Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Beibele—E na le Molaetša Ofe?

 Karolo 12

Bohlale bja Modimo bjo bo Lebišago Bophelong

Bohlale bja Modimo bjo bo Lebišago Bophelong

Puku ya Diema e dirilwe ka dikeletšo tše buduletšwego—tšeo bontši bja tšona bo ngwadilwego ke Solomone—tšeo di re neago tlhahlo bophelong bja letšatši le letšatši

NA Jehofa ke Mmuši yo bohlale? Tsela yeo ka yona re ka arabago potšišo ye ka mo go feletšego ke ka go hlahloba keletšo yeo a e neago. Na e a šoma? Na go e diriša go dira gore bophelo bo kaonefale le gore e be bjoo bo nago le morero? Kgoši Solomone yo bohlale o ngwadile diema tše makgolo. Di kgoma karolo e nngwe le e nngwe ya bophelo. Ela hloko mehlala e mengwe.

Go Bota Modimo. Potego e bohlokwa kudu e le gore re be le tswalano e botse le Jehofa. Solomone o ngwadile gore: “Bôʹta Modimo ka pelo ka moka; O se ké wa ithêkxa ka xo fo re: Ke n’e thlaloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.” (Diema 3:5, 6) Go bota Modimo ka go tsoma tlhahlo ya gagwe le go mo kwa go dira gore bophelo bja rena bo be le morero kudu. Bophelo bjo bjalo bo dira gore motho a thabiše pelo ya Modimo gomme bo nea Jehofa karabo ya kgang yeo lenaba la Gagwe Sathane le e rotošitšego.—Diema 27:11.

Go dirišana le ba bangwe ka bohlale. Lehono, keletšo ya Modimo go banna, basadi le bana ke yeo e lego nakong go feta le ge e le neng pele. Modimo o eletša monna gore a ‘thabele mogatšagwe wa mehla yela e sa le yo mofsa’ le gore a dule a mmotegela. (Diema 5:18-20) Ka pukung ya Diema, basadi bao ba nyetšwego ba hwetša tlhaloso e kgahlišago ya mosadi wa sethakga yoo a dirago gore monna wa gagwe le bana ba gagwe ba mo hlomphe. (Diema, kgaolo 31) Le gona, bana ba eletšwa gore ba kwe batswadi ba bona. (Diema 6:20) Puku ye e bile e bontšha gore segwera se bohlokwa, ka gobane go ikarola go tswala boithati. (Diema 18:1) Bagwera ba ka re tutuetša ka tsela e botse goba e mpe, ka gona re swanetše go ba kgetha ka tsela e bohlale.—Diema 13:20; 17:17.

Go itshwara ka tsela e bohlale. Puku ya Diema e na le keletšo e bohlokwa ya kamoo re ka phemago go diriša dino-tagi gampe le kamoo re ka hlagolelago maikwelo ao a ka bago le mafelelo a mabotse bophelong bja rena le go lwantšha maikwelo a kotsi gotee le go ba bašomi ba mafolofolo. (Diema 6:6; 14:30; 20:1) E lemoša gore go bota kahlolo ya batho e sego ya Modimo go lebiša kotsing. (Diema 14:12) E re kgothaletša gore re šireletše motho wa ka gare, pelo, kgahlanong le ditutuetšo tšeo di senyago gomme e re gopotša gore ‘bophelo bo hlaga pelong.’—Diema 4:23.

Batho ba dimilione lefaseng ka bophara ba hweditše gore go phela ka keletšo yeo go dira gore bophelo e be bjo bokaone. Ka baka leo, ba na le lebaka le le kwagalago la go amogela Jehofa bjalo ka Mmuši wa bona.

—E theilwe pukung ya Diema.

Ithute ka mo go oketšegilego

Na “Bohlale bjo bo Tšwaxo Xodimo” bo a Šoma Bophelong bja Gago?

Beibele e bolela ka dilo tše nne tšeo di ka go thušago go hlagolela bohlale bjo bo tšwago go Modimo.