Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Mmušo wa Modimo o a Buša!

 KGAOLO 18

Kamoo Mediro ya Mmušo e Thekgwago ka Ditšhelete

Kamoo Mediro ya Mmušo e Thekgwago ka Ditšhelete

MOKOTABA WA KGAOLO YE

Lebaka leo batho ba Jehofa ba thekgago mediro ya Mmušo wa gagwe ka ditšhelete le kamoo ba dirago seo ka gona

1, 2. (a) Ngwanabo rena Russell o ile a araba bjang moruti yo a bego a nyaka go tseba kamoo mediro ya Barutwana ba Beibele e bego e thekgwa ka gona? (b) Re tlo ahlaahla’ng kgaolong ye?

LEBAKENG le lengwe, Ngwanabo rena Charles T. Russell o ile a batamelwa ke moruti wa Kereke ya Reformed yo a bego a nyaka go tseba kamoo mediro ya Barutwana ba Beibele e thekgwago ka gona.

Ngwanabo rena Russell o ile a re go yena: “Ga re ntšhiše batho koleke.”

Moruti yoo o ile a botšiša gore: “Bjale le tšea kae tšhelete ya go thekga mediro ya lena?”

Russell o ile a re: “Ge nka go botša, o ka se nkgolwe. Ge batho ba etla dibokeng tša rena, ga go fetišwe poleiti ka pele ga bona ya gore ba ntšhe koleke. Eupša ba a tseba gore go na le ditshenyagalelo. Seo ba ipotšago sona ke gore: ‘Go diriša holo ye ga se mahala . . . Nka thuša bjang go lefelela ditshenyagalelo tša yona?’”

Moruti yo o ile a lebelela Ngwanabo rena Russell a sa mo kgolwe.

Russell o ile a tšwela pele ka gore: “Ga ke go fore. Bohle bao ba tlago dibokeng tša rena ba dula ba mpotšiša gore: ‘Nka thekga bjang modiro wo ka ditšhelete?’ Ge motho a šegofatšwa gomme a eba le tšhelete, o ithaopela go e diriša modirong wa Morena. Ge e ba a se na tšhelete, ke ka baka la’ng re swanetše go mo gapeletša go e ntšha?” *

2 Ruri Ngwanabo rena Russell o be a sa mo “fore.” Batho ba Modimo ga ba thome lehono go ntšha meneelo ya boithatelo go thekga borapedi bja therešo. Kgaolong ye, re tlo ahlaahla mehlala ya Mangwalo ya seo gotee le histori ya rena ya mehleng yeno. Ge re dutše re ahlaahla kamoo mediro ya Mmušo e thekgwago ka gona ka ditšhelete mehleng yeno, yo mongwe le yo mongwe wa rena o swanetše go ipotšiša gore: ‘Nka thekga bjang mediro ya Mmušo?’

‘Anke yo Mongwe le yo Mongwe wa Pelo e Ratago a Tliše Moneelo’

3, 4. (a) Ke’ng seo Jehofa a botago barapedi ba gagwe gore ba tla se dira? (b) Baisiraele ba ile ba thekga bjang modiro wa go aga taberenakele?

3 Jehofa o bota barapedi ba gagwe ba therešo. O a tseba gore ge ba ka newa sebaka, ba tla thabela go bontšha boineelo bja  bona go yena ka go ntšha meneelo ya boithatelo. Ela hloko mehlala e mebedi ya mehleng ya Baisiraele.

4 Ka morago ga gore Jehofa a ntšhe Baisiraele Egipita, o ile a ba botša gore ba age tente yeo e rwalegago ya borapedi, goba taberenakele. Go be go tlo nyakega dilo tše dintši gore e agwe. Jehofa o ile a laela Moshe gore a nee setšhaba sebaka sa go thekga modiro woo, a re go yena: ‘Anke yo mongwe le yo mongwe wa pelo e ratago a tlišetše Jehofa moneelo.’ (Ek. 35:5) Setšhaba se seo se bego se sa tšwa go ‘šomišwa mošomo o mongwe le o mongwe wa bokgoba le go gatelelwa’ se ile sa arabela bjang? (Ek. 1:14) Se ile sa thekga modiro woo ka tsela e makatšago, sa ithaopela go tliša gauta, silifera le dilo tše dingwe tše bohlokwa—tšeo tše dintši tša tšona go ka diregago gore se di hweditše go bao e kilego ya ba beng ba sona, e lego Baegipita. (Ek. 12:35, 36) Baisiraele ba ile ba ntšha moneelo o montši kudu moo ba ilego ba swanelwa ke go “thibelwa go o tliša.”—Ek. 36:4-7.

5. Baisiraele ba ile ba arabela bjang ge Dafida a be a ba nea sebaka sa go thekga modiro wa go aga tempele?

5 Ka morago ga nywaga e ka bago e 475, Dafida o ile a ntšha moneelo go tšwa ‘thotong ya gagwe e kgethegilego’ gore a thekge modiro wa go aga tempele, e lego moago wa mathomo wa borapedi bja therešo mo lefaseng. Ke moka o ile a nea Baisiraelegotee le yena sebaka sa go ntšha moneelo ka go ba botšiša gore: “Ke mang yo a ithaopago go nea Jehofa mpho lehono?” Setšhaba se ile sa arabela ka go “neela Jehofa dibego tša boithaopo ka pelo e feletšego.” (1 Dikor. 29:3-9) Ge Dafida a lemoga gore meneelo yeo ge e le gabotse etšwa kae, o ile a botša Jehofa ka thapelo gore: “Dilo tšohle di tšwa go wena, gomme re go neile tšeo di tšwago seatleng sa gago.”—1 Dikor. 29:14.

6. Ke ka baka la’ng lehono go nyakega tšhelete gore modiro wa Mmušo o tšwele pele, gona go rotoga dipotšišo dife?

6 Moshe le Dafida ga se ba ka ba gapeletša batho ba Modimo go ntšha meneelo. Go e na le moo, batho ka bobona ba ile ba neela ka dipelo tše di ratago. Go thwe’ng ka lehono? Re tseba gabotse gore modiro woo Mmušo wa Modimo o o phethago o nyaka tšhelete. Go nyakega tšhelete e ntši kudu gore go gatišwe Dibeibele le dikgatišo tše di theilwego Beibeleng le go di romela mafelong a fapafapanego, go aga mafelo a borapedi le meago ya makala, go e hlokomela gotee le go thuša badumedigotee le rena ge ba wetšwe ke dikotsi tša tlhago. Ka go re’alo, se se rotoša dipotšišo tše tša bohlokwa: Tšhelete ya go dira dilo tše ka moka e tšwa kae? Na balatedi ba Kgoši ba swanetše go gapeletšwa go ntšha meneelo?

“O ka se Tsoge o Kgopetše Goba wa Lopa Batho Gore ba o Thekge”

7, 8. Ke ka baka la’ng batho ba Jehofa ba sa kgopele batho meneelo?

7 Ngwanabo rena Russell le badirišani ba gagwe ba ile ba gana go ekiša mekgwa ya go kgoboketša tšhelete yeo e tletšego dikerekeng tša Bojakane. Tokollong ya bobedi ya makasine wa Morokami, ka tlase ga sehlogwana se se rego, “Na o Nyaka ‘Zion’s Watch Tower’?” Russell o itše: “Re dumela gore makasine wa ‘Zion’s Watch Tower’ o thekgwa ke JEHOFA. Ka ge seo se le bjalo,  le ka mohla makasine wo o ka se tsoge o kgopetše goba wa lopa batho gore ba o thekge. Ge Yo a rego: ‘Gauta ka moka le silifera ya dithabeng ke tša ka’ a palelwa ke go re nea tšhelete e nyakegago mošomong wa gagwe, gona re tla lebelela seo e le nako ya gore re kgaotše go o gatiša.” (Hag. 2:7-9) Ga bjale go šetše go fetile nywaga ya ka godimo ga e 130 Morokami o gatišwa gomme mokgatlo wa wona o sa gatela pele ka mošito!

8 Batho ba Jehofa ga ba kgopele batho meneelo. Mafelong a bona a borapedi ga ba fetiše dipoleiti tša koleke goba go romela batho mangwalo a go kgopela thekgo ya ditšhelete. Le gona ga ba kgoboketše tšhelete ka go ntšha karolo ya lesome, go swaepa karata ya panka goba go rekiša dilo. Ba latela seo Morokami o mongwe o ilego wa se bolela kgale gore: “Re bona go fošagetše gore re kgopele batho ditšhelete tša go thekga mošomo wa Morena, go etša ge dikereke tše dingwe di tlwaetše go dira bjalo . . . Re lebelela go kgopela batho ditšhelete ka tsela le ge e le efe ka leina la Morena e le go mo kgopiša, a sa go amogele, e bile a ka se šegofatše yo a ntšhitšego tšhelete yeo le seo se tla bago se dirilwe ka yona.” *

“Anke yo Mongwe le yo Mongwe a Dire Feela Kamoo a Phethilego ka Gona Pelong ya Gagwe”

9, 10. Lebaka le lengwe la gore re ntšhe meneelo ya boithatelo ke lefe?

9 Ka ge re le balata ba Mmušo wa Modimo lehono, ga go nyakege gore re gapeletšwe go neela. Go e na le moo, re thabela go diriša ditšhelete tša rena le dilo tše dingwe go thekga mediro ya Mmušo. Ke ka baka la’ng re thabela go neela? Ela hloko mabaka a mararo.

10 La pele, re ntšha meneelo ya boithatelo ka gobane re rata Jehofa e bile re nyaka go dira “dilo tše di kgahlišago mahlong a gagwe.” (1 Joh. 3:22) Ruri Jehofa o thabišwa ke morapedi yo a ntšhago moneelo ka pelo e tšhweu. Anke re sekasekeng mantšu a moapostola Paulo ao a bontšhago kamoo Bakriste ba swanetšego go neela ka gona. (Bala 2 Bakorinthe 9:7.) Mokriste wa therešo ga a dikadike go neela e bile ga a gapeletšwe. Go e na le moo, o neela ka gobane a ‘phethile ka pelong ya gagwe’ go dira bjalo. * Ka mantšu a mangwe, o neela ka morago ga gore a bone bohlokwa bja go dira bjalo le kamoo a ka dirago seo ka gona. Jehofa o rata monei yo bjalo, ka gobane “Modimo o rata monei yo a neago ka go hlalala.” Beibele e nngwe e fetoletše mantšu a ka gore: “Modimo o rata batho bao ba ratago go nea.”

Bana ba rena kua Mozambique le bona ba thabela go nea

11. Ke’ng seo se re tutueletšago go nea Jehofa sohle seo re ka se kgonago?

11 La bobedi, re neela ka dilo tša rena tše di bonagalago go bontšha Jehofa gore re leboga tsela yeo a re šegofaditšego ka yona. Ela hloko molao wa motheo wo o kgomago dipelo wo o lego Molaong wa Moshe. (Bala Doiteronomio 16:16, 17.) Ge monna yo mongwe le yo mongwe wa Moisiraele a be a eya menyanyeng e meraro ya ngwaga le ngwaga, o be a swanetše go ya le mpho yeo e “[lekanago] le tšhegofatšo yeo Jehofa . . . a mo šegofaditšego ka yona.” Ka go re’alo, pele monna yo mongwe le yo  mongwe a ka ya menyanyeng yeo, o be a swanetše go ipotšiša gore Jehofa o mo šegofaditše gakaakaang, a itlhahlobe go tšwa pelong ke moka a dire phetho ya gore ke mpho efe e kaonekaone yeo a tlago go ya le yona. Ka mo go swanago, le rena ge re naganišiša ka ditsela tše dintši tšeo Jehofa a re šegofaditšego ka tšona, re tutueletšega go mo nea sohle seo re ka se kgonago. Mpho ya rena e tšwago pelong, yeo e akaretšago go neela ka dilo tše di bonagalago, ke leswao la kamoo re ikwago ka gona ka tsela yeo Jehofa a re šegofaditšego ka yona.—2 Bakor. 8:12-15.

12, 13. Meneelo ya rena ya boithatelo e bontšha bjang gore re rata Kgoši, gona yo mongwe le yo mongwe wa rena o swanetše go neela gakaaka’ng?

12 La boraro, ge re ntšha meneelo ka go rata, re bontšha gore re rata Kgoši Jesu Kriste. Bjang? Hlokomela seo Jesu a ilego a se botša barutiwa ba gagwe bošegong bja gagwe bja mafelelo mo lefaseng. (Bala Johane 14:23.) Jesu o itše: “Ge e ba motho le ge e le ofe a nthata, o tla boloka lentšu la ka.” “Lentšu” la Jesu le akaretša taelo ya gore re bolele ditaba tše dibotse tša Mmušo lefaseng ka moka. (Mat. 24:14; 28:19, 20) Re boloka “lentšu” la gagwe ka go dira sohle seo re ka se kgonago—go gafa nako ya rena, matla le dilo tše di bonagalago—go thekga modiro wa go  bolela ka Mmušo. Ge re dira bjalo, re bontšha gore re rata Kgoši Mesia.

13 Ee, ka ge re le balata ba botegago ba Mmušo wa Modimo, re nyaka go thekga Mmušo wo ka dipelo tša rena ka moka ka go ntšha meneelo. Re dira seo bjang? Yeo ke phetho ya motho ka noši. Yo mongwe le yo mongwe o neela ka mo a ka kgonago. Lega go le bjalo, badumedigotee le rena ba bantši ga ba na sa bona. (Mat. 19:23, 24; Jak. 2:5) Eupša bana babo rena ba bjalo ba ka kgothatšwa ke go tseba gore Jehofa le Morwa wa gagwe ba tšeela godimo kudu gaešita le moneelo o monyenyane wo o ntšhwago go tšwa pelong.—Mar. 12:41-44.

Re Hwetša Kae Tšhelete?

14. Dihlatse tša Jehofa di be di sepedišetša batho dikgatišo bjang ka nywaga e mentši?

14 Ke kgale Dihlatse tša Jehofa di sepedišetša batho dikgatišo tše di theilwego Beibeleng ka moneelo o itšego. Meneelo yeo e ile ya dula e le tlase kudu e le gore le badiidi ba kgone go hwetša dikgatišo. Ke therešo gore ge mong wa ntlo a be a nyaka kgatišo eupša a se na moneelo, bagoeledi ba be ba mo nea yona. Morero wa bona o mogolo e be e le go nea batho ba dipelo tše dibotse dikgatišo gore ba di bale gomme ba holege.

15, 16. (a) Ka 1990, Sehlopha se Bušago se ile sa dira phetogo efe tseleng yeo re sepedišago dikgatišo tša rena? (b) Meneelo ya boithatelo e dirwa bjang? (Bona le lepokisi le le rego, “ Meneelo ya Rena e Dirišwa Bjang?”)

15 Ka 1990, Sehlopha se Bušago se ile sa thoma go dira diphetogo tseleng yeo re sepedišago dikgatišo tša rena. Go thoma wona ngwageng woo kua United States, dikgatišo ka moka di ile tša thoma go sepedišwa ka moneelo wa boithatelo. Lengwalo leo le ilego la romelwa diphuthegong tša moo le ile la hlalosa gore: “Bagoeledi le batho bao ba thabelago ba tlo newa dimakasine le dipuku ntle le go ba kgopela gore ba ntšhe moneelo o itšego pele ba ka newa kgatišo. . . . Motho le ge e le ofe yo a ratago go ntšha moneelo go thuša go lefelela ditshenyagalelo tša modiro wa rena wa go ruta ka Beibele, a ka dira bjalo, eupša batho ba ka newa dikgatišo go sa šetšwe gore ba ntšhitše moneelo goba aowa.” Tokišetšo ye e ile ya thuša batho go lemoga gore modiro wa bodumedi bja rena o thekgwa ka meneelo ya boithatelo le go ba bontšha gore “ga re babapatši ba lentšu la Modimo.” (2 Bakor. 2:17) Ge nako e dutše e eya, tokišetšo ya meneelo ya boithatelo e ile ya thoma go šoma makaleng lefaseng ka bophara.

16 Meneelo ye ya boithatelo e ntšhwa bjang? Diholong tša Mmušo tša Dihlatse tša Jehofa, go na le mapokisi a meneelo ao a beilwego mafelong a swanetšego. Bao ba ratago ba ka tsenya meneelo ya bona ka go ona goba ba e romela ka go lebanya mokgatlong woo o dirišwago ke Dihlatse tša Jehofa nageng ya gabo bona. Ngwaga o mongwe le o mongwe go ba le sehlogo se itšego ka go Morokami seo se hlalosago kamoo batho ba ka ntšhago meneelo yeo ya boithatelo.

Tšhelete Yeo e Dirišwa Bjang?

17-19. Hlalosa kamoo tšhelete ya moneelo e dirišwago ka gona bakeng sa (a) modiro wa lefase ka bophara, (b) go agwa ga Diholo tša Mmušo lefaseng ka bophara le (c) go lefelela ditshenyagalelo tša phuthego.

17 Modiro wa lefase ka bophara. Tšhelete ye e dirišetšwa go lefelela ditshenyagalelo tša modiro wa boboledi wa lefase ka bophara. Ditshenyagalelo tše di akaretša go lefelela go tšweletšwa  ga dikgatišo tša rena le go di romela mafelong a fapafapanego, go aga le go hlokomela diofisi tša makala le magae a Bethele gotee le go thekga dikolo tše di fapafapanego tša mokgatlo wa rena. Go oketša moo, tšhelete e nngwe e dirišetšwa go hlokomela baromiwa, balebeledi ba basepedi le babulamadibogo ba ba kgethegilego. Le gona meneelo ya rena e dirišetšwa go thuša badumedigotee le rena ge ba wetšwe ke masetlapelo. *

18 Go agwa ga Diholo tša Mmušo lefaseng ka bophara. Tšhelete ye e dirišetšwa go thuša diphuthego go aga Diholo tša tšona tša Mmušo goba go di mpshafatša. Ge lekala le dutše le amogela meneelo, go ba le tšhelete yeo e ka thušago diphuthego tše dingwe. *

19 Ditshenyagalelo tša phuthego. Tšhelete ye e dirišetšwa go lefelela ditshenyagalelo tša go dirišwa ga Holo ya Mmušo le go e hlokomela. Bagolo ba ka šišinya gore moneelo o mongwe o romelwe ofising ya lekala ya nageng ya gabo lena gore o thuše go tšwetša pele modiro wa lefase ka bophara. Mabakeng a bjalo, bagolo ba tla kgopela phuthego gore e dire setlamo. Ge e ba phuthego e dumela, moneelo woo o šišintšwego o tla romelwa ofising ya lekala. Kgwedi e nngwe le e nngwe, ngwanabo rena yo a swarago ditšhelete tša phuthego o rulaganya pego ya ditšhelete gomme ya balelwa phuthego.

20. O ka godiša Jehofa bjang ka “dilo tša gago tše bohlokwa”?

20 Ge re nagana ka tšhelete e ntši yeo e nyakegago gore go phethwe modiro wa go bolela ka Mmušo le wa go dira barutiwa lefaseng ka bophara, re tutueletšega go “godiša Jehofa ka dilo tša [rena] tše bohlokwa.” (Die. 3:9, 10) Dilo tša rena tše bohlokwa di akaretša matla a rena, menagano ya rena le bomoya bja rena. Ruri re nyaka go diriša dilo tšeo ka botlalo modirong wa Mmušo. Eupša gopola gore dilo tša rena tše bohlokwa di bile di akaretša dilo tša rena tše di bonagalago. Ka gona anke re ikemišetšeng go neela ka seo re ka se kgonago, ge re kgona. Meneelo ya rena ya boithatelo e godiša Jehofa e bile e bontšha gore re thekga Mmušo wa Mesia.

^ par. 1 Bala Morokami wa Seisemane wa July 15, 1915, matlakala 218-219.

^ par. 8 Bala Morokami wa Seisemane wa August 1, 1899, letlakala 201.

^ par. 10 Seithuti se sengwe se re lentšu la Segerika leo le fetoletšwego e le “kamoo a phethilego ka gona,” “le na le mogopolo wa go rulaganya e sa le pele go dira selo se itšego.” Se okeditše ka gore: “Gaešita le ge go nea go tliša lethabo, motho yo a neelago o sa dutše a swanetše go rulaganya seo e sa le pele.”—1 Bakor. 16:2.

^ par. 17 Ge o nyaka go tseba mo go oketšegilego ka modiro wa tlhakodišo, bala Kgaolo 20.

^ par. 18 Ge o nyaka go tseba mo go oketšegilego ka go agwa ga Diholo tša Mmušo, bala Kgaolo 19.

Ithute ka mo go oketšegilego

Kamoo re ka Thušago ba Bangwe

Ithute kamoo meneelo ya lefase ka bophara ya Dihlatse tša Jehofa e thušago go hlokomela ba bangwe moyeng le nameng.

Na o tla Ikgafa ka Baka la Mmušo?

Ithute kamoo re ka dirišago nako ya rena, tšhelete, matla le bokgoni go thekga Mmušo wa Modimo.