Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Mmušo wa Modimo o a Buša!

 KGAOLO 17

Go Tlwaetša Bagoeledi ba Mmušo wa Modimo

Go Tlwaetša Bagoeledi ba Mmušo wa Modimo

MOKOTABA WA KGAOLO YE

Kamoo dikolo tša pušo ya Modimo di lokišeletšago bagoeledi ba Mmušo wa Modimo go phetha dikabelo tša bona

1-3. Jesu o ile a rulaganya bjang gore ditaba tše dibotse di bolelwe le mafelong a mangwe, gona se se dira gore re ipotšiše dipotšišo dife?

JESU o ile a fetša nywaga e mebedi a bolela ditaba tše dibotse nageng ka moka ya Galilea. (Bala Mateo 9:35-38.) O ile a ya metseng e mentši le metsaneng, a ruta disinagogeng le go bolela ditaba tše dibotse tša Mmušo. Gohle mo a bego a di bolela gona, go be go etla mašaba a batho. Jesu o ile a re “puno ke e kgolo,” ka gona go be go nyakega bašomi ba oketšegilego.

2 Jesu o ile a rulaganya gore ditaba tše dibotse di bolelwe le mafelong a mangwe. Bjang? Ka go roma baapostola ba gagwe ba 12 gore ba ye “go bolela ka Mmušo wa Modimo.” (Luka 9:1, 2) Go ka direga gore baapostola ba ile ba ipotšiša gore ba be ba tla phetha bjang modiro woo. Pele ga ge Jesu a ka ba roma, ka lerato o ile a ba nea selo seo Tatagwe wa legodimong a mo neilego sona—o ile a ba nea tlwaetšo.

3 Re ka thoma go ipotšiša dipotšišo tša go swana le gore: Jesu o ile a hwetša tlwaetšo efe go Tatagwe? Jesu o ile a nea baapostola ba gagwe tlwaetšo efe? Go thwe’ng ka lehono—na Kgoši Mesia o neile balatedi ba gagwe tlwaetšo ya gore ba phethe bodiredi bja bona? Ge e ba a ba neile yona, o dirile seo bjang?

“Ke Bolela Dilo tše go Etša ge Tate a Nthutile”

4. Jesu o ile a rutwa neng ke Tatagwe, gona kae?

4 Jesu o ile a dumela ntle le go dikadika gore o rutilwe ke Tatagwe. Nakong ya bodiredi bja gagwe, Jesu o ile a re: “Ke bolela dilo tše go etša ge Tate a nthutile.” (Joh. 8:28) O ile a rutwa neng, gona kae? Ka ge e le Morwa wa Modimo wa leitšibulo, ga go pelaelo gore Modimo o ile a thoma go mo ruta gateetee ka morago ga go mmopa. (Bakol. 1:15) Ge a be a na le Tatagwe kua legodimong, Morwa yo o feditše nywaga e sa balegego a theeditše ‘Mohlahli yo Mogolo’ le go ithuta go yena. (Jes. 30:20) Ka go re’alo, Morwa yo o ile a ithuta dilo tše dintši kudu ka dika tša Tatagwe, mediro ya gagwe le merero ya gagwe.

5. Modimo o ile a nea Morwa wa gagwe tlwaetšo efe mabapi le bodiredi bjo a bego a tlo bo phetha mo lefaseng?

5 Ka nako ya maleba, Jehofa o ile a ruta Morwa wa gagwe ka bodiredi bjo a bego a tlo bo phetha mo lefaseng. Ela hloko boporofeta bjo bo hlalosago tswalano ya Mohlahli yo yo Mogolo le Morwa wa gagwe wa leitšibulo. (Bala Jesaya 50:4, 5.) Boporofeta bjo bo re Jehofa o be a tsoša Morwa yo wa gagwe “mesong  e mengwe le e mengwe.” Seswantšhokgopolo se se dira gore re nagane ka morutiši yo a tsošago barutwana ba gagwe e sa le mesong gore a ba rute. Puku e nngwe yeo e hlalosago mantšu a Beibele e re: “Jehofa . . . o mo tsentšha sekolo go fo swana le barutwana, gomme a mo ruta seo a swanetšego go se ruta le kamoo a swanetšego go se ruta ka gona.” Gona moo legodimong, moo re ka go swantšhago le sekolong, Jehofa o ile a ruta Morwa wa gagwe seo a bego a “[swanetše] go se bolela le go se ruta.” (Joh. 12:49) Le gona Modimo o ile a nea Morwa wa gagwe ditaelo tša kamoo a bego a swanetše go ruta ka gona. * Ge Jesu a be a le mo lefaseng, ga se a fo diriša tlwaetšo yeo a e neilwego go phetha bodiredi bja gagwe eupša gape o ile a e diriša go tlwaetša balatedi ba gagwe gore ba phethe bodiredi bja bona.

6, 7. (a) Jesu o ile a nea baapostola ba gagwe tlwaetšo efe, gona e ile ya ba hlamela go dira’ng? (b) Jesu o kgonthišeditše gore balatedi ba gagwe ba mehleng yeno ba newa tlwaetšo efe?

6 Go etša ge go boletšwe mathomong a kgaolo ye, ke tlwaetšo efe yeo Jesu a ilego a e nea baapostola ba gagwe? Go ya ka Mateo kgaolo 10, o ile a ba nea ditaelo tše di lebanyago tša mabapi le bodiredi, go akaretša tše di latelago: moo ba bego ba swanetše go bolela gona (temana 5 le 6), seo ba bego ba swanetše go se bolela (temana 7), bohlokwa bja gore ba ithekge ka Jehofa (temana 9 le 10), kamoo ba bego ba swanetše go thoma poledišano le beng ba dintlo (ditemana 11-13), seo ba bego ba swanetše go se dira ge ba ganetšwa (temana 14 le 15) le kamoo ba bego ba swanetše go arabela ka gona ge ba tlaišwa (ditemana 16-23). * Tlwaetšo e botse yeo Jesu a ilego a e nea baapostola ba gagwe e ile ya ba hlamela go etelela pele modiro wa go bolela ditaba tše dibotse lekgolong la pele la nywaga C.E.

7 Go thwe’ng ka lehono? Jesu, yena Kgoši ya Mmušo wa Modimo, o neile balatedi ba gagwe mošomo wa bohlokwa kudu wa go bolela ‘ditaba tše dibotse tša Mmušo lefaseng ka moka gore e be bohlatse go ditšhaba tšohle.’ (Mat. 24:14) Na Kgoši ye e re tlwaeditše go phetha mošomo wo o bohlokwa kudu? Ee, e dirile bjalo! E dutše e le legodimong, Kgoši ye e kgonthišeditše gore balatedi ba yona ba newa tlwaetšo ya kamoo ba swanetšego go ruta batho bao e sego ditho tša phuthego le kamoo ba swanetšego go phetha maikarabelo a kgethegilego ka phuthegong.

Go Tlwaetša Batho ba Modimo Gore e be Bagoeledi

8, 9. (a) Morero o mogolo wa Sekolo sa Bodiredi sa Pušo ya Modimo e be e le ofe? (b) Seboka sa gare ga beke se go thušitše bjang?

8 Ke kgale mokgatlo wa Jehofa o diriša dikopano tše dikgolo le tše dinyenyane gotee le diboka tša phuthego—go swana le Seboka sa Tirelo—go tlwaeletša batho ba Modimo bodiredi. Lega go le bjalo, go thoma ka bo-1940, bana babo rena bao ba bego ba etelela pele kua ntlongkgolo ba ile ba thoma go rulaganya gore go be le dikolo tše di fapafapanego go tlwaetša batho ba Modimo.

9 Sekolo sa Bodiredi sa Pušo ya Modimo. Go etša ge re bone kgaolong e fetilego, sekolo se se thomile go swarwa ka 1943. Na morero wa sona e be e le go fo ruta barutwana go nea dipolelo tše dibotse ka phuthegong? Aowa. Morero o mogolo wa sekolo  se e be e le go tlwaetša batho ba Modimo go diriša bokgoni bja bona bja go bolela gore ba tumiše Jehofa bodireding. (Ps. 150:6) Sekolo se se be se tlwaetša bana babo rena ka moka le dikgaetšedi bao ba tšeago karolo go sona gore e be bagoeledi ba atlegago kudu ba Mmušo. Ga bjale tlwaetšo yeo e hwetšwa sebokeng sa gare ga beke.

10, 11. Ke bomang bao ba ka ingwadišago Sekolong sa Gilead, gona morero wa thuto ya sekolo se ke ofe?

10 Sekolo sa Beibele sa Watchtower sa Gilead. Sekolo sa Beibele sa Watchtower sa Gilead se thomile ka Mošupologo, February 1, 1943. Mathomong morero wa sekolo se e be e le go tlwaetša babulamadibogo le bahlanka ba bangwe bao ba lego tirelong ya nako e tletšego gore e tle e be baromiwa dinageng tše dingwe. Eupša ga e sa le go tloga ka October 2011, sekolong se go ya feela bao ba šetšego ba le tirelong e kgethegilego ya nako e tletšego, e lego babulamadibogo ba kgethegilego, balebeledi ba basepedi le basadi ba bona, ditho tša Bethele le baromiwa bao ba sego ba hlwa ba eya sekolong se.

11 Morero wa thuto ya Sekolo sa Gilead ke ofe? Yo mongwe wa bahlahli ba kgale sekolong se o re: “Morero wa thuto ye ke go matlafatša tumelo ya barutwana ka thuto e tseneletšego ya Lentšu la Modimo le go ba thuša go ba le dika tše di nyakegago tša moya gore ba kgone go lebeletšana ka katlego le ditlhohlo tša dikabelong tša bona. Le gona, morero o mogolo wa thuto ye ke go nweletša ka dipelong tša barutwana kganyogo e matla ya go botša ba bangwe ditaba tše dibotse.”—Baef. 4:11.

12, 13. Sekolo sa Gilead se bile le mafelelo afe modirong wa boboledi wa lefaseng ka bophara? Nea mohlala.

12 Sekolo sa Gilead se bile le mafelelo afe modirong wa boboledi wa lefaseng ka bophara? Ga e sa le go tloga ka 1943, batho ba ka godimo ga ba 8 500 ba neilwe tlwaetšo sekolong se, * gomme baromiwa bao ba tšwago Gilead ba hlanketše dinageng tša ka godimo ga tše 170 lefaseng ka moka. Baromiwa ba diriša gabotse tlwaetšo yeo ba e neilwego ka go beela ba bangwe mohlala o mobotse wa go ba mafolofolo bodireding le ka go ba tlwaetša. Mabakeng a mantši, baromiwa ba ile ba etelela pele modiro wa boboledi ditikologong tšeo go bego go na le bagoeledi ba sego kae ba Mmušo goba tšeo go tšona ba bego ba se gona.

13 Nagana ka seo se ilego sa direga kua Japane, moo modiro o rulagantšwego wa boboledi o ilego wa kgaotša nakong ya Ntwa ya Bobedi ya Lefase. Ka August 1949, nageng yeo go be go na le bagoeledi ba ka tlase ga ba lesome. Eupša mafelelong a ngwaga woo, baromiwa ba 13 bao ba tšwago Sekolong sa Gilead ba be ba swaregile ka modiro wa boboledi moo Japane. Baromiwa ba bangwe ba bantši ba ile ba goroga ka morago. Baromiwa ba ba ile ba thoma pele ka go šoma ditšhemo tša metseng e megolo; ke moka ka morago ba ya metseng e mengwe. Baromiwa ba ile ba kgothaletša barutwana ba bona ka mafolofolo le bagoeledi ba bangwe gore ba tsenele tirelo ya bobulamadibogo. Maiteko a bona a ile a ba le mafelelo a mabotse kudu. Gona bjale kua Japane go na le bagoeledi ba Mmušo ba ka godimo ga ba 216 000, gomme mo e ka bago 40 lekgolong ya bona ke babulamadibogo! *

14. Dikolo tša pušo ya Modimo ke bohlatse bja eng? (Bona le lepokisi le le rego, “ Dikolo tša go Tlwaetša Bagoeledi ba Mmušo,” go letlakala 188.)

 14 Dikolo tše dingwe tša pušo ya Modimo. Sekolo sa Tirelo ya Bobulamadibogo, Sekolo sa Beibele sa Banyalani ba Bakriste le Sekolo sa Beibele sa Bana Babo Rena ba Sego Lenyalong di thušitše bao ba tšwago go tšona go ba batho ba moya le go etelela pele ka mafolofolo modirong wa boboledi. * Dikolo tše ke bohlatse bjo matla bja gore Kgoši ya rena e hlamile balatedi ba yona ka mo go feletšego gore ba phethe bodiredi bja bona.—2 Tim. 4:5.

Go Tlwaetša Bana Babo Rena go Phetha Maikarabelo a Kgethegilego

15. Banna bao ba nago le maikarabelo ka phuthegong ba nyaka go ekiša Jesu ka tsela efe?

15 Na o sa gopola boporofeta bjola bja Jesaya bjo bo bontšhago Jesu a rutwa ke Modimo? Ge a be a sa le legodimong, Morwa yo wa Modimo o ile a ithuta “go araba yo a lapilego ka lentšu” le lebotse. (Jes. 50:4) Jesu o ile a diriša seo a ithutilego sona; gomme ge a be a le mo lefaseng, o ile a lapološa bao ba bego ba ‘lapile le go imelwa.’ (Mat. 11:28-30) Banna bao ba nago le maikarabelo ka phuthegong ba nyaka go lapološa bana babo bona le dikgaetšedi go swana le Jesu. E le gore ba kgone go dira seo, go  hlomilwe dikolo tše di fapafapanego go ba thuša go hlankela badumedigotee le bona ka katlego.

16, 17. Morero wa Sekolo sa Bodiredi sa Mmušo ke ofe? (Bona le mongwalo wa ka tlase.)

16 Sekolo sa Bodiredi sa Mmušo. Klase ya mathomo ya sekolo se e ile ya swarwa ka March 9, 1959, kua South Lansing, New York. Balebeledi ba basepedi gotee le bahlanka ba diphuthego (bagolo) ba ile ba laletšwa sekolong se seo se bego se tšea kgwedi. Mathomong sekolo se se be se swarwa ka Seisemane eupša ka morago sa swarwa ka maleme a mangwe, gomme ganyenyane-ganyenyane sa thoma go swarwa lefaseng ka bophara. *

Ngwanabo rena Lloyd Barry a ruta Sekolong sa Bodiredi sa Mmušo kua Japane, ka 1970

17 Ge Yearbook of Jehovah’s Witnesses ya 1962 e bolela ka morero wa Sekolo sa Bodiredi sa Mmušo e itše: “Lefaseng le la leemaema, molebeledi ka phuthegong ya Dihlatse tša Jehofa e swanetše go ba monna yo a nago le thulaganyo e le gore a tle a kgone go hlokomela ditho ka moka tša phuthego le go ba tšhegofatšo go tšona. Ka lehlakoreng le lengwe, ga se a swanela go hlokomologa lapa la gagwe a ipotša gore o hlokometše phuthego, o swanetše go ba le tekatekano. Ruri bao ba nago le maikarabelo ka phuthegong lefaseng ka bophara ba neilwe sebaka se sebotse sa go bokana gotee Sekolong sa Bodiredi sa Mmušo go tlo tlwaetšwa  go dira seo Beibele e rego molebeledi o swanetše go se dira!”—1 Tim. 3:1-7; Tito 1:5-9.

18. Batho ba Modimo ka moka ba holwa bjang ke Sekolo sa Bodiredi sa Mmušo?

18 Batho ba Modimo ka moka ba holwa ke Sekolo se sa Bodiredi sa Mmušo. Bjang? Ge bagolo le bahlanka ba bodiredi ba diriša seo ba ithutilego sona sekolong se, ba kgona go lapološa badumedigotee le bona go swana le Jesu. Na ga o ikwe o thaba ge mogolo yo lerato goba mohlanka wa bodiredi a go botša mantšu a kgothatšago, a go theetša ge o ntšha sa mafahleng goba a go etela? (1 Bathes. 5:11) Ruri banna ba bjalo ke tšhegofatšo e kgolo diphuthegong tša gabo bona!

19. Komiti ya go Ruta e okametše dikolo dife tše dingwe, gona morero wa tšona ke ofe?

19 Dikolo tše dingwe tša pušo ya Modimo. Komiti ya go Ruta ya Sehlopha se Bušago e okamela dikolo tše dingwe tšeo di tlwaetšago bana babo rena bao ba neilwego maikarabelo ka mokgatlong. Morero wa dikolo tšeo ke go thuša bana babo rena bao ba nago le maikarabelo, e lego bagolo ba phuthego, balebeledi ba basepedi le ditho tša Komiti ya Lekala, gore ba be le bokgoni kutšwanyana ge ba phetha maikarabelo a bona. Dikolo tše tšeo di theilwego Beibeleng, di kgothaletša bana babo rena ba gore ba itlhokomele moyeng le go diriša melao ya motheo ya Mangwalo ge ba dirišana le dinku tša bohlokwa tšeo Jehofa a ba laetšego gore ba di hlokomele.—1 Pet. 5:1-3.

Klase ya mathomo ya Sekolo sa Tlwaetšo ya Bodiredi kua Malawi, ka 2007

20. Ke ka baka la’ng Jesu a be a ka re ka moka ga rena re “rutwa ke Jehofa,” gona o ikemišeditše go dira’ng?

20 Go molaleng gore Kgoši Mesia o kgonthišeditše gore balatedi ba gagwe ba tlwaetšwa gabotse. Tlwaetšo ye ka moka e sepela ka lenaneo: Jehofa o tlwaeditše Morwa wa gagwe, gomme Morwa yena o tlwaeditše balatedi ba gagwe. Ke ka baka leo Jesu a bego a ka re ka moka ga rena re “rutwa ke Jehofa.” (Joh. 6:45; Jes. 54:13) Anke re ikemišetšeng go ikhola ka botlalo ka tlwaetšo yeo Kgoši ya rena e re neago yona. Le gona anke re duleng re gopola gore morero o mogolo wa tlwaetšo ye ke go re thuša go dula re tiile moyeng e le gore re kgone go phetha bodiredi bja rena ka botlalo.

^ par. 5 Re tseba bjang gore Modimo o ile a ruta Morwa wa gagwe kamoo a bego a swanetše go ruta ka gona? Nagana ka se: Go diriša ga Jesu diswantšho tše dintši ge a be a ruta go ile gwa phethagatša boporofeta bjo bo begilwego nywageng e makgolokgolo pele a ka belegwa. (Ps. 78:2; Mat. 13:34, 35) Go molaleng gore Mongwadi wa boporofeta bjo e lego Jehofa, o ile a tseba e sa le pele gore Morwa wa gagwe o be a tla ruta batho a diriša diswantšho goba dipapišo.—2 Tim. 3:16, 17.

^ par. 6 Ka morago ga dikgwedi tše itšego, Jesu o ile “a hlaola ba bangwe ba masomešupa a ba roma ka babedi ka babedi” gore ba yo dira boboledi. Le bona o ile a ba nea tlwaetšo.—Luka 10:1-16.

^ par. 12 Ba bangwe ba tšwa sekolong se sa Gilead ka makga a fetago letee.

^ par. 13 Ge o nyaka ditaba ka botlalo tša mafelelo ao baromiwa bao ba tšwago Sekolong sa Gilead ba bilego le ona lefaseng ka bophara, bala kgaolo 23 ka pukung ya Dihlatse tša Jehofa—Bagoeledi ba Mmušo wa Modimo.

^ par. 14 Sekolo sa Beibele sa Banyalani ba Bakriste le Sekolo sa Beibele sa Bana Babo Rena ba Sego Lenyalong di tšeetšwe legato ke Sekolo sa Baebangedi ba Mmušo.

^ par. 16 Gona bjale bagolo ka moka ba holwa ke Sekolo sa Bodiredi sa Mmušo seo se nago le mananeo ao a sa lekanego ka botelele gomme se swarwa ka morago ga nywaga e mengwe le e mengwe e sego kae. Ga e sa le go tloga ka 1984, bahlanka ba bodiredi le bona ba newa tlwaetšo sekolong se.

Ithute ka mo go oketšegilego

“Batalatša Tsela ya Lenao la Gago” Gore o Dire Tšwelopele

O ka tloša bjang mapheko gomme wa fihlelela dipakane tša gago tša moya?

Thuša ba Bangwe go Fihlelela Bokgoni bja Bona ka Botlalo

Re ka thuša bjang bana babo rena ba bafsa le bao ba sa tšwago go kolobetšwa go fihlelela bokgoni bja bona ka botlalo?