Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

“Le Duleng Leratong la Modimo”

 KGAOLO 4

Ke ka Baka La’ng re Swanetše go Hlompha Bolaodi?

Ke ka Baka La’ng re Swanetše go Hlompha Bolaodi?

“Godišang batho ba mehuta ka moka.”1 PETRO 2:17.

1, 2. (a) Ke ka baka la’ng re hwetša go le thata go hlompha bolaodi? (b) Ke dipotšišo dife tšeo re tlago go di ahlaahla?

NA O kile wa lebelela kamoo ngwana a arabelago ka gona ge a kgopelwa go dira selo seo a tlogago a sa rate go se dira? Sefahlego sa mošemanyana yoo se go botša kamoo a ikwago ka gona. O kwa lentšu la motswadi wa gagwe, e bile o a tseba gore o swanetše go hlompha bolaodi bja motswadi wa gagwe. Eupša mo lebakeng le, o tloga a sa nyake go kwa. Boemo bjo a lego go bjona, bo bontšha selo seo se re diragalelago ka moka ga rena.

2 Ga se ka mehla go lego bonolo gore re hlomphe bolaodi. Na ka dinako tše dingwe o hwetša go le thata go hlompha bao ba go okametšego? Ge e ba go le bjalo, tseba gore ga o noši ntweng yeo. Re phela nakong yeo go bonagalago go hlompha bolaodi go se sa hlwago go tšeelwa godimo. Lega go le bjalo, Beibele e re re swanetše go hlompha bao ba re okametšego. (Diema 24:21) Ge e le gabotse, go dira se go bohlokwa ge e ba re nyaka go dula leratong la Modimo. Ka gona, go ba le dipotšišo tšeo re ipotšišago tšona. Ke ka baka la’ng re thatafalelwa ke go hlompha bolaodi gakaakaa? Ke ka baka la’ng Jehofa a nyaka gore re dire se, le gona ke’ng seo se ka re thušago gore re kwe? Mafelelong, ke ka ditsela dife re ka bontšhago gore re hlompha bolaodi?

LEBAKA LEO GO LEGO THATA GO HLOMPHA BOLAODI

3, 4. Sebe le go se phethagale di thomile bjang, le gona ke ka baka la’ng go se phethagale ga rena go re thatafaletša go hlompha bolaodi?

3 Anke ka boripana re hlahlobeng mabaka a mabedi ao a dirago  gore re thatafalelwe ke go hlompha bolaodi. Lebaka la pele ke ka gobane re se ra phethagala; lebaka la bobedi ke gore batho bao ba re okametšego le bona ga se ba phethagala. Go ba le sebe le go se phethagale ga batho go thomile kgale kudu, morago kua tšhemong ya Edene ge Adama le Efa ba be ba rabela bolaoding bja Modimo. Ka gona sebe se thomile ka baka la borabele. Go tloga ka nako yeo go fihla lehono, re belegwa re na le moya wa borabele.Genesi 2:15-17; 3:1-7; Psalme 51:5; Baroma 5:12.

4 Ka baka la go ba ga rena batho ba sebe, boikgogomošo le boikgantšho di bonagala di itlela feela go rena, mola e le gore boikokobetšo ke sona seka sa bohlokwa kudu seo re swanetšego go se hlagolela kamoo re ka kgonago gomme re se kgomarele. Gaešita le ge re ile ra botega ka nywaga e mentši tirelong ya Modimo, re ka ikhwetša re le manganga re bile re ikgogomoša. Ka mohlala, ela hloko mohlala wa Kora yo a ilego a ema ka potego le batho ba Jehofa mathateng a mantši. Go dutše go le bjalo, o ile a kganyoga bolaodi gomme ka bonganga a rabela go Moshe monna yo boletaleta yo a phetšego mehleng yeo. (Numeri 12:3; 16:1-3) Nagana le ka Kgoši Usia, yo boikgogomošo bja gagwe bo ilego bja dira gore a tsene tempeleng ya Jehofa gomme a dire tirelo e kgethwa yeo go bego go laetšwe gore e dirwe ke baperisita feela. (2 Dikoronika 26:16-21) Banna bao ba ile ba otlwa o šoro ka baka la borabele bja bona. Lega go le bjalo, mehlala ya bona e mebe ke dikgopotšo tše di holago go rena ka moka. Re swanetše go lwantšha boikgogomošo bjo bo dirago gore re thatafalelwe ke go hlompha bolaodi.

5. Batho bao ba sa phethagalago ba ile ba diriša bjang bolaodi bja bona gampe?

5 Ka lehlakoreng le lengwe, batho bao ba sa phethagalago bao e lego balaodi ba ile ba dira gore batho ba se ke ba hlompha bolaodi. Bontši bja bona ba bile ba sehlogo, ba gobogilego goba ba šoro. Ge e le gabotse, histori ya batho e tletše ka pego ya go dirišwa ga matla gampe. (Bala Mmoledi 8:9) Ka mohlala, Saulo e be e le monna wa go loka le yo a ikokobeditšego ge Jehofa a be a mo kgetha gore e be kgoši. Lega go le bjalo, o ile a  ba le boikgogomošo le lehufa; ke moka a tlaiša monna yo a botegago Dafida. (1 Samuele 9:20, 21; 10:20-22; 18:7-11) Ka morago, Dafida o ile a ba yo mongwe wa dikgoši tše kaone tšeo Isiraele e kilego ya ba le tšona, eupša o ile a diriša matla a gagwe gampe ge a be a tšea mosadi wa Uria wa Mohethe gomme a romela monna yoo yo a se nago molato gore a ete pele madira a ntwa e le gore a bolawe tlhabanong. (2 Samuele 11:1-17) Ruri, go se phethagale go thatafaletša batho gore ba diriše matla gabotse. Le gona ge balaodi ba sa hlomphe Jehofa, ba diriša matla gampe kudu le go feta. Ka morago ga go hlalosa kamoo bomopapa ba Katholika ba ilego ba baka tlaišo yeo e apareditšego gohle, mokgoma wa Brithania o ile a ngwala gore: “Go ba le matla go dira gore batho ba senye gomme go ba le matla a feletšego go senya ka mo go feletšego.” Re sa dutše re gopola pego ye ya go dirišwa gampe ga bolaodi historing ya motho, anke re hlahlobeng potšišo e rego: Ke ka baka la’ng re swanetše go hlompha bolaodi?

KE KA BAKA LA’NG RE SWANETŠE GO HLOMPHA BOLAODI?

6, 7. (a) Lerato la rena la go rata Jehofa le swanetše go re tutueletša go dira’ng, gona ka baka la’ng? (b) Boikokobetšo bo akaretša boemo bofe bja kgopolo, gomme re ka bo bontšha bjang?

6 Mabaka a kaone kudu a go hlompha bolaodi a tšwa leratong—lerato la rena la go rata Jehofa, magagabo rena gaešita le go ithata. Ka ge re rata Jehofa go feta selo le ge e le sefe, re nyaka go thabiša pelo ya gagwe. (Bala Diema 27:11; Mareka 12:29, 30) Re a tseba gore bobuši bja gagwe, e lego tshwanelo ya gagwe ya go buša legohle, bo ile bja hlohlwa lefaseng go tloga nakong ya borabele bja Edene le gore batho ba bantši ba ile ba thekga Sathane gomme ba gana bobuši bja Jehofa. Re thabela go ba ka lehlakoreng la bao ba thekgago bobuši bja Jehofa. Ge re bala mantšu ao a lego go Kutollo 4:11, a dira gore dipelo tša rena di arabele ka mafolofolo. Ruri re tloga re bona gore Jehofa ke Mmuši yo a swanetšego wa legohle! Re thekga bobuši bja Jehofa, ra amogela pušo ya gagwe bophelong bja rena bja letšatši le letšatši.

 7 Tlhompho e bjalo e bolela se se fetago go fo kwa feela. Re kwa Jehofa ka mehla ka gobane re mo rata. Lega go le bjalo, go tla ba le dinako tše dingwe moo re tlago go thatafalelwa kudu ke go mo kwa. Dinakong tše swanago le tšeo, le rena go swana le mošemanyana yo go boletšwego ka yena mathomong a kgaolo ye, go tla nyakega gore re ithute boikokobetšo. Re a gopola gore Jesu o ile a ikokobeletša go dira thato ya Tatagwe gaešita le ge go dira bjalo go be go ka bonagala go le thata. O ile a botša Tatagwe gore: “Go se phethege thato ya ka eupša go phethege ya gago.”Luka 22:42.

8. (a) Ke’ng seo gantši lehono se akaretšwago ke go ikokobeletša bolaodi bja Jehofa, gomme se se bontšha’ng ka maikwelo a Jehofa ka taba ye? (b) Ke’ng seo se ka re thušago gore re kwe keletšo gomme re amogele tayo? (Bona lepokisi go “ Theetša Keletšo Gomme o Amogele Tayo”.)

8 Go ba gona, lehono Jehofa ga a bolele le rena ka go lebanya; o diriša Lentšu la gagwe le batho bao e lego baemedi ba gagwe lefaseng. Ka gona, gantši re ikokobeletša bolaodi bja Jehofa ka go hlompha batho bao a ba beilego, goba bao a ba dumeletšego go tšwela pele ba le maemong a go re okamela. Ge re ka rabela go batho bao—ka mohlala, ka go gana go amogela keletšo ya bona ya Mangwalo le phošollo—re tla kgopiša Modimo wa rena. Ge Baisiraele ba be ba ngongorega le go rabela go Moshe, Jehofa o ile a lebelela ditiro tše bjalo eka di lebišitšwe go yena.Numeri 14:26, 27.

9. Ke ka baka la’ng go rata ga rena magagabo rena go re tutueletša go hlompha bolaodi? Nea mohlala wa kamoo seo se ka diregago ka gona.

9 Re bile re hlompha bolaodi ka baka la ge re rata magagabo rena. Seo se bjalo bjang? Anke o nagane o le lešole leo e lego karolo ya madira. Gore go be le katlego, gaešita le go phologa ga madira a mangwe, go ithekgile ka tirišano yeo lešole le lengwe le le lengwe le nago le yona le ka go kwa le go hlompha tshepedišo ya bolaodi bja sešole. Ge e ba o ka tšeela fase thulaganyo yeo ka gore o rabele, mašole ka moka ao o dirišanago le wona a ka ba kotsing. Therešo ke gore madira a batho a baka tshenyo e šiišago lefaseng lehono. Lega go le bjalo, Jehofa o na le madira ao a dirago se se lokilego feela. Beibele e bolela ka Modimo ka makga a makgolo e le “Jehofa wa madira.” (1 Samuele  1:3) Ke Molaodi wa dibopiwa tše dintši tše matla tša moya. Ka dinako tše dingwe, Jehofa o swantšha bahlanka ba gagwe ba lefaseng le madira, goba lekoko. (Psalme 68:11; Hesekiele 37:1-10) Ge e ba re ka rabela go batho bao Jehofa a ba beilego gore ba re okamele, na go dira bjalo ga se go bea mašole a moya ao re dirišanago le wona kotsing? Ge Mokriste a rabela go bagolo bao ba kgethilwego, batho ba bangwe ka phuthegong le bona ba ka tlaišega. (1 Bakorinthe 12:14, 25, 26) Ngwana ge a rabela, lapa moka le ka tlaišega. Ka gona re bontšha magagabo rena lerato ka go hlagolela moya wa tlhompho le wa tirišano.

10, 11. Kganyogo e swanetšego ya gore re holege e ka re tutueletša bjang gore re kwe bolaodi?

10 Re hlompha bolaodi ka gobane seo se a re hola. Ge Jehofa a re kgopela gore re hlomphe bolaodi, gantši o bolela mehola yeo e tla tlišwago ke go dira seo. Ka mohlala, o botša bana gore ba kwe batswadi ba bona e le gore ba tle ba phele bophelo bjo botelele le bjo bo thabišago. (Doiteronomio 5:16; Baefeso 6:2, 3) O re botša gore re hlomphe bagolo ba phuthego ka gobane  ge e ba re sa dire bjalo seo se tla re gobatša moyeng. (Baheberu 13:7, 17) E bile o re botša gore re hlomphe balaodi ba mmušo e le gore re šireletšege.Baroma 13:4.

11 Na ga o dumele gore go tseba lebaka leo Jehofa a nyakago gore re kwe go re thuša gore re hlomphe bolaodi? Ka gona, anke re eleng hloko mokgwa wo re ka o dirišago go hlompha bolaodi dibopegong tše tharo tša bohlokwa tša bophelo.

KAMOO RE KA BONTŠHAGO TLHOMPHO KA LAPENG

12. Ke karolo efe yeo Jehofa a e abelago monna yo a nyetšego le tate ka lapeng, gomme banna bao ba ka phetha karolo yeo bjang?

12 Jehofa o rulagantše thulaganyo ya lapa ka boyena. Ka ge ka mehla e le Modimo wa thulaganyo, o rulagantše lapa ka tsela yeo le ka atlegago. (1 Bakorinthe 14:33) O nea monna yo a nyetšego le tate matla a gore ba be dihlogo tša lapa. Monna wa lapa o hlompha Hlogo ya gagwe, e lego Kriste Jesu, ka go ekiša tsela yeo Jesu a dirišago bohlogo ka phuthegong. (Baefeso 5:23) Ka gona, monna wa lapa ga se a swanelwa go palelwa ke go phethagatša boikarabelo bja gagwe eupša o swanetše gore a bo phethagatše senna; e bile a se ke a ba mogateledi goba yo thata, go e na le moo e be yo lerato, yo a naganelago le yo botho. O dula a gopola gore matla a gagwe a lekanyeditšwe—le ka mohla ga a fete bolaodi bja Jehofa.

Tate yo e lego Mokriste o ekiša tsela yeo Kriste a bontšhago bohlogo ka yona

13. Mosadi yo a nyetšwego le mma ba ka phethagatša bjang karolo ya bona ka lapeng ka tsela yeo e kgahlago Jehofa?

13 Mosadi yo a nyetšwego le mma o swanetše go ba mothuši wa monna wa  gagwe, goba motlatši wa gagwe. Le yena o neilwe matla ka lapeng, ka gobane Beibele e bolela ka “molao wa mmago.” (Diema 1:8) Go ba gona, matla a mosadi a ka tlase ga a monna wa gagwe. Mosadi wa Mokriste o hlompha taolo ya monna wa gagwe ka gore a mo thuše gore a phethagatše karolo ya gagwe e le hlogo ya lapa. Ga a mo nyenyefatše, ga a mo hlalefetše goba go mo amoga matla ao a nago le ona. Go e na le moo, o a mo thekga e bile o dirišana le yena. Ge e ba a sa dumelelane le diphetho tšeo monna wa gagwe a di dirago, ka tlhompho o mmotša kamoo yena a ikwago ka gona ka diphetho tšeo, eupša o dula a ikokobeditše. Ge e ba monna wa gagwe e se modumedi, a ka no lebeletšana le maemo a hlohlago, lega go le bjalo go itshwara ga gagwe ka go ikokobetša go ka tutuetša monna wa gagwe gore a tsome Jehofa.—Bala 1 Petro 3:1.

14. Bana ba ka thabiša bjang Jehofa le batswadi ba bona?

14 Bana ge ba ekwa tatago bona le mmago bona ba thabiša pelo ya Jehofa. Ba bile ba godiša batswadi ba bona le go ba thabiša. (Diema 10:1) Malapeng a motswadi o tee, bana ba diriša molao o swanago wa motheo wa go kwa, ba tseba gore motswadi  wa bona le yena a ka be a nyaka thekgo ya bona e kgolwanyana ya gore ba mo thekge le go dirišana le yena. Go ba le khutšo le lethabo le legolo malapeng ao go ona ditho ka moka di phethagatšago dikarolo tša tšona tšeo Modimo a di abetšego tšona. Se se godiša Mothomi wa malapa ka moka, e lego Jehofa Modimo.Baefeso 3:14, 15.

TLHOMPHO KA PHUTHEGONG

15. (a) Re ka bontšha bjang gore re hlompha bolaodi bja Jehofa ka phuthegong? (b) Ke melao efe ya motheo yeo e ka re thušago gore re ikokobeletše bao ba re etelelago pele? (Bona lepokisi go “ Kwang Bao ba Etelelago Pele”.)

15 Jehofa o kgethile Morwa wa gagwe gore e be Mmuši phuthegong ya Bokriste. (Bakolose 1:13) Jesu le yena o ile a abela “mohlanka [wa gagwe] yo a botegago le wa temogo” gore a hlokomele dinyakwa tša moya tša batho ba Modimo mo lefaseng. (Mateo 24:45-47) Sehlopha se Bušago sa Dihlatse tša Jehofa se emela sehlopha sa mohlanka. Go etša ge go be go le bjalo diphuthegong tša Bokriste tša lekgolong la pele la nywaga, bagolo lehono ba amogela ditaelo le keletšo go Sehlopha se Bušago, e ka ba ka go lebanya goba ka baemedi ba sona, ba bjalo ka balebeledi ba basepedi. Ge e ba rena re le motho ka o tee ka o tee re hlompha bolaodi bja bagolo ba Bakriste, re kwa Jehofa.Bala 1 Bathesalonika 5:12; Baheberu 13:17.

16. Ke ka kwešišo efe bagolo ba kgethwago ka moya o mokgethwa?

16 Bagolo le bahlanka ba bodiredi ga se ba phethagala. Ba na le mafokodi go swana le rena. Lega go le bjalo, bagolo ke “dimpho tšeo e lego banna,” ba neilwe e le gore ba thuše phuthego gore e dule e na le tswalano e matla le Jehofa. (Baefeso 4:8) Bagolo ba kgethwa ka moya o mokgethwa. (Ditiro 20:28) Seo se bjalo bjang? Ka kgopolo ya gore banna ba bjalo ba swanetše gore sa pele ba fihlelele ditshwanelego tšeo di begilwego Lentšung la Modimo leo le buduletšwego. (1 Timotheo 3:1-7, 12; Tito 1:5-9) Go tlaleletša go seo, bagolo bao ba hlahlobago go bona ge e ba ngwanabo rena a fihlelela ditshwanelego tša Mangwalo ba rapelela tlhahlo ya Jehofa ya moya o mokgethwa go tšwa pelong.

17. Ke ka baka la’ng ka dinako tše dingwe basadi ba Bakriste ka diphuthegong tša gabo bona ba swanetše go rwala hlogong ge ba phetha dikabelo?

 17 Ka phuthegong, go ka direga gore ka dinako tše dingwe go se ke gwa ba le bagolo le bahlanka ba bodiredi bao ba ka dirago dikabelo tšeo gantši di abelwago bona, go swana le go swara seboka sa tirelo ya tšhemo. Maemong a bjalo, ba bangwe ba bana babo rena bao ba kolobeditšwego ba ka phetha dikabelo tšeo. Ge go se na bana babo rena bao ba kolobeditšwego, gona dikgaetšedi tše di kolobeditšwego tša Bakriste tšeo di swanelegago di ka phetha dikabelo tšeo. Lega go le bjalo, ge e ba mosadi a phetha karolo yeo ka tlwaelo e abelwago motho yo motona yo a kolobeditšwego, mosadi yoo o swanetše go rwala hlogong. * (1 Bakorinthe 11:3-10) Se ga se bolele gore mosadi o tšeelwa fase. Go e na le moo, se nea sebaka sa go hlompha thulaganyo ya Jehofa ya bohlogo ka lapeng gotee le ka phuthegong.

GO HLOMPHA BALAODI BA MMUŠO

18, 19. (a) O ka hlalosa bjang melao ya motheo yeo go boletšwego ka yona go Baroma 13:1-7? (b) Re bontšha bjang tlhompho go balaodi?

18 Bakriste ba therešo ba kgomarela ka kelohloko melao ya motheo yeo go boletšwego ka yona go Baroma 13:1-7 (Bala.) Ge o dutše o bala ditemana tšeo, o ka kgona go bona gore “balaodi ba bagolo” bao go bolelwago ka bona moo ke mebušo ya batho. Ge feela Jehofa a dumeletše mebušo yeo gore e be gona, e dira mediro ya bohlokwa, ya dira gore go be le thulaganyo le go nea ditirelo tšeo di nyakegago. Re hlompha mebušo ye ka go kwa melao. Re kgonthiša gore re lefa metšhelo le ge e le efe yeo re e kolotago, ra tlatša ka mo go swanetšego difomo goba dipampiri tšeo mmušo o ka bego o di nyaka le go latela melao le ge e le efe yeo e akaretšago rena, malapa a rena, kgwebo le diphahlo tša rena. Lega go le bjalo, ga re ikokobeletše mebušo ge e ba e nyaka gore re se kwe Modimo. Go e na le moo, re araba go swana le kamoo baapostola ba bogologolo ba ilego ba araba ka gona ge ba re: “Modimo ke mmuši yo re swanetšego go mo  kwa go e na le go kwa batho.”Ditiro 5:28, 29; bona lepokisi le rego:  “Ke Swanetše go kwa Bolaodi bja Mang?”.

19 Le gona re hlompha mebušo ka go dirišana le ba bangwe gabotse. Ka dinako tše dingwe re ka dirišana ka go lebanya le bahlankedi ba mmušo. Moapostola Paulo o ile a dirišana le babuši ba etšago Kgoši Heroda Agaripa le Mohlomphegi Fesito. Banna ba ba be ba tloga ba na le diphošo, eupša Paulo o ile a bolela le bona ka tlhompho. (Ditiro 26:2, 25) Re tla ekiša mohlala wa Paulo, go sa šetšwe gore mohlankedi yo re bolelago le yena ke mmuši yo matla goba lephodisa la lefelong la gabo rena. Sekolong, bafsa ba Bakriste ba katanela go hlompha ka tsela e swanago barutiši ba bona le balaodi ba sekolo le bao ba šomago moo. Therešo ke gore ga re hlomphe feela bao ba amogelago ditumelo tša rena; re bile re bontšha tlhompho ge re dirišana le bao ba ganetšago Dihlatse tša Jehofa. Ruri, batho ka kakaretšo bao e sego badumedi ba swanetše go lemoga gore re a hlompha.Bala Baroma 12:17, 18; 1 Petro 3:15.

20, 21. Ke ditšhegofatšo dife tše dingwe tšeo di tlišwago ke go hlompha bolaodi?

20 Re se ke ra dikadika go hlompha batho ba bangwe. Moapostola Petro o ngwadile gore: “Godišang batho ba mehuta ka moka.” (1 Petro 2:17) Ge batho ba lemoga gore re ba hlompha e le ka kgonthe, ba ka kgahlega kudu. Gopola, seka se ga se sa bonagala mehleng yeno. Ka gona, go se bontšha ke e nngwe ya ditsela tša go bontšha gore re kwa taelo ya Jesu ya gore: “Seetša sa lena a se bonege pele ga batho, e le gore ba bone mediro ya lena e mebotse gomme ba nee Tatago lena yo a lego magodimong letago.”Mateo 5:16.

21 Lefaseng le la leswiswi, batho ba dipelo tše di lokilego ba itlela ka go rata seetšeng sa moya. Ka gona go bontšha ga rena tlhompho ka lapeng, phuthegong le balaoding ba lefase go ka gogela batho ba bangwe gomme gwa ba tutueletša gore ba sepele le rena seetšeng. Yeo ke tebelelo e kgahlišago gakaakang! Lega go le bjalo, gaešita le ge seo se sa direge, go na le seo re ka kgodišegago ka sona. Go hlompha ga rena batho go kgahla Jehofa Modimo le gona go re thuša gore re dule leratong la Modimo. Na wo ga se moputso o mogolo go feta ye mengwe ka moka?

^ par. 17 Go “Go Rwala Hlogong—Go Swanetše go Dirwa Neng le Gona ka Baka la Eng?”, Lemetletšo le bolela ka ditsela tše sego kae tša go diriša molao wo wa motheo.

Ithute ka mo go oketšegilego

Ekwa Badiši ba Jehofa

Balebeledi ba kgethilwe ka moya o mokgethwa gore ba diše phuthego ya Modimo. Ke ka baka la’ng dinku di swanetše go ba kwa?