Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Beibele—E na le Molaetša Ofe?

 Karolo 14

Modimo o Diriša Baporofeta ba Gagwe go Bolela

Modimo o Diriša Baporofeta ba Gagwe go Bolela

Baporofeta ba kgethwa ke Jehofa gore ba botše batho melaetša yeo e lego mabapi le kahlolo, borapedi bjo bo sekilego le mabapi le go holofela Mesia

NAKONG ya dikgoši tša Isiraele le Juda, go ile gwa tšwelela sehlopha se kgethegilego sa banna—baporofeta. Ba e be e le banna ba tumelo e makatšago le sebete, bao ba bego ba tsebatša melaetša ya Modimo. Ela hloko dihlogo tše nne tše bohlokwa tšeo di ilego tša godišwa ke baporofeta ba Modimo.

1. Go senywa ga Jerusalema. Baporofeta ba Modimo—kudu-kudu Jesaya le Jeremia—ba ile ba thoma go lemoša nako e telele e sa le pele gore Jerusalema e tla senywa le go tlogelwa e le lešope. Ba ile ba utolla ka go se pepetletše lebaka leo ka lona Modimo a ilego a galefela Jerusalema. Boipolelo bja badudi ba Jerusalema bja gore ba emela Jehofa bo ile bja ipontšha e se bja therešo ka gobane ba ile ba tšea karolo medirong ya bodumedi bja maaka, kgobogong le bošorong.—2 Dikxoši 21:10-15; Jesaya 3:1-8, 16-26; Jeremia 2:1–3:13.

2. Go tsošološwa ga borapedi bjo bo sekilego. Batho ba Modimo ba be ba tla lokollwa Babilona ka morago ga nywaga e 70 ba le bothopša. Ba be ba tla boela nageng ya gabo bona ya lešope gomme ba tsošološa tempele ya Jehofa kua Jerusalema. (Jeremia 46:27; Amosi 9:13-15) Nywaga e ka bago e 200 e sa le pele, Jesaya o ile a tsebatša leina la mofenyi—Korese—yo a bego a tla fenya Babilona gomme a dumelela batho ba Modimo go tsošološa borapedi bjo bo sekilego. Le gona, Jesaya o ile a hlalosa mokgwa woo Korese a bego a tla o diriša go fenya Babilona.—Jesaya 44:24–45:3.

3. Go fihla ga Mesia le bophelo bja gagwe. Mesia o be a tla belegelwa motseng wa Betlelehema. (Mika 5:1) O be a tla ikokobetša, a fihla Jerusalema a nametše pokolo. (Sakaria 9:9) Le ge a le bonolo e bile a le botho, o be a ka se ratwe gomme ba bantši ba be ba tla mo gana. (Jesaya 42:1-3; 53:1, 3) O be a tla hwa lehu le bohloko. Na bjo e be e tla ba bofelo bja Mesia? Aowa, ka gobane sehlabelo sa gagwe se be se tla dira gore ba bantši ba kgone go lebalelwa dibe. (Jesaya 53:4, 5, 9-12) Ke tsogo ya gagwe feela yeo e bego e ka dira gore seo se kgonege.

4. Pušo ya Mesia godimo ga lefase. Batho ba sa phethagalago ba tloga ba palelwa ke go ipuša ka khutšo, eupša Kgoši yeo e lego Mesia e tla bitšwa Kgoši ya Kagišo. (Jesaya 9:5, 6; Jeremia 10:23) Ka tlase ga pušo ya gagwe, batho ka moka ba tla ba khutšong gaešita le go ba khutšong le mehuta ka moka ya diphoofolo. (Jesaya 11:3-7) Bolwetši bo tla fedišwa. (Jesaya 33:24) Lehu le lona le tla fedišetšwa sa ruri. (Jesaya 25:8) Nakong ya pušo ya Mesia, batho bao ba hwilego ba tla tsošetšwa bophelong lefaseng.—Daniele 12:13.

E theilwe dipukung tša Jesaya, Jeremia, Daniele, Amosi, Mika le Sakaria.