Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Beibele—E na le Molaetša Ofe?

 Karolo 3

Batho ba Phologa Meetse-fula

Batho ba Phologa Meetse-fula

Modimo o fediša lefase le kgopo eupša o phološa Noa le lapa la gagwe

GE BATHO ba oketšega, sebe le bokgopo di ile tša phatlalala lefaseng ka lebelo. Henoge, yo a bego a hlankela a nnoši bjalo ka moporofeta, o ile a lemoša batho gore ka letšatši le lengwe Modimo o tlo fediša batho ba kgopo. Lega go le bjalo, bobe bo ile bja tšwela pele gomme bja gakala. Barongwa ba bangwe ba ile ba rabela kgahlanong le Jehofa ka go tlogela maemo a bona a legodimong, ba apara mebele ya go swana le ya batho gomme ka megabaru ba itšeela barwedi ba batho gore e be basadi ba bona. Manyalo a ao e sego a tlhago a ile a tšweletša bana bao ba nago le matla a sa tlwaelegago—bo-mphenyašilo ba ditšitširipa bao ba bitšwago Banefilimi bao ba ilego ba dira gore lefase le tlale dintwa le tšhollo ya madi. Modimo o ile a kwa bohloko kudu ge a bona tlholo ya gagwe ya lefaseng e senywa.

Ka morago ga lehu la Henoge, go ile gwa tšwelela monna yo mongwe yo a bego a fapane le batho bao ba kgopo. Leina la gagwe e be e le Noa. Yena le lapa la gagwe ba ile ba leka go dira seo se bego se lokile mahlong a Modimo. Ge Modimo a be a dira phetho ya go fediša batho ba kgopo ba mehleng yeo, o be a nyaka go šireletša Noa le diphoofolo tša lefase. Ka gona, Modimo o ile a botša Noa gore a age areka—sekepe se segolo sa khutlonnethwi. Ka go yona, Noa le lapa la gagwe ba be ba tlo šireletšwa gotee le diphoofolo tše dintši tše fapa-fapanego nakong ya meetse-fula a lefase ka bophara ao a bego a tla tla. Noa o ile a kwa Modimo. Ka nywaga-some yeo a e feditšego a aga areka, Noa gape e be e le “mmoledi wa toko.” (2 Petro 2:5) O ile a lemoša batho ka Meetse-fula a tlago, eupša ba ile ba mo hlokomologa. Nako e ile ya tla ya gore Noa le lapa la gagwe gotee le diphoofolo ba tsene ka arekeng. Ge ba tsene, Modimo o ile a tswalela mojako. Pula e ile ya na.

Pula e kgolo e ile ya na ka matšatši a 40 le mašego a 40 go fihla ge lefase ka moka le khupeditšwe ke meetse. Batho ba babe ba be ba fedišitšwe. Dikgwedi ka morago, ge meetse a be a nwelela, areka e ile ya ema thabeng. Nakong ya ge batho ba ka kgona go tšwa ka arekeng, ba be ba feditše ngwaga ka moka ba le ka go yona. E le go bontšha tebogo, Noa o ile a direla Jehofa sehlabelo. Modimo o ile a araba ka go kgonthišetša Noa le lapa la gagwe gore A ka se ke a tliša meetse-fula gape lefaseng bakeng sa go fediša dilo ka moka tšeo di phelago. Jehofa o ile a dira gore go be le molalatladi e le kgonthišetšo e ka bonwago, kgopotšo ya kholofetšo ya gagwe e homotšago.

Ka morago ga Meetse-fula, Modimo o ile a nea batho ditaelo tše difsa. O ile a ba dumelela go ja nama ya diphoofolo. Lega go le bjalo, o ile a ba iletša go ja madi. O ile a ba a laela ditlogolo tša Noa gore di phatlalale le lefase, eupša tše dingwe tša tšona di ile tša gana. Ka tlase ga boetapele bja monna yo a bitšwago Nimirode, batho ba ile ba ba ngatana e tee gomme ba thoma go aga tora motseng wa Babele, woo ka morago o ilego wa bitšwa Babilona. Maikemišetšo a bona e be e le go tshela taelo ya Modimo ya gore ba phatlalale lefaseng. Eupša Modimo o ile a šitiša marabele ao ka go šarakanya leleme la bona gomme a dira gore a bolele maleme a fapa-fapanego. Ka ge a be a palelwa ke go boledišana, a ile a tlogela go aga gomme a phatlalala.

—E theilwe go Genesi dikgaolo 6 go ya go 11; Juda 14, 15.

Ithute ka mo go oketšegilego

Noa “o be a Sepela le Modimo wa Therešo”

Noa le mosadi wa gagwe ba ile ba lebeletšana le ditlhohlo dife ge ba be ba godiša bana ba bona? Ba ile ba bontšha bjang tumelo ka go aga areka?