Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Beibele—E na le Molaetša Ofe?

 Karolo 26

Paradeise e a Tsošološwa!

Paradeise e a Tsošološwa!

Jehofa o diriša Mmušo o eteletšwego pele ke Kriste go kgethagatša leina la Gagwe, go godiša bogoši bja Gagwe le go fediša bobe ka moka

PUKU ya Beibele ya mafelelo, yeo e bitšwago Kutollo, e nea batho bohle kholofelo. Puku yeo e ngwadilwego ke moapostola Johane, e na le dipono tšeo di tla fihlago seremong ka go phethagatšwa ga morero wa Jehofa.

Ponong ya mathomo, Jesu yo a tsošitšwego o reta le go phošolla diphuthego tše mmalwa. Pono e latelago e bontšha sedulo sa Modimo sa bogoši sa legodimong, moo a retwago ke dibopiwa tša moya.

Ge morero wa Modimo o tšwela pele, Kwana, Jesu Kriste, o amogela lengwalo la go phuthwa leo le nago le mahuto a šupago. Ge go bulwa mahuto a pele a mane, go tšwelela banamedi ba dipere ba seswantšhetšo. Wa pele ke Jesu yo a nametšego pere e tšhweu e bile a rwešitšwe mphapahlogo ka ge e le Kgoši. Ka morago go tšwelela banamedi ba nametše dipere tša mebala e sa swanego tšeo go ya ka boporofeta di swantšhetšago ntwa, tlala le bolwetši—tšeo ka moka di bago gona mehleng ya bofelo bja tshepedišo ya gona bjale ya dilo. Go bulwa ga lehuto la bošupa go dira gore go letšwe diphalafala tše šupa tša seswantšhetšo, e lego seo se bontšhago go tsebatšwa ga dikahlolo tša Modimo. Se se dira gore go be le dikotlo tše šupa tša seswantšhetšo, goba mantšu a Modimo a kgalefo.

Mmušo wa Modimo, wo o swantšhetšwago ke lesea la mošemanyana, o thewa legodimong. Go tsoga ntwa gomme Sathane le batemona ba gagwe ba kgopo ba lahlelwa lefaseng. Lentšu le le phagamego le re, “go madimabe lefase.” Diabolo o galefile, o tseba gore o šaletšwe ke nako e kopana.—Kutollo 12:12.

Johane o bona pono ya Jesu a le legodimong a swantšhetšwa ke kwana, a e-na le ba 144 000 bao ba kgethilwego bathong. Bona ba “tla buša” gotee le Jesu. Kutollo e utolla gore karolo ya bobedi ya peu e tla ba le ditho tše 144 000.—Kutollo 14:1; 20:6.

Dikgoši tša lefase di kgobokana nakong ya Haramagedone, ‘ntwa ya letšatši le legolo la Modimo Ra-matla-ohle.’ Di lwa le yo a nametšego pere e tšhweu—Jesu, yo a eteletšego madira a legodimo pele. Babuši ba lefase ka moka ba a fedišwa. Sathane o a golegwa gomme Jesu le ba 144 000 ba buša lefase ka “nywaga e sekete.” Mafelelong a nywaga e sekete, Sathane o a fedišwa.—Kutollo 16:14; 20:4.

Pušo ya Kriste ya Nywaga e Sekete le ya babuši-gotee le yena e tla hola batho ba kwago bjang? Johane o ngwala gore: “[Jehofa] o tla phumola megokgo ka moka mahlong a bona, gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.” (Kutollo 21:4) Lefase e ba paradeise!

Ka gona puku ya Kutollo e ruma molaetša wa Beibele. Ka Mmušo wa Mesia, leina la Jehofa le tla kgethagatšwa gomme bogoši bja gagwe bja phagamišwa ka mo go sa felego!

E theilwe pukung ya Kutollo.

Ithute ka mo go oketšegilego

Ke Eng Seo ge e le Gabotse Beibele e se Rutago?

Mmušo wa Modimo ke Eng?

Batho ba bantši ba tseba Thapelo ya Morena. Ke eng seo se bolelwago ke polelwana: “Mmušo wa gago a o tle”