswi le Mongwadi wa yona e lego Jehofa Modimo.—Jak. 4:8.

Re kgomega kudu ge re ekwa ka diteko tšeo di welago bana babo rena le dikgaetšedi bao ba rategago. Go a kwagala gore ka dinako tše dingwe ba ka hwetša go le thata go thaba le bana babo bona. Ka mohlala, morago bjale lapa le lengwe kua Asia le ile la šulafalelwa ke bophelo ka morago ga gore mma wa ka lapeng leo a hwe ditho ka moka tša mmele. Ditsebi tša kalafo di ile tša šala di tlabegile ge di be di palelwa ke go mo alafa. A masetlapelo a magolo gakaakaang! Ga bjale monna ke yena a emaemago bošego le mosegare go hlokomela mosadi wa gagwe. Morwa wa bona le barwedi ba bona ba babedi ba bea mohlala o mobotse wa Bokriste ka go thekga batswadi ba bona ka lerato. Lapa le leo le rategago gotee le lena bohle bao le kgonnego go kgotlelela diteko tše di fapafapanego le kwa lethabo leo le tlišwago ke go kgotlelela diteko tša tumelo. (Jak. 1:2-4) Jehofa o kgonthišetša batlotšwa ba gagwe le ba dinku tše dingwe gore ba tlo iteboga gore ba ile ba tšwela pele ba kgotlelela diteko, ka gobane o tlo re šegofatša ka mpho ya bophelo bjo bo sa felego!—Jak. 1:12.

Batho bao ba bilego gona Segopotšong ngwagola e bile ba 19 241 252. Ruri go a kgothatša go bona batho ba bantši ka tsela ye ba hlompha Jehofa le Jesu Kriste ka go ba gona sebokeng se sa bohlokwahlokwa sa ngwaga le ngwaga sa batho ba Modimo! Sehleng sa Segopotšo, mogoo o mogolo wa theto o ile wa rotogela legodimong ge bagoeledi ba dimilione ba be ba tšere bobulamadibogo bja go  thuša ka March le April. A ditaba tše di kgahlišago gakaakaang! Le gona, na ga se wa thabela go kwa gore bao ba tšeago bobulamadibogo bja go thuša nakong ya ketelo ya molebeledi wa tikologo ba ka ba gona sebokeng ka moka seo a bago le sona le babulamadibogo, gaešita le ge ketelo ya gagwe e se ka March goba April? Bao ba lego bohlale moyeng ba kwešiša bohlokwa bja go dula ba le mafolofolo modirong wa boboledi le ka phuthegong. Go dula re swaregile tirelong ya Jehofa go re thuša go dula re tiile le go se šišinyege, ra folodiša maano a Diabolo a go leka go fokodiša tumelo ya rena le go re aroša.—1 Bakor. 15:58.

Ruri ke mo go kgothatšago go tseba gore ngwageng o fetilego wa tirelo, batho ba 277 344 ba bontšhitše boineelo bja bona ka go kolobetšwa ka meetseng gomme ga bjale ba tseleng e išago bophelong gotee le bana babo bona ba lefaseng ka bophara! (Mat. 7:13, 14) Bana babo rena ba ba bafsa ba hloka thekgo ya rena gore ba ‘tsepame tumelong.’ (Bakol. 2:7) Tšwelang pele le kgothatšana gore le kgotlelele go fihla bofelong. (Mat. 24:13) “Bolelang ka mo go homotšago le bao ba nyamilego, thekgang ba fokolago, le se felele motho pelo.” (1 Bathes. 5:14) Sa mafelelo, eka ka moka ga rena re ka ‘rapela ka mehla’ gore: “Mmušo wa gago a o tle.”—1 Bathes. 5:17; Mat. 6:10.

Hle ipshineng ka go bala Puku ye ya Ngwaga, e bile tsebang gore re rata yo mongwe le yo mongwe wa lena bao le ratago Jehofa!

Bana babo lena,

Sehlopha se Bušago sa Dihlatse tša Jehofa