Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Beibele—E na le Molaetša Ofe?

 Karolo 19

Jesu o Porofeta ka Ditiragalo Tšeo di Tlago go Kgoma Lefase ka Moka

Jesu o Porofeta ka Ditiragalo Tšeo di Tlago go Kgoma Lefase ka Moka

Jesu o bolela ka dipontšho tšeo di tlago go swaya gore o a buša le go swaya bofelo bja tshepedišo ye ya dilo

THABENG ya Mehlware, moo Jerusalema le tempele ya yona di bonagalago gabotse, baapostola ba Jesu ba bane ba ile ba mmotšiša ka thopeng mabapi le dilo tšeo a di boletšego. Jesu o be a sa tšwa go bolela gore Tempele ya Jerusalema e tla fedišwa. Lebakeng le lengwe pejana, o be a ba boditše ka ‘bofelo bja tshepedišo ya dilo.’ (Mateo 13:40, 49) Ga bjale baapostola ba mmotšiša gore: “Pontšho ya go ba gona ga gago le ya bofelo bja tshepedišo ya dilo e tla ba eng?”—Mateo 24:3.

Ge a araba, Jesu o ile a ba botša seo se tlago go direga pele Jerusalema e fedišwa. Eupša mantšu a gagwe a be a akaretša dilo tše dintši go feta go fedišwa ga Jerusalema. Ka morago, boporofeta bja Gagwe bo be bo tla phethagala lefaseng ka moka. Jesu o porofetile ka ditiragalo tše dintši le maemo a lefase ao a tla bopago pontšho. Pontšho yeo e be e tla bontšha bao ba lego lefaseng gore go ba gona ga Jesu e le Kgoši legodimong go thomile. Ka mantšu a mangwe, pontšho yeo e be e tla bontšha gore Jehofa Modimo o beile Jesu gore e be Kgoši ya Mmušo wa Mesia woo e bego e le kgale o holofeditšwe. Pontšho yeo e be e tla bontšha gore Mmušo o be o tla tloga o fediša bobe gomme o tliše khutšo ya kgonthe bathong. Ka gona, dilo tšeo Jesu a boletšego ka tšona di be di tla swaya mehla ya bofelo bja tshepedišo ya kgale ya dilo—tshepedišo ya bodumedi, dipolitiki le ya tša leago yeo e lego gona ga bjale—le go thoma ga e mpsha.

Ge a hlalosa seo se tlago go direga mo lefaseng nakong ya go ba gona ga gagwe e le Kgoši legodimong, Jesu o boletše gore lefaseng ka bophara go tla ba le dintwa, tlhaelelo ya dijo, ditšhišinyego tše dikgolo tša lefase le malwetši a mantši. Go hlokega ga molao go be go tla oketšega. Barutiwa ba Jesu ba kgonthe ba be ba tla bolela ditaba tše dibotse tša Mmušo wa Modimo lefaseng ka bophara. Dilo tše ka moka di be di tla feleletša ka “masetlapelo a magolo” ao a sa kago a ba gona.—Mateo 24:21.

Balatedi ba Jesu ba be ba tla tseba bjang ge masetlapelo ao a le kgaufsi? Jesu o itše: ‘Ithuteng ka mogo.’ (Mateo 24:32) Go hloga ga mogo ke leswao leo le bonagalago la gore selemo se kgaufsi. Ka mo go swanago, go direga ka nako e tee ga dilo tšeo Jesu a di boletšego e be e tla ba pontšho e bonagalago ya gore bofelo go kgaufsi. Ga go na yo a bego a tla tseba letšatši le iri yeo ka yona masetlapelo a magolo a bego a tla thoma, ge e se Tate feela. Ka gona, Jesu o ile a eletša barutiwa ba gagwe ka gore: “Dulang le phakgame, gobane ga le tsebe gore nako e beilwego e neng.”—Mareka 13:33.

—E theilwe go Mateo dikgaolo 24 le 25; Mareka kgaolo 13; Luka kgaolo 21.

^ ser. 14 Bakeng sa tlhaloso e oketšegilego ya boporofeta bja Jesu, bona kgaolo 9 a puku ya Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.

Ithute ka mo go oketšegilego

Ke Eng Seo ge e le Gabotse Beibele e se Rutago?

Na re Phela “Mehleng ya Bofelo”?

Ela hloko kamoo ditiro le boitshwaro bja batho bjo bo re dikologilego bo hlatselago gore ga bjale re phela “mehleng ya bofelo” yeo Beibele e boletšego ka yona e sa le pele.