Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Beibele—E na le Molaetša Ofe?

 Karolo 23

Ditaba tše Dibotse di a Phatlalatšwa

Ditaba tše Dibotse di a Phatlalatšwa

Paulo o thoma maeto a boboledi a sepela ka sekepe le ka maoto

KA MORAGO ga gore a sokologe, Paulo o ile a bolela ditaba tše dibotse tša Mmušo wa Modimo ka phišego—eupša ga bjale monna yo yoo pele e bego e le moganetši o be a lebeletšana gantši le kganetšo e šoro. Moapostola yo yo a fišegago o ile a tšea maeto a mmalwa a boboledi, a e-ya mafelong a kgole e le gore a phatlalatše ditaba tše dibotse tša Mmušo wa Modimo o tlago go phethagatša morero wa Modimo wa mathomong bakeng sa batho.

Ge a le leetong la gagwe la mathomo la boboledi kua Lisitara, Paulo o ile a fodiša monna yo a belegwego a golofetše. Mašaba a ile a thoma go goelela a re Paulo le Baranaba yo a bego a sepela le yena ke medimo. Banna ba ba babedi ba be ba sa kgone go thibela batho go ba direla dihlabelo. Lega go le bjalo, ka morago mašaba ao a ile a kgatla Paulo ka mafsika gomme a mo tlogela a nagana gore o hwile, ka ge a be a tutueditšwe ke manaba a Paulo. Paulo o ile a phologa tlhaselo yeo gomme ge nako e dutše e e-ya a boela motseng woo e le gore a matlafatše barutiwa ka mantšu a kgothatšago.

Bakriste ba bangwe ba Bajuda ba ile ba phegelela gore badumedi bao e sego Bajuda ba swanetše go kgomarela dikarolo tše itšego tša Molao wa Moše. Paulo o ile a iša taba yeo go baapostola le banna ba bagolo kua Jerusalema. Ka morago ga go hlahloba Mangwalo ka kelohloko le ka tlhahlo ya moya o mokgethwa wa Modimo, banna bao ba ile ba ngwalela diphuthego gomme ba di kgothaletša gore di ile borapedi bja medimo ya diswantšho, go ja madi gotee le nama e sa ntšhwago madi le bootswa. Ditaelo tše bjalo e be e le ‘dilo tšeo di nyakegago,’ eupša go di boloka go be go sa nyake gore motho a latele Molao wa Moše.—Ditiro 15:28, 29.

Ge a be a le leetong la gagwe la bobedi la boboledi, Paulo o ile a etela Berea, yeo ga bjale e lego Gerika ya mehleng yeno. Bajuda bao ba dulago moo ba ile ba amogela lentšu ka phišego, ka mehla ba hlahloba Mangwalo e le gore ba kgonthišege ka seo a se rutago. Le gona moo o ile a gapeletšega gore a fetele pele ka baka la kganetšo gomme nakong ye o ile a fetela Athene. A eme pele ga sehlopha sa dirutegi tša Athene, Paulo o ile a nea polelo e matla yeo e re beelago mohlala wa go se kgopiše ba bangwe, go diriša temogo le go bolela ka bokgwari.

Ka morago ga leeto la boraro la boboledi, Paulo o ile a ya Jerusalema. Ge a be a le tempeleng, Bajuda ba ile ba tsoša mpherefere gomme ba nyaka go mmolaya. Madira a Roma a ile a tsena ditaba gare gomme a botšološiša Paulo. Bjalo ka moagi wa Roma, ka morago o ile a ikemela pele ga Mmušiši wa Roma e lego Felikisi. Bajuda ba be ba se na bohlatse bja go thekga ditatofatšo tšeo ba latofatšago Paulo ka tšona. E le go thibela Mmušiši yo mongwe wa Roma e lego Fesito gore a se ke a mmušetša go Bajuda, Paulo o ile a re: “Ke ipiletša go Kesara!” Fesito o ile a araba ka gore: “O tla ya go Kesara.”—Ditiro 25:11, 12.

Ke moka, Paulo o ile a išwa Italia ka sekepe e le gore a ye go sekišwa. Ka ge sekepe seo a bego a sepetšwa ka sona se ile sa robega leetong leo, o ile a swanelwa ke go fetša marega a le sehlakahlakeng sa Melite. Ge mafelelong a fihla Roma, o ile a fetša nywaga e mebedi a dula ka ntlong e hirilwego. Gaešita le ge a be a hlapeditšwe ke madira, moapostola yo yo a bego a dula a fišega o ile a tšwela pele go bolela ka Mmušo wa Modimo go bohle bao ba bego ba mo etela.

—E theilwe go Ditiro 11:22–28:31.