Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Beibele—E na le Molaetša Ofe?

 Karolo 10

Solomone o Buša ka Bohlale

Solomone o Buša ka Bohlale

Jehofa o nea Kgoši Solomone pelo e bohlale; nakong ya pušo ya Solomone Baisiraele ba thabela khutšo e kgolo le katlego

BOPHELO bo be bo tla ba bjang ge nkabe setšhaba ka moka le mmuši wa sona ba be ba latela Jehofa bjalo ka Mmuši wa bona gomme ba e-kwa melao ya Gagwe? Karabo e ile ya bonala nakong ya pušo ya nywaga e 40 ya Kgoši Solomone.

Pele Dafida a e-hwa, o ile a kgetha Solomone bjalo ka mohlatlami wa gagwe. Modimo o ile a botša Solomone ge a be a le ditorong gore a mo kgopele selo le ge e le sefe. Solomone o ile a kgopela bohlale le tsebo e le gore a ahlole batho ka toka le ka bohlale. Jehofa o ile a thabišwa ke seo gomme a nea Solomone bohlale le pelo e kwešišago. Le gona, Jehofa o ile a mo holofetša mahumo, letago le go phela nako e telele ge e ba a dula a mo kwa.

Solomone o ile a tuma ka baka la dikahlolo tša gagwe tše bohlale. Ka nako e nngwe, basadi ba babedi ba ile ba lwela ngwana wa mošemanyana, yo mongwe le yo mongwe a bolela gore ngwana ke wa gagwe. Solomone o ile a laela gore ngwana yoo a ntšhwe diripa tše pedi gomme mosadi yo mongwe le yo mongwe a newe seripa. Mosadi wa pele o ile a dumela, eupša mosadi yoo ngwana e lego wa gagwe ka kgonthe o ile a kgopela gore ngwana yoo a newe mosadi wa pele. Ka gona, Solomone o ile a bona gabotse gore mosadi yo a nago le kwelobohloko ke yena mmago ngwana gomme a mo nea ngwana yoo. Kapejana, Isiraele ka moka e ile ya kwa ka phetho yeo ya kahlolo gomme batho ba lemoga gore Solomone o be a e-na le bohlale bja Modimo.

O mongwe wa mediro e megolo yeo Solomone a ilego a e dira e bile wa go agela Jehofa tempele—moago o mobotse kua Jerusalema woo e bego e tla ba lefelo la bohlokwa la borapedi Isiraeleng. Nakong ya go kgakolwa ga tempele, Solomone o rapetše ka gore: “Hleng maxodimo, le maxodimo a xodimodimo à sa kxone xo Xo lekana! Byale Ngwakô wó ke o axilexo o tlo Xo lekana bya’ng?”—1 Dikxoši 8:27.

Botumo bja Solomone bo ile bja fihla dinageng tše dingwe, gaešita le go fihla dinageng tša kgole tše bjalo ka Seba yeo e lego kua Arabia. Kgošigadi ya Seba e ile ya sepela leeto le letelele go tlo bona letago la Solomone le mahumo a gagwe gotee le go bona kamoo a lego bohlale ka gona. Kgošigadi yeo e ile ya kgahlwa kudu ke bohlale bja Solomone gotee le katlego ya Isiraele moo e ilego ya tumiša Jehofa bakeng sa go bea kgoši e bohlale bjalo sedulong sa bogoši. Ee, ka baka la tšhegofatšo ya Jehofa, pušo ya Solomone e ile ya ba e atlegilego kudu le yeo e nago le khutšo historing ya Isiraele ya bogologolo.

Ka manyami, Solomone o ile a palelwa ke go tšwela pele a dira dilo ka go dumelelana le bohlale bja Jehofa. O ile a hlokomologa taelo ya Modimo gomme a nyala basadi ba makgolo go akaretša le ba bantši bao ba bego ba rapela medimo e šele. Ganyenyane-ganyenyane, basadi ba gagwe ba ile ba mo dira gore a tlogele Jehofa gomme a rapele medimo ya diswantšho. Jehofa o ile a botša Solomone gore o tla tšeelwa karolo e nngwe ya mmušo. Modimo o itše ke karolo e nyenyane feela yeo e bego e tla šala lapeng la gagwe, ka baka la kholofetšo yeo a e holofeditšego Dafida tatagwe. Go sa šetšwe bohlanogi bja Solomone, Jehofa o ile a dula a botegela kgwerano ya Mmušo yeo a e dirilego le Dafida.

E theilwe go 1 Dikxoši dikgaolo 1-11; 2 Koronika dikgaolo 1-9; Doiteronomio 17:17.