Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2014

 MODIRO WA BOBOLEDI LE WA GO RUTA LEFASENG KA BOPHARA

Afrika

Afrika
  • DINAGA 58

  • BAAGI 979 685 702

  • BAGOELEDI 1 363 384

  • DITHUTO TŠA BEIBELE 3 265 314

“Ga Bjale ke Loketše go tšwa Babilona o Mogolo”

Thomson, e lego lesogana leo le dulago kua Uganda, o be a sa kgotsofatšwe ke bodumedi. Ka ge a be a tennwe ke gore baruti ka mehla ba kgopela tšhelete, o ile a kgaotša go ya kerekeng. Lega go le bjalo, o ile a tšwela pele go bala Beibele letšatši le letšatši. O ile a kgahlwa kudu ke puku ya Kutollo gomme a leka go e hlatholla, a ngwala dintlha tša gagwe ka pukwaneng. Ge ngwanabo rena yo mongwe a be a  kopana le Thomson mošomong, e lego lefelong le lenyenyane leo go bego go agiwa go lona, o mo hweditše a bala Beibele. Ba ile ba ba le poledišano e kgahlišago ke moka Thomson a amogela puku ya Ke Eng Seo ge e le Gabotse Beibele e se Rutago? O ile a bala puku yeo ka moka ka bošego botee. Letšatšing le le latelago, ngwanabo rena yoo o ile a hwetša molaetša mogalathekeng wa gagwe wo o rego: “Ke leboga Morena ka boitsebišo bjo o nneilego bjona. Ga bjale ke loketše go tšwa Babilona o Mogolo.” Thomson o ile a kgopela dikgatišo ka moka tšeo go boletšwego ka tšona mametletšong le mengwalong ya ka tlase ya puku yeo. O ile a ineela thutong ya gagwe ya Beibele, a dira tšwelopele ka go akgofa ke moka a kolobetšwa Kopanong ya Selete ya 2012 ya ‘Šireletša Pelo ya Gago!’ Ka March 2013, Thomson o ile a thoma go hlankela e le mmulamadibogo wa ka mehla, a thuša ba bangwe go bona bohlokwa bja go tšwa go Babilona o Mogolo.

O Badile le Bana Babo Rena ba Seswai

Jimmy o goletše kua Port Louis, motsemošate wa Mauritius. O ile a thoma go nwa a na le nywaga e lesometshela gomme ka morago ga moo a thoma go tagwa letšatši le letšatši. Gantši ge a be a tagilwe o be a sa be le boitshwaro, ka baka leo o ile a golegwa ka makga a mmalwa. Ka dinako tše dingwe o be a enwa mapotlelo a mararo a bjala bjo bo tagago kudu bja rum le go kgoga disekerete tše 60 ka letšatši. Ge a be a se na tšhelete, o be a enwa khemikhale e tagago ya go hlatswa mafasetere. O be a bile a enwa dinkgišabose tša mmagwe. Ge mothotsoko a be a mmotša gore o swana le setopo, o ile a ya lefelong la go thuša batho go tlogela go nwa le go kgoga. O dutše moo ngwaga le seripa eupša seo sa se thuše ka selo.

Rodrigues: Jimmy o be a ikemišeditše go fetoša bophelo bja gagwe

Mafelelong Jimmy o ile a kopana le Dihlatse tša Jehofa gomme a amogela thuto ya Beibele. Ka dinako tše dingwe o be a etšwa thuto e tšwela pele gore a yo nwa. O ile a feleletša  a badile le bana babo rena ba seswai. Mafelelong Jimmy o ile a lemoga gore o swanetše go fetoša tsela yeo a phelago ka yona. O itše: “Ke be ke ikwa eka tšhoša ya moya yeo go bolelwago ka yona go Baheberu 4:12 e ntlhaba pelong. Ka letšatši le lengwe ge ke be ke bala Beibele, ke ile ka bala lengwalo la Diema 24:16 leo le rego: ‘Moloki le ge a ka wa gašupa, o tla tsoga gape.’ Seo se ile sa fetoša bophelo bja ka.” Ka morago ga go “wa” le bana babo rena ba šupago bao a badilego le bona, Jimmy o be a ikemišeditše go fetoga gomme a ‘tsoge’ a thušwa ke ngwanabo rena wa boseswai. Jimmy o ile a lopa Jehofa gore a mo nee matla, a ba gona dibokeng tša phuthego gomme a tlogela mekgwa ya gagwe e mebe. O ile a kolobetšwa ka 2003 ke moka a tsenela bobulamadibogo bja ka mehla ka 2012. Ga bjale ke mohlanka wa bodiredi phuthegong e nngwe ya sehlakahlakeng sa Rodrigues.

“Bagwera ba ka e tla ba Jehofa le Barongwa”

Mary wa nywaga e 70 yo a dulago kua Kenya e bile setho sa Kereke ya Presbyterian bophelo bja gagwe ka moka. Gantši o be a thuša kereke go hwetša meneelo e bile o thušitše ka go aga e nngwe ya dikereke tša moo. Ge yo mongwe wa barwa ba gagwe e eba Hlatse, o ile a se thabe. Morwa yo wa gagwe o be a fela a mo laletša dibokeng tša phuthego, eupša Mary a gana go ya, a re o nyaka go kwa molaetša wa Beibele ka segagabo e lego Sekikuyu, e sego Seswahili. Mafelelong Mary o ile a dumela go ba gona kopanong ya selete yeo e bego e tlo swarwa ka Sekikuyu. Ge a le kopanong, o ile a dula ditulong tšeo di beetšwego batšofadi. O ile a kgahlwa kudu ke tsela e botho le e lerato yeo a ilego a swarwa ka yona. Mary o ile a re ga se a ka a bona lerato la mohuta woo kerekeng yeo a bego a e tsena. O ile a theetša dipolelo  ka moka ka kelohloko gomme a rata seo a se kwelego. Ge motho yo mongwe a be a ithaopela go mo swarela thuto ya Beibele a diriša poroutšha ya Listen to God, o ile a dumela gateetee.

Ka morago ga go ithuta ka dikgwedi tše sego kae, Mary o ile a dira phetho ya gore o nyaka go ba yo mongwe wa Dihlatse tša Jehofa, ka gona a kgaotša go ba setho sa kereke yeo a bego a e tsena. Baruti ba kereke yeo ba be ba galefile. Ba ile ba bitša moruti go tšwa motsemošate kua Nairobi gore a tlo boledišana le yena. Moruti yo o ile a leka go rapeletša Mary gore a se tlogele kereke, eupša a ema a tiile. O ile a botšiša Mary gore: “Bagwera ba gago e tlo ba bomang ge o tlogela kereke? O na le bagwera ba bantši le baagišani bao ba tsenago kereke ye.”

Mary o ile a araba ka gore: “Bagwera ba ka e tla ba Jehofa le barongwa. Dihlatse le tšona e tla ba bagwera ba ka.”

Moruti yoo o ile a sepela ka ge a be a paletšwe ke go fetoša monagano wa Mary. Mary o dira tšwelopele e botse thutong ya gagwe ya Beibele e bile o ba gona dibokeng ka moka tša Bokriste gaešita le ge a dula kgole le moo di swarelwago gona. Morago bjale ge a be a sa kgone go ya dibokeng ka senamelwa, o ile a sepela ka maoto diiri tše pedi  puleng gore a be gona dibokeng. Gaešita le ge a lebeletšane le kganetšo ya baagišani, Mary o ikemišeditše go fihlelela pakane ya gagwe ya gore a kolobetšwe.

Liberia: Go lokišeletšwa ditulo tša Segopotšo. Ka 2013, bagoeledi ba 6 148 ba bile le batho ba 81 762 Segopotšong

Moruti o Ile a mo Kgopa!

Ngwanenyana wa nywaga e 14 yo a bitšwago Ashton o dula kua Cameroon. Ge a be a thoma go ithuta Beibele le Dihlatse tša Jehofa, ramogolwagwe le mosadi wa gagwe bao a dulago le bona ba ile ba mo ganetša o šoro. Ba ile ba mo gapeletša gore a tšwele pele a eya le bona kerekeng ya Pentekoste. Ka letšatši le lengwe ge ba le kerekeng, moruti o ile a bea bao ba bego ba tlile kerekeng diatla gore ba tsenwe ke moya ke moka ba we. Ashton ga se a ka a wa. Moruti yo o ile a re ke a rapela, eupša Ashton a se we. Ka gona moruti yo o ile a mo kgopa gore a we! Ge ba fihla gae, Ashton o ile a botša ramogolwagwe le mosadi wa gagwe gore moruti o mo kgopile, eupša ba se mo kgolwe. Ka yona nako yeo o ile a phetha ka gore a ka se sa ya kerekeng. Gaešita le ge lapa la gabo le baagišani ba mo ganetša le go mo roga, lehono Ashton o tšwela pele go ba gona dibokeng Holong ya Mmušo.

Taletšo e Tšwago go Ngwana

Gaešita le ge Anilpa a be a na le dikgwedi tše 17 feela, o ile a tšea karolo ka mafolofolo lesolong la go laletša batho go ba gona kopanong ya selete ya ngwagola kua Angola. Anilpa o be a neilwe mošomo wa go kokota mejako gomme a letele go nea beng ba dintlo ditaletšo ge mmagwe a hlalosa ka boripana lebaka la ketelo ya bona. Ka ge a be a na le mafolofolo, ka dinako tše dingwe Anilpa o be a sa letele mmagwe gore a fetše go bolela pele a ka kokota mojakong o latelago. O ile a kgahla beng ba dintlo kudu. Ka mohlala,  letšatšing la mafelelo la kopano mosadi yo mongwe a ilego a tla go Anilpa gomme a re: “Ke be ke go nyaka. Ke thabela gore ke go hweditše, ka ge e le wena o ntaleditšego kopanong ye.”

Ba be ba Lapišitšwe ke go Gatelelwa

Ka August 2012, bagoeledi ba Phuthegong ya Antaviranambo kua Madagascar ba ile ba kopana le sehlopha sa batho bao ba bego ba re ba nyaka go ba Dihlatse tša Jehofa. Batho bao ba be ba bona ba gateletšwe ke baruti bao ba bego ba dira dilo tše di fapanego le tšeo ba di rutago. Bao ba bego ba tsena kereke ba boletše gore dikereke tša bona ga di na mananeo a go ba ruta Beibele le dikgatišo tša go hlalosa ditumelo tša bona. Ba be ba ntšha tšhelete e ntši kudu dikerekeng, go se na borwarre bja kgonthe e bile go se na lerato la kgonthe la Bokriste. Le gona ba boletše gore ba be ba tseba gore Dihlatse tša Jehofa ga di na mathata ao.

Ka morago sehlopha se se ile sa ngwalela ofisi ya lekala. Lengwalo leo le be le re: “Ka lengwalo le re le tsebiša gore re kganyoga go hlankela Jehofa. Lega go le bjalo, re dula kgole kudu. Ba bangwe ba rena re swanetše go sepela diiri tše 9  go ya go tše 15 gore re fihle dibokeng. Bjale re a le kgopela hle, re romeleng motho yo a tla re thušago go ithuta Beibele. Re ka se kgone go kgotsofatša kganyogo ya rena ya go hlankela Jehofa ka dipelo ka moka ge e ba le ka se re romele motho yo a tlago go re thuša go matlafatša lerato leo re mo ratago ka lona. Re ba 215 metseng e meraro. Re be re tsena dikereke tše di fapafapanego, eupša gona bjale ka moka ga rena re kganyoga go hlankela Jehofa le go mo kwa ka dipelo ka moka. Re holofela gore le tla re thuša.”

Bana babo rena ba ile ba etela sehlopha se, ba sepela diiri tše senyane go ya motseng wa mathomo. Ge ba fihla moo, ba ile ba swara diboka gomme gwa tla batho ba 65 bao ba thabelago. Taba yeo e ile ya phatlalala kapejana gomme batho bao ba tšwago metseng e mengwe ba bolela gore le bona ba kganyoga go etelwa gomme ba rutwe Beibele. Ka gona, bana babo rena ba ba ile ba sepela diiri tše dingwe tše nne go ya motseng wa bobedi ke moka ba swara diboka, moo batho ba ka godimo ga ba 80 ba bilego gona. Ge ba le moo ba ile ba kopana le batho ba bangwe bao ba ilego ba ba kgopela gore ba tle motseng wa gabo bona, woo ba bego ba swanetše go sepela diiri tše pedi gore ba fihle go wona. Bana babo rena ga se ba ba le bothata bja go dira seo gomme le gona moo ba swara diboka. Batho ba ka godimo ga ba 50 ba ile ba ba gona.

Batho ba ka godimo ga ba 30 bao ba tšwago metseng ye ba šetše ba kile ba tla kopanong kua Mahanoro ka makga a mabedi, ba sepela letšatši le seripa go ya le letšatši le seripa go boa. Ba 25 ba bona—banyalani, malapa le batšofadi—ba ile ba tla dibokeng nakong ya ketelo ya molebeledi wa tikologo. Ba be ba robala ka ntlong e tee, ba boledišana ka seo ba ithutilego sona le go botšiša dipotšišo go fihla bošegogare. Badudi ba metseng yeo ba ile ba bolela gore batho ba bangwe ba bantši ba nyaka go ba Dihlatse ka gobane ba lapišitšwe ke go gatelelwa ke baruti.