Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Mmušo wa Modimo o a Buša!

 KGAOLO 3

Jehofa o Utolla Morero wa Gagwe

Jehofa o Utolla Morero wa Gagwe

MOKOTABA WA KGAOLO YE

Jehofa o utolla morero wa gagwe ganyenyane-ganyenyane, eupša o o utollela feela bao ba mmoifago

1, 2. Jehofa o utolotše bjang morero wa gagwe ka batho?

BATSWADI ba lerato ba akaretša bana ba bona dipoledišanong tša mabapi le ditaba tša lapa. Lega go le bjalo, ditabeng tše dingwe ba ba šedi. Ga ba botše bana ba bona dilo ka moka, eupša ba ba botša feela tšeo ba naganago gore ba godile ka mo go lekanego go ka di kwešiša.

2 Ka mo go swanago, Jehofa o be a dutše a utolla morero wa gagwe ka batho ganyenyane-ganyenyane. Eupša o be a dira bjalo ge feela a be a tseba gore ke nako ya maleba. Ela hloko kakaretšo e kopana ya kamoo go theoša le histori Jehofa a utolotšego ditherešo tša mabapi le Mmušo.

Ke ka Baka la Eng go Nyakega Mmušo?

3, 4. Na Jehofa o rerile e sa le pele gore batho ba tla felela kae? Hlalosa.

3 Mmušo wa Mesia e be e se karolo ya morero wa Jehofa wa mathomong. Ka baka la’ng? Ka gobane Jehofa o be a sa rera e sa le pele gore batho ba tla felela kae; go ba gona, o bopile batho ba na le tokologo ya go ikgethela. Ka baka leo o ile a botša Adama le Efa morero wa gagwe ka batho, a re: “Tswalang le ate le tlale lefase le be le le fenye.” (Gen. 1:28) Le gona Jehofa o be a nyaka gore ba phele ka go dumelelana le ditekanyetšo tša gagwe tša se sebotse le se sebe. (Gen. 2:16, 17) Adama le Efa ba ka ba ba ile ba kgetha go dula ba botega. Ge nkabe bona le bana ba bona ba ile ba dira bjalo, re be re ka se hloke Mmušo wo o bušwago ke Kriste gore o phethagatše morero wa Modimo. Gona bjale nkabe lefase le tletše ka batho bao ba phethagetšego, ka moka ba hlankela Jehofa.

4 Borabele bja Sathane, Adama le Efa ga se bja dira gore Jehofa a lebale ka morero wa gagwe wa go tlatša lefase ka batho bao ba phethagetšego. Go e na le moo, Jehofa o ile a fetoša mokgwa woo a bego a tla o phethagatša ka wona. Morero wa gagwe ga o swane le terene yeo e swanetšego go sepela seporong se itšego gore e fihle moo e yago gona, yeo e ka ntšhwago seporong ke ditiro tša batho ba bangwe. Ge Jehofa a boletše morero wa gagwe, ga go na selo le ge e le sefe legohleng seo se ka o thibelago go phethagala. (Bala Jesaya 55:11.) Ge e ba go na le lepheko tseleng, Jehofa o diriša tsela e nngwe. * (Ek. 3:14, 15) Ge  a bona go swanetše, o botša bahlanka ba gagwe ba botegago ka mokgwa o mofsa wo a tlago go o diriša go phethagatša morero wa gagwe.

5. Jehofa o ile a arabela bjang borabeleng bja kua Edene?

5 Ge Jehofa a be a arabela borabeleng bja kua Edene, o ile a rera go hloma Mmušo. (Mat. 25:34) Nakong yeo ya ge go be go bonagala go se na kholofelo ka batho, Jehofa o ile a thoma go utolla selo seo a bego a tla se diriša go bušetša batho sekeng le go lokiša tshenyo yeo e bakilwego ke pušo ya Sathane ya lefeela. (Gen. 3:14-19) Lega go le bjalo, Jehofa ga se a ka a utolla ditaba ka moka tša mabapi le Mmušo woo ka nako e tee.

Jehofa o Thoma go Utolla Ditherešo tša Mabapi le Mmušo

6. Jehofa o ile a holofetša’ng, eupša ke’ng seo a sa kago a se utolla?

6 Boporofeteng bja mathomothomo, Jehofa o ile a holofetša gore “peu” e itšego e be e tla pšhatla noga. (Bala Genesi 3:15.) Lega go le bjalo, Jehofa ga se a utolla ka nako yeo gore peu yeo le peu ya noga e be e le bomang. Ge e le gabotse, ga se a ka a bolela selo ka taba yeo ka nywaga e ka bago e 2 000. *

7. Ke ka baka la’ng Jehofa a ile a kgetha Aborahama, gona re ithuta thuto efe ya bohlokwa go se?

7 Mafelelong, Jehofa o ile a kgetha Aborahama gore ke yena yoo peu e holofeditšwego e bego e tla tšwa lelokong la gagwe. Aborahama o ile a kgethwa ka ge a ‘ile a kwa lentšu la Jehofa.’ (Gen. 22:18) Re ithuta thuto ya bohlokwa tabeng ye—gore Jehofa o utollela feela bao ba mmoifago merero ya gagwe.—Bala Psalme 25:14.

8, 9. Ke ditaba dife tša mabapi le peu e holofeditšwego tšeo Jehofa a ilego a di utollela Aborahama le Jakobo?

8 Ge Jehofa a be a bolela le mogwera wa gagwe Aborahama a diriša morongwa, o ile a utolla ka lekga la pele taba ye ya bohlokwa ka peu e holofeditšwego: Gore peu yeo e be e tla ba motho. (Gen. 22:15-17; Jak. 2:23) Eupša motho yoo o be a tla pšhatla bjang noga? Noga yeo e be e le mang? Ditaba tšeo di bego di tla utollwa ka morago di be di tla araba dipotšišo tšeo.

9 Jehofa o ile a rera gore peu e holofeditšwego e be e tla tšwa lelokong la setlogolo sa Aborahama e lego Jakobo, yena monna yo a ilego a bontšha tumelo e matla go Modimo. (Gen. 28:13-22) Jehofa o ile a diriša Jakobo go utolla gore Motho yo a Holofeditšwego e be e tla ba setlogolo sa morwa wa Jakobo e lego Juda. Jakobo o ile a porofeta gore setlogolo se sa Juda se be se tla newa “molamo,” e lego phata yeo e swantšhetšago matla a mmušo, le gore yena yoo “merafo ka moka e [be e] tla mo kwa.” (Gen. 49:1, 10) Ka mantšu ao, Jehofa o ile a bontšha gore Motho yo a Holofeditšwego e be e tla ba mmuši, yona kgoši.

10, 11. Ke ka baka la’ng Jehofa a ile a utollela Dafida le Daniele morero wa gagwe?

10 Mo e ka bago nywaga e 650 ka morago ga mehla ya Juda, Jehofa o ile a utolla ditaba tše di oketšegilego ka morero wa gagwe go Kgoši Dafida, yo a tšwago lelokong la Juda. Jehofa o ile a hlalosa Dafida ka gore ke ‘monna yo a kwanago le pelo ya gagwe.’ (1 Sam. 13:14; 17:12; Dit. 13:22) Ka ge Dafida a be a boifa Modimo, Jehofa o ile a kgetha go dira kgwerano le yena, a mo holofetša gore se sengwe sa ditlogolo tša gagwe se be se tla buša ka mo go sa felego.—2 Sam. 7:8, 12-16.

 11 Ka morago ga nywaga e ka bago e 500, Jehofa o ile a diriša moporofeta Daniele go bolela tlwaa ngwaga woo Motlotšwa yo, goba Mesia, a bego a tla tšwelela ka wona lefaseng. (Dan. 9:25) Jehofa o be a lebelela Daniele e le “motho yo a rategago kudu.” Ka baka la’ng? Ka gobane Daniele o be a hlompha Jehofa kudu e bile a mo hlankela ka go se kgaotše.—Dan. 6:16; 9:22, 23.

12. Daniele o ile a botšwa gore a dire’ng, gona ka baka la’ng?

12 Gaešita le ge Jehofa a ile a diriša baporofeta ba botegago ba bjalo ka Daniele go ngwala ditaba tše dintši ka peu e holofeditšwego e lego Mesia, e be e se ya tšwa e eba nako ya gagwe ya gore bahlanka ba gagwe ba kwešiše ka botlalo seo a ba buduletšego go se ngwala. Ka mohlala, ka morago ga gore Daniele a newe pono ya mabapi le go hlongwa ga Mmušo wa Modimo, o ile a botšwa gore a tiiše boporofeta bjoo ka seka go fihlela ka nako yeo e beilwego ke Jehofa. Yona nakong yeo e bego e sa tla, tsebo ya therešo e be “e tla ata.”—Dan. 12:4.

Jehofa o ile a diriša banna ba botegago ba bjalo ka Daniele gore ba bege ditaba tše dintši tša mabapi le Mmušo wa Mesia

Jesu o Hlabiša Seetša ka Morero wa Modimo

13. (a) Peu e holofeditšwego e be e le mang? (b) Jesu o ile a hlabiša seetša bjang boporofeteng bjo bo begilwego go Genesi 3:15?

13 Jehofa o ile a utolla gore Jesu ke yena peu e holofeditšwego, sona setlogolo sa Dafida seo se tlago go buša e le Kgoši. (Luka 1:30-33; 3:21, 22) Ge Jesu a be a thoma bodiredi bja gagwe, go be go le bjalo ka ge eka batho ba hlabelwa ke seetša sa tsebo mabapi le morero wa Modimo. (Mat. 4:13-17) Ka mohlala, Jesu o ile a bolela phaa gore “noga” yeo go boletšwego ka yona go Genesi 3:14, 15 ke mang, ka go bitša Diabolo gore ke “mmolai” le “tatago maaka.” (Joh. 8:44) Kutollong yeo a e neilego Johane, Jesu o ile a bolela gore “noga ya kgale” ke “Diabolo le Sathane.” * (Bala Kutollo 1:1; 12:9.) Yona kutollong yeo, Jesu o bontšhitše kamoo mafelelong e le peu e holofeditšwego a tlago go phethagatša boporofeta bjo bo boletšwego kua Edene gomme a pšhatla Sathane gore a se sa ba gona.—Kut. 20:7-10.

14-16. Na barutiwa ba Jesu ba lekgolong la pele la nywaga ka mehla ba be ba kwešiša ka botlalo seo se bego se bolelwa ke ditherešo tšeo a bego a di utolla? Hlalosa.

14 Go etša ge re bone go Kgaolo 1 ya puku ye, Jesu o boletše kudu ka Mmušo wa Modimo. Lega go le bjalo, ga se ka mehla moo a bego a botša barutiwa ba gagwe ditaba ka moka tšeo ba bego ba nyaka go di tseba. Gaešita le ge a ile a ba botša ditaba tše itšego ka go lebanya, e bile feela ka morago—nywagakgolo e mentši ka morago—moo balatedi ba Kriste ba ilego ba thoma go kwešiša ka botlalo seo se bolelwago ke ditherešo tšeo Mong wa bona a di utolotšego. Ela hloko mehlala e sego kae.

15 Ka 33 C.E., Jesu o ile a bolela ka mo go kwagalago gore babuši bao ba bego ba tla buša gotee le Kgoši ya Mmušo wa Modimo ba be ba tla tšewa lefaseng gomme ba tsošetšwa bophelong bja legodimong e le dibopiwa tša moya. Lega go le bjalo, barutiwa ba gagwe ga se ba ka ba kwešiša taba ye ka yona nako yeo. (Dan. 7:18; Joh. 14:2-5) Wona ngwageng woo, Jesu o ile a diriša diswantšho go bontšha gore Mmušo wa Modimo o be o ka se thome go buša mehleng yeo go ba go fihla ge go fetile nako  e telele a rotogetše legodimong. (Mat. 25:14, 19; Luka 19:11, 12) Barutiwa ba Jesu ga se ba ka ba kwešiša ntlha yeo ya bohlokwa, moo ka morago ga ge a tsošitšwe ba ilego ba mmotšiša gore: “Na o tsošološa mmušo wa Isiraele mo nakong ye?” Lega go le bjalo, ka nako yeo Jesu o ile a kgetha go se sa ba utollela selo ka taba yeo. (Dit. 1:6, 7) Le gona Jesu o ile a ruta gore go be go tla ba le “dinku tše dingwe,” tšeo e bego e ka se be karolo ya “mohlatswana” wa babušigotee le yena. (Joh. 10:16; Luka 12:32) Balatedi ba Kriste ga se ba ka ba kwešiša gabotse gore dihlopha tšeo tše pedi di be di bopša ke bomang go fihlela ka morago ga ge Mmušo wa Modimo o thomile go buša legodimong ka 1914.

16 Go na le dilo tše dintši tšeo Jesu a ka bego a ile a di botša barutiwa ba gagwe ge a be a na le bona mo lefaseng, eupša o be a tseba gore ka nako yeo ba be ba ka se kgone go di rwala. (Joh. 16:12) Ga go pelaelo gore lekgolong la pele la nywaga go ile gwa utollwa tsebo e ntši mabapi le Mmušo wa Modimo. Lega go le bjalo, yeo e be e se ya tšwa e eba nako ya gore tsebo e bjalo e ate.

Tsebo ya Therešo e a Ata “Mehleng ya Bofelo”

17. Re swanetše go dira’ng gore re kwešiše ditherešo tša mabapi le Mmušo wa Modimo, gona ke’ng gape seo se nyakegago?

17 Jehofa o ile a holofetša Daniele gore “mehleng ya bofelo,” ba bantši ba be ba tla “latišiša gomme tsebo ya therešo” ya mabapi le morero wa Modimo ya ata. (Dan. 12:4) Bao ba nyakago tsebo yeo ba swanetše go šoma ka thata gore ba e hwetše. Puku e nngwe ya ditšhupetšo e re sebopego sa lediri la Seheberu la lentšu leo le fetoletšwego e le “latišiša” le fetišetša kgopolo ya motho yo a ithutago puku e itšego ka kelohloko le ka mo go tseneletšego. Ka gona, go sa šetšwe gore re ithuta Beibele ka mo go tseneletšego gakaakang, re ka se kwešiše ka mo nepagetšego ditherešo tša mabapi le Mmušo ka ntle le gore Jehofa a re thuše.—Bala Mateo 13:11.

18. Bao ba boifago Jehofa ba bontšha bjang tumelo le boikokobetšo?

 18 Go etša ge Jehofa a ile a utolla ganyenyane-ganyenyane ditherešo tša mabapi le Mmušo nakong ya pele ga 1914, o sa tšwela pele a dira bjalo le mehleng ye ya bofelo. Bjalo ka ge Dikgaolo 4 le 5 tša puku ye di tla bontšha, nywageng ya ka godimo ga e 100 e fetilego batho ba Modimo ba ile ba swanelwa ke go fetoša kwešišo ya bona ka makga a mmalwa. Na seo se ra gore Jehofa ga a ba thekge? Ga go bjalo le gatee! O a ba thekga. Ke ka baka la’ng re re’alo? Ka gobane bao ba boifago Jehofa ba bontšha dika tše pedi tšeo a di ratago—tumelo le boikokobetšo. (Baheb. 11:6; Jak. 4:6) Bahlanka ba Jehofa ba na le tumelo ya gore dikholofetšo ka moka tšeo di lego ka Lentšung la Modimo di tla phethagala. Ba bontšha boikokobetšo ge ba lemoga gore ba ile ba se kwešiše gabotse kamoo dikholofetšo tšeo di bego di tla phethagala ka gona. Moya woo wa boikokobetšo o bontšhitšwe ka tokollong ya Morokami wa March 1, 1925, woo o itšego: “Re a tseba gore Morena ke yena a hlalosago dilo, re a tseba gore o tla hlalosetša batho ba gagwe Lentšu la gagwe ka tsela ya gagwe e botse le ka nako ya gagwe ya maleba.”

“Morena . . . o tla hlalosetša batho ba gagwe Lentšu la gagwe ka tsela ya gagwe e botse le ka nako ya gagwe ya maleba”

19. Jehofa o dirile gore ga bjale re kwešiše eng, gona ka baka la’ng?

19 Ge Mmušo wa Modimo o be o thoma go buša ka 1914, batho ba Modimo ba be ba na le tsebo e lekanyeditšwego ya kamoo diporofeto tša mabapi le Mmušo wo di bego di tla phethagala ka gona. (1 Bakor. 13:9, 10, 12) Ka ge re fagahlela go bona dikholofetšo tša Modimo di phethagala, ka dinako tše dingwe re ile ra hlalosa dilo ka tsela e fošagetšego. Go theoša le nywaga, go rereša ga mantšu a mangwe a Morokami wo o tsopotšwego serapeng sa ka mo godimo go ile gwa bonagala. Sehlogo sa ka go Morokami woo se itše: “Go bonagala go le kaone go bolela gore re ka se ke ra kwešiša boporofeta go fihlela bo phethagetše goba gore re tla bo kwešiša ge bo dutše bo phethagala.” Ka ge ga bjale re le garegare ga mehla ya bofelo, diporofeto tše dintši tša Mmušo di phethagetše gomme tše dingwe di a phethagala. Ka ge batho ba Modimo ba ikokobeditše e bile ba  thabela go phošollwa, Jehofa o dirile gore re kwešiše ka mo go feletšego morero wa gagwe. Ruri tsebo ya therešo e atile!

Go Fetošwa ga Kwešišo ya Rena go Leka Batho ba Modimo

20, 21. Go fetošwa ga kwešišo go ile gwa kgoma bjang Bakriste ba lekgolong la pele la nywaga?

20 Ge Jehofa a fetoša kwešišo ya rena ka therešo, seo re lego sona ka pelong se a lekwa. Na tumelo le boikokobetšo di tla re tutueletša go amogela diphetogo tšeo? Bakriste bao ba phetšego bogareng bja lekgolo la pele la nywaga ba ile ba lebana le teko e bjalo. Ka mohlala, akanya o be o le Mokriste wa Mojuda mehleng yeo, o hlompha kudu Molao wa Moshe le gona o tšeela godimo setšo sa setšhaba sa geno. Bjale o hwetša mangwalo a buduletšwego go tšwa go moapostola Paulo ao a hlalosago gore Molao wa Moshe ga o sa šoma le gore Jehofa ga a sa amogela Isiraele ya tlhago ka ge ga bjale a kgoboketša Isiraele ya moya yeo e bopšago ke Bajuda le Bantle. (Baroma 10:12; 11:17-24; Bagal. 6:15, 16; Bakol. 2:13, 14) Nkabe o ile wa arabela bjang?

21 Bakriste bao ba ikokobeditšego ba ile ba amogela tlhaloso e buduletšwego ya Paulo gomme Jehofa a ba šegofatša. (Dit. 13:48) Ba bangwe ba ile ba galefišwa ke diphetogo tšeo gomme ba nyaka go kgomarela kwešišong ya bona. (Bagal. 5:7-12) Ge ba be ba ka se fetoše pono ya bona, batho bao ba be ba tla lahlegelwa ke tokelo ya go ba babušigotee le Kriste.—2 Pet. 2:1.

22. O ikwa bjang ka diphetogo tša mabapi le kwešišo ya rena ka morero wa Modimo?

22 Nywagasomeng ya morago bjale, Jehofa o fetošitše kwešišo ya rena mabapi le Mmušo wa gagwe. Ka mohlala, o re thušitše go kwešiša gabotse gore ke neng moo bao e tlago go ba balata ba Mmušo woo ba tlago go aroganywa go bao ba sa arabelego gabotse go etša ge dinku di aroganywa go dipudi. Le gona o re rutile gore palo e feletšego ya ba 144 000 e tla felela neng, seo se bolelwago ke diswantšho tša Jesu tša mabapi le Mmušo le gore batlotšwa ba mafelelo ba tla rotošetšwa neng legodimong. * O arabela bjang diphetogong tše bjalo? Na tumelo ya gago e a matlafala? Na o di lebelela e le bohlatse bja gore Jehofa o tšwela pele go ruta batho ba gagwe ba ikokobeditšego? Ditaba tšeo re tlago go ithuta tšona ka pukung ye di tla tiiša kgodišego ya gago ya gore ganyenyane-ganyenyane Jehofa o utollela batho bao ba mmoifago morero wa gagwe.

^ par. 4 Leina la Modimo ke sebopego sa lediri la Seheberu leo le bolelago gore “go ba selo se itšego.” Leina la Jehofa le bolela gore ke Mophethagatši wa dikholofetšo tša gagwe. Bona lepokisi leo le rego “Seo se Bolelwago ke Leina la Modimo,” go letlakala 43.

^ par. 6 Gaešita le ge nako ye e ka bonagala e le e telele kudu lehono, re swanetše go gopola gore mehleng yeo batho ba be ba phela nako e telele kudu; e bile ke meloko e mene feela yeo e phetšego gotee ka nakwana mehleng e swanago go tloga go Adama go fihla go Aborahama. Adama o phetše le tatago Noa e lego Lamege ka nakwana mehleng e swanago. Lamege o phetše le morwa wa Noa e lego Sheme ka nakwana mehleng e swanago. Sheme o phetše le Aborahama ka nakwana mehleng e swanago.—Gen. 5:5, 31; 9:29; 11:10, 11; 25:7.

^ par. 13 Lentšu “Sathane” le tšwelela ka makga a 18 ka Mangwalong a Seheberu moo le dirišetšwago go šupa go sebopiwa sa moya. Lega go le bjalo, lentšu “Sathane” le tšwelela ka makga a ka godimo ga a 30 ka Mangwalong a Bakriste a Segerika. Mangwalo a Seheberu ga se a bolela kudu ka Sathane eupša a boletše kudu ka yoo e bego e tla ba Mesia. Ge Mesia a fihlile, o ile a pepentšha Sathane ka mo go feletšego, e lego taba yeo e begilwego ka Mangwalong a Bakriste a Segerika.

^ par. 22 Ge o nyaka go tseba tše dingwe tša diphetogo tšeo di dirilwego kwešišong ya rena, bala ditokollo tše di latelago tša Morokami: October 15, 1995, matlakala 23-28; January 15, 2008, matlakala 20-24; July 15, 2008, matlakala 17-21; July 15, 2013, matlakala 9-14.