Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

“Le Duleng Leratong la Modimo”

 LEMETLETŠO

Go Rarolla Dingangišano Ditabeng tša Kgwebo

Go Rarolla Dingangišano Ditabeng tša Kgwebo

Ka ge go begilwe go 1 Bakorinthe 6:1-8, moapostola Paulo o ile a bolela ka go sekišana mo go bago gona magareng ga badumedigotee. O ile a nyamišwa ke gore Bakriste ba bangwe kua Korinthe ba be ba “beta pelo [ba] ya kgorong ya tsheko pele ga batho ba sa lokago.” (Temana 1) Paulo o ile a nea mabaka a kwagalago ao Bakriste ba sa swanelago go sekišana dikgorong tša tsheko tša lefase, eupša go e na le moo ba rarolle dingangišano ka go latela tlhahlo e neilwego ka phuthegong. Anke re eleng hloko mabaka a mangwe ao a dirilego gore go newe keletšo ye e buduletšwego, ke moka re hlahlobe maemo a mmalwa ao ka go se lebanye a sa akaretšwego ke taelo ye.

Ge e ba re na le taba ya kgwebo yeo re ngangišanago ka yona le modumedigotee le rena, sa pele re tla nyaka go swaragana le ditaba tše ka tsela ya Jehofa, e sego ya rena. (Diema 14:12) Ka ge Jesu a bontšhitše, go kaone go lokiša ditaba ka go akgofa pele ga gore di fetoge kgang e kgolo. (Mateo 5:23-26) Lega go le bjalo, go a nyamiša gore Bakriste ba bangwe ba ile ba ba manganga ka mo go feteletšego, moo ba ilego ba išana dikgorong tša tsheko. Paulo o itše: “Gore le a sekišana ruri go bolela gore le fentšwe ka mo go feletšego.” Ka baka la’ng? Lebaka le legolo ke gore go išana kgorong ya tsheko mo go bjalo, go ka senya botumo bjo bobotse bja phuthego le bja Modimo yoo re mo rapelago. Ka gona, re tšeela godimo potšišo ya Paulo e rego: “Ke ka baka la’ng le sa upše la dumela go radiiwa?”Temana 7.

Paulo o ile a ba a bolela gore Modimo o neile phuthego yeo tokišetšo e botse ya go rarolla dingangišano tše dintši. Bagolo ke banna ba Bakriste bao ba hlalefišitšwego ke tsebo ya bona ya ditherešo tša Mangwalo, gomme Paulo o bolela gore ba “[kgona] go ahlola magareng ga bana babo” bona ge go tliwa“[ditabeng] tša bophelo bjo.” (Ditemana 3-5) Jesu o bontšhitše gore dingangišano tšeo di akaretšago dibe tše dikgolo tše bjalo ka go thomeletša le bomenetša, di swanetše go rarollwa ka go latela thulaganyo ya megato e meraro: wa pele, ka go katanela go rarolla taba le nnoši; wa bobedi, ge e ba mogato wa pele o folotša, tlišang hlatse e tee goba tše pedi; wa boraro, ge e ba mogato wa bobedi  o folotša, išang taba yeo go bagolo bao ba emelago phuthego.Mateo 18:15-17.

Ke therešo gore bagolo ba Bakriste ga se boramolao goba borakgwebo le gona ga go nyakege gore ba itshware ka tsela yeo. Ga se bona bao ba beago melao yeo bana babo rena ba swanetšego go e latela ge ba lokiša dingangišano tša kgwebo magareng ga bona. Go e na le moo, ba tsoma go thuša batho ka moka bao ba akaretšwago gore ba diriše Mangwalo le go fihlelela tharollo ka khutšo. Melatong e raraganego, ba ka botšiša molebeledi wa tikologo goba ofisi ya lekala ya Dihlatse tša Jehofa. Lega go le bjalo, go na le maemo ao a sa akaretšwego ke keletšo ya Paulo. A mangwe a ona ke afe?

Mabakeng a mangwe, go išana kgorong ya tsheko e ka no ba mogato o swanetšego go latelwa goba o nyakegago go ya ka molao e le gore go fihlelelwe tharollo e botho le ya khutšo. Ka mohlala, go išana dikgorong tša tsheko e ka no ba yona tsela feela ya go hwetša lengwalo la tlhalo, tshwanelo ya motswadi ya go hlokomela ngwana, ditefo tša go hlokomela molekane ka tša ditšhelete, ditefo tše tšwago go inšurense, go lokeletšwa lelokelelong la baadimiši bao dikgwebo tša bona di phuhlamego gotee le go kgonthiša ka molao go ba ga kgonthe ga mangwalo a dikabo tša bohwa. Le gona go na le maemo ao ngwanabo rena a ka ikwago a gapeletšega gore a itšhireletše ka go gata mogato wa molao ge a išwa kgorong ya tsheko. *

Ge e ba go sekišana mo go bjalo ga bana babo rena go sa dirwe ka ditshele, ba ka no se tshele keletšo e buduletšwego ya Paulo. * Lega go le bjalo, taba e tlago pele go Mokriste ke go kgethagatšwa ga leina la Jehofa le khutšo gotee le botee bja phuthego. Sa pele le sa bohlokwa ke gore balatedi ba Kriste ba hlaolwa ka lerato la bona, gomme “lerato . . . ga le nyake tša go ikhola.”1 Bakorinthe 13:4, 5; Johane 13:34, 35.

^ par. 2 Maemong ao a sa tlwaelegago, Mokriste a ka direla Mokriste yo mongwe sebe se segolo—se bjalo ka go kata, go hlasela, polao goba bohodu. Maemong a bjalo, e ka se be go tshela molao wa Bokriste gore taba yeo e begwe balaoding, gaešita le ge go dira bjalo go ka feleletša ka gore molato woo o sekwe kgorong ya tsheko goba gore motho a bewe molato wa bosenyi.

^ par. 3 Bakeng sa tsebišo e oketšegilego, hle bona Morokami wa March 15, 1997, matlakala 17-22, le Morokami wa October 15, 1991, matlakala 25-28.

 

Ithute ka mo go Oketšegilego

MOROKAMI—KGATIŠO E ITHUTWAGO

O Bontšha Moya wa Mohuta Mang?

Re ka godiša bjang ditswalano tšeo di nago le khutšo le ba bangwe? Ithute go tšwa mehlaleng e mebotse le e mebe yeo e begilwego ka Beibeleng.