Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Lapa la Gago le ka Thaba

 KAROLO 9

Rapelang Jehofa le le Lapa

Rapelang Jehofa le le Lapa

‘Rapelang Yo a dirilego legodimo le lefase.’—Kutollo 14:7

Ka ge o ithutile poroutšheng ye, Beibele e na le melao e mentši ya motheo yeo e ka thušago wena le lapa la gago. Jehofa o nyaka gore o thabe. O go holofetša gore ge o ka etiša pele borapedi bja gagwe, ‘dilo tše tše dingwe ka moka o tla di okeletšwa.’ (Mateo 6:33) Ruri Jehofa o nyaka gore o be mogwera wa gagwe. Diriša sebaka se sengwe le se sengwe go hlagolela segwera sa gago le Modimo. Ye ke tokelo e kgolo kudu yeo motho a ka bago le yona.—Mateo 22:37, 38.

 1 MATLAFATŠA TSWALANO YA GAGO LE JEHOFA

SEO BEIBELE E SE BOLELAGO: “‘Ke tla ba tatago lena, lena le tla ba barwa le barwedi ba ka,’ go bolela Jehofa.” (2 Bakorinthe 6:18) Modimo o nyaka gore o be mogwera wa gagwe wa kgauswi. Tsela e nngwe ya go dira se, ke ka go rapela. Jehofa o go laletša gore ‘o rapele ka mehla.’ (1 Bathesalonika 5:17) Jehofa o fagahletše go go kwa o ntšha sa mafahleng. (Bafilipi 4:6) Ge o rapela le ba lapa la gago, ba tla bona kamoo Modimo e lego wa kgonthe go wena.

Ga se wa swanela go bolela le Modimo feela, eupša o swanetše go mo theetša. O ka dira se ka go ithuta Lentšu la gagwe le dikgatišo tšeo di theilwego Beibeleng. (Psalme 1:1, 2) Naganišiša ka seo o ithutago sona. (Psalme 77:11, 12) Go theetša Modimo gape go akaretša go ya dibokeng tša Bokriste ka mehla.—Psalme 122:1-4.

Go bolela le ba bangwe ka Jehofa ke tsela e nngwe e bohlokwa ya go matlafatša tswalano ya gago le yena. Ge o tšwela pele o dira se, o tla ikwa o batamela go yena le go feta.—Mateo 28:19, 20.

SEO SE KA DIRWAGO:

  • Beelang ka thoko nako ya go bala Beibele le go rapela letšatši le lengwe le le lengwe

  • Le le lapa, dirang gore mediro ya moya e tle pele ga boithabišo le boitapološo

2 THABELANG BORAPEDI BJA LENA BJA LAPA

SEO BEIBELE E SE BOLELAGO: “Batamelang Modimo gomme o tla le batamela.” (Jakobo 4:8) Le swanetše go dira lenaneo la borapedi bja lapa gomme le le latele ka mehla. (Genesi 18:19) Eupša go nyakega mo gontši. Modimo o swanetše go ba karolo ya bophelo bja lena bja letšatši le letšatši. Matlafatša tswalano ya lapa la gago le Modimo ka go bolela ka yena “ge o dutše ntlong ya gago, ge o sepela tseleng, ge o robala le ge o tsoga.” (Doiteronomio 6:6, 7) Ipeele pakane ya gore o tla swana le Joshua, yo a itšego: “Ge e le nna le ba lapa la ka re tla hlankela Jehofa.”—Joshua 24:15.

SEO SE KA DIRWAGO:

  • Eba le lenaneo la ka mehla la go dira dilo tšeo di kgomago setho se sengwe le se sengwe sa lapa la gago

Ithute ka mo go oketšegilego

Borapedi bja Lapa ke Eng?

Ithute kamoo tokišetšo ye e ka go thušago ka gona go batamela go Modimo le go matlafatša lapa la gago.

Hlagolelang Bomoya Bjalo ka Banyalani

Go beela nako ka thoko bakeng sa go ithuta Beibele gotee le le lapa go ka kaonefatša lenyalo la lena.

Kamoo o ka Dirago Bophelo bja Lapa la Gago Gore bo Thabiše

Lerato leo Jesu a le bontšhitšego ke mohlala wo o swanetšego go ekišwa ke banna bao ba nyetšego, basadi bao ba nyetšwego, batswadi le bana. Rena re ithuta eng go yena?