Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2014

 DINTLHAKGOLO TŠA NGWAGOLA

Ba Leboga BOKGOBAPUKU BJA INTHANETENG

Ba Leboga BOKGOBAPUKU BJA INTHANETENG

Ka June 28, 2013, wepesaete ya jw.org e ile ya ba le tsebišo ya gore BOKGOBAPUKU BJA INTHANETENG [Watchtower ONLINE LIBRARY] bo sa tšwa go dira mohlolo ka go hwetšagala ka maleme a 100. Bokgobapuku bjo bo go dumelela go dira nyakišišo go swana le go Watchtower Library, yeo e hwetšagalago go CD-ROM. O ka kgona go tsena go bjona didirišweng tše dintši tšeo di nago le Inthanete, tše bjalo ka khomphutha, laptop, thabolete goba smartphone. Bontši bja dikgatišo tša bokgobapuku bjo di thoma ka tša 2000 go ya pele. Maleme a mantši a bile a na le Phetolelo ya Lefase le Lefsa le Insight on the Scriptures bokgobapukung bjo. Karolo ya “Search” e ka dirišetšwa go nyaka lentšu, polelwana goba sehlopha  sa mantšu, go etša ge o ka dira bjalo go Watchtower Library. Ge o diriša bokgobapuku bjo bja Inthaneteng, o ka bula mangwalo goba tsebišo e itšego ka maleme a mabedi sammaletee. Ekwa seo ba bangwe ba se boletšego ge ba be ba leboga sedirišwa se sa bohlokwa:

“Re leboga BOKGOBAPUKU BJA INTHANETENG ka diatla tše pedi. Ge ke be ke thoma go bona sedirišwa se sa go ithuta, ke ile ka tlala ditebogo. Ga ke tsebe selo ka tša dikhomphutha goba go hlama diwepesaete, eupša nka bolela ke kgwahlišitše ka ganong gore sedirišwa se sa go dira nyakišišo se di goga pele. Wepesaete ye e bontšha gabotse gore le rata moagišani, le rata bana babo lena e bile le rata Jehofa. Go hlangwa ga BOKGOBAPUKU BJA INTHANETENG ke bohlatse bjo bo lego molaleng bja gore le re hlokometše. Ga ke tsebe gore ke tla ba ke sa nyaka eng go Tate wa ka wa legodimong Jehofa ge ke sa bone lerato le la gagwe le go fana ga gagwe ka seatla se se bulegilego. Ke leboga kudu.”—A. kua Argentina.

“Ga ke kgolwe! Thapameng ye ke tsene BOKGOBAPUKUNG BJA INTHANETENG, gomme ka hwetša gore se-Creole sa Haiti ke le lengwe la maleme a mafsa moo. Ke be ke sa nagane gore seo se ka tsoga se diregile. Ke nagana gore ka lona lengwalo le le a bona gore ke feletšwe ke mantšu. Eka Jehofa a ka šegofatša maiteko a lena, le gona eka moya wa gagwe o mokgethwa o ka tšwela pele o le hlahla.”—D.C. kua United States.