Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

“Le Duleng Leratong la Modimo”

 LEMETLETŠO

Pono ya Beibele ka Tlhalo le Karogano

Pono ya Beibele ka Tlhalo le Karogano

Jehofa o letetše gore banyalani ba dule ba botegela keno ya lenyalo. Jehofa ge a be a kopanya batho ba pele lenyalong o ile a re: “Monna . . . a [kgomarele] mosadi wa gagwe gomme bona e tla ba nama e tee.” Ka morago, Jesu o ile a boeletša polelwana yeo gomme a oketša ka gore: “Ka baka leo, se Modimo a se tlemagantšego jokong go se be le motho yo a se aroganyago.” (Genesi 2:24; Mateo 19:3-6) Ka gona, Jehofa le Jesu ba lebelela lenyalo e le tlemo ya nako e telele yeo e fedišwago feela ke ge molekane yo mongwe a ehwa. (1 Bakorinthe 7:39) Ka ge lenyalo e le thulaganyo e kgethwa,  tlhalo ga se ya swanelwa go tšewa gabohwefo. Ge e le gabotse, Jehofa o hloile ditlhalo tšeo di sa thewago Mangwalong.Maleaki 2:15, 16.

Motheo wa Mangwalo wa tlhalo ke ofe? Jehofa o hloile bohlotlolo le bootswa. (Genesi 39:9; 2 Samuele 11:26, 27; Psalme 51:4) Ruri, o bona bootswa e le bjo bobe kudu moo a dumelelago gore e be motheo wa tlhalo. (Bakeng sa tshekatsheko ya seo se bolelwago ke bootswa, eya go Kgaolo 9, serapa 7, moo go bolelwago ka bootswa.) Jehofa o nea molekane yo a se nago molato tshwanelo ya gore a dire phetho ya ge e ba a nyaka go tšwela pele a dula le molekane yo a nago le molato goba go hlala. (Mateo 19:9) Ka gona, ge e ba molekane yo a se nago molato a nyaka go hlala, o tla ba a sa gate mogato woo Jehofa a o hloilego. Lega go le bjalo, phuthego ya Bokriste ga e kgothaletše motho le ge e le ofe gore a hlale. Ge e le gabotse, maemo a mangwe a ka dira gore molekane yo a se nago molato a tšwele pele a dula le molekane yo a nago le molato, kudukudu ge e ba molekane yoo a tloga a itshola. Lega go le bjalo, taba ke gore bao ba nago le motheo wa Mangwalo wa go hlala ba swanetše go itirela phetho gomme ba lebeletšane le ditlamorago le ge e le dife tša yona tšeo di ka tšwelelago.Bagalatia 6:5.

Maemong a mangwe a feteletšego, Bakriste ba bangwe ba ile ba phetha ka gore ba arogane le balekane ba bona ba lenyalo goba ba ba hlale gaešita le ge balekane bao ba se ba otswa. Boemong bjo bjalo, Beibele e bolela ka go lebanya gore yo a tlogelago molekane wa gagwe “a dule a se a nyalwa goba go sego bjalo a boelane le [molekane] wa gagwe.” (1 Bakorinthe 7:11) Mokriste yo bjalo ga a lokologa gore a be le segwera le motho yo mongwe ka kgopolo ya gore a tsene lenyalong gape. (Mateo 5:32) Anke o ele hloko maemo a feteletšego a mmalwa ao batho ba bangwe ba a lebelelago e le mabaka a motheo a karogano.

Go gana go fepa lapa ka boomo. Lapa e ka ba leo le hlokago, la se be le dilo tša motheo tša bohlokwa bophelong, ka gobane monna a palelwa ke go le fepa, gaešita le ge a le boemong bjo bobotse bja go ka dira bjalo. Beibele e re: “Ge e ba motho a sa babalele . . . ditho tša lapa la gagwe, o latotše tumelo gomme ke yo mobe go feta motho yo a se nago tumelo.” (1 Timotheo 5:8) Ge e ba monna yoo a gana go fetola ditsela tša gagwe, mosadi a ka dira phetho ya ge e ba a nyaka go šireletša bophelo bja gagwe le bja bana ba gagwe ka go arogana le yena go ya ka molao. Go ba gona, bagolo ba Bakriste  ba swanetše go ba šedi kudu ge ba hlahloba tatofatšo ya gore Mokriste o gana go fepa lapa la gagwe. Go gana ga motho go hlokomela lapa la gagwe go ka feleletša ka gore a kgaolwe.

Go tlaišwa ka mo go feteletšego mmeleng. Molekane yo a gobošago molekane wa gagwe e ka ba yo šoro mo e lego gore o gobatša mmele wa molekane wa gagwe e bile o bea bophelo bja yena molekane yo a mo gobošago kotsing. Ge e ba molekane yo a gobošago molekane wa gagwe e le Mokriste, bagolo ba phuthego ba swanetše go nyakišiša ditatofatšo tšeo. Go tlalelana ka bogale le boitshwaro bja bošoro ke dilo tšeo di ka dirago gore motho a kgaolwe.Bagalatia 5:19-21.

Go bea bophelo bja moya kotsing. Molekane a ka leka go phegelela go thatafaletša molekane wa gagwe gore a se latele borapedi bja therešo goba a ka ba a leka go gapeletša molekane wa gagwe gore a robe ditaelo tša Modimo ka tsela e itšego. Boemong bjoo, molekane yo a lego kotsing o tla swanelwa ke go dira phetho ya ge e ba tsela feela ya gore “Modimo ke mmuši yo re swanetšego go mo kwa go e na le go kwa batho” ke gore a arogane le molekane wa gagwe ka molao.Ditiro 5:29.

Ditabeng ka moka tšeo di akaretšago maemo a bjalo a feteletšego ao a sa tšwago go ahlaahlwa, ga go motho yo a swanetšego go gatelela molekane yo a se nago molato gore a arogane le molekane yo a nago le molato goba gore a tšwele pele a dula le yena. Le ge bagwera ba moya bao ba godilego ka tsebo le bagolo ba ka nea thekgo le keletšo yeo e theilwego Beibeleng, ba ka se tsebe ditaba ka moka tša seo se diregago magareng ga monna yoo le mosadi yoo. Ke Jehofa feela yo a ka tsebago seo. Go ba gona, mosadi wa Mokriste o tla be a bontšha go se hlomphe Modimo goba thulaganyo ya lenyalo ge e ba a ile a feteletša bogolo bja mathata a gagwe a ka gae e le gore a arogane le monna wa gagwe, goba monna e le yena a nyakago gore a arogane le mosadi wa gagwe. Jehofa o tseba maanomabe le ge e le afe ao motho a a logago gore a arogane le molekane wa gagwe, go sa šetšwe kamoo a ka lekago gore a ute seo. Ka kgonthe, “dilo ka moka di hlobotše e bile di molaleng mahlong a yo re ikarabelago go yena.” (Baheberu 4:13) Eupša ge e ba boemo bjo kotsi o šoro bo tšwela pele bo sa kgaotše, ga go na motho yo a swanetšego go swaya phošo Mokriste yoo a bonego go le kaone gore mafelelong a kgethe go arogana le molekane wa gagwe. Mafelelong, “ka moka re tla ema pele ga sedulo sa kahlolo sa Modimo.”Baroma 14:10-12.