Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Beibele—E na le Molaetša Ofe?

 Karolo 17

Jesu o Ruta ka Mmušo wa Modimo

Jesu o Ruta ka Mmušo wa Modimo

Jesu o ruta barutiwa ba gagwe dilo tše dintši, eupša sehlogo sa gagwe ke se tee—Mmušo wa Modimo

KE’NG seo Jesu a bego a tletše go se dira lefaseng? Yena ka boyena o boletše gore: “Ke swanetše go bolela ditaba tše dibotse tša mmušo wa Modimo, gobane ke sona se ke se rometšwego.” (Luka 4:43) Ela hloko dilo tše nne tšeo Jesu a di rutilego ka Mmušo, e lego sehlogo se segolo sa molaetša wa gagwe.

1. Jesu e be e tla ba Kgoši. Jesu o boletše ka go lebanya gore ke Mesia yo a holofeditšwego. (Johane 4:25, 26) Le gona, o ile a bontšha gore ke Kgoši yeo moporofeta Daniele a bego a e bone ponong. Jesu o boditše baapostola ba gagwe gore ka letšatši le lengwe o tla dula ‘sedulong sa bogoši sa letago’ le gore le bona ba tla dula didulong tša bona tša bogoši. (Mateo 19:28) O ile a bolela ka sehlopha se sa babuši e le “mohlatswana” wa gagwe, le gona o ile a bolela gore o na le “dinku tše dingwe,” tšeo e bego e se karolo ya sehlopha seo.—Luka 12:32; Johane 10:16.

2. Mmušo wa Modimo o tla godiša toka ya kgonthe. Jesu o bontšhitše gore Mmušo o tlo fediša go hloka toka ka go kgethagatša, goba go dira gore leina la Jehofa Modimo e be le lekgethwa le ka go tloša kgobogo ka moka yeo Sathane a e pharilego go lona ga e sa le go tloga borabeleng bja tšhemong ya Edene. (Mateo 6:9, 10) Jesu gape o be a sa kgetholle batho go ya ka maemo gomme o be a ruta banna le basadi, bahumi le badiidi. Le ge thomo ya gagwe e be e le go ruta Baisiraele, o ile a thuša le Basamaria le Bantle, goba bao e sego Bajuda. Go fapana le baetapele ba bodumedi ba mehleng ya gagwe, o be a sa kgetholle goba go beba sefahlego.

3. Mmušo wa Modimo e ka se be karolo ya lefase le. Jesu o phetše nakong ya khuduego e kgolo ya dipolitiki. Motse wa gabo o be o bušwa ke mmušo wa naga e šele. Lega go le bjalo, ge batho ba be ba leka go mo tsenya dipolitiking, o ile a tšhaba. (Johane 6:14, 15) O ile a botša radipolitiki yo mongwe gore: “Mmušo wa-ka ga se karolo ya lefase le.” (Johane 18:36) Go balatedi ba gagwe o itše: ‘Ga le karolo ya lefase.’ (Johane 15:19) O be a sa ba dumelele go diriša dibetša, gaešita le ge e be e le go mo šireletša.—Mateo 26:51, 52.

“A tloga . . . motsaneng o mongwe go ya go o mongwe a bolela le go tsebatša ditaba tše dibotse tša mmušo wa Modimo.”Luka 8:1

4. Motheo wa pušo ya Kriste e be e tla ba lerato. Jesu o holofeditše gore o tla lapološa batho, a ba imolla morwalo. (Mateo 11:28-30) O ile a phethagatša kholofetšo ya gagwe. O ile a nea dikeletšo tše bohlale le tše kwagalago mabapi le go lebeletšana le dipelaelo, go kaonefatša ditswalano, go efoga go rata dilo tše di bonagalago le mabapi le go hwetša lethabo. (Mateo, dikgaolo 5-7) Ka ge a be a e-na le lerato, batho ba mehuta ka moka ba be ba kgona go mmatamela. Gaešita le bao ba bego ba gateletšegile ba be ba kgeregela go yena, ba kgodišegile gore o tla ba swara ka botho le seriti. Ruri Jesu e tla ba Mmuši yo botse!

Go na le tsela e nngwe e matla yeo ka yona Jesu a ilego a ruta ka Mmušo wa Modimo. O ile a dira mehlolo e mentši. Ke ka baka la’ng a ile a dira bjalo? Anke re bone.

—E theilwe dipukung tša Mateo, Mareka, Luka le Johane.

Ithute ka mo go Oketšegilego

MOROKAMI

Mmušo wa Modimo—Seo o se Bolelago go Jesu

Jesu o boletše ka Mmušo kudu go feta kamoo a boletšego ka taba le ge e le efe e nngwe.

MOROKAMI

Mmušo wa Modimo—O tla Bolela Eng go Wena?

Ka tekanyo e kgolo, karabo e ithekgile ka wena.

Ke Eng Seo ge e le Gabotse Beibele e se Rutago?

Mmušo wa Modimo ke Eng?

Batho ba bantši ba tseba Thapelo ya Morena. Ke eng seo se bolelwago ke polelwana: “Mmušo wa gago a o tle”