Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Mmušo wa Modimo o a Buša!

 KGAOLO 22

Mmušo wa Modimo o Phethagatša Thato ya Gagwe mo Lefaseng

Mmušo wa Modimo o Phethagatša Thato ya Gagwe mo Lefaseng

MOKOTABA WA KGAOLO YE

Mmušo wa Modimo o phethagatša dikholofetšo tša gagwe ka moka tša mabapi le batho le lefase

1, 2. (a) Ke ka baka la’ng ka dinako tše dingwe go ka ba thata go bona Paradeise e le selo sa kgonthe? (b) Ke’ng seo se ka re thušago go matlafatša tumelo ya rena dikholofetšong tša Modimo?

NGWANABO rena yo a botegago o fihla dibokeng a lapile ka morago ga go se ipshine ka letšatši. Mothwadi wa gagwe o hlwele a sa mo swara gabotse mošomong, o gateletšegile ka baka la mathata a go hlokomela lapa e bile o tshwenyegile ka baka la bolwetši bja mosadi wa gagwe. Ge kopelo ya go bula e thoma, o ikwa a imologile, a thabetše go ba Holong ya Mmušo le bana babo le dikgaetšedi. Kopelo yeo e mabapi le bophelo Paradeiseng, gomme mantšu a yona a re a ipone a le lefaseng le lefsa, a ipone a le moo. Ye ke kopelo ya gagwe ya mmamoratwa, gomme ge a dutše a e opela gotee le lapa la gagwe, o kgothatšwa ke kholofelo ya bokamoso.

2 Na o kile wa ikwa ka tsela yeo? Ba bantši ba rena re kile ra ikwa bjalo. Lega go le bjalo, therešo ke gore bophelo bja tshepedišong ye ya kgale ya dilo bo ka dira gore go be thata kudu gore re bone Paradeise e tlago e le selo sa kgonthe. Re phela “[dinakong] tše di hlobaetšago tšeo go lego thata go lebeletšana le tšona,” le gona lefase le le fapana kgole le paradeise. (2 Tim. 3:1) Ke’ng seo se ka re thušago go bona kholofelo ya rena ya lefase la Paradeise e le selo sa kgonthe? Ge e le gabotse, re tseba bjang gore kgauswinyane Mmušo wa Modimo o tlo buša batho ka moka? Anke re ahlaahleng diporofeto tše sego kae tše di tšwago go Jehofa tšeo batho ba gagwe ba bogologolo ba bonego di phethagala. Ke moka re tlo ahlaahla kamoo diporofeto tšeo le tše dingwe tše di swanago le tšona di phethagalago ka tsela e kgahlišago gona bjale. Mafelelong, ge tumelo ya rena e matlafaditšwe, re tlo ahlaahla seo diporofeto tšeo di se bolelago ka bokamoso bja rena.

Kamoo Jehofa a Ilego a Phethagatša Dikholofetšo tša Gagwe Mehleng ya Bogologolo

3. Ke kholofetšo efe yeo e ilego ya kgothatša Bajuda bao ba bego ba le bothopša Babilona?

3 Akanya kamoo bophelo bo bego bo le ka gona go Bajuda bao ba bego ba le bothopša kua Babilona lekgolong la botshelela la nywaga B.C.E. Ba bantši ba goletše gona moo bothopša, go fo swana le batswadi ba bona, le gona bophelo bo be bo le thata. Ka ge ba be ba dumela go Jehofa, Bababilona ba be ba ba kwera. (Ps. 137:1-3) Go theoša le nywagasome, Bajuda bao ba botegago  ba ile ba dula ba kgomaretše kholofelo e kgahlišago e rego: Jehofa o holofeditše go bušetša batho ba gagwe nageng ya gabo bona. Jehofa o itše maemo e tla ba a kgahlišago moo. O ile a ba a swantšha naga ya Juda yeo ba bego ba tla boela go yona le serapa sa Edene—paradeise! (Bala Jesaya 51:3.) Ga go pelaelo gore dikholofetšo tše bjalo e be e le tša go nea batho ba Modimo kholofelo, tša tloša dipelaelo tše di ka bago di be di ba tshwenya. Bjang? Ela hloko tše dingwe tša diporofeto tša mabapi le dikholofetšo tšeo.

4. Jehofa o ile a kgonthišetša Bajuda bjang gore ba be ba tla šireletšega nageng ya gabo bona?

4 Tšhireletšego. Bajuda bao ba bego ba le bothopša ba be ba ka se boele paradeiseng ya kgonthe, eupša ba be ba tlo boela nageng ya kgole yeo e bilego mašope ka nywaga e 70, naga yeo e bego e tsebja ke ba sego kae feela ba bona. Dinageng tša mehleng ya Beibele go be go atile ditau, diphiri, mapogo le dibata tše dingwe. Monna wa lapa o be a ka ipotšiša gore: ‘Ke tlo šireletša bjang mosadi wa ka le bana? Go thwe’ng ka dinku le dikgomo—ke tlo di šireletša bjang?’ E be e tla ba ga tlhago go tshwenyega ka tsela yeo. Eupša nagana ka kholofetšo ya Modimo yeo e begilwego go Jesaya 11:6-9 le kamoo e swanetšego go ba e ile ya ba kgothatša ka gona. (Bala.) Ka mantšu ao a kgahlišago a theto, Jehofa o ile a kgonthišetša Bajuda bao ba bego ba le bothopša gore bona le diruiwa tša bona ba tla šireletšega. Tau e be e tla fula bjang ka kgopolo ya gore e be e ka se je dikgomo tša Bajuda. Babotegi bao ba be ba ka se boife dibata tše bjalo. Jehofa o ile a holofetša batho ba gagwe gore ba be ba tla šireletšega nageng yeo ba bego ba tla boela go yona ya Juda, gaešita le lešokeng le dithokgweng.—Hesek. 34:25.

5. Ke diporofeto dife tšeo di thušitšego bao ba bego ba tlo boa bothopša go kgodišega gore Jehofa o be a tla ba nea dinyakwa tša bona ka boati?

5 Monono. Mathopša a a be a ka ipotšiša dipotšišo tše dingwe tša go swana le gore: ‘Na ke tla kgona go fepa lapa la ka nageng ya gabo rena yeo re boelago go yona? Re tlo dula kae? Na go tla ba le mošomo, le gona na bophelo bo ka se be thata go swana le mo bothopša?’ Dipotšišo tše le tšona Jehofa o ile a di araba a diriša baporofeta ba gagwe. Jehofa o ile a holofetša batho ba gagwe ba ba kwago gore o tla ba nešetša pula; ka baka leo, mmu o be o tla tšweletša senkgwa se se “humilego ka phepo le sa makhura.” (Jes. 30:23) Le gona o ile a holofetša batho ba gagwe madulo le mošomo o kgotsofatšago ka gore: “Ba tla aga dintlo ba dula go tšona; ba tla bjala dirapa tša merara ba ja dienywa tša tšona. Ba ka se ke ba aga gwa dula o šele; ba ka se ke ba bjala gwa ja o šele.” (Jes. 65:21, 22) Ee, bophelo e be e tla ba bjo bo kgahlišago kudu ge bo bapetšwa le bja bothopša kua Babilona ya baheitene. Eupša go thwe’ng ka mathata a bona a magolo—mathata ao a dirilego gore ba išwe bothopša?

6. Ke bolwetši bofe bjo bo bego bo dutše bo swere batho ba Modimo, gona Jehofa o ile a holofetša batho bao ba bego ba tlo boa bothopša eng?

6 Go hlankela Modimo ka tsela ya maleba. Nako e telele pele ga ge batho ba Modimo ba ka išwa bothopša, ba be ba babja moyeng. Jehofa o ile a bolela ka batho ba gagwe a diriša moporofeta Jesaya gore: “Hlogo ka moka e gobetše gomme pelo ka moka e a fokola.” (Jes. 1:5) E be e le difofu le difoa tša moya, ka gobane ba ile ba dulela go thiba ditsebe tša bona gore ba se kwe keletšo  ya Jehofa gomme ba tswalela mahlo a bona gore ba se bone seetša seo a ba hlabišetšago sona. (Jes. 6:10; Jer. 5:21; Hesek. 12:2) Ge e ba batho bao ba bego ba tla boa bothopša ba be ba tlo fokola ka tsela e swanago, ba be ba tla hwetša tšhireletšego efe? Na Jehofa o be a ka se ba lahle gape? Ruri ba ile ba kgothatšwa kudu ke kholofetšo ya Jehofa yeo e rego: “Mohlang woo difoa di tla kwa mantšu a puku ye gomme mahlo a difofu a tla bona gaešita le kgamping ya leswiswi le leswiswing.” (Jes. 29:18) Ee, Jehofa o be a tla fodiša batho ba gagwe moyeng bao ba bego ba itshotše le go sokologa. Ge feela ba be ba ka dula ba amogela keletšo ya gagwe le go mo kwa, o be a tla ba nea tlhahlo le keletšo tšeo di phološago maphelo.

7. Dikholofetšo tša Modimo go batho ba gagwe bao ba bego ba le bothopša di ile tša phethagala bjang, gona ke ka baka la’ng seo se swanetše go re matlafatša tumelo?

7 Na Jehofa o ile a phethagatša dikholofetšo tša gagwe? Seo se ilego sa direga se araba potšišo ye. Bajuda bao ba ilego ba boela nageng ya gabo bona ba ile ba šegofatšwa ka tšhireletšego, monono le go hlankela Modimo ka tsela ya maleba. Ka mohlala, Jehofa o ile a ba šireletša ditšhabeng tša kgauswi le bona tšeo di bego di le matla kudu e bile e le tše dikgolo go ba feta. Dibata ga se tša ka tša ja diruiwa tša Bajuda. Ke therešo gore Bajuda bao ba bone ka tekanyo e nyenyane go phethagala ga diporofeto tša mabapi le paradeise tšeo di ngwadilwego ke banna ba bjalo ka Jesaya, Jeremia le Hesekiele—eupša go phethagala ga tšona go ile gwa thabiša batho ba Modimo e bile e be e le seo ba bego ba se hloka ka nako yeo. Ge re dutše re naganišiša ka seo Jehofa a se diretšego batho ba gagwe mehleng yeo, tumelo ya rena e tla matlafala. Ge e ba go phethagala ga mathomo ka tsela e nyenyane ga diporofeto tšeo go ile gwa thabiša batho ba Modimo, go tla ba bjang ge di šetše di phethagala ka tsela e kgolo? Anke re ahlaahleng seo Jehofa a re diretšego sona lehono.

Kamoo Jehofa a Thomilego go Phethagatša Dikholofetšo tša Gagwe Mehleng ya Rena

8. Batho ba Modimo lehono ba dula ‘nageng’ ya mohuta ofe?

8 Batho ba Jehofa gona bjale ga se setšhaba ka kgopolo ya kgonthe, le gona ga ba dule nageng e tee. Go e na le moo, Bakriste ba tloditšwego ke setšhaba sa moya, ke “Isiraele ya Modimo.” (Bagal. 6:16) Bagwera ba bona ba “dinku tše dingwe” ba dula le bona ‘nageng’ ya moya, moo ba hlankelago Jehofa Modimo ka botee. Yeo ke tsela ya bona ya bophelo. (Joh. 10:16; Jes. 66:8) Ke “naga” ya mohuta ofe yeo Jehofa a re neilego yona? Ke paradeise ya moya. Dikholofetšo tša Modimo tša mabapi le maemo ao a swanago le a serapeng sa Edene di phethagetše ka tsela e kgahlišago ya moya. Ela hloko mehlala e latelago.

9, 10. (a) Boporofeta bjo bo lego go Jesaya 11:6-9 bo phethagala bjang lehono? (b) Ke’ng seo se bontšhago gore batho ba Modimo ba na le khutšo?

9 Tšhireletšego. Boporofeteng bjo bo lego go Jesaya 11:6-9, re bona seswantšhokgopolo se se kgahlišago sa botee le khutšo magareng ga diphoofolo tša naga le magareng ga batho le diruiwa. Na seswantšhokgopolo se se phethagala ka tsela ya moya lehono? Ee! Go temana 9, re hwetša lebaka leo ka lona diphoofolo tše bjalo di ka se sa gobatšago goba go senya. Temana yeo e re: “Ka  gobane lefase le tla tlala tsebo ya Jehofa go etša ge meetse a khurumeditše lewatle.” Na “tsebo ya Jehofa” e fetoša diphoofolo? Aowa, ke batho ba fetogago ge ba thoma go tseba Modimo yo a Phagamego gomme ba ithuta go ekiša ditsela tša gagwe tša khutšo. Ke ka baka leo paradeiseng ya rena ya moya lehono re kgonago go bona boporofeta bjo bo phethagala ka tsela e kgomago pelo. Ka tlase ga pušo ya Mmušo wa Modimo, balatedi ba Kriste ba ithuta go tlogela mekgwa ya bona e kotsi ya bophoofolo gomme ba phela ka khutšo le ka botee le bana babo bona ba moya le dikgaetšedi.

10 Ka mohlala, ka pukung ye re ahlaahlile taba ya gore Bakriste ga ba tšee karolo dipolotiking—ra bona lebaka la rena la Mangwalo la go se dire seo le tsela yeo batho ba Modimo ba ilego ba tlaišwa ka yona ka baka la go se tšee karolo dipolotiking. Na ga se mo go makatšago gore lefaseng le leo le tletšego bošoro, go na le batho ba bantši bao ba ganago go tšea karolo bošorong le ge e le bofe, gaešita le ge ba tšhošetšwa ka gore ba tla bolawa? Bjo ke bohlatse bjo bogolo kudu bja gore balata ba Kgoši Mesia ba thabela khutšo e swanago le yeo e hlalositšwego ke Jesaya! Jesu o boletše gore balatedi ba gagwe ba tla tsebja ka go ratana. (Joh. 13:34, 35) Ka phuthegong, Kriste ka go se fele pelo o diriša “mohlanka [wa gagwe] yo a botegago le wa temogo” go ruta Bakriste ka moka ba therešo go ba le khutšo, lerato le go ba botho.—Mat. 24:45-47.

11, 12. Lefase la lehono le swerwe ke tlala ya mohuta ofe, eupša Jehofa o fepa batho ba gagwe bjang ka boati?

 11 Monono. Lefase le swerwe ke tlala ya moya. Beibele e lemošitše ka gore: “Mmuši Morena Jehofa o re: ‘Tsebang gore go tla matšatši ao ka ona ke tlago go romela tlala le lenyora nageng, e sego tlala ya dijo le lenyora la go nyorelwa meetse, eupša bakeng sa go kwa lentšu la Jehofa.’” (Amose 8:11) Na baagi ba Mmušong wa Modimo le bona ba bolawa ke tlala ya moya? Jehofa o boletše e sa le pele gore batho ba gagwe ba tla fapana le manaba a bona ka tsela e latelago: “Bahlanka ba ka ba tlo ja, eupša lena le tlo swarwa ke tlala. Bonang! Bahlanka ba ka ba tlo nwa, eupša lena le tlo nyorwa. Bonang! Bahlanka ba ka ba tlo thaba, eupša lena le tlo hlabja ke dihlong.” (Jes. 65:13) Na o bone go phethagala ga mantšu ao?

12 Dijo tša moya di elela go rena go etša noka yeo e dulago e katologa le yeo e išago kudu. Dikgatišo tša rena tše di theilwego Beibeleng—gotee le dikgatišo tše di rekhotilwego le dibidio, diboka tša rena, dikopano le dilo tšeo di tšwelelago Wepesaeteng ya rena—ka moka ga tšona ke mokero o elelago ka mehla wa dijo tša moya lefaseng le leo le swerwego ke tlala ya moya. (Hesek. 47:1-12; Joele 3:18) Na ga o thabele go bona go phethagala ga kholofetšo ya Jehofa ya gore o tla re nea dijo tša moya ka boati letšatši le letšatši? Na o kgonthišetša gore o ja ka mehla tafoleng ya Jehofa?

Diphuthego tša gabo rena di re fepa moyeng, di a re šireletša le go re thuša go dula re phetše gabotse moyeng

13. O bone kholofetšo ya Jehofa ya mabapi le go budullwa ga mahlo a difofu le go thibollwa ga ditsebe tša difoa e phethagala bjang?

13 Go hlankela Modimo ka tsela ya maleba. Lehono lefase le tletše ka difofu le difoa tša moya. (2 Bakor. 4:4) Lega go le bjalo, Kriste o fodiša bao ba swerwego ke malwetši a lefaseng ka bophara. Na o kile wa bona mahlo a difofu a bulega le ditsebe tša difoa di thibollwa? Ge e ba o kile wa bona batho ba amogela tsebo e nepagetšego ya Lentšu la Modimo, ba tlogela maaka a bodumedi ao a kilego a ba foufatša gore ba se bone therešo le go ba dira difoa, gona o bone go phethagala ga kholofetšo yeo e rego: “Mohlang woo difoa di tla kwa mantšu a puku ye gomme mahlo a difofu a tla bona gaešita le kgamping ya leswiswi le leswiswing.” (Jes. 29:18) Lefaseng ka moka, batho ba bantši ba fodišwa ka tsela e bjalo ngwaga le ngwaga. Motho yo mongwe le yo mongwe yo a tlogelago Babilona o Mogolo gomme a hlankela Modimo le rena paradeiseng ya moya ke bohlatse bja gore dikholofetšo tša Jehofa di phethagetše!

14. Ke’ng seo se tlago go matlafatša tumelo ya rena?

14 Kgaolo e nngwe le e nngwe ya puku ye e na le bohlatse bjo matla bja gore Kriste o tlišitše balatedi ba gagwe paradeiseng ya kgonthe ya moya mehleng ye ya bofelo. Anke re duleng re naganišiša ka ditsela tše dintši tšeo re šegofatšwago ka tšona paradeiseng ye lehono. Ge re dutše re dira bjalo, tumelo ya rena dikholofetšong tša Jehofa ka bokamoso e tla tšwela pele e matlafala.

“Mmušo wa Gago a o tle”

15. Ke ka baka la’ng re ka kgodišega gore lefase e tla ba paradeise?

15 Morero wa Jehofa e be e dutše e le go dira gore lefase ka moka e be paradeise. O ile a bea Adama le Efa serapeng sa paradeise, gomme a ba laela gore ba tlatše lefase ka bana ba bona le go hlokomela diphedi ka moka. (Gen. 1:28) Go e na le moo,  Adama le Efa ba ile ba latela Sathane borabeleng bja gagwe gomme ba wetša bana ba bona ka moka go se phethagaleng, sebeng le lehung. Lega go le bjalo, morero wa Modimo ka lefase ga se wa fetoga. Ge a boletše selo se itšego, ka mehla se a phethagala. (Bala Jesaya 55:10, 11.) Ka gona, re ka kgodišega gore nakong e tlago ditlogolwana tša Adama le Efa di tla tlala lefase le le go le fenya gomme tša hlokomela ka lerato tlholo ya Jehofa lefaseng la paradeise. Ka nako yeo, diporofeto tša mabapi le paradeise tšeo mathomong di bego di neilwe mathopša a Bajuda di tla phethagala ka mo go feletšego! Ela hloko mehlala e latelago.

16. Beibele e hlalosa bjang tšhireletšego yeo re tla e thabelago Paradeiseng?

16 Tšhireletšego. Mafelelong, seswantšhokgopolo se se kgahlišago seo se hlalositšwego go Jesaya 11:6-9 se tla phethagala ka mo go feletšego le ka tsela ya kgonthe. Banna, basadi le bana ba tla šireletšega gohle mo ba yago gona mo lefaseng. Ga go na sebopiwa seo se tla bakago kotsi, e ka ba motho goba phoofolo. Akanya ka nako yeo lefase ka moka e tla bago e le legae la gago, o kgona go rutha ka dinokeng, matsheng le mawatleng; o namela dithaba e bile o itshepelela nageng o sa boife selo. Le gona ge e eba bošego o ka se tshwenyege. Mantšu a Hesekiele 34:25 a tla phethagala, moo e lego gore batho ba Modimo ba tlo kgona go ‘dula ka polokego le lešokeng ba be ba robale dithokgweng.’

17. Ke ka baka la’ng re ka kgodišega gore Jehofa o tla re nea dinyakwa tša rena ka boati ge Mmušo wa gagwe o tla be o buša lefase ka moka?

17 Monono. Akanya ka nako yeo go tla bago go se na bodiidi, phepompe, tlala goba mekgatlo ya go thuša setšhaba. Motlalo wa dijo tša moya tšeo batho ba Modimo ba di thabelago lehono ke kgonthišetšo ya gore Kgoši Mesia o tla fepa balata ba gagwe ka ditsela tšohle. Ge Jesu a be a le mo lefaseng, o bontšhitše ka tekanyo e nyenyane gore a ka kgona go dira bjalo, ka gobane o ile a fepa batho ba dikete bao ba bego ba swerwe ke tlala ka dinkgwa le dihlapi tše sego kae feela. (Mat. 14:17, 18; 15:34-36; Mar. 8:19, 20) Ge Mmušo wa Modimo o tla be o buša lefase ka moka, go tla phethagala boporofeta bjo bo swanago le bjo bo rego: “Peu ya lena yeo le e bjetšego mmung o tla e nešetša pula gomme mmu wa tšweletša senkgwa se se humilego ka phepo le sa makhura. Mohlang woo diruiwa tša lena di tla fula mafulong a ikadilego.”—Jes. 30:23.

18, 19. (a) Boporofeta bjo bo begilwego go Jesaya 65:20-22 bo bolela’ng go wena? (b) Ke ka kgopolo efe matšatši a rena a ‘tla etšago matšatši a sehlare’?

18 Lehono go thata gore batho ba bantši ba ipone ba na le magae a mabotse goba ba na le mošomo o kgotsofatšago. Tshepedišong ye yeo e tletšego ka boradia, ba bantši ba ipona ba šoma ka thata diiri tše ditelele gomme bona goba malapa a bona ba sa holege, mola go holega bahumi le batho ba megabaru. Akanya kamoo bophelo bo tla bago ka gona lefaseng ka bophara ge go tla ba go phethagala boporofeta bjo bo rego: “Ba tla aga dintlo ba dula go tšona; ba tla bjala dirapa tša merara ba ja dienywa tša tšona. Ba ka se ke ba aga gwa dula o šele; ba ka se ke ba bjala gwa ja o šele. Ka gobane matšatši a batho ba ka a tla etša matšatši a sehlare; bahlaolwa ba ka ba tla thabela modiro wa diatla tša bona ka botlalo.”—Jes. 65:20-22.

19 Go bolela’ng gore matšatši a rena a tla “etša matšatši a sehlare”?  Ge o eme kutung ya sehlare se segologolo, na ga o kwe o kgotsa ge o nagana gore sehlare seo se bile moo nywaga e mekae? Mohlomongwe se bile moo gaešita le pele borakgolokhukhu ba gago ba ka belegwa. Mohlomongwe o ka nagana gore ge e ba go be go se na taba ya gore ka letšatši le lengwe re tlo phethagala, o be o tla hwa gomme wa se šia se sa le gona, se phela gabotse gaešita le ka morago ga nako e telele o šetše o lebetšwe. Ruri Jehofa o re bontšhitše botho ka go re kgonthišetša gore Paradeiseng e tlago, matšatši a rena e tla ba a matelele gomme ra phela ka khutšo! (Ps. 37:11, 29) Go tlo fihla nako yeo ka yona re tla bonago le dihlare tšeo re tsebago di phela nako e telele di tla hlogago le go hwa go etša bjang, mola rena re tšwela pele go phela ka mo go sa felego!

20. Ke’ng seo se tla dirago gore balata ba Mmušo wa Modimo bao ba botegago ba phethagale?

20 Bophelo bjo bo phethagetšego. Lehono, bolwetši le lehu di kgoma motho yo mongwe le yo mongwe. Ge e le gabotse, ka moka ga rena re a babja—re fetetšwe ke bolwetši bjo bo sa folego bjo bo bitšwago sebe. Kalafo e nnoši ke sehlabelo sa Kriste sa topollo. (Baroma 3:23; 6:23) Nakong ya Pušo ya Nywaga e Sekete, Jesu le babušigotee le yena ba tla thuša batho gore ba holwe ka mo go feletšego ke sehlabelo seo, ba tloša sebe ganyenyane-ganyenyane bathong ba botegago. Boporofeta bjo bongwe bja Jesaya bjo bo tlago go phethagala ka mo go feletšego ke bjo bo rego: “Ga go na modudi yo a tla rego: ‘Ke a babja.’ Batho bao ba dulago nageng e tla ba bao ba swaretšwego molato wa bona.” (Jes. 33:24) Akanya ka nako yeo go tla bago go se na difofu, difoa goba digole. (Bala Jesaya 35:5, 6.) Ga go na bolwetši bjo Jesu a tla palelwago ke go bo alafa—e ka ba bja mmeleng, monaganong goba maikwelong. Balata ba Mmušo wa Modimo bao ba botegago ba tla phethagala!

21. Go tla direga’ng ka lehu, gona ke ka baka la’ng kholofetšo ye e go homotša?

21 Lega go le bjalo, go thwe’ng ka ditlamorago tša bolwetši, mafelelo a sa phemegego a sebe—e lego lehu? Lehu ke “lenaba” leo batho ka moka bao ba sa phethagalago ba se nago matla a go le fenya. (1 Bakor. 15:26) Eupša na lehu ke lenaba leo Jehofa a sa tsebego gore a le thome kae? Ela hloko seo Jesaya a se boletšego e sa le pele. O itše: “O tla metša lehu ka mo go sa felego, gomme Mmuši Morena Jehofa o tla phumola megokgo difahlegong ka moka.” (Jes. 25:8) Na o kgona go bona ka leihlo la kgopolo nako yeo ka yona lehu le tla bego le se sa le gona? Go tla ba go se sa na dipoloko, go se sa na mabitla e bile go se sa na megokgo ya manyami! Ka mo go fapanego—go tla ba go na le megokgo ya lethabo ge Jehofa a phethagatša kholofetšo ya gagwe e kgahlišago ya go tsoša bahu! (Bala Jesaya 26:19.) Mafelelong, mahloko a mantši ao a bakilwego ke lehu a tla fola.

22. Go tla direga’ng ge Mmušo wa Mesia o phethagaditše thato ya Modimo mo lefaseng?

22 Mafelelong a Pušo ya Nywaga e Sekete, Mmušo wa Mesia o tla ba o phethagaditše thato ya Modimo mo lefaseng, gomme Kriste o tla bušetša matla a go buša go Tatagwe. (1 Bakor. 15:25-28) Mafelelong ge batho ba tla be ba phethagetše, ba tla ba ba loketše go lebeletšana le teko ya mafelelo ge Sathane a tla be a  lokolotšwe sekoting moo a bego a sa kgone go dira selo. Ka morago ga moo, mafelelong Kriste o tla pšhatla noga yeo e kgopo le bathekgi ba yona ka moka. (Gen. 3:15; Kut. 20:3, 7-10) Eupša bohle bao ba ratago Jehofa ba tla hwetša moputso o kgahlišago. Mohlomongwe ga go na mantšu ao a ka hlalosago moputso woo ka tsela e kaone go feta ao a lego ka Beibeleng. Ke kholofetšo ya gore bao ba botegago ba tla ba le “tokologo ya letago ya bana ba Modimo.”—Baroma 8:21.

Mmušo wa Modimo o tla phethagatša dikholofetšo tša gagwe ka moka tša mabapi le batho le lefase

23, 24. (a) Ke ka baka la’ng re kgodišegile gore dikholofetšo tša Modimo di tlo phethagala? (b) O ikemišeditše go dira’ng?

23 Dikholofetšo tšeo ga e fo ba ditoro. Dikholofetšo tša Jehofa di tlo phethagala e le ruri! Ka baka la’ng? Gopola mantšu a Jesu ao re a ahlaahlilego kgaolong ya mathomo ya puku ye. O ile a ruta balatedi ba gagwe gore ba rapele Jehofa ka gore: “Mmušo wa gago a o tle. Thato ya gago a e direge le mo lefaseng bjalo ka ge e direga legodimong.” (Mat. 6:9, 10) Mmušo wa Modimo ga se selo seo motho a fo go inaganela sona. Ke selo sa kgonthe! Gona bjale o buša legodimong. E šetše e le nywaga e lekgolo o phethagatša dikholofetšo tša Jehofa ka ditsela tšeo re kgonago go di bona ka phuthegong ya Bokriste. Ka gona re ka kgodišega gore dikholofetšo ka moka tša Jehofa di tla phethagala ge Mmušo wa Modimo o tla be o buša lefase ka moka!

24 Re a tseba gore Mmušo wa Modimo o tla tla. Le gona re a tseba gore kholofetšo e nngwe le e nngwe ya Jehofa e tla phethagala. Ka baka la’ng? Ka gobane gona bjale MMUŠO WA MODIMO O A BUŠA! Yo mongwe le yo mongwe wa rena o swanetše go ipotšiša gore: ‘Na ke bušwa ke Mmušo wa Modimo?’ Anke re direng sohle seo re ka se kgonago gore gona bjale re phele bjalo ka balata ba botegago ba Mmušo woo, e le gore pušo ya wona e phethagetšego le ya toka e tle e re hole ka mo go sa felego!

Ithute ka mo go Oketšegilego

BATAMELA KGAUFSI LE JEHOFA

Matla a Tsošološo—Jehofa o ‘Dira Dilo ka Moka tše Mpsha’

Jehofa o šetše a tsošološitše borapedi bjo bo sekilego. O tla tsošološa’ng nakong e tlago?

MOROKAMI—KGATIŠO E ITHUTWAGO

Eba le Tumelo e Tiilego Mmušong

Jehofa o ile a diriša dikgwerano tše tshela go kgonthišetša gore Mmušo wa gagwe o tla phethagatša morero wa gagwe. Dikgwerano tše di ka re thuša bjang go matlafatša tumelo ya rena?