Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Beibele—E na le Molaetša Ofe?

 Karolo 9

Baisiraele ba Kgopela go ba le Kgoši

Baisiraele ba Kgopela go ba le Kgoši

Saulo, kgoši ya pele ya Isiraele, ga a kwe Jehofa. O latelwa ke Dafida, yoo Modimo a dirago kgwerano le yena ya mmušo o tlago go ba gona ka mo go sa felego

KA MORAGO ga mehla ya Simisone, Samuele o ile a hlankela e le moporofeta le moahlodi kua Isiraele. Baisiraele ba be ba duletše go mmotša gore ba nyaka go swana le ditšhaba tše dingwe gomme ba bušwe ke kgoši ya motho. Le ge kgopelo ye e ile ya nyamiša Jehofa, o ile a laela Samuele gore a ba theetše. Modimo o ile a kgetha monna yo a ikokobeditšego yo a bitšwago Saulo gore e be kgoši. Lega go le bjalo, ge nako e dutše e e-ya Kgoši Saulo o ile a thoma go ikgogomoša le go se kwe. Jehofa o ile a mo lahla e le kgoši gomme a botša Samuele gore a kgethe kgoši e nngwe—lesogana leo le bitšwago Dafida. Lega go le bjalo, go be go tla feta nywaga pele Dafida e e-ba kgoši.

Mohlomongwe ge a be a sa le mahlalagading, Dafida o be a etela bagolo ba gagwe bao ba bego ba hlankela madireng a Saulo. Madira ka moka a be a tšhošwa ke mohlabani o tee wa lenaba, tšitširipa e bitšwago Goliata, yeo e bego e duletše go a kwera gaešita le go kwera Modimo wa ona. A galefile, Dafida o ile a amogela tlhohlo ya tšitširipa yeo ya gore a lwe le yona. Le itlhamile feela ka seraga-mabje le mafsika a mmalwa, lesogana le le ile la tšwa go yo lwa le lenaba leo la botelele bjo e ka bago bja dimithara tše tharo. Ge Goliata a be a mo kwera, Dafida o ile a mmotša gore yena o itlhamile kudu go feta tšitširipa yeo, ka ge Dafida a be a e-lwa ka leina la Jehofa Modimo! Dafida o ile a bolaya Goliata ka lefsika letee gomme a mo kgaola hlogo ka sabola ya tšitširipa yeo. Madira a Bafilisita a ile a tšhaba a tšhogile.

Mathomong, Saulo o be a kgahlilwe ke sebete sa Dafida gomme a mo dira molaodi wa madira. Eupša katlego ya Dafida e ile ya dira gore Saulo a mo hufegele kudu. Dafida o ile a swanelwa ke go tšhaba e le gore a phološe bophelo bja gagwe gomme a phela e le moneneri ka nywaga e mentši. Lega go le bjalo, Dafida o ile a dula a botegela kgoši yeo e bego e nyaka go mmolaya, a re Kgoši Saulo o kgethilwe ke Jehofa Modimo. Mafelelong, Saulo o ile a hwa ntweng. Nakwana ka morago ga moo, Dafida o ile a ba kgoši, go etša ge Jehofa a be a holofeditše.

“Sedulô sa mmušô wa xaxwe ke tlo se thêkxa ka xo sa felexo.”2 Samuele 7:13

Ka ge e le kgoši, Dafida o be a kganyoga go agela Jehofa tempele. Lega go le bjalo, Jehofa o ile a botša Dafida gore e tlo agwa ke yo a tšwago lešikeng la gagwe. Motho yoo e ile ya ba Solomone morwa wa Dafida. Lega go le bjalo, Modimo o ile a putsa Dafida ka go dira kgwerano e kgahlišago le yena: Lešika la gagwe le be le tla tšweletša dikgoši tše go sego tšeo di swanago le tšona. Mafelelong le be le tla tšweletša Mohlakodiši, goba Peu yeo e holofeditšwego Edene. Mohlakodiši yoo e be e tla ba Mesia, yeo e bolelago “Motlotšwa,” yo a kgethilwego ke Modimo. Jehofa o ile a holofetša gore Mesia e be e tla ba Mmuši wa Mmušo woo o tlago go ba gona ka mo go sa felego.

A leboga seo kudu, Dafida o ile a kgoboketša ditlabakelo tša go aga le mafsika a bohlokwa bakeng sa go aga tempele. Le gona, o ile a hlama dipsalme tše dintši tšeo di buduletšwego. Ge a be a le kgaufsi le go hwa, Dafida o ile a dumela gore: “Môya wa Morêna ó bolêla ka nna, Leleme la-ka le n’e ’fokô la’xwe.”—2 Samuele 23:2.

E theilwe go 1 Samuele; 2 Samuele; 1 Koronika; Jesaya 9:6; Mateo 21:9; Luka 1:32; Johane 7:42.

Ithute ka mo go oketšegilego

Dikgoši tše Lokilego le tše sa Lokago

Go tlile bjang gore Isiraele e aroganywe ka mebušo e mebedi?