Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Beibele—E na le Molaetša Ofe?

 Karolo 6

Jobo o Boloka Potego

Jobo o Boloka Potego

Sathane o belaela potego ya Jobo pele ga Modimo, eupša Jobo o dula a botegela Jehofa

NA MOTHO le ge e le ofe a ka dula a botegela Modimo ge e ba a lekwa ka mo go feletšego le ge e ba go bonala go kwa go sa mo tlišetše mehola e bonagalago? Potšišo yeo e ile ya botšišwa—gomme ya arabja—ka seo se ilego sa diragalela monna yo a bitšwago Jobo.

Ge Baisiraele ba be ba sa le Egipita, Jobo, yo e lego motswalo wa Aborahama, o be a dula nageng yeo ga bjale e lego Arabia. Kgabagareng, kua legodimong barongwa ba ile ba bokana pele ga Modimo gomme Sathane wa lerabele le yena o be a le gare ga bona. A le pele ga barongwa bao, Jehofa o ile a bolela gore o bota mohlanka wa gagwe yo a botegago Jobo. Ge e le gabotse, Jehofa o ile a re go be go se na motho yo mongwe yo a botegago go swana le Jobo. Eupša Sathane o ile a re Jobo o hlankela Modimo feela ka gobane Modimo a mo šegofatša e bile a mo šireletša. Sathane o ile a bolela gore ge e ba Jobo a ka amogwa dilo ka moka tšeo a nago le tšona, o tla roga Modimo.

Modimo o ile a dumelela Sathane gore pele a amoge Jobo lehumo la gagwe le bana ba gagwe ke moka a mo otle ka bolwetši. A sa lemoge gore Sathane ke yena a ikarabelago ka seo, Jobo o be a sa kwešiše lebaka leo ka lona Modimo a dumeletšego gore a welwe ke diteko tše. Lega go le bjalo, Jobo ga se a ka a lahla Modimo.

Bagwera ba bararo ba maaka ba ile ba tla go Jobo. Ka lelokelelo la dipolelo tšeo di ngwadilwego ka pukung ya Jobo, banna bao ka phošo ba ile ba leka go kgodiša Jobo gore Modimo o be a mo otla ka baka la dibe tšeo a di dirilego ka sephiring. Ba ile ba ba ba bolela gore Modimo ga a kgahlišwe ke bahlanka ba gagwe e bile ga a ba bote. Jobo o ile a gana dipolelo tša bona tšeo di fošagetšego. Ka kgodišego, Jobo o ile a bolela gore o tla dula a botega go fihla lehung!

Eupša Jobo o ile a dira phošo ya go tshwenyega ka mo go feteletšego ka go itokafatša. Lesogana le bitšwago Elihu, leo le bego le theeditše poledišano ya bona ka moka, le ile la thoma go bolela. Elihu o ile a kgalema Jobo ka baka la go palelwa ga gagwe ke go kwešiša gore go godišwa ga bogoši bja Jehofa Modimo ke taba ya bohlokwa kudu go feta go phagamišwa ga motho le ge e le ofe. Le gona, Elihu o ile a kgalema bagwera ba maaka ba Jobo ka matla.

Ke moka, Jehofa Modimo o ile a bolela le Jobo gomme a mo phošolla. A diriša dilo tšeo di makatšago tlholong, Jehofa o ile a ruta Jobo gore motho ke yo monyenyane kudu ge a bapetšwa le Modimo. Ka boikokobetšo Jobo o ile a amogela phošollo yeo e tšwago go Modimo. Ka ge a e-na le ‘maikwelo a borutho a bonolo kudu e bile e le yo a gaugelago,’ Jehofa o ile a fodiša Jobo, a atiša lehumo la gagwe gabedi gomme a mo šegofatša ka bana ba lesome. (Jakobo 5:11) Ka go dula a botegela Jehofa mola a lebeletšane le teko e šoro, Jobo o ile a araba ka katlego tlhohlo ya Sathane ya gore batho ba ka se dule ba botegela Modimo ge ba lekwa.

E theilwe pukung ya Jobo.

Ithute ka mo go oketšegilego

“Na Modimo o Hloka Toka?”

Ge e ba Jehofa a hloile go hloka toka, ke ka baka la’ng go tletše kudu mo lefaseng?