Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2014

 DINTLHAKGOLO TŠA NGWAGOLA

Dipego—Ditaba tše di Tšwago Lefaseng ka Bophara

Dipego—Ditaba tše di Tšwago Lefaseng ka Bophara

Maphodisa a Ile a Thuša go Fološa Ditena

Kua Kutaisi, e lego motse wa bobedi ka bogolo Repabliking ya Georgia, dikopano tše dinyenyane di ile tša swarelwa feketoring ya go hlagala ya beine ka nywaga e 13. Ka tlasana ga tlhaka go be go fegilwe dipolasitiki gore meetse a pula a se kolobiše batheetši. Lehono bana babo rena ba na le Holo ya Mmušo e botse yeo e ka bulwago gore go swarelwe le dikopano go yona. Ge e be e sa agwa, baithaopi ba 50 ba be ba fološa ditena tša samente loring gomme maphodisa a tla go tlo bona seo se diregago. A kgahlilwe ke tsela yeo bašomi ba bego ba thabile ka yona le go šoma ka mafolofolo, maphodisa ao a ile a ba reta ke moka a ba thuša go fološa ditena tšeo. A ile a  botša bana babo rena bao gore ba ba bitše ge go ka ba le motho yo a ba tshwenyago. Maphodisa ao a ile a holofetša gore a tlo tla kopanong ya pele ya selete yeo e tlago go swarelwa Holong yeo e mpsha ya Kopano.

O Ile a Rekiša Paesekela ya Gagwe

Malachi, e lego mogolo yo a dulago kua Burundi, o be a iphediša ka go lema le ka go rwalela batho merwalo ka paesekela ya gagwe. E le gore a thekge modiro wa go agwa ga Holo ya bona ya Mmušo, Malachi o ile a phetha ka gore letšatši le letšatši a tle go thuša go aga. E le gore a kgone go dira seo, o be a swanetše go hwetša tšhelete ya go hlokomela lapa la gagwe dikgweding tše pedi tša ge go agiwa Holo yeo. Ka gona o ile a rekiša paesekela ya gagwe ke moka tšhelete yeo a e nea mosadi wa gagwe gore a reke dinyakwa tša lapa, gomme e nngwe ka moka a e tsenya lepokising la moneelo go thuša go lefelela ditshenyagalelo tša go aga. Ka baka la maiteko a gagwe, o ile a hwetša tlwaetšo e botse ya go aga go bahlanka bao ba agago Diholo tša Mmušo. Ge Holo ya Mmušo e fedile, Malachi o ile a kgona go hwetša mošomo wa go aga ka ge batho ba be ba bone gore ke sekgwari sa go aga. Gona bjale Malachi o rekile paesekela e nngwe!

Ba Ile ba Tutueletšega go Thuša

Go aga Diholo tša Mmušo mafelong a lego lekatana kua Malawi go na le ditlhohlo tša gona. Ngwageng o fetilego wa tirelo, go ile gwa agwa holo motseng o mongwe woo ditsela tša wona di sa sepelegego. Bana babo rena bao ba tšwago lekaleng ba ile ba tliša dikago lefelong leo ba diriša dikoloi tše dikgolo le tše di nago le matla. Bana babo rena ba moo ba re batho ba moo ba ile ba kgahlwa kudu ke seo se bego se direga. Batho ba bantši bao e sego Dihlatse motseng woo ba ile ba ithaopela go thuša gomme ba šoma go fihlela bošego ba fološa santa, maswika, disamente le masenke. Ge e le gabotse, go ile gwa ba le dinako tša ge batho bao e sego Dihlatse e bego e le ba bantši go feta Dihlatse! Ka ge ba be ba kgahlilwe ke gore  Dihlatse tša Jehofa di dira maiteko a go aga mafelo a mabotse a borapedi metseng yeo e lego lekatana go etša wa gabo bona, ba ile ba tutueletšega go thuša.

Bana ba Ile ba Rekiša Toffee

Banyalani ba babulamadibogo ba ba kgethegilego ba kua Côte d’Ivoire ba ithuta Beibele le banyalani ba bangwe bao ba nago le bana ba lesome ba diriša leleme la moo la Sebete. Ka May 2013 go be go tlo swarwa kopano ya pele ka leleme la Sebete toropong ya Daloa, gomme ditho tša lapa leo ka moka di be di nyaka go ba gona. Lega go le bjalo, go ya kopanong e be e le R16.00 (800 CFA) motho ka o tee go ya le go boa, ka gona tate wa lapa le o be a se na tšhelete ya go lefelela lapa leo la gagwe le legolo. Ka ge a be a feditše le pelo gore ba ya ka moka, o ile a loga leano. O ile a nea morwedi wa gagwe yo mogolo R6.00 (300 CFA) gore a reke malekere ao a bitšwago Toffee gomme a a rekiše. O ile a dira bjalo gomme a hwetša tšhelete e lekanego go itefelela leeto. Tate yo o ile a botša bana ba gagwe ba bangwe go dira se se swanago—a nea yo mongwe le yo mongwe wa bona R6.00 gore ba ithomele kgwebonyana ya go rekiša malekere go fihlela ka moka ga bona ba hwetša tšhelete e lekanego ya go ya kopanong. Mafelelong, lapa leo gotee le ba bangwe ba ile ba ya kopanong. Ba be ba thabile kudu gakaakaang go kwa lenaneo ka segagabo bona!