Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Beibele—E na le Molaetša Ofe?

 Karolo 11

Dikopelo tše di Buduletšwego Tšeo di Homotšago le Tšeo di Rutago

Dikopelo tše di Buduletšwego Tšeo di Homotšago le Tšeo di Rutago

Dafida le banna ba bangwe ba hlama dikopelo tšeo di tlago go dirišwa borapeding. Puku ya Dipsalme e hupere mantšu a dikopelo tše 150

PUKU ya Dipsalme, yeo e lego e kgolo go di feta ka moka ka Beibeleng, e dirilwe ka dikopelo tše kgethwa. Dikopelo tše tše kgethwa di ngwadilwe ka nywaga e ka bago e 1000. Puku ya Dipsalme e na le mantšu a kgomago kudu a bontšhago tumelo ao a kilego a ngwalwa. Ka pukung ye go tšweletšwa maikwelo a batho ao a fapa-fapanego, go tloga go a lethabo, tumišo, tebogo go ya go a manyami le go itshola. Go molaleng gore bangwadi ba Dipsalme ba be ba e-na le tswalano ya kgaufsi le Modimo e bile ba mmota. Ela hloko ditaba tše dingwe tšeo di tšweletšwago mantšung a dikopelo tšeo.

Jehofa ke Mmuši yo a swanelegago wa legohle yo a swanelwago ke go rapelwa le go tumišwa. Go Psalme 83:18 re bala gore: “Ba tsebê xobane Morêna ké Wene, Mong’a ’ina leo O nnoši, Yo-xodimo-dimo Kukama-lefase.” Dipsalme tše mmalwa di tumiša Jehofa ka baka la mediro ya gagwe ya tlholo, e bjalo ka magodimo a tletšego dinaledi, dilo tše makatšago tšeo di phelago mo lefaseng gotee le tsela e makatšago yeo mmele wa motho o bopilwego ka yona. (Dipsalme 8, 19, 139, 148) Tše dingwe di nea Jehofa letago bjalo ka Modimo yo a gatago mogato bakeng sa go phološa le go šireletša bao ba mmotegelago. (Dipsalme 18, 97, 138) Tše dingwe tšona di mo godiša bjalo ka Modimo wa toka yo a imollago bao ba gateletšegilego le go otla ba kgopo.—Dipsalme 11, 68, 146.

Jehofa o thuša le go homotša bao ba mo ratago. Mohlomongwe Psalme e tsebjago kudu ke ya bo-23, yeo go yona Dafida a hlalosago Jehofa e le Modiši yo lerato yo a hlahlago, a šireletšago le go hlokomela dinku tša gagwe. Psalme 65:2 e gopotša barapedi ba Modimo gore Jehofa ke “Mokwi wa dithapêlô.” Ba bantši bao ba ilego ba dira dibe tše dikgolo ba ile ba homotšwa ke Dipsalme 39 le 51, moo Dafida a hlalosago go itshola ga gagwe go tšwa pelong ka mantšu a kgomago pelo ka baka la dibe tše dikgolo tšeo a di dirilego le moo a hlalosago tumelo ya gagwe ya gore Jehofa o tla mo lebalela. Psalme 55:22 e hupere keletšo ya gore re bote Jehofa le go lahlela merwalo ya rena ka moka go Yena.

Jehofa o tla fetoša lefase a diriša Mmušo wa Mesia. Ka ntle le pelaelo, dikarolo tše dintši tša Dipsalme di bolela ka Mesia, e lego Kgoši e boletšwego e sa le pele. Psalme 2 e porofeta gore Mmuši yo o tla fediša ditšhaba tše kgopo tšeo di mo ganetšago. Psalme 72 e utolla gore Kgoši ye e tla fediša tlala, go hloka toka le kgateletšego. Go ya ka Psalme 46:9, Modimo o tla fediša ntwa gaešita le dibetša tša ntwa a diriša Mmušo wa Mesia. Go Psalme 37, re bala gore ba kgopo ba tla fedišwa mola ba lokilego ba tla phela ka mo go sa felego lefaseng, ba thabela khutšo le kwano lefaseng ka bophara.

—E theilwe pukung ya Dipsalme.

Ithute ka mo go oketšegilego

Modimo a ka go Homotša

Go thwe’ng ge e ba mathata a gago a bonagala a se bohlokwa ge a bapišwa le a batho ba dibilione bao ba lego lefaseng, bao bontši bja bona ba nago le mathata a magolo?

Mmušo wa Modimo ke Eng?

Kgoši ya Mmušo wa Modimo ke mang, gomme ke eng seo Mmušo woo o tlago go se fihlelela?