Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Mmušo wa Modimo o a Buša!

 KGAOLO 11

Go Hlwekišwa Boitshwarong—Go Bonagatša Bokgethwa bja Modimo

Go Hlwekišwa Boitshwarong—Go Bonagatša Bokgethwa bja Modimo

MOKOTABA WA KGAOLO YE

Kamoo Kgoši e rutilego balata ba yona go hlompha ditekanyetšo tša Modimo tša boitshwaro

Ipone o tsena kgorong yeo e yago ka lapeng la ka ntle la tempele e kgolo ya Jehofa ya moya

1. Ke’ng seo Hesekiele a ilego a se bona seo se re šiago re maketše?

O KA re’ng ge o ka ba le phihlelo yeo moporofeta Hesekiele a bilego le yona nywageng e ka bago e 2 500 e fetilego? Akanya ka se: O batamela tempele e kgolo yeo e phadimago. Gona moo go na le morongwa yo matla yo a tlago go go bontšha lefelo le leo le kgahlišago! O namelela manamelo a šupago ao a go lebišago go e nngwe ya dikgoro tše tharo tša tempele yeo. Dikgoro tše di go šia o maketše. Ke tša bophagamo bja dimithara tše e ka bago tše 30. Ge o se na go tsena dikgorong tšeo, o bona mafelo a bahlapetši. Dikokwane tša tšona di kgabišitšwe ka diswantšho tša mepalema.—Hesek. 40:1-4, 10, 14, 16, 22; 41:20.

2. (a) Tempele yeo Hesekiele a e bonego ponong e swantšhetša’ng? (Bona le mongwalo wa ka tlase.) (b) Re ka ithuta’ng dibopegong tša dikgorong tša yona?

2 Ye ke tempele ya moya yeo Hesekiele a e bonego ponong. O e hlalositše gabotse kudu moo e akaretšago dikgaolo 40 go ya go 48 tša puku ya gagwe ya boporofeta. Tempele ye e swantšhetša tokišetšo ya Jehofa ya borapedi bjo bo sekilego. Sebopego se sengwe le se sengwe sa yona se na le seo se se bolelago borapeding bja rena mehleng ye ya bofelo. * Dikgoro tša yona tše di phagamego di swantšhetša’ng? Di re gopotša gore bao ba tsenago tokišetšong ya Jehofa ya borapedi bjo bo sekilego ba swanetše go phela ka ditekanyetšo tša Modimo tše di phagamego le tša go loka. Gaešita le mekgabišo ya mepalema e bolela se se swanago, ka gore ka dinako tše dingwe mepalema ka Beibeleng e swantšhetša go loka. (Ps. 92:12) Go thwe’ng ka mafelo a bahlapetši? Go molaleng gore bao ba sa hlomphego ditekanyetšo tša Modimo ga ba dumelelwe go tsena borapeding bjo bjo sekilego le bjo bo neago bophelo.—Hesek. 44:9.

3. Ke ka baka la’ng go be go nyakega gore balatedi ba Kriste ba dule ba hlwekišwa?

3 Pono ye ya Hesekiele e phethagetše bjang? Go etša ge re bone go Kgaolo 2 ya puku ye, Jehofa o dirišitše Kriste go hlwekiša batho ba gagwe ka tsela e kgethegilego go thoma ka 1914 go fihla mathomong a 1919. Na go hlwekiša moo go ile gwa felela mehleng yeo? Le gatee! Nywageng e lekgolo e fetilego, Kriste o be a dutše a lwela ditekanyetšo tše kgethwa tša Jehofa tša boitshwaro. Ka go re’alo, balatedi ba gagwe ba be ba swanetše go dula ba hlwekišwa. Ka baka la’ng? Ka gobane Kriste o be a dutše a kgoboketša balatedi ba gagwe go tšwa lefaseng le leo le bodilego boitshwarong, e bile Sathane ga a kgaotše go leka go ba bušetša lerageng la  boitshwaro bjo bo gobogilego. (Bala 2 Petro 2:20-22.) Anke re ahlaahleng dikarolo tše tharo tšeo Bakriste ba therešo ba bego ba dutše ba hlwekišwa go tšona ganyenyane-ganyenyane. Sa pele, re tlo ahlaahla tše dingwe tša dibopego tšeo ba hlwekišitšwego go tšona boitshwarong, ke moka re ahlaahle tokišetšo ya bohlokwa ya go boloka phuthego e hlwekile gomme mafelelong re ahlaahle thulaganyo ya lapa.

Go Hlwekišwa Boitshwarong go Theoša le Nywaga

4, 5. Ke’ng seo Sathane a bego a dutše a thabela go se dira, gona o atlegile gakaaka’ng?

4 Batho ba Jehofa ba be ba dutše ba kgahlegela kudu go hlweka boitshwarong. Ka baka leo, ba amogetše ditaelo tše di kwagalago tša mabapi le taba ye. Ela hloko mehlala e sego kae.

5 Boitshwaro bjo bo gobogilego bja tša botona le botshadi. Jehofa o rerile gore banyalani ba be le thobalano ka tsela ya maleba le e hlwekilego. Sathane o thabela go šilafatša mpho ye e botse le go e diriša go leka batho ba Jehofa gore a se sa ba amogela. Sathane o ile a diriša gampe mpho ye mehleng ya Bileama gomme seo sa ba le ditlamorago tše šoro, e bile o e diriša gampe le go feta mehleng ye ya bofelo.—Num. 25:1-3, 9; Kut. 2:14.

6. Ke keno efe yeo e ilego ya gatišwa ka makasineng wa Zion’s Watch Tower, e be e šoma bjang, gona ke ka baka la’ng e ile ya kgaotšwa? (Bona le mongwalo wa ka tlase.)

6 E le go lwantšha makatika ao a Sathane, Morokami wa June 15, 1908, o ile wa gatiša keno yeo e bego e na le boitlamo bjo bo latelago: “Ka dinako tšohle le mafelong ohle, ke tla itshwara gabotse ge ke na le motho wa bong bjo bo fapanego le bja ka ka sephiring go fo swana le ge ke tla dira bjalo le pele ga batho.” * Gaešita le ge keno yeo e be e se tlamo, ba bantši ba ile ba e amogela gomme ba romela maina a bona gore a gatišwe ka makasineng wa Zion’s Watch Tower. Ka morago ga nywaga e itšego, go ile gwa lemogwa gore le ge keno ye e be e thuša ba bantši ka nako yeo, e be e thoma go fetoga mokgwa feela; ka go re’alo ya kgaotšwa. Lega go le bjalo, melao ya motheo e phagamego yeo e bego e e kgothaletša e ile ya se fetoge.

7. Ka 1935, Morokami o ile wa ahlaahla bothata bofe, gona o ile wa gatelela ditekanyetšo dife?

7 Ditlhaselo tša Sathane di ile tša gakala. Tokollo ya Morokami wa March 1, 1935, e ile ya bolela phaa ka bothata bjo bo bego bo gola gare ga batho ba Modimo. Go bonagala ba bangwe ba be ba nagana gore ge feela ba tšea karolo bodireding ga go hlokagale gore ba phele ka go dumelelana le ditekanyetšo tša Jehofa tša boitshwaro ge ba sa bonwe ke motho. Morokami woo o ile wa bolela o sa pepetletše gore: “Motho o swanetše go gopola gore go tšea karolo bodireding ga se feela seo se nyakegago. Dihlatse tša Jehofa ke baemedi ba gagwe, ka gona di ikarabela ka go emela Jehofa gabotse le mmušo wa gagwe.” Ke moka o ile wa nea keletšo e kwagalago ka lenyalo le ditekanyetšo tša botona le botshadi, ka go re’alo wa thuša batho ba Modimo go ‘tšhaba bootswa.’—1 Bakor. 6:18.

8. Ke ka baka la’ng Morokami o boletše leboelela ka tlhaloso e feletšego ya lentšu la Segerika leo le hlalosago boitshwaro bjo bo gobogilego bja botona le botshadi?

8 Nywagasomeng ya morago bjale, Morokami o boletše leboelela ka tlhaloso e nepagetšego ya lentšu leo le dirišitšwego ka Mangwalong a Segerika bakeng sa boitshwaro bjo bo gobogilego, e lego por·neiʹa. Tlhaloso ya lona ga e akaretše feela go ba le thobalano.  Go e na le moo, por·neiʹa e akaretša mehutahuta ya ditiro tše di gobogilego, tšeo gantši di akaretšago ditiro ka moka tše di šišimišago tšeo di dirwago mafelong a bagweba-ka-mmele. Ka go re’alo, balatedi ba Kriste ba šireleditšwe boitshwarong bjo bo gobogilego bjoo bo tantšego batho ba bantši kudu lefaseng lehono.—Bala Baefeso 4:17-19.

9, 10. (a) Ke bothata bofe bja boitshwaro bjoo Morokami o bo ahlaahlilego ka 1935? (b) Pono ya Beibele ka bjala ke efe?

9 Go diriša bjala gampe. Tokollo ya Morokami wa March 1, 1935, e ile ya bolela ka bothata bjo bongwe bja boitshwaro ka gore: “Go lemogilwe gape gore ba bangwe ba ya tšhemong le go phetha dikabelo tše dingwe ka mokgatlong ba nwele [bjala]. Mangwalo a dumelela motho go nwa bjala neng? Na e tla ba mo go swanetšego go diriša bjala go fihla bokgoleng bjoo bo šitišanago le tirelo ya gago ka mokgatlong wa Morena?”

10 Dikarabo tša dipotšišo tše di ile tša bontšha pono e lekalekanego yeo e lego ka Lentšung la Modimo ka dinotagi. Beibele ga e ganetše batho go nwa beine le dinotagi tše dingwe ka tsela e lekanetšego, eupša e ganetša botagwa. (Ps. 104:14, 15; 1 Bakor. 6:9, 10) Go tloga kgale bahlanka ba Modimo ba gopotšwa gore ba se phethe dikabelo tše kgethwa ba nwele. Ba newa mohlala wa barwa ba Arone bao Modimo a ilego a ba bolaya ka ge ba ile ba tliša mello e sa dumelelwago aletareng ya Modimo. Ka moragonyana ga moo, pego ye e hlalosa seo se ka bago se bakile gore banna bao ba dire sebe seo, ka gobane Modimo o be a neile baperisita ka moka molao wa gore ba se ke ba nwa bjala ge ba le tirelong e kgethwa. (Lef. 10:1, 2, 8-11) E le ge ba latela molao woo wa motheo lehono, balatedi ba Kriste ba phema go nwa bjala ge ba tšea karolo tirelong e kgethwa.

11. Ke ka baka la’ng e bile tšhegofatšo gore batho ba Modimo ba newe tsebišo e oketšegilego ka dinotagi?

11 Nywagasomeng ya morago bjale, balatedi ba Kriste ba ile ba šegofatšwa ka tsebišo e oketšegilego mabapi le dinotagi, go di nwa kudu le go di lemalela. Ka baka la dijo tša moya tšeo re di hwetšago ka nako e swanetšego, ba bantši ba thušitšwe gore ba se sa lemalela dinotagi ka go re’alo ba thoma go phela gabotse. Ba bangwe ba bantši ba thušitšwe go phema bothata bjo ka mo go feletšego. Ga go le o tee wa bona yo a nyakago gore bjala bo mo amoge seriti, bo mo thubele lapa, gomme go feta tšohle, bo mo amoge tokelo ya go tšea karolo borapeding bjo bo sekilego bja Jehofa.

“Ga re bone Morena wa rena a nkga motšoko goba a tsenya selo le ge e le sefe se se šilafetšego ka leganong la gagwe.”—C. T. Russell

12. Bahlanka ba Kriste ba be ba lebelela bjang go dirišwa ga motšoko le pele mehla ya bofelo e ka thoma?

12 Go diriša motšoko. Bahlanka ba Kriste ba thomile go ganetša go dirišwa ga motšoko le pele mehla ya bofelo e ka thoma. Nywageng e mmalwa e fetilego, ngwanabo rena yo a tšofetšego e lego Charles Capen, o ile a gopola seo se ilego sa direga ge a be a kopana la mathomo le Charles Taze Russell mafelelong a lekgolo la bo-19 la nywaga. Capen, yoo ka nako yeo a bego a na le nywaga e 13, o be a dutše le bana babo ba bararo ditepising tša moago wa Bible House kua Allegheny, Pennsylvania. Ge Russell a feta kgauswi le bona, o ile a ba botšiša gore: “Lena bašemane, le a kgoga? Ke kwa go nkga motšoko.” Ba ile ba mo kgonthišetša gore ga ba kgoge. Go tloga ka nako yeo ba ile ba tseba gabotse pono ya gagwe ka motšoko. Ka go Morokami wa August 1, 1895, Ngwanabo  rena Russell o ile a bolela ka 2 Bakorinthe 7:1 gore: “Ga ke bone kamoo Modimo a tla holegago ka gona goba go kgahlišwa ke Mokriste le ge e le ofe yo a dirišago motšoko ka tsela le ge e le efe. . . . Ga re bone Morena wa rena a nkga motšoko goba a tsenya selo le ge e le sefe se se šilafetšego ka leganong la gagwe.”

13. Ke phetogo efe ya boitshwaro yeo e ilego ya dirwa ka 1973?

13 Ka 1935, Morokami o ile wa bitša motšoko gore ke “bjang bja ditšhila” gomme wa re ga go na motho yo a o sohlago goba yo a o kgogago a ka dulago e le setho sa lapa la Bethele goba a ka hlankelago e le moemedi wa mokgatlo wa Modimo modirong wa bobulamadibogo goba wa bosepedi. Ka 1973 go ile gwa dirwa phetogo e nngwe ya boitshwaro. Morokami wa June 1 o ile wa hlalosa gore ga go na Hlatse ya Jehofa yeo e ka dulago e amogelega ka phuthegong mola e le gore e tšwela pele ka mokgwa wo o šilafatšago, o bolayago le wo o sa bontšhego lerato. Bao ba bego ba gana go tlogela motšoko ba be ba tla kgaolwa. * Kriste o be a gatile mogato o mongwe wa bohlokwa wa go hlwekiša balatedi ba gagwe.

14. Molao wa Modimo ka madi ke ofe, gona go tlile bjang gore tšhelo ya madi e ate kudu?

14 Go diriša madi gampe. Mehleng ya Noa, Modimo o ile a bolela gore go ja madi go fošagetše. O ile a tiišetša seo Molaong woo a o neilego setšhaba sa Isiraele, gomme ka morago a laela le ditho tša phuthego ya Bokriste gore di ‘ile madi.’ (Dit. 15:20, 29; Gen. 9:4; Lef. 7:26) Eupša mehleng yeno Sathane o hweditše tsela ya go dira gore batho ba bantši ba se kwe molao wo wa Modimo. Lekgolong la bo-19 la nywaga, dingaka di ile tša leka mokgwa wa go alafa batho ka go ba tšhela madi, eupša mokgwa wo o ile wa ata kudu ka morago ga gore di hwetše gore madi a batho ba bangwe a a swana. Ka 1937, madi a batho a ile a thoma go kgoboketšwa le go bolokwa, ke moka Ntwa ya Bobedi ya Lefase ya gakatša mokgwa wo wa go alafa batho ka go ba tšhela madi. Go se go ye kae, tšhelo ya madi e ile ya ata kudu lefaseng ka bophara.

15, 16. (a) Dihlatse tša Jehofa di lebelela bjang tšhelo ya madi? (b) Balatedi ba Kriste ba neilwe thekgo efe mabapi le tšhelo ya madi le mehuta e mengwe ya kalafo yeo e sa akaretšego tšhelo ya madi, gona mafelelo e bile afe?

15 Go thoma ka 1944, Morokami o ile wa bontšha gore go tšhelwa madi ke tsela e nngwe ya go ja madi. Ngwageng o latetšego, pono yeo ya Mangwalo e ile ya hlaloswa ka botlalo le ka mo go kwagalago. Ka 1951, go ile gwa gatišwa lelokelelo la dipotšišo le dikarabo go thuša batho ba Modimo go kgona go boledišana le ditsebi tša kalafo. Lefaseng ka bophara, balatedi ba Kriste bao ba botegago ba ile ba thoma go gana tšhelo ya madi ka sebete gaešita le ge ba be ba kwerwa, ba hloiwa le go tlaišwa. Eupša Kriste o ile a tšwela pele a tutuetša mokgatlo wa gagwe go nea balatedi ba gagwe thekgo e nyakegago. Go ile gwa gatišwa diporoutšha le dihlogo tše di nago le tsebišo e kwagalago le yeo e nyakišišitšwego gabotse.

16 Ka 1979, bagolo ba bangwe ba ile ba thoma go etela dipetlele go thuša dingaka go kwešiša boemo bja rena gakaone, lebaka la rena la Mangwalo la go gana tšhelo ya madi le go di botša ka mehuta e mengwe ya kalafo yeo e sa akaretšego tšhelo ya madi. Ka 1980, bagolo bao ba tšwago metseng e 39 kua United States ba ile ba newa tlwaetšo e kgethegilego ka mošomo wo. Ge nako e  dutše e eya, Sehlopha se Bušago se ile sa dumelela gore go hlongwe Dikomiti tša go Dira Kwano le Dipetlele lefaseng ka bophara. Na maiteko a a bile le dipoelo tše dibotse go theoša le nywaga? Lehono, ditsebi tše diketekete tša kalafo—go akaretša dingaka, dingaka tša go bua le dingaka tša go hwiša bogogoma—di dirišana gabotse le balwetši bao e lego Dihlatse, di hlompha phetho ya rena ya go kgetha kalafo yeo e sa akaretšego go tšhelwa madi. Dipetlele tše dintši di tšwela pele go alafa batho ntle le go ba tšhela madi, e bile tše dingwe di re mokgwa wo ke kalafo ya maemo a godimo kudu. Na ga o ikwe o thaba ge o nagana ka ditsela tšeo Jesu a šireleditšego balatedi ba gagwe maitekong a Sathane a go nyaka go ba šilafatša?—Bala Baefeso 5:25-27.

Dipetlele tše di oketšegilego di tšwela pele go alafa batho ntle le go ba tšhela madi, e bile tše dingwe di re mokgwa wo ke kalafo ya maemo a godimo kudu

17. Re ka bontšha bjang gore re tšeela godimo tsela yeo Kriste a bego a dutše a hlwekiša balatedi ba gagwe?

17 Re swanetše go ipotšiša gore: ‘Na re tšeela godimo tsela yeo Kriste a bego a dutše a hlwekiša balatedi ba gagwe, a re tlwaetša go phela ka ditekanyetšo tše di phagamego tša Jehofa tša boitshwaro?’ Ge e ba go le bjalo, gona anke re duleng re gopola gore ka mehla Sathane o nyaka go re aroganya le Jehofa le Jesu ka go re dira gore re hlokomologe ditekanyetšo tša Jehofa tša boitshwaro. E le go re šireletša maitekong ao a Sathane, mokgatlo wa Jehofa o dula o re nea ditemošo tše lerato le dikgopotšo mabapi le mekgwa e  gobogilego ya lefase le. Anke re duleng re phakgame, re ekwa e bile re diriša dikeletšo tše bjalo tšeo di re thušago.—Die. 19:20.

Go Šireletša Phuthego Gore e se Šilafatšwe Boitshwarong

18. Pono ya Hesekiele e re nea kgopotšo efe e kwagalago ka bao ka boomo ba kgethago go se sa phela ka ditekanyetšo tša Modimo?

18 Karolo ya bobedi ya go hlwekišwa boitshwarong e akaretša megato yeo e gatwago go boloka phuthego e hlwekile. Se se nyamišago ke gore ga se bohle bao ba amogelago ditekanyetšo tša Jehofa tša boitshwaro le go ineela go yena ba dulago ba botega. Ba bangwe mafelelong ba a fetoga gomme ka boomo ba se sa phela ka ditekanyetšo tšeo. Ke’ng seo se swanetšego go dirwa ka batho ba bjalo? Re ka hwetša karabo ponong ya Hesekiele ya mabapi le tempele ya moya yeo go boletšwego ka yona mathomong a kgaolo ye. Na o sa gopola dikgoro tša yona tše di phagamego? Ge o se na go tsena ka e nngwe le e nngwe ya tšona, go be go na le mafelo a bahlapetši. Bahlapetši bao ba be ba hlapetša tempele, mohlomongwe ba thibela batho bao ba “sa bollago pelong” gore ba se tsene. (Hesek. 44:9) Ye ke kgopotšo e kwagalago ya gore tokelo ya go ba borapeding bjo bo sekilego e newa feela bao ba katanelago go phela ka ditekanyetšo tše di hlwekilego tša Jehofa tša boitshwaro. Ka mo go swanago, tokelo ya go kopanela le Bakristegotee go rapeleng Jehofa ga e newe mang le mang.

19, 20. (a) Kriste o thušitše bjang balatedi ba gagwe ganyenyane-ganyenyane go kaonefatša tsela yeo melato ya go dirwa ga bobe e swanetšego go rarollwa ka yona? (b) Ke mabaka afe a mararo ao a dirago gore badiri ba bobe bao ba sa itsholego ba kgaolwe?

19 Ka 1892, Morokami o ile wa hlalosa gore ke “boikarabelo bja rena (Bakriste) go kgaola bao ka go lebanya goba ka go se lebanye ba ganago gore Kriste o ikgafile gore e be topollo [theko e lekanago] bakeng sa bohle.” (Bala 2 Johane 10.) Ka 1904, puku ya The New Creation e ile ya dumela gore bao ba tšwelago pele ba itshwara gampe ba ka bodiša phuthego boitshwarong. Mehleng yeo, phuthego ka moka e be e tšea karolo go seo se bego se bitšwa “tsheko ya kereke” go swaragana le melato ya go dirwa ga bobe. Eupša seo se be se sa direge gantši. Ka 1944, Morokami o ile wa bontšha gore ke feela bana babo rena bao ba nago le boikarabelo bao ba swanetšego go swaragana le ditaba tšeo. Ka 1952, Morokami o ile wa ba le sehlogo sa mabapi le mokgwa wo o theilwego Beibeleng wa go swaragana le ditaba tša boahlodi, sa gatelela lebaka le legolo la go kgaola badiri ba bobe bao ba sa itsholego, e lego go boloka phuthego e hlwekile.

20 Ga e sa le go tloga ka yona nako yeo, Kriste o thušitše balatedi ba gagwe go hlalosa gabotse le go kaonefatša tsela yeo melato ya badiri ba bobe e swanetšego go rarollwa ka yona. Bagolo ba Bakriste ba newa tlwaetšo e tseneletšego ya go swaragana le ditaba tša boahlodi ka tsela ya Jehofa, gotee le go swara badiri ba bobe ka toka le go ba bontšha kgaugelo ge go nyakega. Lehono re bona gabotse bonyenyane mabaka a mararo a go kgaola modiri wa bobe yo a sa itsholego ka phuthegong: (1) gore leina la Jehofa le se gobošwe, (2) go šireletša phuthego go ditlamorago tše di šilafatšago tša sebe seo se dirilwego, le (3) go thuša modiri wa bobe gore a itshole ge e ba go kgonega.

21. Tokišetšo ya go kgaolo e itlhatsetše bjang e le tšhegofatšo go batho ba Modimo?

21 Na o bona kamoo tokišetšo ya go kgaola e bilego tšhegofatšo ka gona go balatedi ba Kriste lehono? Isiraeleng ya bogologolo,  gantši badiri ba bobe ba be ba eba le tutuetšo e mpe setšhabeng, e bile ka dinako tše dingwe e le ba bantši go feta bao ba ratago Jehofa le bao ba nyakago go dira se se nepagetšego. Ka go re’alo, gantši setšhaba se se be se dira gore leina la Jehofa le gobošwe ke moka yena a se sa se amogela. (Jer. 7:23-28) Eupša lehono Jehofa o dirišana le sehlopha sa banna le basadi ba moya. Ka ge badiri ba bobe bao ba sa itsholego ba ntšhwa ka phuthegong, re ka re ga ba dumelelwe go ba dibetša tšeo Sathane a ka tšwelago pele a di diriša go senya phuthego le go e šilafatša. Go e na le moo, ga ba be le tutuetšo e kaalo ka phuthegong. Ka go re’alo, re le sehlopha re kgodišegile gore Jehofa o tla dula a re amogela. Gopola, Jehofa o re holofeditše gore: “Sebetša le ge e le sefe seo se rulelwago go lwa le wena se ka se atlege.” (Jes. 54:17) Na re thekga bagolo ka dipelo tša rena ka moka, ka ge ba rwele boikarabelo bjo boima bja go swaragana le ditaba tša boahlodi?

Go Tagafatša yo Lapa le Lengwe le le Lengwe le Bitšwago ka Yena

22, 23. Ke ka baka la’ng re leboga Bakristegotee le rena ba mathomong a lekgolo la bo-20 la nywaga, eupša ke’ng seo se bontšhago gore ba be ba sa hloka go thušwa go ba le tekatekano ditabeng tša lapa?

22 Karolo ya boraro yeo balatedi ba Kriste ba bego ba dutše ba hlwekišwa go yona ke ya mabapi le lenyalo le bophelo bja lapa. Na pono ya rena ka lapa e be e dutše e kaonefatšwa go theoša le nywaga? Ee. Ka mohlala, ge re bala ka bahlanka ba Modimo ba mathomong a lekgolo la bo-20 la nywaga, re kgahlwa kudu le go makatšwa ke moya wa bona wa boikgafo. Re leboga kudu tsela yeo ba ilego ba etiša pele tirelo e kgethwa maphelong a bona. Lega go le bjalo, e bile re a lemoga gore ba be ba sa hloka thušo go beng le tekatekano ditabeng tša lapa. Ke ka baka la’ng re re’alo?

23 Go be go tlwaelegile gore bana babo rena ba amogele dikabelo bodireding goba modirong wa bosepedi tšeo di bego di ba aroganya le malapa a bona ka dikgwedikgwedi. Ka dinako tše dingwe, bana babo rena le dikgaetšedi ba be ba iletšwa go tsenela lenyalo go feta kamoo Mangwalo a hlalosago ka gona, mola go be go sa bolelwe gakaalo ka ditsela tšeo Bakriste ba ka matlafatšago manyalo a bona. Na mokgwa wo o sa le gona gare ga balatedi ba Kriste lehono? Aowa.

Ga se ra swanela go kitimiša dikabelo tša ka phuthegong mola re hlokomologa boikarabelo bja rena bja lapa

24. Kriste o thušitše bjang balatedi ba gagwe ba botegago go ba le pono e lekalekanego kutšwanyana ka lenyalo le lapa?

24 Lehono, ga se ra swanela go kitimiša dikabelo tša ka phuthegong mola re hlokomologa boikarabelo bja rena bja lapa. (Bala 1 Timotheo 5:8.) Go oketša moo, Kriste o kgonthišeditše gore balatedi ba gagwe ba botegago mo lefaseng ka mehla ba hwetša keletšo ya Mangwalo e holago le e lekalekanego ya mabapi le lenyalo le bophelo bja lapa. (Baef. 3:14, 15) Ka 1978, go ile gwa gatišwa puku ya Go Dira Bophelo bja Lapa la Gago Gore e be bjo bo Thabilego. Ka morago ga nywaga e ka bago e 18 gwa gatišwa e rego, Sephiri sa Lethabo la Lapa. Go feta moo, Morokami o gatišitše dihlogo tše dintši tšeo di hlametšwego go thuša banyalani go diriša melao ya motheo ya Mangwalo manyalong a bona.

25-27. Dinyakwa tša bana ba nywaga e sa swanego di be di dutše di kgotsofatšwa bjang ka mo go oketšegago go theoša le nywaga?

25 Go thwe’ng ka bafsa? Le bona dinyakwa tša bona di be di dutše di kgotsofatšwa ka mo go oketšegilego go theoša le nywaga. Ke kgale mokgatlo wa Jehofa o nea bana ba nywaga e sa swanego  dilo tše dibotse, eupša seo se thomilego e le marothodi feela, se fetogile noka. Ka mohlala, sehlogo se se rego, “Thuto ya Beibele ya Bafsa” se ile sa tšwelela ka go The Golden Age go thoma ka 1919 go fihla ka 1921. Ke moka ka 1920 gwa gatišwa poroutšha yeo e bitšwago The Golden Age ABC gomme ka 1941 gwa gatišwa puku ya Children. Ka bo-1970 go ile gwa gatišwa puku ya Go Theeletša Morutiši yo Mogolo, Bofsa bja Gago—Go Holwa Kudu ke Bjona le Puku ya ka ya Ditaba tša Beibele. Ka 1982 go ile gwa thoma go gatišwa dihlogo tša Phafoga! tšeo di rego, “Bafsa ba a Botšiša” gomme gwa latela puku ya Dipotšišo tša Bafsa le Dikarabo tše Šomago, yeo e gatišitšwego ka 1989.

Poroutšha ya Seo ke Ithutago Sona ka Beibeleng e ile ya amogelwa ka lethabo kopanong ye ya selete kua Jeremane

26 Lehono re na le dibolumo tše pedi tše di lego nakong tša puku ya Dipotšišo tša Bafsa, gomme dihlogo tšeo di bego di gatišwa ka go Phafoga! di tšwela pele go tšwelela ka Wepesaeteng ya rena ya jw.org. E bile re na le puku ya Ithute go Morutiši yo Mogolo. Wepesaete ya rena e na le dikarolo tše dintši bakeng sa bafsa le bana, tšeo di akaretšago dikarata tša batho ba ka Beibeleng, mešomo ya go ithuta Beibele bakeng sa bana ba banyenyane le ba bagolwanyane, di-puzzle, dibidio, dikanegelo tša Beibele tša diswantšho,  gotee le karolo ya bana ba nywaga e meraro le ya ka tlase yeo e rego seo ke ithutago sona ka Beibeleng. Go molaleng gore pono ya Kriste ka bana e sa swana le ya ge a be a ba gokarela morago kua lekgolong la pele la nywaga. (Mar. 10:13-16) O nyaka gore bana le bafsa ba rena ba ikwe ba ratwa e bile ba fepša gabotse moyeng.

27 Le gona Jesu o nyaka gore bana ba šireletšwe. Ka ge lefase le leo le gobogilego boitshwarong le bodile wa go bola, go gobošwa ga bana go iphile matla. Ka gona, mokgatlo wa Jehofa o gatišitše dihlogo tše di kwagalago gabotse go thuša batswadi go šireletša bana ba bona mokgweng wo o sehlogo. *

28. (a) Go etša ge go bontšhitšwe ponong ya Hesekiele ya mabapi le tempele, r e swanetše go dira’ng ge e ba re nyaka go tšea karolo borapeding bjo bo sekilego? (b) O ikemišeditše go dira’ng?

28 Na ga re ikwe re thabišwa ke tsela yeo Kriste a tšwetšego pele a hlwekiša balatedi ba gagwe, a ba tlwaetša go hlompha le go phela ka ditekanyetšo tše di phagamego tša Jehofa tša boitshwaro gotee le go holwa ke tšona? Nagana gape ka tempele yeo Hesekiele a e bonego ponong. Na o sa gopola dikgoro tšela tša yona tše di phagamego? Ke therešo gore tempele yeo ga se ya kgonthe, eupša ke ya moya. Lega go le bjalo, na re kgona go e bona eka ke ya kgonthe? Tempeleng ye, ga re tsene ka go fo ya dibokeng Holong ya Mmušo goba go bula Dibeibele tša rena goba go tšama re kokota dintlong tša batho bodireding. Tšeo ke ditiro tša kgonthe tšeo re kgonago go di bona ka mahlo. Gaešita le moikaketši a ka dira dilo tšeo eupša a se tsene tempeleng ye ya Jehofa. Lega go le bjalo, ge e ba re dira dilo tšeo e bile re phela ka go dumelelana le ditekanyetšo tše di phagamego tša Jehofa tša boitshwaro gotee le go tšea karolo borapeding bjo bo sekilego ka dipelo tše dibotse, gona re tsene lefelong leo le lekgethwakgethwa le go hlankela go lona. Lefelo leo ke tokišetšo ya Jehofa Modimo ya borapedi bjo bo sekilego! Anke re duleng re tšeela godimo tokelo ye e kgolokgolo. Le gona anke ka mehla re direng sohle seo re ka se kgonago go bonagatša bokgethwa bja Jehofa ka go kgomarela ditekanyetšo tša gagwe tša go loka!

^ par. 2 Ka 1932, Bolumo 2 ya puku ya Vindication e ile ya thoma go bontšha gore boporofeta bja Beibele bja mabapi le go bušetšwa ga batho ba Modimo nageng ya gabo bona bo bile le phethagalo ya bjona ya mehleng yeno go Isiraele ya moya, e sego go Isiraele ya nama. Boporofeta bjo bo šupa go go tsošološwa ga borapedi bjo bo sekilego. Morokami wa March 1, 1999, o hlalositše gore tempele yeo Hesekiele a e bonego ponong ke boporofeta bjo bjalo bja go tsošološwa ga borapedi bjo bo sekilego, ka go re’alo bo phethagala ka tsela e kgolo mehleng ye ya bofelo.

^ par. 6 Keno yeo e be e thibela monna le mosadi go ba ka phapošing e tee ba le nnoši ntle le ge ba butše mojako—goba e le banyalani goba ditho tša lapa. Ka nywaga e mentši, keno ye e be e bušeletšwa ka mehla Borapeding bja Mesong bja Bethele.

^ par. 13 Go diriša motšoko go akaretša go o kgoga, go o sohla goba go o bjalela merero e bjalo.

^ par. 27 Ka mohlala, bala kgaolo 32 ka pukung ya Ithute go Morutiši yo Mogolo; bona le taba ya letlakala la ka ntle,“ ; bona le taba ya letlakala la ka ntle,“ ; bona le taba ya letlakala la ka ntle,“Boloka Bana ba Gago ba Šireletšegile!”go Phafoga! ya October-December 2007, matlakala 3-9.

Ithute ka mo go oketšegilego

MOROKAMI—KGATIŠO E ITHUTWAGO

Lebaka Leo re Swanetšego go ba ba Bakgethwa

Na o kile wa ikwa o thatafalelwa ke go kwešiša puku ya Beibele ya Lefitiko goba e go tšwafiša? Dithuto tša bohlokwa tše di lego ka pukung ya Lefitiko di ka go thuša go ba yo mokgethwa ge o dutše o hlankela Modimo.