Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2014

 MODIRO WA BOBOLEDI LE WA GO RUTA LEFASENG KA BOPHARA

Oceania

Oceania
  • DINAGA 29

  • BAAGI 39 508 267

  • BAGOELEDI 96 088

  • DITHUTO TŠA BEIBELE 63 333

“Ga Bjale ke a Kwešiša”

Freda yo e lego sefoa, o ile a thaba kudu ge a se na go tseba gore yena le kgaetšedi yo a mo swarelago thuto ya Beibele ba tlo kopanela le phuthego ya mathomo yeo e dirišago polelo ya diatla kua Papua New Guinea. Phuthego ye e hlomilwe ka March 1, 2013. Freda o ile a lemoga gore o be a kwešiša kaone nakong ya diboka ge a lebeletše seboledi le dilo tšeo di dirišetšwago go ruta gomme a beetše ka thoko dikgatišo tša gagwe. Ka  wona mokgwa wo, o ile a makatšwa ke ge a fenya dihlong tša go araba gomme a thoma go araba ka makga a mmalwa nakong ya diboka. Ka April 2013, o ile a swanelega go ba mogoeledi yo a sa kolobetšwago gomme o kgona go kgothaletša batho ba bangwe ba difoa go ya le yena dibokeng. Ge a be a botšišwa gore ke ka baka la eng gantši a etšwa megokgo nakong ya diboka, o ile a araba ka gore: “Ke ka gobane ga bjale ke a kwešiša.”

O Ile a Namela Koloi Yeo e Sego Yona

Ge Barbara a be a eya sehlopheng sa tirelo ya tšhemo kua Australia, o ile a emiša koloi ya gagwe ka thoko ga tsela go bona ge e ba a swere puku yeo a ngwadilego maeto a gagwe a go boela. Gateetee lebati la koloi le ile la bulega, gomme mosadi yo mongwe a tsena ka gare.

Barbara o ile a re: “Tshwarelo, ke nagana gore o tsene ka koloing yeo e sego yona.”

Mosadi yoo o ile a re: “O ntshwarele hle. Ke be ke nagana gore o mosadi yo a swanetšego go tlo ntšea.” Ge mosadi yo a bona dimakasine tša Barbara tša Morokami le Phafoga! o ile a re: “Ke be ke hwetša dimakasine tše go basadi ba babedi bao ba bego ba nthuta Beibele morago kua.” A thabile, Barbara o ile a nea mosadi yo dimakasine tšeo gomme ka morago a thoma thuto ya Beibele le yena.

“Mangwalo a go tšwa go Modimo”

New Zealand: Violet o botša batho ba bantši therešo ka go ba ngwalela mangwalo

Violet ke kgaetšedi wa nywaga e 82 yo a babjago wa kua Christchurch, New Zealand. Ka mehla o romela mangwalo le dikgatišo tše di theilwego Beibeleng magaeng a go hlokomela batšofadi le magaeng a balwetši a tikologong ya gabo. Baoki bao ba ba hlokomelago le go ba išetša  mangwalo ba re batšofadi bao ba leta ka phagahlo seo ba se bitšago mangwalo a bona a go tšwa go Modimo. Ba bangwe ge ba feditše go bala mangwalo a bona le dikgatišo ba nea ba bangwe gore ba bale goba ba balela bao ba sa bonego gabotse. Baoki bao ba bile ba re batšofadi bao ba balago mangwalo le dikgatišo tše ga ba tshwenye kudu, ba na le pono e nepagetšego e bile ba na le khutšo go feta bao ba sa balego dikgatišo tše. Ge Violet a bolela ka maiteko a gagwe a go nea bohlatse, o re: “Ke a bona gore Jehofa o sa dutše a ntiriša go thuša ba bangwe. Go botša batho therešo ka tsela ye go tloga go nthabiša.”

 O Ile a Bala ka Matšoba

“Ke šetše ke o badile.” Kgaetšedi Bernie o ile a makatšwa ke karabo ye yeo a bego a sa e letela mesong e mengwe ya Mokibelo ge a be a sepediša kopi ya moragorago ya Morokami sehlakahlakeng sa Saipan. O ile a ipotšiša gore go tla bjang gore Bernadette, e lego morutwana wa kholetšheng yoo a ilego a mmulela mojako, a be a šetše a badile makasine woo. Bernie o ile a mo ntšhetša makasine o mongwe ka mokotleng. Bernadette o ile a re: “Le wona wo ke šetše ke o badile.” A tlabegile, Bernie o ile a mmotšiša gore: “O badile kae dimakasine tše? Na o yo mongwe wa Dihlatse tša Jehofa yo a tlilego maikhutšong mo?” Bernadette o ile a mmotša gore ga se yena Hlatse eupša o badile dimakasine tšeo Inthaneteng. Ka letšatši le lengwe ge Bernadette a be a nyaka tsebišo mabapi le matšoba Inthaneteng, o ile a tlanya lentšu “roses,” gomme a kgahlwa ke sehlogo seo se rego: “Alluring Roses From Africa,” seo se lego ka go Phafoga! Wepesaeteng ya Dihlatse tša Jehofa. Bernadette o ile a botša Bernie gore o thabetše go bala sehlogo seo kudu moo a ilego a phetha ka gore a fetleke Wepesaete ye ka mo go oketšegilego. Mathomong o be a bala feela ka mehlare le diphoofolo eupša e se kgale a hwetša dihlogo tše ipiletšago mabapi le Beibele. Ge Bernie a bona kgahlego ya Bernadette, o ile a ithaopela go mo swarela thuto ya mahala ya Beibele gomme ka morago a mo tlišetša puku ya Ke Eng Seo ge e le Gabotse Beibele e se Rutago? Ge Bernie a boela laboraro, yena le Bernadette ba be ba ithuta kgaolo ya mathomo ya puku yeo. Mo e ka bago ka morago ga ngwaga, ka November 2012, Bernadette o ile a kolobetšwa. O ile a dira tšwelopele ka pela moo bagwera ba gagwe ba felago ba re go swana le ge a kitimetše therešong. Ruri Wepesaete ya rena e ile ya mo thuša go bona therešo.