Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

“Le Duleng Leratong la Modimo”

 KGAOLO 2

Ke Bjang o ka Dulago o na le Letswalo le Lebotse?

Ke Bjang o ka Dulago o na le Letswalo le Lebotse?

“Ebang le letswalo le lebotse.”1 PETRO 3:16.

1, 2. Mpša e ka hlapetša motho bjang, gomme e ka swantšhwa bjang le letswalo?

MONNA o ithobaletše gabose malaong a gagwe bošego. Gateetee mpša ya gagwe e kwa lešata gomme e thoma go bogola. Motho yo a bego a šwahletše ka legaeng la gagwe o a tšhaba. Monna yoo o tšwa ka dikobong gomme ge a lebelela ka ntle o hwetša tšohle di sepela gabotse. Motho yo a bego a šwahletše moo o tšhabile. Monna o ikwa a imologile. Ke’ng seo se ka bego se diregile ge nkabe mpša ya gagwe e be e se ya phafoga le gona e be e se ya bogola? Monna yoo a ka ba a ile a hulwa, a gobatšwa goba a bolawa.

2 Magaeng a mantši go na le mpša yeo e hlapeditšego. Ge e ba e phafogile, e ka phološa bophelo. Ka ditsela tše dintši, e ka swantšhwa le mpho e bohlokwa yeo Jehofa a re filego yona—letswalo. (Jakobo 1:17) Ge nkabe re se na letswalo, nkabe re se na tlhahlo le gatee. Ge le dirišwa gabotse, le ka re thuša gore re hwetše tsela e nepagetšego ya bophelo gomme re e kgomarele. Ka gona a re ahlaahleng seo letswalo e lego sona le kamoo le šomago ka gona. Ka morago re tla ahlaahla dintlha tše di latelago: (1) Kamoo re ka tlwaetšago letswalo la rena, (2) lebaka leo re swanetšego go naganela matswalo a ba bangwe le (3) kamoo letswalo le lebotse le re holago ka gona.

SEO LETSWALO E LEGO SONA LE KAMOO LE ŠOMAGO KA GONA

3. Lentšu la Segerika la “letswalo” le ra go re’ng ka go lebanya, gomme le šupa go bokgoni bofe bja moswananoši bjoo batho ba nago le bjona?

3 Ka Beibeleng, lentšu la Segerika la “letswalo” ka go lebanya  le bolela “go itseba.” Go fapana le dibopiwa tše dingwe ka moka mo lefaseng, rena re na le bokgoni bjo Modimo a re neilego bjona bja go itseba. Ka tsela ya seswantšhetšo, re ka ema gomme ra itlhahloba ke moka ra bona ge e ba re hlwekile boitshwarong. Ka ge letswalo la rena le šoma bjalo ka hlatse, goba moahlodi, le ka hlahloba ditiro tša rena, mekgwa ya rena le dikgetho tša rena. Le ka re hlahla gore re dire phetho e botse goba la re lemoša gore re se dire e mpe. Ka morago ga moo, le ka re homotša ge re dirile kgetho e botse goba la re tlaiša gabohloko ge re dirile phetho e mpe.

4, 5. (a) Re tseba bjang gore Adama le Efa ba be ba na le matswalo, gomme ke’ng seo se ilego sa direga ka ge ba ile ba hlokomologa molao wa Modimo? (b) Ke mehlala efe yeo e bontšhago gore banna ba botegago ba mehleng ya pele ga Bokriste ba ile ba diriša matswalo a bona?

4 Bokgoni bjo bja leabela bo ile bja bewa ka gare ga monna le mosadi go tloga mathomong. Adama le Efa ba ile ba bontšha gore ba na le matswalo. Re bona bohlatse bja seo tabeng ya gore ba ile ba ba le dihlong ka morago ga gore ba dire sebe. (Genesi 3:7, 8) Ka manyami, letswalo leo la bona leo le bego le tshwenyegile le be le ka se sa ba thuša ka selo ka nako yeo. Ba be ba tshetše molao wa Modimo ka boomo. Ka go re’alo, ba ile ba ikgethela ka boomo go ba marabele, baganetši ba Jehofa Modimo. Ka ge e be e le batho ba phethagetšego, ba be ba tseba seo ba bego ba se dira, gomme ba be ba ka se sa boela go Modimo.

5 Go fapana le Adama le Efa, bontši bja batho bao ba sa phethagalago ba ile ba theetša matswalo a bona. Ka mohlala, monna yo a botegago Jobo o ile a re: “Ke kgomaretše go loka ga ka, gomme nka se go tlogele; pelo ya ka e ka se nkgoboše mehleng ya ge ke sa phela.” * (Jobo 27:6) Jobo e be e tloga e le  monna yo a lego šedi kudu. O be a kgonthišetša gore o theetša letswalo la gagwe, a le dumelela gore le hlahle ditiro tša gagwe le diphetho tša gagwe. Ka gona, o be a ka bolela ka kgodišego gore letswalo la gagwe le be le sa mo goboše, goba go mo tlaiša ka gore a lewe ke dihlong goba a ikwe a le molato. Hlokomela ka tsela yeo Jobo le Dafida ba ilego ba arabela ka tsela e sa swanego ka gona. Lebakeng le lengwe ge Dafida a be a sa hlomphe Saulo, e lego kgoši e tloditšwego ya Jehofa, “pelo ya Dafida ka morago [e ile] ya mo hlokiša boroko.” (1 Samuele 24:5) Go itiwa moo ga Dafida ke letswalo go swanetše go ba go ile gwa mo thuša, gwa mo ruta gore nakong e tlago a pheme mokgwa woo wa go hloka tlhompho.

6. Ke’ng seo se bontšhago gore letswalo ke mpho yeo e filwego batho ka moka?

6 Na mpho ye ya letswalo e filwe feela bahlanka ba Jehofa? Ela hloko mantšu a buduletšwego a moapostola Paulo a rego: “Neng le neng ge batho ba ditšhaba bao ba se nago molao ba dira ka tlhago dilo tša molao, batho ba gaešita le ge ba se na molao, ke molao go bona ka noši. Ke bona bao ba bontšhago gore kgwekgwe ya molao e ngwadilwe dipelong tša bona, ge letswalo la bona le dutše le hlatselana le bona gomme menagano ya bona e ba latofatša goba gaešita le go ba lokafatša.” (Baroma 2:14, 15) Gaešita le bao ba sa tsebego selo ka melao ya Jehofa, ka dinako tše dingwe ba ka tutuetšwa ke hlatse ye ya bona ya ka gare gore ba dire dilo ka go dumelelana le melao ya motheo ya Modimo.

7. Ke ka baka la’ng ka dinako tše dingwe letswalo le ka foša?

7 Lega go le bjalo, ka dinako tše dingwe letswalo le ka foša. Ka baka la’ng? Ge e ba mpša yeo e hlapeditšego e se ya phafoga, gona ga e na mohola. Goba ge e ba mong wa yona a e hlokomologa ge e bogola, gona seo se ka ba kotsi. Ka mo go swanago, ge e ba letswalo la rena le tutueditšwe kudu ke dikganyogo tša boithati tša dipelo tša rena, gona le ka re lebiša gošele. Le gona ge e ba le dirišwa ka ntle le tlhahlo e botegago ya Lentšu la Modimo, re ka palelwa ke go kgethologanya se se nepagetšego go se se fošagetšego ditabeng tše dintši tše bohlokwa.  Ruri ge e ba letswalo la rena le tla šoma gabotse, re nyaka tlhahlo ya moya o mokgethwa wa Jehofa. Paulo o ngwadile gore: “Letswalo la ka le hlatselana le nna ka go dumelelana le moya o mokgethwa.” (Baroma 9:1) Eupša re ka kgonthišetša bjang gore letswalo la rena le dumelelana le moya o mokgethwa wa Jehofa? Re ka dira seo ka gore re le tlwaetše.

KAMOO LETSWALO LE KA TLWAETŠWAGO KA GONA

8. (a) Pelo e ka kgoma bjang letswalo, gomme ke’ng seo re swanetšego go tshwenyega kudu ka sona ge re dira diphetho? (b) Ke ka baka la’ng ka mehla letswalo le le sekilego e se le le lekanego go Mokriste? (Bona mongwalo wa ka tlase.)

8 O dira bjang phetho yeo e nyakago letswalo? Go bonagala batho ba bangwe ba fo hlahloba seo ba se naganago le seo ba se kwago, ke moka ba dira phetho. Ke moka ka morago ga moo ba re: “Se ga se tshwenye letswalo la ka.” Dikganyogo tša pelo e ka ba tše matla kudu, moo e bilego di ka tutuetšago letswalo. Beibele e re: “Pelo e boradia kudu go feta selo le ge e le sefe e bile ke e kgopo. Ke mang yo a ka e tsebago?” (Jeremia 17:9) Ka gona, seo pelo ya rena e se kganyogago, ga se sa swanela go ba seo re tshwenyegago kudu ka sona. Go e na le moo, re nyaka go tshwenyega pele ka seo se tlago go kgahliša Jehofa Modimo. *

9. Go boifa Modimo ke go dira’ng, gomme go mmoifa ga rena go swanetše go kgoma bjang letswalo la rena?

9 Ge e ba phetho e tloga e theilwe letswalong la rena leo le tlwaeditšwego gabotse, e tla bontšha gore re boifa Modimo, e ka se bontšhe gore e theilwe dikganyogong tša rena. Ela hloko mohlala wo o swanelago gabotse tabeng ye. Mmuši yo a  botegago Nehemia o be a na le tshwanelo ya go nyaka gore batho bao ba bego ba le Jerusalema ba mo lefe ka tsela e itšego ba be ba ntšhe le makgetho. Eupša o ile a se ke a dira seo. Ka baka la’ng? O ile a phema go se kgahliše Jehofa ka gore a gatelele batho ba Modimo. O itše: “Nna ga se ka ka ka dira ka tsela yeo ka gobane ke be ke boifa Modimo.” (Nehemia 5:15) Go bohlokwa gore re boife Modimo e le ka kgonthe, re boife ka pelo ka moka go se kgahliše Tatago rena wa legodimong. Poifo e bjalo e tla re šušumeletša gore re nyake tlhahlo e tšwago ka Lentšung la Modimo ge go na le diphetho tšeo re swanetšego go di dira.

10, 11. Ke melao efe ya motheo ya Beibele yeo e akaretšwago tabeng ya go nwa dino tše di tagago, gomme re ka hwetša bjang tlhahlo ya Modimo gore re diriše melao yeo?

10 Ka mohlala, nagana ka taba ya dino tše di tagago. Potšišo yeo bontši bja rena re lebeletšanago le yona ge re bokane le bagwera še: Na ke nwe goba ke se nwe? Sa pele, re swanetše go ithuta dilo ka moka mo tabeng ye. Ke melao efe ya motheo ya Beibele yeo e šomago mo tabeng ye? Go ba gona, Beibele ga e gane go dirišwa gabotse ga dino tše di tagago. E tumiša Jehofa ka baka la mpho ya beine. (Psalme 104:14, 15) Lega go le bjalo, Beibele e ganetša go nwa kudu le menyanya ya mašata. (Luka 21:34; Baroma 13:13) Godimo ga moo, e lokeletša botagwa gare ga dibe tše dingwe tše dikgolo kudu, tše bjalo ka bootswa le bohlotlolo. *1 Bakorinthe 6:9, 10.

11 Letswalo la Mokriste le rutwa ka melao e bjalo ya motheo la ba la tiišwa. Ka gona ge re lebeletšana le phetho ya go nwa ge re tlo ba pokanong, re ipotšiša dipotšišo tše bjalo ka tše: ‘Ke pokano ya mohuta mang yeo e rulagantšwego? Na go ka direga gore e tšwe taolong, e be monyanya wa mašata? Ke’ng seo nna ke se ratago? Na ke hlologela dino tše di tagago, ke ithekga ka tšona, ke di nwela go laola maikwelo a ka le boitshwaro  bja ka? Na ke kgona go itshwara ka gore ke lekanyetše kamoo ke nwago ka gona?’ Ge re dutše re naganišiša ka melao ya motheo ya Beibele le dipotšišo tšeo melao yeo e di rotošago, re dira gabotse gore re rapelele tlhahlo ya Jehofa. (Bala Psalme 139:23, 24) Ka tsela ye, re laletša Jehofa gore a re hlahle ka moya wa gagwe o mokgethwa. Le gona re tlwaetša letswalo la rena gore le dire dilo ka go dumelelana le melao ya motheo ya Modimo. Lega go le bjalo, go na le taba e nngwe yeo e swanetšego go elwa hloko ge re dira diphetho.

KE KA BAKA LA’NG RE SWANETŠE GO ŠETŠA MATSWALO A BA BANGWE?

Letswalo leo le tlwaeditšwego ke Beibele le tla go thuša gore o dire phetho ya ge e ba o tla nwa dino tša bjala go ba go se bjalo

12, 13. Ke mabaka afe a mangwe ao a dirago gore matswalo a Bakriste a fapane, gomme re swanetše go swaragana bjang le go fapana moo?

12 Ka dinako tše dingwe o ka makatšwa ke kamoo matswalo a Bakriste a fapanego ka gona. Motho yo mongwe o belaela tiro e itšego goba mokgwa o itšego; yo mongwe yena o a e thabela e bile ga a bone phošo ka yona. Tšea ka mohlala taba ya go nwa ga motho ge a na le bagwera, yo mongwe o thabela go nwa a na le bagwera ba sego kae ge ba dutše ba iketlile mantšiboa; yo mongwe o tshwenywa ke seo. Ke ka baka la’ng go na le go fapana mo go bjalo, gomme go swanetše go kgoma bjang diphetho tšeo re di dirago?

13 Batho ba fapane ka baka la mabaka a mantši. Ditlogo tša batho di fapane kudu. Ka mohlala, ba bangwe ba tloga ba lemoga gabotse bofokodi bjoo bo ilego bja ba swariša bothata nakong e fetilego—mohlomongwe e bile ba be ba thatafalelwa ke go bo fenya. (1 Dikgoši 8:38, 39) Ge go tliwa tabeng ya dino tše di tagago, batho ba bjalo ba tla ba le matswalo ao a dirago gore ba naganišiše ka kelohloko. Ge e ba motho yo bjalo a etla lapeng la gago go go etela, letswalo la gagwe le ka mo ganetša ka tshwanelo gore a gane seno se se tagago ge e ba o mo nea sona. Na wena o tla kgopišega? Na o tla mo gapeletša? Aowa. Go sa šetšwe gore o tseba mabaka a gagwe goba go se bjalo—mabaka ao yena a ka kgethago go se a bolele moo—gona lerato la borwarre le tla go šušumeletša gore o mo naganele.

14, 15. Matswalo a bao ba bego ba le phuthegong ya lekgolo la pele la nywaga a ile a fapana tabeng efe, gomme ke’ng seo Paulo a ilego a šišinya gore se dirwe?

 14 Moapostola Paulo o ile a bona gore matswalo gantši a be a tloga a sa swane magareng ga Bakriste lekgolong la pele la nywaga. Mehleng yeo, Bakriste ba bangwe ba be ba tshwenyegile ka dijo tše itšego tšeo di bego di hlabetšwe medingwana ya diswantšho. (1 Bakorinthe 10:25) Letswalo la Paulo le be le se na bothata ka dijo tše bjalo tšeo ka morago di bego di rekišwa borekišetšong. Go yena, medingwana ya diswantšho e be e se selo; le ka mohla medingwana yeo e be e ka se be le dijo tšeo di bego di hlodilwe ke Jehofa le tšeo e bego e le tša Gagwe. Lega go le bjalo, Paulo o ile a kwešiša gore ba bangwe ba be ba sa lebelele taba ye ka tsela yeo yena a bego a e lebelela ka yona. Ba bangwe ba ka ba ba be ba ile ba ineela borapeding bja medingwana ya diswantšho pele ga ge e eba Bakriste. Go ya ka bona, selo se sengwe le se sengwe seo se bego se tswalanywa le borapedi bja medingwana yeo se be se ba kgopiša. Paulo o ile a rarolla bjang taba ye?

15 Paulo itše: “Lega go le bjalo, rena bao ba tiilego tumelong re swanetše go rwala mafokodi a bao ba sa tiago gomme re se ke ra ikgahliša ka noši. Gobane gaešita le Kriste ga se a ka a ikgahliša.” (Baroma 15:1, 3) Paulo o boletše gore re swanetše go bea dikgahlego tša bana babo rena pele ga tša rena, feela bjalo ka ge Kriste a dirile. Tabeng e nngwe e tswalanago le ye, Paulo o ile a re a ka upša a se je nama le gatee go e na le gore a kgopiše nku e bohlokwa yeo Kriste a gafilego bophelo bja gagwe ka baka la yona.Bala 1 Bakorinthe 8:13; 10:23, 24, 31-33.

16. Ke ka baka la’ng bao matswalo a bona a tlogago a ba ganetša go dira dilo tše dingwe ba swanetšego go phema go ahlola bao matswalo a bona a fapanago le a bona?

16 Ka lehlakoreng le lengwe, bao matswalo a bona a ba ganetšago go dira dilo tše itšego ga se ba swanela go sola ba bangwe, ba gapeletša gore batho ba bangwe ka moka ba lebelele ditaba tša letswalo kamoo bona ba di lebelelago ka gona. (Bala Baroma 14:10) Ge e le gabotse, letswalo la rena le swanetše go dirišetšwa go re ahlola, e sego go ahlola ba bangwe. Gopola mantšu  a Jesu a rego: “Tlogelang go ahlola gore le se ahlolwe.” (Mateo 7:1) Bohle ka phuthegong ba swanetše go phema go tsoša dingangišano ka ditaba tšeo motho a ka itirelago phetho a diriša letswalo la gagwe. Go e na le moo, re nyaka ditsela tšeo re ka godišago lerato le botee, ra agana, e sego go gagolana.Baroma 14:19.

KAMOO LETSWALO LE LEBOTSE LE RE HOLAGO KA GONA

Letswalo le lebotse le ka re hlahla tseleng ya bophelo, la tliša lethabo le khutšo ya ka gare

17. Go diregile eng ka matswalo a batho ba bantši lehono?

17 Moapostola Petro o ngwadile gore: “Ebang le letswalo le lebotse.” (1 Petro 3:16) Letswalo leo le hlwekilego mahlong a Jehofa Modimo ke mpho e kgolo kudu. Ga le swane le matswalo a batho ba bantši lehono. Paulo o boletše ka bao “matswalo a bona a retetšego mo e kego ke letlalo leo le fišitšwego ka tšhipi ya go fišeletša.” (1 Timotheo 4:2) Tšhipi ya go fišeletša e tšhuma nama, ya e tlogela e na le lebadi e bile e sa kwe  selo. Ba bantši ba na le matswalo ao ge e le gabotse a hwilego—a tšhumilwe le go se kwe selo moo e bilego a se sa lemoša motho ka kotsi, a se sa belaelago goba go hlabja ke dihlong goba go ikwa a le molato ka bobe bjo bo dirilwego. Bontši bja batho lehono ba hlokomologa maikwelo a bona a molato ntle le bothata.

18, 19. (a) Go ikwa o le molato le go hlabja ke dihlong go ka ba le mohola ofe? (b) Re ka dira’ng ge e ba letswalo la rena le tšwela pele le re otlela dibe tša nakong e fetilego tšeo re ilego ra itsholela tšona?

18 Ke therešo gore go ikwa o le molato ke tsela yeo letswalo le re botšago ka yona gore re fošitše. Ge modiradibe a ikwa ka tsela e bjalo gomme a šušumeletšega go itshola, a ka lebalelwa le dibe tše dikgolokgolo. Ka mohlala, kgoši Dafida o ile a ba le molato o mogolo eupša o ile a lebalelwa ka baka la go itshola ga gagwe ka pelo ka moka. Go hloya ga gagwe tsela ya gagwe e  fošagetšego gotee le boikemišetšo bja gagwe bja go kwa melao ya Jehofa go tloga ka nako yeo go ya pele, go ile gwa dira gore a bone ka mahlo a gagwe gore Jehofa “o lokile e bile o ikemišeditše go lebalela.” (Psalme 51:1-19; 86:5) Lega go le bjalo, go thwe’ng ge e ba maikwelo a tseneletšego a go ba le molato le go hlabja ke dihlong a tšwela pele ka morago ga ge re itshotše e bile re lebaletšwe?

19 Ka dinako tše dingwe letswalo le ka re ahlola ka mo go feteletšego, la tlaiša modiradibe ka gore a ikwe a le molato nako e telele ka morago ga gore maikwelo a bjalo a se sa hlwa a phetha morero le ge e le ofe o holago. Maemong a bjalo, re ka swanelwa ke go kgonthišetša pelo ya rena yeo e ikahlolago gore Jehofa ke yo mogolo go feta maikwelo ka moka a batho. Re swanetše go dumela le go amogela lerato la gagwe le tebalelo ya gagwe, go fo swana le ge le rena re kgothaletša ba bangwe go dira bjalo. (Bala 1 Johane 3:19, 20) Ka lehlakoreng le lengwe, letswalo leo le hlwekišitšwego le tliša khutšo ya ka gare, boiketlo le lethabo le legolo leo le hwetšwago ka sewelo lefaseng le. Ba bantši bao ba kilego ba dira sebe se segolo ba ile ba thabela kimollo ye e kgolo gomme lehono ba kgona go ba le letswalo le lebotse ge ba dutše ba hlankela Jehofa Modimo.1 Bakorinthe 6:11.

20, 21. (a) Puku ye e hlametšwe go go thuša go dira’ng? (b) Ka ge re le Bakriste, re na le tokologo efe, eupša re swanetše go e diriša bjang?

20 Puku ye e hlamilwe ka tsela yeo e tla go thušago gore o hwetše lethabo le bjalo, o be le letswalo le lebotse mehleng ye ka moka ya bofelo ya mathata ya tshepedišo ya Sathane ya dilo. Go ba gona, e ka se kgone go akaretša melao ka moka ya Beibele le melao ya yona ya motheo yeo go nyakegago gore o naganišiše ka yona le go e diriša maemong ao a tšwelelago letšatši le letšatši. Go oketša moo, o se ke wa letela melao e bonolo le e lebanyago ditabeng tšeo di nyakago gore motho a itirele phetho a latela letswalo la gagwe. Morero wa puku ye ke go ruta le go phafoša letswalo la gago ka go ithuta kamoo o ka dirišago melao ya motheo ya Lentšu la Modimo bophelong bja gago bja letšatši le letšatši. Ka go fapana le Molao wa  Moshe, “molao wa Kriste” o kgothaletša bao ba o latelago gore ba phele kudu ka go latela matswalo le melao ya motheo go e na le melao e ngwadilwego. (Bagalatia 6:2) Ka go re’alo Jehofa o nea Bakriste tokologo e kgolo kudu. Lega go le bjalo, Lentšu la gagwe le re gopotša gore re se diriše tokologo yeo e le “selo sa go bipa go dirwa ga bobe.” (1 Petro 2:16) Go e na le moo, tokologo e bjalo e re nea sebaka se sebotse sa gore re bontšhe gore re rata Jehofa.

21 Ka go naganišiša ka thapelo tsela e kaonekaone yeo o ka phelago ka melao ya motheo ya Beibele gomme wa latela diphetho tšeo o tlago go di tšea, o tla ba o tšwetša pele mosepelo o bohlokwa woo o thomilego ge o be o tseba Jehofa ka lekga la pele. ‘Matla a gago a go hlatha’ a tla tlwaetšwa “ka go a diriša.” (Baheberu 5:14) Letswalo la gago leo le tlwaeditšwego ke Beibele le tla go hola letšatšing le lengwe le le lengwe la bophelo bja gago. Go swana le mpša e bogolago gare ga mpa ya bošego gomme ya re lemoša ka kotsi e ka tlago, letswalo la gago le tla go thuša go dira diphetho tšeo di thabišago Tatago wa legodimong. Ye ke tsela e kgonthišeditšwego ya gore o dule o le leratong la Modimo.

^ par. 5 Ka Mangwalong a Seheberu, lentšu “letswalo” ga le tšwelele ka go lebanya. Lega go le bjalo, go ile gwa dirišwa letswalo mehlaleng e swanago le wo. Ka kakaretšo lentšu “pelo” le šupa go motho wa ka gare. Maemong a swanago le a, go molaleng gore go bolelwa ka karolo e itšego ya motho wa ka gare—letswalo la gagwe. Ka Mangwalong a Bakriste a Segerika, lentšu la Segerika leo le fetoletšwego e le “letswalo” le tšwelela ka makga a 30.

^ par. 8 Beibele e bontšha gore go ba le letswalo le le sekilego ga se ka mehla e lego mo go lekanego. Ka mohlala, Paulo o itše: “Ga ke lemoge selo se sebe ka nna. Lega go le bjalo, ga ke hlatselwe ke lokile ka se, eupša yo a ntlhahlobago ke Jehofa.” (1 Bakorinthe 4:4) Gaešita le bao ba tlaišago Bakriste go etša ge Paulo le yena a dirile, ba ka dira seo ka letswalo le lebotse gobane ba nagana gore Modimo o amogela tsela yeo ba dirago dilo ka yona. Ke gabohlokwa gore letswalo la rena e be le sekilego mahlong a rena gomme e be le hlwekilego mahlong a Modimo.Ditiro 23:1; 2 Timotheo 1:3.

^ par. 10 Ke gabohlokwa go lemoga gore dingaka tše dintši di bolela gore go nwa ka mo go lekanego ga go tloge go kgonega go bao e lego makgoba a bjala; go batho ba bjalo, “go nwa ka mo go lekanego” go bolela gore ba se ke ba nwa le gatee.

Ithute ka mo go oketšegilego

Dira Diphetho tša Gago ka Bohlale

Re ka kgonthišetša bjang gore diphetho tša rena di dumelelana le thato Modimo? Ke’ng seo se ka re thušago gore re tšee kgato ge re dirile phetho?