Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Beibele—E na le Molaetša Ofe?

 Karolo 15

Moporofeta Yoo a Lego Bothopša o Bona Dilo Tšeo di Tlago go Direga Nakong e Tlago

Moporofeta Yoo a Lego Bothopša o Bona Dilo Tšeo di Tlago go Direga Nakong e Tlago

Daniele o porofeta ka Mmušo wa Modimo gotee le go tla ga Mesia. Babilona e a wa

DANIELE, mofsa yoo a botegago kudu, o ile a išwa bothopša Babilona pele Jerusalema e senywa. Yena gotee le Bajuda ba bangwe—bao ba bego ba išitšwe bothopša ge Mmušo wa Juda o fedišwa—ba ile ba newa tokologo e lekanyeditšwego ke bathopi ba bona. Modimo o ile a šegofatša Daniele kudu nakong e telele yeo a e feditšego a le Babilona, a mo phološa lehung moleteng wa ditau gaešita le go mmontšha dipono tšeo di ilego tša dira gore a kgone go bona dilo tšeo di bego di tla direga nakong e telele e tlago. Diporofeto tše bohlokwa kudu tša Daniele di be di bolela ka Mesia gotee le pušo ya Gagwe.

Daniele o tsebišwa gore Mesia o tla tla neng. Daniele o ile a botšwa gore ke neng moo batho ba Modimo ba bego ba ka letela go tla ga “Motlotšwa Mo-êta-pele”—Dibeke tše 69 tša nywaga ka morago ga gore go ntšhwe taelo ya gore marako a Jerusalema a tsošološwe le go agwa lefsa. Beke e tlwaelegilego e na le matšatši a šupago; beke ya nywaga e bopša ke nywaga e šupago. Taelo yeo e ile ya ntšhwa nako e telele ka morago ga mehla ya Daniele, ke gore ka 455 B.C.E. Go tloga ka nako yeo, “dibeke” tše 69 di ile tša tšea nywaga e 483 gomme tša fela ka 29 C.E. Karolong e latelago ya kgatišo ye, re tla bona seo se ilego sa direga ka ngwaga woo. Le gona, Daniele o ile a bonela pele gore Mesia a ka “se kê a hlwa a e-ba xôna,” goba o tla bolawa, bakeng sa tebalelo ya dibe.—Daniele 9:24-26.

Mesia e tla ba Kgoši Legodimong. Ponong yeo e sa tlwaelegago ya legodimo, Daniele o bone Mesia, yo a bitšwago “e mongwê . . . e kexo ké Morwa-motho,” a batamela sedulo sa Jehofa sa bogoši. Jehofa a mo nea “boxoši le kxodišô le mmušô.” Mmušo woo o be o tla ba gona ka mo go sa felego. Daniele o ile a tsebišwa taba e nngwe e kgahlišago mabapi le Mmušo wa Mesia—Kgoši e tla abelana le ba bangwe bogoši bja yona, e lego sehlotswana seo se bitšwago “bakxêthwa ba Yo-xodimo-dimo.”—Daniele 7:13, 14, 27.

Mmušo woo o tla fediša mebušo ya lefase le. Modimo o ile a nea Daniele bokgoni bja go hlatholla toro yeo e ilego ya gakantšha Nebukadinetsara, kgoši ya Babilona. Kgoši e be e bone seswantšho se segolo se se nago le hlogo ya gauta, sehuba le matsogo a silifera, mpa le dirope tša koporo, maoto a tšhipi gomme dinao e le tša tšhipi yeo e tswakanego le letsopa. Lefsika leo le kgomogilego thabeng le ile la betha dinao tša seswantšho seo gomme la se pšhatlaganya gore e be lerole. Daniele o hlalositše gore dikarolo tša seswantšho seo di be di swantšhetša mebušo e megolo ya lefase ka go latelana ga yona, go thoma ka Babilona yeo e bego e swantšhetšwa ke hlogo ya gauta. Daniele o ile a bonela pele gore mehleng ya mmušo wa mafelelo o matla wa lefase le le kgopo, Mmušo wa Modimo o tla tšea kgato. O tla fediša mebušo ka moka ya lefase le. Ke moka, o tla buša ka mo go sa felego.—Daniele, kgaolo 2.

Bjalo ka monna yo a tšofetšego, Daniele o ile a phela go fihlela a bona Babilona e e-wa. Kgoši Korese o ile a fenya motse woo bjalo ka ge baporofeta ba be ba boletše e sa le pele. Nakwana ka morago ga moo, Bajuda ba ile ba lokollwa bothopša—ka nako e beilwego, ka morago ga go dirwa lešope ga naga ya bona ka nywaga e 70 mo go boletšwego e sa le pele. Mafelelong ka tlase ga tlhahlo ya babuši ba botegago, baperisita le baporofeta, Bajuda ba ile ba aga Jerusalema le go tsošološa tempele ya Jehofa. Lega go le bjalo, ke’ng seo se bego se tla direga ka morago ga nywaga yeo e 483?

E theilwe pukung ya Daniele.

Ithute ka mo go oketšegilego

Mmušo wa Modimo o Thomile go Buša Neng? (Karolo 1)

Ge e ba o tseba karabo, na o ka hlalosetša motho yo mongwe go tšwa Beibeleng?