Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Na Dilo tše di Phelago di Bopilwe?

Ke Eng Seo o se Dumelago?

Ke Eng Seo o se Dumelago?

Bakgomaredi ba tumelo ya setšo ba bodumedi ba dumela gore lefase le tšohle tšeo di lego go lona di bopilwe ka matšatši a selelago a botelele bja diiri tše 24, nywageng e dikete tše mmalwa feela e fetilego. Ba-ila-modimo ba bangwe ba ka dira gore o dumele gore Modimo ga a gona, o dumele le gore Beibele ke puku ya dinonwane le gore bophelo ka moka bo tšweleditšwe ke ditiragalo tšeo di itiragaletšego feela tšeo di bego di sa rerwa.

Bontši bja batho bo na le dipono tšeo di welago dikgopolong tše tšeo di thulanago. Go bala ga gago poroutšha ye mohlomongwe go bontšha gore o yo mongwe wa bona. O ka ba o dumela go Modimo e bile o hlompha Beibele. Eupša o ka ba o hlompha dikgopolo tša borathutamahlale bao ba rutegilego kudu le bao ba nago le tutuetšo bao ba sa dumelego gore dilo tše di phelago di bopilwe. Ge e ba o le motswadi, o ka ba o ipotšiša gore o tla araba bana ba gago bjang ge ba go botšiša dipotšišo mabapi le tlhagelelo gotee le tlholo.

Morero wa Poroutšha ye ke Ofe?

Morero wa poroutšha ye ga se go nyatša bakgomaredi ba tumelo ya setšo ba bodumedi goba bao ba kgethago go se dumele go Modimo. Go e na le moo, re holofela gore poroutšha ye e tla go tutuetša gore o hlahlobe lefsa motheo wa tše dingwe tša ditumelo tša gago. E tla hlalosa pego ya Beibele ka tlholo, yeo mohlomongwe o sa kago wa nagana ka yona nakong e fetilego. Le gona, e tla gatelela lebaka leo ka lona seo o se dumelago mabapi le gore bophelo bo thomile bjang se lego bohlokwa.

Na o tla dumela dipolelo tša bao ba bolelago gore ga go na Mmopi yo bohlale le gore Beibele ga se yeo e ka botwago? Goba na o tla hlahloba seo ge e le gabotse Beibele e se bolelago? Ke dithuto dife tše di lego bohlokwa tšeo o ka di botago le go di dumela: na ke tša Beibele goba tša borathutatlhagelelo? (Baheberu 11:1) Ke ka baka la’ng o sa hlahlobe dintlha tše?