Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Lapa la Gago le ka Thaba

 KAROLO 1

Kgopela Thušo ya Modimo Gore o be le Lenyalo le le Thabilego

Kgopela Thušo ya Modimo Gore o be le Lenyalo le le Thabilego

“Yo a ba bopilego mathomong o ba dirile e le yo motona le yo motshadi.”—Mateo 19:4

Jehofa * Modimo ke mothomi wa lenyalo la pele. Beibele e re botša gore o bopile mosadi wa pele gomme “a mo tliša go monna.” Adama o be a thabile kudu moo a ilego a re: “Mafelelong yo ke yena lerapo la marapo a ka le nama ya nama ya ka.” (Genesi 2:22, 23) Jehofa o sa dutše a nyaka gore bao ba lego lenyalong ba thabe.

Ge o tsena lenyalong, o ka nagana gore dilo di tla dula di sepela gabotse. Eupša, gaešita le monna goba mosadi bao ba tlogago ba ratana ba tla ba le mathata a itšego. (1 Bakorinthe 7:28) Poroutšheng ye, o tla hwetša melao ya motheo ya Beibele yeo ge e ba e dirišwa, e ka dirago gore lenyalo le lapa la gago e be le le thabilego.—Psalme 19:8-11.

 1 AMOGELA KAROLO YEO JEHOFA A GO FILEGO YONA

SEO BEIBELE E SE BOLELAGO: Monna ke hlogo ya lapa.—Baefeso 5:23.

Ge e ba o le monna, Jehofa o letetše gore o sware mosadi wa gago gabotse. (1 Petro 3:7) Jehofa o mo dirile gore e be molekane wa gago, gomme o nyaka gore o mo sware ka seriti le lerato. (Genesi 2:18) O swanetše go rata mosadi wa gago go fihla bokgoleng bja gore o bee dikganyogo tša gagwe pele ga tša gago.—Baefeso 5:25-29.

Ge e ba o le mosadi, Jehofa o letetše gore o hlomphe monna wa gago ka mo go tseneletšego gomme o mo thuše go phetha karolo ya gagwe. (1 Bakorinthe 11:3; Baefeso 5:33) Thekga diphetho tša gagwe gomme o dirišane le yena ka pelo ka moka. (Bakolose 3:18) Ge o dira bjalo, o tla ba yo a kgahlišago mahlong a monna wa gago le a Jehofa.—1 Petro 3:1-6.

SEO SE KA DIRWAGO:

  • Botšiša molekane wa gago seo o ka se dirago gore o be mosadi goba monna yo kaone. Theetša ka kelohloko, gomme o dire seo o ka se kgonago gore o kaonefatše

  • O se fele pelo. Go tla le tšea nako gore le ithute go thabišana

2 TSHWENYEGA E LE RURI KA MAIKWELO A MOLEKANE WA GAGO

SEO BEIBELE E SE BOLELAGO: O swanetše go šetša dikgahlego tša molekane wa gago wa lenyalo. (Bafilipi 2:3, 4) Tšeela molekane wa gago godimo, o sa lebale gore Jehofa o nyaka gore bahlanka ba gagwe ba be “bonolo go bohle.” (2 Timotheo 2:24) “Go na le yo a bolelago a sa naganišiše bjalo ka ge eka o hlaba ka tšhoša, eupša leleme la ba bohlale le a fodiša.” Ka gona kgetha mantšu a gago gabotse. (Diema 12:18) Moya wa Jehofa o tla go thuša gore o bolele ka botho le ka lerato.—Bagalatia 5:22, 23; Bakolose 4:6.

SEO SE KA DIRWAGO:

  • Rapelela thušo ya gore o dule o thekgile ditho gomme o be le monagano o bulegilego ge o boledišana le molekane wa gago ka dilo tše bohlokwa

  • Naganišiša ka kelohloko ka seo o tlago go se bolela le kamoo o tlago go se bolela ka gona

 3 EBANG NGATANA E TEE

SEO BEIBELE E SE BOLELAGO: Ge o tsena lenyalong, o ba “nama e tee” le molekane wa gago. (Mateo 19:5) Eupša le sa dutše le le batho ba babedi gomme le ka fapana ka dikgopolo. Ka gona le swanetše go ithuta go ba batee kgopolong le maikwelong. (Bafilipi 2:2) Botee bo a nyakega ge go dirwa diphetho. Beibele e re: “Maano a tiišwa ka dikeletšo.” (Diema 20:18) Dumelelang melao ya motheo ya Beibele go le hlahla ge le dira diphetho tše bohlokwa.—Diema 8:32, 33.

SEO SE KA DIRWAGO:

  • O se botše molekane wa gago taba e itšego le dikgopolo tša gago feela, eupša o mmotše le kamoo o ikwago ka gona

  • Boledišana le molekane wa gago pele o itlama ka selo se itšego

^ ser. 4 Jehofa ke leina la Modimo bjalo ka ge le utolotšwe ka Beibeleng.

Ithute ka mo go oketšegilego

Go Atlega Ngwageng wa Mathomo wa Lenyalo

Na o sa tšwa go tsena lenyalong? Beibele e ka go thuša go matlafatša lenyalo la gago.

Banna—Dirang Gore Malapa a Lena a be le Tšhireletšego

Lapa le ka ema gabotse ditšheleteng, eupša ya ba leo le sa šireletšegago dilong tše bohlokwa kudu.

Na Beibele e ka Nthuša go ba le Lapa Leo le Thabilego?

Keletšo e bohlale yeo e tšwago ka Beibeleng e šetše e thušitše banna le basadi ba dimilione go ba le lethabo ka gae.