Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Beibele—E na le Molaetša Ofe?

 Karolo 20

Jesu Kriste o a Bolawa

Jesu Kriste o a Bolawa

Jesu o thea segopotšo se sefsa, o a ekwa gomme o kokotelwa koteng

KA MORAGO ga go ruta le go dira boboledi ka nywaga e meraro le seripa, Jesu o be a tseba gore nako ya gagwe ya go phela lefaseng e be e fihla bofelong. Baetapele ba bodumedi ba Bajuda ba be ba loga leano la go mmolaya, eupša ba be ba tšhaba gore batho bao ba bego ba dumela gore ke moporofeta ba tla tsoša mpherefere. Go sa le bjalo, Sathane o ile a tutuetša yo mongwe wa baapostola ba Jesu ba 12—Judase Isikariote—gore a mo eke. Baetapele ba bodumedi ba ile ba nea Judase ditsekana tše 30 tša silifera gore a eke Jesu.

Bošegong bja gagwe bja mafelelo, Jesu o ile a bokana gotee le baapostola ba gagwe gore ba gopole Paseka. Ka morago ga go raka Judase, o ile a thea segopotšo se sefsa, Sejo sa Morena sa Mantšiboa. O ile a tšea borotho, a rapela gomme a ngwathela baapostola bao ba šetšego ba 11. A re: “Se se bolela mmele wa-ka wo o tlago go newa ka baka la lena. Dulang le dira se e le go nkgopola.” O dirile bjalo le ka senwelo sa beine, a re: “Senwelo se se bolela kgwerano e mpsha ka baka la madi a-ka.”—Luka 22:19, 20.

Bošegong bjoo Jesu o ile a botša baapostola ba gagwe dilo tše dintši. O ile a ba nea taelo e mpsha—gore ba ratane ka lerato leo le se nago boithati. O itše: “Bohle ba tla tseba ka se gore le barutiwa ba-ka, ge e ba le ratana.” (Johane 13:34, 35) O ile a ba kgothaletša gore ba se ke ba dumelela dipelo tša bona di tshwenywa ke ditiragalo tše kwešago bohloko tšeo di bego di tla direga. Jesu o ile a ba rapelela ka mo go tseneletšego. Ba ile ba opela ditumišo ba le gotee gomme ba tšwa e le bošego.

Ge ba le tšhemong ya Getsemane, Jesu o ile a khunama a ntšha seo se lego pelong ya gagwe ka thapelo. Go se go ye kae, sehlopha sa madira, baperisita le batho ba bangwe se ile sa tla go mo golega. Judase o ile a batamela gomme a hlaola Jesu ka go mo atla. Ge madira a golega Jesu, baapostola ba ile ba tšhaba.

A eme pele ga lekgotla le le phagamego la Bajuda, Jesu o ile a itlhalosa e le Morwa wa Modimo. Lekgotla leo le ile la mmona molato wa thogako gomme la mo ahlolela lehu. Ke moka, Jesu o ile a išwa go Mmušiši wa Moroma Pontio Pilato. Gaešita le ge a hweditše Jesu a se na molato, o ile a mmušetša sehlopheng seo se bego se goeletša gore a bolawe.

Jesu o ile a išwa Gologotha, moo madira a Roma a ilego a mo kokotela koteng. Ka mohlolo, mosegare wa sekgalela o ile wa fetoga lefsifsi. Ka morago thapameng yeo, Jesu o ile a hwa gomme gwa ba le tšhišinyego e kgolo ya lefase. Setopo sa gagwe se ile sa bewa ka lebitleng leo le epilwego mafsikeng. Letšatšing le le latelago, baperisita ba ile ba tswalela lebitla gomme ba bea moleti mojakong wa lona. Na Jesu o be a tla dula sa ruri ka lebitleng leo? Aowa. Mohlolo o mogolo go e feta ka moka o be o le kgaufsi le go direga.

—E theilwe go Mateo dikgaolo 26 le 27; Mareka dikgaolo 14 le 15; Luka dikgaolo 22 le 23; Johane dikgaolo 12 go ya go 19.

^ ser. 15 Bakeng sa tsebišo e oketšegilego mabapi le bohlokwa bja lehu la Jesu la sehlabelo, bona matlakala 47-56 ka pukung ya Ke Eng Seo ge e le Gabotse Beibele e se Rutago?

Ithute ka mo go oketšegilego

Topollo—Mpho e Kgolo Kudu ya Modimo

Topollo ke eng? E bolela’ng go wena?

Jehofa o Lokišetša “Topollo Bakeng sa go Lopolla ba Bantši”

Thuto e bonolo eupša e le e kwagalago e ka go thuša go batamela kgaufsi le Modimo.