Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Beibele—E na le Molaetša Ofe?

 Karolo 16

Mesia o a Tšwelela

Mesia o a Tšwelela

Jehofa o tsebatša Jesu wa Natsaretha e le Mesia yo a holofeditšwego kgale

NA Jehofa o tla thuša batho go tseba Mesia yo a holofeditšwego? Ee. Ela hloko seo Modimo a ilego a se dira. E be e le ka morago ga nywaga-kgolo e mene Mangwalo a Seheberu a ngwadilwe. Motseng o bitšwago Natsaretha, karolong ya ka leboa ya Galilea, kgarebe yeo e bitšwago Maria e ile ya etelwa ke motho yo a sego a tlwaelega. Morongwa yo a bitšwago Gabriele o ile a iponagatša go yona gomme a e botša gore Modimo o be a tlo diriša matla a gagwe, moya wa gagwe o mokgethwa, go dira gore e ime ngwana wa mošemane. Morwa yoo e be e tla ba Kgoši yeo e holofeditšwego kgale, yeo e bego e tla buša go ya go ile. Ngwana yo e be e tla ba Morwa wa Modimo, yoo Modimo a bego a tla tloša bophelo bja gagwe legodimong gomme a bo fetišetša ka popelong ya Maria.

Maria ka boikokobetšo o ile a amogela kabelo yeo e bohlokwa. Monna yo a mmeeleditšego, mmetli yo a bitšwago Josefa, o ile a mo nyala ka morago ga ge Modimo a rometše morongwa gore a mmotše gore go tlile bjang gore Maria ime. Lega go le bjalo, go thwe’ng ka boporofeta bjo bo rego Mesia o tla belegelwa Betlelehema? (Mika 5:1) Motse woo o monyenyane o be o le bokgole bja dikhilomithara tše 140.

Mmuši wa Roma o ile a ntšha taelo ya gore batho ba balwe. Batho ba be ba swanetše go ingwadiša metseng yeo ba belegetšwego go yona. Go bonala Josefa le Maria ba belegetšwe Betlelehema, ka gona Josefa o ile a ya moo le mosadi wa gagwe yo a imilego. (Luka 2:3) Maria o ile a belegela ka setaleng, a robatša ngwana ka legopong. Ke moka, Modimo o ile a romela barongwa ba bantši gore ba botše badiši ba lego thabeng gore ngwana yo a sa tšwago go belegwa ke Mesia yo a holofeditšwego, goba Kriste.

Ka morago, ba bangwe le bona ba be ba tla hlatsela gore Jesu ke Mesia yo a holofeditšwego. Moporofeta Jesaya o be a boletše e sa le pele gore go tla ba le monna yo a bego a tla tšwelela e le gore a lokiše tsela bakeng sa modiro wa Mesia o bohlokwa. (Jesaya 40:3) Monna yoo e be e le Johane Mokolobetši. Ge a be a bona Jesu, o ile a goeletša ka gore: “Bonang, Kwana ya Modimo e tlošago sebe sa lefase!” Ba bangwe ba barutiwa ba Johane ba ile ba latela Jesu gatee-tee. Yo mongwe wa bona o boletše gore: “Re hweditše Mesia.”—Johane 1:29, 36, 41.

Go be go e-na le bohlatse bjo bongwe. Ge Johane a kolobetša Jesu, Jehofa ka boyena o ile a bolela a le legodimong. A diriša moya o mokgethwa, o ile a tlotša Jesu gore e be Mesia gomme a re: “Yo ke Morwa wa-ka, morategi, yo ke mo amogetšego.” (Mateo 3:16, 17) Mesia yo e bego e le kgale a holofeditšwe o be a tšweletše!

O tšweletše neng? Ka ngwaga wa 29 C.E., ka nako e beilwego ge go fela nywaga e 483 yeo e boletšwego e sa le pele ke Daniele. Ee, ye ke karolo ya bohlatse bjo bo ka se kego bja ganetšwa bja gore Jesu ke Mesia, goba Kriste. Lega go le bjalo, ke molaetša ofe woo a bego a tla o tsebiša batho nakong ya ge a le lefaseng?

—E theilwe go Mateo dikgaolo 1 go ya go 3; Mareka kgaolo 1; Luka kgaolo 2; Johane kgaolo 1.

Ithute ka mo go oketšegilego

Jesu Kriste ke Mang?

Ithute lebaka leo Jesu a ilego a hwa, seo se bolelwago ke topollo, le gore ke eng seo Jesu a se dirago gona bjale.

Maria o Ile a “Akanya ka Tšona Pelong ya Gagwe”

Dilo tšeo di diragaletšego Maria kua Betlelehema di ile tša matlafatša tumelo ya gagwe dikholofetšong tša Jehofa.

Josefa o Ile a Šireletša, a Fepa le go Kgotlelela

Josefa o ile a šireletša lapa la gagwe ka ditsela dife? Ke ka baka la’ng a ile a ya Egipita le Maria le Jesu?

Modimo o Rulaganya go Phološa Batho

Mesia o akaretšwa bjang kholofetšong yeo Modimo a e dirilego go Aborahama? Ithute kamoo Modimo a tlago go lokolla batho bolwetšing, tlaišegong le lehung.