Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Mmušo wa Modimo o a Buša!

 KGAOLO 6

Batho Bao ba Bolelago Ditaba tše Dibotse—Badiredi ba Ikgafa ka go Rata

Batho Bao ba Bolelago Ditaba tše Dibotse—Badiredi ba Ikgafa ka go Rata

MOKOTABA WA KGAOLO YE

Kgoši e kgoboketša baboledi ba ditaba tše dibotse

1, 2. Jesu o porofetile ka modiro ofe o mogolo, gona go rotoga potšišo efe ya bohlokwa?

GANTŠI baetapele ba dipolotiki ba dira dikholofetšo tšeo ba sa di phethego. Gaešita le bao ba nago le maikemišetšo a mabotse ba ka palelwa ke go phetha dikholofetšo tša bona. Ka go se swane le bona, Kgoši Mesia e lego Jesu Kriste, ka mehla o phetha seo a se holofeditšego.

2 Ka morago ga gore Jesu e be Kgoši ka 1914, o be a loketše go phethagatša boporofeta bjo a bo boletšego nywaga e ka bago e 1 900 pele ga moo. Pejana ga ge Jesu a ka hwa, o ile a porofeta ka gore: “Ditaba tše tše dibotse tša Mmušo di tla bolelwa lefaseng ka moka gore e be bohlatse go ditšhaba tšohle.” (Mat. 24:14) Go phethagala ga mantšu ao e be e tla ba karolo ya pontšho ya gore o thomile go buša legodimong. Lega go le bjalo, go rotoga potšišo ye ya bohlokwa: Kgoši ye e be e tla kgona bjang go kgoboketša batho bao ba bego ba tla ithaopela go bolela ditaba tše dibotse mehleng ya bofelo—nakong yeo go tla bago le batho ba go ithata, ba ba se nago lerato le bao ba sa ratego bodumedi? (Mat. 24:12; 2 Tim. 3:1-5) Re swanetše go tseba karabo ya potšišo ye ka gobane e akaretša Bakriste ka moka ba therešo.

3. Jesu o be a kgodišegile ka’ng, gona o hweditše kae kgodišego yeo?

3 Lebelela gape mantšu a Jesu a boporofeta. Na mantšu ao a rego “di tla bolelwa” a bontšha kgodišego? Ee, go bjalo! Jesu o be a kgodišegile gore mehleng ya bofelo o tla ba le bao ba mo thekgago ka go rata. O hweditše kae kgodišego ye? O ithutile yona go Tatagwe. (Joh. 12:45; 14:9) Pele ga ge a ka tla lefaseng, Jesu o ile a iponela ka noši gore Jehofa o na le kgodišego ya gore barapedi ba Gagwe ba na le moya wa boikgafo. Anke re boneng kamoo Jehofa a bontšhitšego kgodišego yeo.

“Batho ba Gago ba tla Ithaopa”

4. Jehofa o ile a kgopela Baisiraele gore ba thekge modiro ofe, gomme ba ile ba arabela bjang?

4 Gopola seo se ilego sa direga ge Jehofa a be a laela Moshe gore a age taberenakele, goba tente, yeo setšhaba sa Isiraele se bego se tla mo rapela go yona. Jehofa o ile a diriša Moshe go kgopela batho ka moka go thekga modiro woo. Moshe o ile a ba botša gore: ‘Anke yo mongwe le yo mongwe wa pelo e ratago a tlišetše Jehofa moneelo.’ Mafelelo e bile afe? ‘Mesong e mengwe le e mengwe batho ba be ba dutše ba tliša sebego sa boithaopo.’ Ba  ile ba tliša moneelo o montši kudu moo ba ilego ba swanelwa ke go “thibelwa go o tliša.” (Ek. 35:5; 36:3, 6) Baisiraele ba ile ba bontšha gore Jehofa o be a se a foša ka go ba bota.

5, 6. Go ya ka Psalme 110:1-3, Jehofa le Jesu ba be ba letetše go hwetša moya ofe gare ga barapedi ba therešo mehleng ya bofelo?

5 Na Jehofa o be a letetše go hwetša moya o bjalo wa boikgafo go barapedi ba gagwe mehleng ye ya bofelo? Ee! Nywaga ya ka godimo ga e 1 000 pele Jesu a ka belegwa mo lefaseng, Jehofa o ile a budulela Dafida go ngwala mabapi le nako yeo Mesia a tlago go thoma go buša. (Bala Psalme 110:1-3.) Jesu, e lego Kgoši yeo e tla bego e sa tšwa go bewa sedulong, o be a tla ba le manaba a mantši ao a bego a tla ganetšana le yena. Eupša gape o be a tla ba le bathekgi ba bantši kudu. Ba be ba ka se gapeletšwe go mo hlankela. Gaešita le ba banyenyane gare ga bathekgi bao ba be ba tla ithaopa, ya ba batho ba bantši kudu moo e bego e tla ba ga maleba go ba bapiša le marothodi a mantši a phoka ao a hwetšwago a apešitše naga ge letšatši le hlaba. *

Bao ba thekgago Mmušo ka go rata ke ba bantši go etša marothodi a phoka (Bona serapa 5)

6 Jesu o be a tseba gore boporofeta bjo bo begilwego go Psalme 110 bo be bo šupa go yena. (Mat. 22:42-45) Ka baka leo, o be a kgodišegile gore o tla ba le bathekgi bao ba botegago bao ba bego ba tla ithaopa ka go rata go bolela ditaba tše dibotse lefaseng ka moka. Histori e bontšha’ng? Na Kgoši ye ya Mmušo wa Modimo e kgonne go kgoboketša lešaba la batho bao ba ithaopelago go bolela ditaba tše dibotse mehleng ye ya bofelo?

“Tokelo ya ka le Boikarabelo bja ka ke go Tsebatša Molaetša Woo”

7. Ka morago ga gore Jesu a bewe go ba Kgoši, o ile a gata megato efe go lokišeletša balatedi ba gagwe bakeng sa modiro wo o bego o letše ka pele?

7 Nakwana ka morago ga gore Jesu a bewe go ba Kgoši, o ile a gata megato ya go lokišeletša balatedi ba gagwe bakeng sa modiro o mogolo wo o bego o swanetše go dirwa. Go etša ge re bone go Kgaolo 2, o ile a swarega ka modiro wa go hlahloba le go hlwekiša go tloga ka 1914 go ya mathomong a 1919. (Mal. 3:1-4) Ke moka ka 1919, o ile a kgetha mohlanka yo a botegago gore a  etelele balatedi ba gagwe pele. (Mat. 24:45) Ge e le gabotse, go tloga ka nako yeo go ya pele, mohlanka yoo o ile a thoma go aba dijo tša moya—ka dipolelo tša dikopanong le ka dikgatišo—tšeo di bego di gatelela leboelela boikarabelo bja Bakriste ka moka bja gore yo mongwe le yo mongwe a tšee karolo modirong wa boboledi.

8-10. Dikopano tša selete di ile tša kgothaletša batho bjang go kgatha tema modirong wa boboledi? Nea mohlala. (Bona le lepokisi le le rego, “ Dikopano tša Pele tša Selete Tšeo di Kgothaleditšego Modiro wa Boboledi.”)

8 Dipolelo tša dikopanong tša selete. Ka ge Barutwana ba Beibele ba be ba fagahletše go hwetša tlhahlo, ba ile ba bokana kua Cedar Point, Ohio, U.S.A., go tloga ka September 1-8, 1919, kopanong ya bona ya selete e kgolo ya mathomo ka morago ga Ntwa ya Pele ya Lefase. Letšatšing la bobedi la kopano, Ngwanabo rena Rutherford o ile a nea polelo yeo go yona a ilego a botša batheetši ka go lebanya gore: “Modiro wa Mokriste mo lefaseng . . . ke go tsebatša molaetša wa mmušo wa Morena.”

9 Kopano yeo e ile ya fela ka morago ga matšatši a mararo ge Ngwanabo rena Rutherford a be a nea polelo yeo e nago le sehlogo se se rego, “Polelo go Bašomigotee,” yeo e ilego ya gatišwa ka go Morokami ka tlase ga sehlogo se se rego, “Go Tsebatša Mmušo.” O ile a re: “Ka dinako tša ge Mokriste a iketlile ka tlwaelo o ipotšiša gore: Ke ka baka la’ng ke le mo lefaseng? Karabo ya maleba e swanetše go ba yeo e rego: Morena ka kgaugelo o ntirile motseta wa gagwe gore ke iše molaetša wa Modimo wa poelano lefaseng, gomme tokelo ya ka le boikarabelo bja ka ke go tsebatša molaetša woo.”

10 Polelong ye yeo e sa lebalegego, Ngwanabo rena Rutherford o ile a tsebiša gore makasine o mofsa wa The Golden Age (woo ga bjale o bitšwago Phafoga!), o be o tla gatišwa go thuša batho go bona gore Mmušo wa Modimo ke kholofelo e nnoši ya bona. Ke moka o ile a botšiša batheetši gore ke ba bakae gare ga bona bao ba nyakago go sepediša makasine wo. Pego ya kopanong yeo e itše: “Go ile gwa direga mohlolo. Batho ba dikete tše tshela ba ile ba emelela sammaletee go bontšha gore ba be ba ikemišeditše go tlo sepediša makasine woo.” * Ruri Kgoši ye e be e na le balatedi bao ba bego ba ithaopela go tsebatša Mmušo wa yona!

11, 12. Ka 1920, Morokami o itše modiro wo Jesu a boletšego ka wona e sa le pele o be o tla dirwa neng?

11 Dikgatišo. Ka thušo ya Morokami, bohlokwa bja modiro wo Jesu a boletšego ka wona e sa le pele—e lego wa go bolela ditaba tše dibotse tša Mmušo—bo ile bja tšwela pele bo kwagala le go feta. Ela hloko e mengwe ya mehlala ya seo go tloga mathomong a bo-1920.

12 Ke molaetša ofe wo o bego o tla tsebatšwa e le go phethagatša Mateo 24:14? Modiro woo o be o tla dirwa neng? Sehlogo se se rego, “Ebangedi ya Mmušo” ka tokollong ya Morokami wa July 1, 1920, se ile sa hlalosa molaetša woo ka gore: “Ditaba tše dibotse tše go bolelwago ka tšona mo ke tša mabapi le go fedišwa ga tshepedišo ya kgale le go hlongwa ga Mmušo wa Mesia.” Sehlogo seo se ile sa bontšha gabotse gore molaetša woo o be o  tla bolelwa neng, ge se be se re: “Molaetša wo o swanetše go bolelwa magareng ga ntwa e kgolo ya lefase [Ntwa ya Pele ya Lefase] le ‘masetlapelo a magolo.’” Sa oketša ka gore: “Ye ke nako . . . ya go tsebatša ditaba tše tše dibotse kgole le kgauswi gare ga Bojakane.”

13. Ka 1921, Morokami o ile wa kgothaletša Bakriste ba tloditšwego bjang go ba le moya wa boikgafo?

13 Na batho ba Modimo ba be ba tla gapeletšwa go phetha modiro wo woo Jesu a boletšego ka wona e sa le pele? Aowa. Sehlogo se se rego, “Ebang le Sebete” ka tokollong ya Morokami wa March 15, 1921, se ile sa kgothaletša Bakriste ba tloditšwego go ba le moya wa boikgafo. Yo mongwe le yo mongwe o ile a kgothaletšwa go ipotšiša gore: “Na go kgatha tema modirong wo ga se tokelo ya ka e kgolokgolo le boikarabelo bja ka?” Sehlogo seo se tšwetše pele ka gore: “Re kgodišegile gore ge le bona [e le tokelo go kgatha tema modirong wo], le tla swana le Jeremia, yoo mantšu a Morena ka pelong ya gagwe a ilego a ‘ba bjalo ka ge eka ke mollo o fišago wo o tswaleletšwego marapong a [gagwe],’ a mo tutueletša go bolela.” (Jer. 20:9) Kgothatšo yeo e borutho e ile ya bontšha gore Jehofa le Jesu ba bota bathekgi bao ba botegago ba Mmušo.

14, 15. Ka 1922, Morokami o ile wa kgothaletša Bakriste ba tloditšwego go fihlelela batho ka molaetša wa Mmušo ka tsela efe?

14 Bakriste ba therešo ba swanetše go fihlelela batho bjang ka molaetša wa Mmušo? Sehlogo se sekopana eupša e le se matla se se rego, “Tirelo ya Tšhemo e Bohlokwa” ka tokollong ya Morokami wa August 15, 1922, se ile sa kgothaletša Bakriste ba tloditšwego go tšea karolo “ka mafolofolo go išetšeng batho molaetša ka dikgatišo le go boledišana le bona dintlong tša bona, ba ba botše gore Mmušo wa legodimo o batametše.”

15 Go molaleng gore go thoma ka 1919 go ya pele, Kriste o dirišitše mohlanka wa gagwe yo a botegago le wa temogo go gatelela leboelela gore tokelo ya Mokriste le boikarabelo bja gagwe mo lefaseng ke go tsebatša molaetša wa Mmušo. Eupša Barutwana ba Beibele ba mehleng ya pele ba ile ba arabela bjang ge ba be ba kgothaletšwa go kgatha tema modirong wa go tsebatša Mmušo?

“Bao ba Botegago ba tla Ithaopa”

16. Bagolo ba bangwe bao ba kgethilwego ba ile ba arabela bjang kgopolong ya gore bohle ba swanetše go kgatha tema bodireding?

16 Ka bo-1920 le bo-1930, ba bangwe ba ile ba gana kgopolo ya gore Bakriste ka moka ba tloditšwego ba swanetše go kgatha tema bodireding. Morokami wa November 1, 1927, o hlalositše seo se bego se direga ka gore: “Lehono go na le bao ka mo kerekeng [phuthegong] ba lego maemong a boikarabelo e le bagolo . . . bao ba ganetšago bana babo rena go ya tšhemong, bao le bona ba ganago go ya tšhemong. . . . Ba kwera kgopolo ya gore re tšame re tsena ka ntlo le ntlo re botša batho ka molaetša wa Modimo, ka Kgoši ya gagwe le ka mmušo wa gagwe.” Sehlogo seo se ile sa bolela se sa pepetletše gore: “Ga bjale go fihlile nako ya gore bao ba botegago ba swaye batho ba bjalo le go ba phema, le go botša banna bao gore ga ba sa swanelega go ba bagolo.” *

17, 18. Ba bantši ka diphuthegong ba ile ba arabela bjang tlhahlong e tšwago ntlongkgolo, gona batho ba dimilione ba arabetše bjang tlhahlong yeo nywageng e 100 e fetilego?

 17 Se se kgahlišago ke gore ba bantši ka diphuthegong ba ile ba arabela ka mafolofolo tlhahlong e tšwago ntlongkgolo. Ba ile ba lebelela go tsebatša molaetša wa Mmušo e le tokelo. Morokami wa March 15, 1926, o hlalositše taba ye ka gore: “Bao ba botegago ba tla ithaopa . . . gomme ba botša batho molaetša wo.” Babotegi bao ba ile ba phethagatša mantšu a boporofeta ao a lego go Psalme 110:3 gomme ba itlhatsela e le bathekgi bao ba ithaopago ba Kgoši Mesia.

18 Nywageng e 100 e fetilego, ba dimilione ba ikgafile ka go rata go phetha modiro wo wa go bolela ka Mmušo. Dikgaolong tše sego kae tše di latelago, re tla ahlaahla kamoo ba phethilego modiro wo ka gona—mekgwa le didirišwa tšeo ba di dirišitšego—le gore mafelelo e bile afe. Lega go le bjalo, anke sa pele re ahlaahleng lebaka leo ka lona ba dimilione ba kgathilego tema ka go ithatela modirong wo wa go bolela ka Mmušo lefaseng le leo le tletšego moya wa boithati. Ge re dutše re ahlaahla lebaka leo, re swanetše go ipotšiša gore: ‘Ke ka baka la’ng ke botša ba bangwe ditaba tše dibotse?’

“Tšwelang Pele le Tsoma Mmušo Pele”

19. Ke ka baka la’ng re ekwa keletšo ya Jesu ya gore re ‘tšwele pele re tsoma Mmušo pele’?

19 Jesu o eleditše balatedi ba gagwe gore ba ‘tšwele pele ba tsoma Mmušo pele.’ (Mat. 6:33) Ke ka baka la’ng re ekwa keletšo ye? Ke ka gobane re lemoga bohlokwa bja Mmušo woo, gore ke wa bohlokwa kudu morerong wa Modimo. Go etša ge re bone kgaolong e fetilego, moya o mokgethwa o re utolletše ganyenyane-ganyenyane ditherešo tše di kgahlišago ka Mmušo wo. Ge therešo ya bohlokwa ya mabapi le Mmušo e kgoma dipelo tša rena, re tutueletšega go tsoma Mmušo pele.

Go swana le monna yo a thabetšego gore o hweditše letlotlo le le utilwego, Bakriste ba thabela gore ba hweditše therešo ya Mmušo (Bona serapa 20)

20. Seswantšho sa Jesu sa mabapi le letlotlo le le utilwego se bontšha bjang kamoo balatedi ba gagwe ba bego ba tlo arabela ka gona keletšong ya gore ba tšwele pele ba tsoma Mmušo pele?

20 Jesu o be a tseba kamoo balatedi ba gagwe ba bego ba tlo arabela ka gona keletšong ya gore ba tšwele pele ba tsoma Mmušo pele. Ela hloko seswantšho sa gagwe sa mabapi le letlotlo le le utilwego. (Bala Mateo 13:44.) Ge mošomi wa mašemong wa seswantšhong se sa Jesu a dutše a swaregile ka mošomo wa gagwe wa letšatši le letšatši, o ile a wela letlotlo le le utilwego gomme gateetee a lemoga bohlokwa bja lona. O ile a dira’ng? “Ka baka la go thaba ga gagwe [o ile] a ya a rekiša dilo tšeo a nago le tšona a reka tšhemo yeo.” Re ithuta’ng go se? Ge re hwetša therešo ya Mmušo gomme re lemoga bohlokwa bja yona, ka lethabo re tla dira boikgafo le ge e le bofe bjo bo nyakegago gore re kgone go etiša dikgahlego tša Mmušo pele maphelong a rena. *

21, 22. Bathekgi ba botegago ba Mmušo ba bontšha bjang gore ba tsoma Mmušo pele? Nea mohlala.

21 Bathekgi ba botegago ba Mmušo ba bontšha gore ba tsoma Mmušo pele ka ditiro, e sego ka go fo bolela. Ba gafa maphelo a bona, bokgoni bja bona le dilo tša bona tše di bonagalago modirong wa go bolela ka Mmušo. Ba bantši ba gafile dilo tše dikgolo e le gore ba tsenele tirelo ya nako e tletšego. Badiredi bao ka moka ba iponetše ka noši gore Jehofa o šegofatša bao ba etišago Mmušo pele maphelong a bona. Ela hloko mohlala wa mehleng ya pele.

 22 Avery le Lovenia Bristow ba hlanketše gotee e le babapatši ba dipuku tša bodumedi (babulamadibogo) ka borwa bja United States go thoma mafelelong a bo-1920. Ka morago ga nywaga e mentši, Lovenia o gopola ka gore: “Nna le Avery re thabetše go ba babulamadibogo ka nywaga e mentši go tloga ka yona nako yeo. Go bile le dinako tša ge re be re ipotšiša gore re tla hwetša kae tšhelete ya go reka peterole goba dijo. Eupša ka mehla Jehofa o be a re nea dilo tše re di hlokago ka tsela ya gagwe. Ga sa nka ra tlogela bobulamadibogo. Ka mehla re be re hwetša seo re se hlokago.” Lovenia o gopola lebakeng le lengwe ge ba be ba hlankela kua Pensacola, Florida, ba feletšwe ke tšhelete le dijo. Ge ba boa gae kharabaneng ya bona, ba ile ba hwetša mekotla e mebedi e megolo ya dijo le lengwalwana le le rego: “Khamphani ya Pensacola e le rata kudu.” * Ge Lovenia a nagana ka nywagasome yeo a e feditšego a le bodireding bja nako e tletšego o re: “Jehofa ga sa nka a re lahla. Le ka mohla ga a hlanogele bao ba mmotago.”

23. O ikwa bjang ka therešo ya Mmušo yeo o e hweditšego, gona o ikemišeditše go dira’ng?

23 Re ka se šome ka go lekana modirong wa boboledi. Maemo a rena ga a swane. Eupša ka moka ga rena re ka lebelela go bolela ditaba tše dibotse ka moya ka moka e le tokelo. (Bakol. 3:23) Ka ge re tšeela godimo therešo e bohlokwa ya Mmušo yeo re e hweditšego, re ikemišeditše—ee, re fagahletše go dira boikgafo le ge e le bofe gore re hlankele Jehofa ka botlalo ka mo re ka kgonago. Na o ikemišeditše go dira seo?

24. Se sengwe sa dilo tše dikgolo kudu tšeo Mmušo o di fihleletšego mehleng ye ya bofelo ke sefe?

24 Nywageng e lekgolo e fetilego, ruri Kgoši e be e dutše e phethagatša mantšu a yona a boporofeta ao a begilwego go Mateo 24:14. Le gona e dirile bjalo e sa gapeletše motho. Ka morago ga go tšwa lefaseng le leo le tletšego boithati, balatedi ba yona ba ikgafile ka go rata go dira boboledi. Go bolela ga bona ditaba tše dibotse lefaseng ka bophara ke karolo ya pontšho ya go ba gona ga Jesu a le matleng a Mmušo—e bile ke se sengwe sa dilo tše dikgolo kudu tšeo Mmušo woo o di fihleletšego mehleng ye ya bofelo.

^ par. 5 Ka Beibeleng, phoka e tswalanywa le motlalo wa dilo.—Gen. 27:28; Mika 5:7.

^ par. 10 Pampišana ya To Whom the Work Is Entrusted e hlalositše gore: “Modiro wa go sepediša makasine wa The Golden Age ke lesolo la go ya ka ntlo le ntlo la go tsebatša molaetša wa mmušo. . . . Ka morago ga go botša mong wa ntlo molaetša, le mo tlogelele kopi ya The Golden Age, go sa šetšwe gore o dirile peeletšo goba go se bjalo.” Nywaga e mentši ka morago ga moo, bana babo rena ba ile ba botšwa gore ba kgothaletše batho go dira dipeeletšo tša The Golden Age gotee le tša Morokami. Go thoma ka February 1, 1940, batho ba Jehofa ba ile ba kgothaletšwa go sepediša dimakasine le go bega palo ya tšeo ba di sepedišitšego.

^ par. 16 Mehleng yeo, bagolo ba be ba kgethwa ka go boutelwa ke ditho tša phuthego. Ka go re’alo, phuthego e be e ka gana go boutela banna bao ba bego ba gana go ya tšhemong. Phetogo ya ge bagolo ba be ba thoma go kgethwa ka tsela ya Jehofa e tla ahlaahlwa go Kgaolo 12.

^ par. 20 Jesu o boletše ntlha e swanago seswantšhong sa gagwe sa mabapi le mmapatši wa mosepedi yo a ilego a gafa dilo tše dintši e le ge a tsoma perela ya theko e kgolo. Ge a e hweditše, o ile a rekiša dilo ka moka tšeo a bego a na le tšona ke moka a e reka. (Mat. 13:45, 46) Diswantšho tše tše pedi di bile di re ruta gore re ka hwetša therešo ya Mmušo ka ditsela tše di sa swanego. Ba bangwe re ka re ba a e wela, mola ba bangwe ba e tsoma. Eupša go sa šetšwe gore re hwetša therešo bjang, re ikemišeditše go dira boikgafo le ge e le bofe gore re etiše Mmušo pele maphelong a rena.

^ par. 22 Mehleng yeo diphuthego di be di bitšwa dikhamphani.

Ithute ka mo go oketšegilego

Na o ‘Fišegela Mediro e Mebotse’?

Sehlogo se se ahlaahla kamoo go fišegela modiro wa rena wa boboledi gotee le boitshwaro bja rena bjo bobotse di ka gogelago batho go Modimo.

Hlankela Jehofa Pele go Fihla Matšatši a Thata

Bakriste ba ba godilego ba na le dibaka dife tša moswananoši tša go katološa bodiredi bja bona?