Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Beibele—E na le Molaetša Ofe?

 Karolo 5

Modimo o šegofatša Aborahama le Lapa la Gagwe

Modimo o šegofatša Aborahama le Lapa la Gagwe

Ditlogolwana tša Aborahama di a atlega. Modimo o šireletša Josefa kua Egipita

JEHOFA o be a tseba gore Morwa wa gagwe yo a mo ratago kudu o be a tla tlaišega le go hwa ka letšatši le lengwe. Boporofeta bjo bo ngwadilwego go Genesi 3:15 bo boletše ka therešo yeo ka tsela e sa lebanyago. Na Modimo o be a ka tsebiša batho kamoo sehlabelo sa Morwa wa gagwe se bego se tla ba bohlokwa ka gona? Beibele e dira papišo ka go re botša ka seo se ilego sa diragalela monna yo a itšego le morwa wa gagwe. Modimo o ile a kgopela Aborahama gore a dire sehlabelo ka morwa wa gagwe yo a ratwago e lego Isaka.

Aborahama o be a e-na le tumelo e matla. Gopola gore Modimo o be a mo holofeditše gore Mohlakodiši goba Peu e boletšwego e sa le pele e be e tla tšwa lešikeng la Isaka. A botile gore Modimo o tla tsoša Isaka ge e ba go nyakega, Aborahama ka ge a be a e-kwa o be a ikemišeditše go dira sehlabelo ka morwa wa gagwe. Eupša morongwa yo a tšwago go Modimo o ile a thibela Aborahama pele a thoma go dira sehlabelo. Modimo o ile a reta Aborahama ka baka la go ikemišetša ga gagwe go neela selo seo se bego se le bohlokwa kudu go yena gomme a boeletša dikholofetšo tša Gagwe go mopatriareka yo yo a botegago.

Ka morago, Isaka o ile a ba le barwa ba babedi, e lego Esau le Jakobo. Go fapana le Esau, Jakobo o be a tšeela godimo dilo tša moya gomme o ile a putswa. Modimo o ile a fetoša leina la Jakobo go ba Isiraele gomme barwa ba Isiraele ba 12 ba ile ba ba dihlogo tša meloko ya Isiraele. Eupša go tlile bjang gore lapa leo le fetoge setšhaba se segolo?

Lelokelelo la ditiragalo le ile la thoma ge bontši bja barwa bao ba hufegela ngwanabo bona yo monyenyane e lego Josefa. Ba ile ba mo rekiša bokgobeng gomme a išwa Egipita. Eupša Modimo o ile a šegofatša lesogana leo le botegago le leo le nago le sebete. Go sa šetšwe tlaišego e šoro, mafelelong Josefa o ile a kgethwa ke Farao e lego mmuši wa Egipita, gomme a newa maemo a phagamego kudu. Seo se diregile ka nako e swanetšego, ka gobane tlala e ile ya dira gore Jakobo a romele barwa ba bangwe ba gagwe Egipita gore ba ye go reka dijo—gomme ba ile ba hwetša gore Josefa ke yena a bego a laola dijo ka moka! Ka morago ga go boelana le bana babo bao ba bego ba itshola, Josefa o ile a ba lebalela gomme a rulaganya gore lapa labo ka moka le hudugele Egipita. Le ile la newa naga e botse kudu yeo ba bego ba ka ata go yona gomme ba atlega. Josefa o be a kwešiša gore Modimo o be a rulagantše gore dilo di direge ka tsela yeo e le gore a phethagatše dikholofetšo tša Gagwe.

Jakobo yo a tšofetšego o ile a fetša matšatši a botšofadi bja gagwe ka moka Egipita, a dikologilwe ke lapa la gagwe leo le golago. Pele a e-hwa, o ile a bolela e sa le pele gore Peu e holofeditšwego goba Mophološi e be e tla ba Mmuši yo matla yo a bego a tla belegwa lešikeng la morwa wa gagwe e lego Juda. Nywaga ka morago pele ga lehu la gagwe, Josefa o ile a porofeta gore ka letšatši le lengwe Modimo o tla ntšha lapa la Jakobo Egipita.

—E theilwe go Genesi dikgaolo 20 go ya go 50; Baheberu 11:17-22.