Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Mmušo wa Modimo o a Buša!

 KGAOLO 16

Go Bokana Gotee Bakeng sa Borapedi

Go Bokana Gotee Bakeng sa Borapedi

MOKOTABA WA KGAOLO YE

Setlogo sa diboka tša rena le bohlokwa bja tšona

1. Ge barutiwa ba Jesu ba be ba bokane gotee ba ile ba hwetša thušo efe, gona ke ka baka la’ng ba be ba e hloka?

NAKWANA ka morago ga tsogo ya Jesu, barutiwa ba gagwe ba ile ba bokana gore ba kgothatšane. Lega go le bjalo, ba be ba notletše mejako ya moo ba bego ba le gona ka ge ba be ba boifa manaba a bona. Ruri poifo ya bona e swanetše go ba e ile ya fela ge Jesu a be a iponagatša go bona gomme a re: “Amogelang moya o mokgethwa”! (Bala Johane 20:19-22.) Ka morago, barutiwa ba Jesu ba ile ba bokana gotee gape gomme Jehofa a tšhollela moya o mokgethwa godimo ga bona. Ruri ba ile ba hwetša matla a go dira modiro wa boboledi wo ba bego ba laetšwe go o dira!—Dit. 2:1-7.

2. (a) Jehofa o re nea matla bjang, gona ke ka baka la’ng re a hloka? (b) Ke ka baka la’ng Borapedi bja Lapa bo le bohlokwa kudu? (Bona mongwalo wa ka tlase le lepokisi le le rego, “ Borapedi bja Lapa,” go letlakala 175.)

2 Le rena re lebeletšana le ditlhohlo tše di swanago le tšeo bana babo rena ba lekgolong la pele la nywaga ba bego ba lebeletšana le tšona. (1 Pet. 5:9) Ka dinako tše dingwe, ba bangwe ba rena re ka boifa batho. Ka gona re hloka matla a tšwago go Jehofa e le gore re kgotlelele modirong wa boboledi. (Baef. 6:10) Jehofa o re nea matla a bjalo ka diboka tša rena. Ga bjale re na le diboka tše pedi beke e nngwe le e nngwe, e lego Seboka sa Polelo ya Phatlalatša le Thuto ya Morokami gotee le seboka sa gare ga beke seo se bitšwago Seboka sa Bophelo bja Rena le Bodiredi. * Le gona re thabela ditiragalo tše nne ngwaga le ngwaga, e lego kopano ya selete, dikopano tše pedi tša tikologo le Segopotšo sa lehu la Kriste. Ke ka baka la’ng go le bohlokwa gore re be gona dipokanong tše ka moka? Diboka tša rena tša mehleng yeno di thomile bjang? Le gona pono ya rena ka diboka e utolla’ng ka rena?

Ke ka Baka la Eng re Bokana Gotee?

3, 4. Jehofa o nyaka gore batho ba gagwe ba dire’ng? Nea mehlala.

3 Ga e sa le go tloga kgale Jehofa a laetše batho ba gagwe go bokana gotee gore ba mo rapele. Ka mohlala, ka 1513 B.C.E., Jehofa o ile a nea setšhaba sa Isiraele Molao, le gona Molao woo o be o akaretša gore se boloke Sabatha ya beke le beke e le gore lapa le lengwe le le lengwe le mo hlankele le go rutwa Molao. (Doit. 5:12; 6:4-9) Ge Baisiraele ba be ba latela Molao woo, malapa a be a matlafala gomme setšhaba ka moka se dula se hlwekile moyeng e bile se le matla. Ge setšhaba se be se sa kwe Molao woo, se hlokomologa melao ya go swana le gore se bokane gotee ka mehla gore se rapele Jehofa, Modimo o be a se furalela.—Lef. 10:11; 26:31-35; 2 Dikor. 36:20, 21.

 4 Le gona, ela hloko mohlala woo Jesu a re beetšego wona. O be a tlwaetše go ya sinagogeng beke e nngwe le e nngwe ka Sabatha. (Luka 4:16) Ka morago ga lehu la Jesu le tsogo ya gagwe, barutiwa ba gagwe ba ile ba tšwela pele ka mokgwa wa go bokana gotee ka mehla le ge go be go se sa nyakega gore ba boloke Sabatha. (Dit. 1:6, 12-14; 2:1-4; Baroma 14:5; Bakol. 2:13, 14) Dibokeng tšeo, Bakriste ba lekgolong la pele la nywaga ba be ba sa fo rutana le go kgothatšana eupša gape ba be ba direla Modimo dihlabelo tša tumišo ka dithapelo tša bona, dikarabo le ka dikopelo.—Bakol. 3:16; Baheb. 13:15.

Barutiwa ba Jesu ba be ba bokana gotee gore ba matlafatšane le go kgothatšana

5. Ke ka baka la’ng re eba gona dibokeng tša beke le beke le dikopanong tša ngwaga le ngwaga tše dikgolo le tše dinyenyane? (Bona le lepokisi le le rego, “ Dipokano tša Ngwaga le Ngwaga Tšeo di Kopanyago Batho ba Modimo,” go letlakala 176.)

5 Ka mo go swanago, le rena ge re eba gona dibokeng tša beke le beke le dikopanong tša ngwaga le ngwaga tše dikgolo le tše dinyenyane, re bontšha gore re thekga Mmušo wa Modimo, re matlafatšwa ke moya o mokgethwa e bile re kgothatša ba bangwe ge re bolela ka tumelo ya rena. Sa bohlokwa kudu, re hwetša sebaka sa go tumiša Jehofa ka dithapelo tša rena, dikarabo le ka dikopelo. Tsela yeo diboka tša rena di swarwago ka yona lehono e ka ba e fapane le yeo Baisiraele le Bakriste ba lekgolong la pele la nywaga ba bego ba swara diboka tša bona ka yona, eupša dipokano tša rena di sa le bohlokwa go etša ge di be di le bohlokwa mehleng yeo. Diboka tša rena tša mehleng yeno di thomile bjang?

Diboka tša Beke le Beke Tšeo di re Hlohleletšago ‘Leratong le Medirong e Mebotse’

6, 7. (a) Morero wa diboka tša rena ke ofe? (b) Diboka tša rena di be di fapana bjang go ya ka dihlopha tša Barutwana ba Beibele?

6 Ge Ngwanabo rena Charles Taze Russell a be a thoma go tsoma therešo ka Lentšung la Modimo, o ile a bona go le bohlokwa gore a kopane le ba bangwe bao ba bego ba na le pakane e swanago. Ka 1879, Russell o ile a ngwala gore: “Nna le ba bangwe kua Pittsburgh, re ile ra rulaganya klase ya ka mehla ya Beibele gore  re nyakišiše Mangwalo, gomme re be re kopana Sontaga se sengwe le se sengwe.” Babadi ba makasine wa Zion’s Watch Tower ba ile ba kgothaletšwa gore ba be le diboka, gomme ka 1881, go be go šetše go swarwa diboka Sontaga se sengwe le se sengwe le Laboraro le lengwe le le lengwe kua Pittsburgh, Pennsylvania. Tokollo ya Morokami wa November 1895 e boletše gore morero wa diboka tšeo e be e le go hlagolela “segwera sa Bokriste, lerato le botee” gotee le go nea bao ba lego gona sebaka sa gore ba kgothatšane.—Bala Baheberu 10:24, 25.

7 Tsela yeo diboka tša rena di bego di swarwa ka yona le makga ao di bego di swarwa ka ona di be di fapana go ya ka dihlopha tša Barutwana ba Beibele go theoša le nywaga. Ka mohlala, lengwalo le le tšwago sehlopheng sa kua United States leo le gatišitšwego ka 1911 le itše: “Re swara bonyenyane diboka tše hlano beke le beke.” Sehlopha seo se be se swara diboka tšeo ka Mošupologo, Laboraro, Labohlano le tše pedi ka Sontaga. Lengwalo le lengwe le le tšwago sehlopheng sa Afrika, leo le gatišitšwego ka 1914 le itše: “Re swara diboka gabedi ka kgwedi, di thoma ka Labohlano gomme tša fela ka Sontaga.” Lega go le bjalo, ge nako e dutše e tšwela pele, go ile gwa thoma mokgwa wo re swarago diboka ka wona lehono. Anke re ahlaahleng ka bokopana histori ya seboka se sengwe le se sengwe.

8. Tše dingwe tša dipolelo tša phatlalatša tša mehleng ya pele di be di le mabapi le eng?

8 Seboka sa Polelo ya Phatlalatša. Ka 1880, e lego ngwaga wa ka morago ga gore Ngwanabo rena Russell a thome go gatiša makasine wa Zion’s Watch Tower, o ile a latela mohlala wo o beilwego ke Jesu gomme a tšea leeto la go tšama a bolela ditaba tše dibotse. (Luka 4:43) Gona moo leetong la gagwe, Ngwanabo rena Russell o ile a thoma seboka seo ga bjale se bitšwago Seboka sa Polelo ya Phatlalatša. Ge Morokami o be o tsebiša ka leeto la gagwe, o boletše gore Ngwanabo rena Russell “o tlo tšama a nea dipolelo tša phatlalatša tšeo di bolelago ka ‘Dilo tša mabapi le mmušo wa Modimo.’” Ka 1911, ka morago ga gore dinageng tše mmalwa go thongwe diklase goba diphuthego, phuthego e nngwe le e nngwe e ile ya kgothaletšwa gore e romele diboledi tše di swanelegago diphuthegong tša tikologong ya gabo tšona gore di yo nea dipolelo tše tshelelago di diriša dihlogo tše bjalo ka tše di lego mabapi le kahlolo le topollo. Mafelelong a polelo e nngwe le e nngwe, go be go tsebišwa leina la seboledi sa bekeng e latelago le sehlogo sa polelo ya sona.

9. Seboka sa Polelo ya Phatlalatša se fetogile bjang go theoša le nywaga, gona o ka se thekga bjang?

9 Ka 1945, Morokami o ile wa tsebiša go thoma ga lesolo la lefaseng ka bophara la go newa ga Dipolelo tša Beibele tša Phatlalatša tše seswai tšeo di bego di bolela ka “mathata a nakong yeo.” Ka nywagasome e mentši, diboledi tšeo di kgethilwego di be di sa fo nea dipolelo tšeo di tšwago go mohlanka yo a botegago eupša di be di nea le dipolelo tšeo di itiretšego tšona. Lega go le bjalo, ka 1981, diboledi ka moka di ile tša laelwa gore di thee dipolelo tša tšona dithulaganyong tša dipolelo tša phatlalatša tšeo di neilwego diphuthego. * Go fihlela ka 1990, dithulaganyo tše dingwe  tša dipolelo tša phatlalatša di be di nyaka gore batheetši ba tšee karolo goba go be le dipontšho; eupša ngwageng woo ditaelo di ile tša fetošwa, gomme go tloga ka nako yeo go ya pele dipolelo tša phatlalatša tša newa e le dipolelo feela. Phetogo e nngwe e ile ya dirwa ka January 2008 ge nako ya go newa ga dipolelo tša phatlalatša e be e fokotšwa go tloga go metsotso e 45 go ya go e 30. Gaešita le ge mokgwa wa go newa ga dipolelo tša phatlalatša o fetogile, dipolelo tša phatlalatša tšeo di lokišeleditšwego gabotse di sa dutše di aga tumelo ya rena Lentšung la Modimo le go re ruta ka dibopego tše di fapafapanego tša Mmušo wa Modimo. (1 Tim. 4:13, 16) Na o laletša ka mafolofolo dipoelo tša gago le ba bangwe bao e sego Dihlatse gore ba tlo kwa dipolelo tšeo tša bohlokwa tšeo di theilwego Beibeleng?

10-12. (a) Seboka sa Thuto ya Morokami se bile le diphetogo dife? (b) Ke dipotšišo dife tšeo o swanetšego go ipotšiša tšona?

10 Thuto ya Morokami. Ka 1922, bana babo rena bao ba bego ba tsebja e le basepedi ba bodumedi, e lego badiredi bao Mokgatlo wa Watch Tower o bego o ba romela go yo nea dipolelo diphuthegong le go etelela pele modirong wa boboledi, ba ile ba šišinya gore go be le seboka sa ka mehla sa thuto ya Morokami. Tšhišinyo ye e ile ya amogelwa, gomme mathomong, thuto ya Morokami e be e swarwa gare ga beke goba ka Sontaga.

Seboka sa Thuto ya Morokami, kua Ghana, ka 1931

11 Morokami wa June 15, 1932, o ile wa nea tlhahlo e oketšegilego mabapi le kamoo seboka se se swanetšego go swarwa ka gona. Sehlogo se se ile sa bolela gore ngwanabo rena o swanetše go etelela pele seboka se, gomme sa diriša tsela yeo seboka se se swarwago ka yona Legaeng la Bethele e le mohlala. Bana babo rena ba bararo ba be ba ka dula sethaleng gomme ba šiedišana ka go bala dirapa. Mehleng yeo dihlogo tše ithutwago di be di se na dipotšišo, ka gona moswari wa thuto o be a laetšwe gore a kgopele batheetši go rotoša dipotšišo tše di theilwego tabeng yeo e ahlaahlwago. Ka morago ga moo, o be a kgopela batheetši gore ba arabe dipotšišo tšeo. Ge e ba go be go nyakega tlhaloso e oketšegilego,  moswari wa thuto o be a laetšwe gore a nee tlhaloso e “kopana le yeo e kwagalago.”

12 Mathomong, phuthego e nngwe le e nngwe e be e dumeletšwe go ikgethela tokollo ya makasine wa Morokami yeo ba bantši ba bego ba nyaka go ithuta yona. Lega go le bjalo, Morokami wa April 15, 1933, o ile wa laela gore diphuthego ka moka di diriše tokollo yeo e sa tšwago go gatišwa. Ka 1937, go ile gwa laelwa gore thuto ye e swanetše go swarwa ka Sontaga. Diphetogo tše dingwe tšeo di ilego tša dirwa sebokeng se gore se be ka tsela yeo se swarwago ka yona lehono, di ile tša gatišwa ka go Morokami wa October 1, 1942. Sa pele, makasine wo o ile wa tsebiša gore botlaseng bja letlakala le lengwe le le lengwe la sehlogo se ithutwago go tlo ba le dipotšišo tšeo di swanetšego go dirišwa. Ke moka wa bolela gore seboka se se swanetše go tšea iri. Le gona o ile wa kgothaletša bao ba arabago gore ba arabe “ka mantšu a bona” go e na le go bala dikarabo serapeng. Thuto ya Morokami e sa dutše e le seboka se segolo seo mohlanka yo a botegago a se dirišago go re nea dijo tša moya ka nako e swanetšego. (Mat. 24:45) Yo mongwe le yo mongwe wa rena o swanetše go ipotšiša gore: ‘Na ke lokišeletša thuto ya Morokami beke e nngwe le e nngwe? Le gona na ke katanela go araba ge e ba nka kgona?’

13, 14. Seboka sa Thuto ya Beibele ya Phuthego se thomile bjang, gona ke’ng seo o se thabelago ka seboka se?

13 Thuto ya Beibele ya Phuthego. Magareng ga bo-1890, ka morago ga gore go lokollwe dibolumo tše mmalwa tša puku ya Millennial Dawn, Ngwanabo rena H. N. Rahn, e lego Morutwana wa Beibele yo a bego a dula motseng wa Baltimore, Maryland, U.S.A., o ile a šišinya gore go swarwe diboka tšeo di bego di bitšwa “Dawn Circles” bakeng sa go ithuta Beibele. Mathomong, diboka tše tšeo gantši di bego di swarelwa ka magaeng a bana babo rena, e be e le tša go fo bona ge e ba di tla atlega. Lega go le bjalo, ka September 1895, diboka tša Dawn Circles di be di šetše di swarwa ka katlego metseng e mentši kua United States. Ka go re’alo, Morokami wa kgwedi yeo o ile wa šišinya gore barutwana ka moka ba therešo ba sware diboka tšeo. O ile wa laela gore moswari wa seboka seo e swanetše go ba motho yo a kgonago go bala gabotse. O be a swanetše go bala lefoko letee ke moka a letele gore batheetši ba nee ditlhaloso. Ka morago ga go bala mafoko ka moka ao a lego serapeng le go a ahlaahla, o be a swanetše go bala mangwalo ao a lego serapeng seo. Mafelelong a kgaolo, yo mongwe le yo mongwe yo a lego gona o be a swanetše go hlalosa ka boripana seo a ithutilego sona kgaolong yeo.

14 Leina la seboka se le fetošitšwe ka makga a mmalwa. Se ile sa bitšwa Berean Circles for Bible Study, e lego leina leo le bego le šupa go Baberea ba lekgolong la pele la nywaga bao ba bego ba hlahloba Mangwalo ka kelohloko. (Dit. 17:11) Ge nako e dutše e tšwela pele, leina leo le ile la fetošwa ya ba Thuto ya Puku ya Phuthego. Gona bjale seboka se se bitšwa Thuto ya Beibele ya Phuthego, gomme phuthego ka moka e bokana gotee Holong ya Mmušo go e na le go bokana ka dihlopha magaeng a bana babo  rena. Go theoša le nywagasome, sebokeng se go ile gwa ithutwa dipuku tše di fapafapanego, diporoutšha gaešita le dihlogo tše itšego tša Morokami. Go tloga mehleng ya pele, bohle bao ba bego ba eba gona sebokeng se ba be ba kgothaletšwa go tšea karolo. Seboka se se re thušitše kudu go oketša tsebo ya rena ya Beibele. Na o lokišeletša seboka se ka mehla le go tšea karolo go sona ka moo o ka kgonago?

15. Sekolo sa Bodiredi sa Pušo ya Modimo se be se hlametšwe’ng?

15 Sekolo sa Bodiredi sa Pušo ya Modimo. Carey Barber, yoo ka nako yeo a bego a hlankela ntlongkgolo ya rena kua Brooklyn, New York, o gopola ka gore: “Bošegong bja Mošupologo ka February 16, 1942, banna ka moka bao e bego e le ditho tša lapa la Bethele ya Brooklyn ba ile ba botšwa gore ba ingwadiše sekolong se seo ka morago se ilego sa bitšwa Sekolo sa Bodiredi sa Pušo ya Modimo.” Ngwanabo rena Barber, yoo ka morago a ilego a ba setho sa Sehlopha se Bušago, o ile a hlalosa gore sekolo seo ke “e nngwe ya diphetogo tša bohlokwa kudu tša kamoo Jehofa a dirišanago le batho ba gagwe ba mehleng yeno.” Sekolo se se ile sa  thuša bana babo rena kudu go kaonefatša bokgoni bja bona bja go ruta le go dira boboledi moo e lego gore go thoma ka 1943, ganyenyane-ganyenyane pukwana ya Course in Theocratic Ministry e ile ya romelwa diphuthegong lefaseng ka bophara. Morokami wa June 1, 1943, o boletše gore Sekolo sa Bodiredi sa Pušo ya Modimo se be se hlametšwe go thuša batho ba Modimo “go itlwaetša go ba dihlatse tše di nago le bokgoni ge ba dutše ba tsebatša molaetša wa Mmušo.”—2 Tim. 2:15.

16, 17. Na Sekolo sa Bodiredi sa Pušo ya Modimo se be se re ruta feela bokgoni bja go bolela? Hlalosa.

16 Mathomong, ba bantši ba be ba hwetša go le thata kudu go nea dipolelo ka pele ga batheetši ba bantši. Clayton Woodworth, yo Monyenyane, yoo tatagwe a ilego a golegwa ka go hloka toka le Ngwanabo rena Rutherford gotee le ba bangwe ka 1918, o gopola kamoo a ilego a ikwa ka gona ge a be a thoma go nea dipolelo sekolong se ka 1943. Ngwanabo rena Woodworth o itše: “Ke be ke thatafalelwa kudu ke go nea dipolelo. E be eka leleme la ka le tlala ka ganong, ke oma ka ganong gomme lentšu la ka le kwala le gwaša e bile ke kgamega.” Lega go le bjalo, ge Clayton a  kaonefaditše bokgoni bja go bolela, o ile a newa tokelo ya go nea dipolelo tše dintši phatlalatša. Sekolo se ga se sa fo mo ruta bokgoni bja go bolela. Se mo rutile le bohlokwa bja go ikokobetša le bja go ithekga ka Jehofa. O itše: “Ke ile ka lemoga gore seboledi ka bosona ga se bohlokwa. Eupša ge e ba se lokišetša gabotse e bile se ithekga ka Jehofa ka mo go feletšego, batheetši ba tla se theetša ka kelohloko le go holega.”

17 Ka 1959, dikgaetšedi le tšona di ile tša botšwa gore di ingwadiše sekolong se. Kgaetšedi Edna Bauer o gopola a ekwa tsebišo yeo kopanong yeo a bego a le go yona. O itše: “Ke gopola kamoo tsebišo ye e ilego ya thabiša dikgaetšedi ka gona. Ga bjale le rena re be re tlo hwetša sebaka sa go itlwaetša.” Go theoša le nywaga, bana babo rena ba bantši le dikgaetšedi ba ile ba ingwadiša Sekolong sa Bodiredi sa Pušo ya Modimo e le gore ba rutwe ke Jehofa. Lehono re hwetša tlwaetšo yeo sebokeng sa rena sa gare ga beke.Bala Jesaya 54:13.

18, 19. (a) Ga bjale re hwetša bjang tlhahlo e holago ya go dira bodiredi bja rena? (b) Ke ka baka la’ng re opela dibokeng tša rena? (Bona lepokisi le le rego, “ Go Opela ka Therešo ya Beibele.”)

18 Seboka sa Tirelo. Ga e sa le go tloga ka 1919, go be go swarwa diboka tša kamoo tirelo ya tšhemo e bego e swanetše go rulaganywa ka gona. Ka nako yeo, ga se bohle ka phuthegong bao ba bego ba eba gona dibokeng tšeo—go be go etla feela bao ba bego ba kgethilwe go sepediša dikgatišo. Mo e nyakilego go ba ngwageng ka moka wa 1923, Seboka sa Tirelo se be se swarwa gatee feela ka kgwedi, gomme bohle ka klaseng goba ka phuthegong, ba be ba swanetše go ba gona. Ka 1928, diphuthego di ile tša kgothaletšwa go swara Seboka sa Tirelo beke e nngwe le e nngwe, ke moka ka 1935, Morokami wa kgothaletša diphuthego ka moka gore Sebokeng sa Tirelo di diriše tsebišo yeo e gatišitšwego ka go Director (yeo ka morago e ilego ya bitšwa Informant gomme ya tla ya bitšwa Tirelo ya Rena ya Mmušo). Go se go ye kae, seboka se se ile sa swarwa ka mehla diphuthegong ka moka.

19 Lehono, sebokeng sa rena sa gare ga beke re hwetša tlhahlo e holago ya kamoo re ka phethago bodiredi bja rena. (Mat. 10:5-13) Ge e ba o swanelega go hwetša pukwana ya seboka, na o ithuta yona le go diriša ditšhišinyo tšeo e di neago ge o le bodireding?

Seboka sa Bohlokwa Kudu mo Ngwageng

Ga e sa le go tloga lekgolong la pele la nywaga C.E., Bakriste ba be ba bokana gotee ngwaga le ngwaga bakeng sa Segopotšo sa lehu la Kriste (Bona serapa 20)

20-22. (a) Ke ka baka la’ng re gopola lehu la Jesu? (b) O holega bjang ka go ba gona Segopotšong ngwaga o mongwe le o mongwe?

20 Jesu o boditše balatedi ba gagwe gore ba gopole lehu la gagwe go fihlela a boa. Go swana le monyanya wa Paseka, Segopotšo sa lehu la Kriste ke tiragalo ya ngwaga le ngwaga. (1 Bakor. 11:23-26) Ngwaga o mongwe le o mongwe batho ba dimilione ba ba gona sebokeng se. Se gopotša batlotšwa ka tokelo ya bona ya go ba bajabohwagotee le Kriste Mmušong. (Baroma 8:17) Le gona se thuša dinku tše dingwe go hlompha ka mo go tseneletšego Kgoši ya Mmušo wa Modimo le go e botegela.—Joh. 10:16.

21 Ngwanabo rena Russell le badirišani ba gagwe ba ile ba lemoga bohlokwa bja go gopola Selalelo sa Morena e bile ba be ba tseba gore se swanetše go gopolwa gatee feela mo ngwageng. Tokollo ya Morokami wa April 1880 e itše: “E šetše e le nywaga e mmalwa ba bantši ba rena mo Pittsburgh re tlwaetše go . . . gopola  Paseka [Segopotšo] le go ja diswantšhetšo tšeo di emelago mmele wa Morena wa rena le madi a gagwe.” Go se go ye kae, dikopano tša selete di ile tša swarwa ka nako e tee le Segopotšo. Lekga la mathomo leo go ilego gwa bolokwa dipego tša tiragalo e bjalo e bile ka 1889, moo go bilego le batho ba 225 gomme gwa kolobetšwa ba 22.

22 Lehono, Segopotšo ga e sa le karolo ya lenaneo la kopano ya selete, eupša re laletša bohle tikologong ya gabo rena gore ba tle ba be gotee le rena Segopotšong Holong ya Mmušo ya gabo rena goba lefelong leo le hirilwego. Ka 2013, batho ba ka godimo ga dimilione tše 19 ba bile gona Segopotšong sa lehu la Jesu. Ruri re na le tokelo e kgolo ya go ba gona Segopotšong le ya go kgothaletša ba bangwe go ba gona bošegong bjo bjo bohlokwa kudu! Na ngwaga o mongwe le o mongwe o laletša ka mafolofolo batho ba bantši kamoo o ka kgonago gore ba be gona Segopotšong?

Seo se Utollwago ke Pono ya Rena ka Dipokano

23. O lebelela bjang taelo ya gore re bokane gotee?

23 Bahlanka ba Jehofa ba botegago ga ba lebelele taelo ya gore ba bokane gotee e le morwalo. (Baheb. 10:24, 25; 1 Joh. 5:3) Ka mohlala, Kgoši Dafida o be a rata go ya ntlong ya Jehofa go yo rapela. (Ps. 27:4) O be a tloga a thabela go dira bjalo a na le ba bangwe bao ba ratago Modimo. (Ps. 35:18) Le gona nagana ka mohlala wa Jesu. Gaešita le ge e be e sa le yo monyenyane, o be a kganyoga kudu go ba ntlong ya Tatagwe ya borapedi.—Luka 2:41-49.

Tsela yeo re ikwago ka yona ka go bokana gotee e bontšha kamoo Mmušo wa Modimo e lego wa kgonthe ka gona go rena

24. Re bontšha’ng ka go ba gona dibokeng, gona di re hola bjang?

24 Ge re eba gona dibokeng, re bontšha gore re rata Jehofa le gore re kganyoga go matlafatša badumedigotee le rena. Le gona re bontšha gore re kganyoga go phela bjalo ka balata ba Mmušo wa Modimo, ka gobane ke dibokeng tša rena, dikopanong tše dikgolo le tše dinyenyane moo re rutwago go phela ka tsela yeo. Go oketša moo, diboka tša rena di re nea bokgoni le matla ao re a hlokago gore re kgotlelele go o mongwe wa mediro ya bohlokwa kudu yeo e dirwago ke balata ba Mmušo wa Modimo lehono, e lego wa go dira batho barutiwa ba Kgoši Jesu Kriste le go ba tlwaetša. (Bala Mateo 28:19, 20.) Ka ntle le pelaelo, tsela yeo re ikwago ka yona ka go bokana gotee e bontšha kamoo Mmušo wa Modimo e lego wa kgonthe ka gona go rena. Anke ka mehla re tšeeleng godimo diboka tša rena!

^ par. 2 Go tlaleletša go diboka tša phuthego tša beke le beke, lapa le lengwe le le lengwe goba motho yo mongwe le yo mongwe o kgothaletšwa go ba le lenaneo la thuto ya motho ka noši goba borapedi bja lapa.

^ par. 9 Ka 2013, go be go šetše go na le dithulaganyo tša dipolelo tša phatlalatša tša ka godimo ga tše 180.

Kopano ye e swaya nywaga e 100 Kriste a buša legodimong.

Ithute ka mo go oketšegilego

Jehofa o Kgoboketša Setšhaba sa Gagwe se Thabilego

Dipokano tša mehleng ya Beibele di swana bjang le dikopano tša Dihlatse tša Jehofa? Ke ka baka la’ng re swanetše go ba go tšona?

Borapedi bja Lapa—Na o ka Dira Gore bo Thabiše Kutšwanyana?

Bona tsela yeo malapa a dinageng tše dingwe a swarago borapedi bja lapa ka yona gore o hwetše thušo ya seo o ka se lekago.