Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Lapa la Gago le ka Thaba

 KAROLO 6

Kamoo Bana ba Fetošago Lenyalo

Kamoo Bana ba Fetošago Lenyalo

“Bana ke bohwa bjo bo tšwago go Jehofa.”—Psalme 127:3

Go belegwa ga ngwana e ka ba selo se se thabišago le se se nyamišago go banyalani. Bjalo ka batswadi ba bafsa, le tla makatšwa ke go lemoga gore le tlo diriša nako ya lena e ntši le matla go hlokomela ngwana wa lena. Go se robale ka mo go lekanego le go fetoga ga maikwelo di ka baka kgateletšego lenyalong la lena. Bobedi bja lena le tla swanelwa ke go dira diphetogo e le gore le hlokomele ngwana wa lena le go tiiša lenyalo la lena. Keletšo ya Beibele e ka le thuša bjang gore le lebeletšane le ditlhohlo tše?

 1 KWEŠIŠANG KAMOO NGWANA A FETOŠAGO BOPHELO BJA LENA

SEO BEIBELE E SE BOLELAGO: “Lerato ga le fele pelo e bile le botho.” E bile lerato “ga le nyake tša go ikhola, ga le rumolege.” (1 Bakorinthe 13:4, 5) Ka ge o le mma yo mofsa, ke ga tlhago gore o lebiše tlhokomelo ngwaneng wa gago. Lega go le bjalo, monna wa gago a ka thoma go ikwa a hlokomologilwe, ka gona o se lebale gore le yena o a go hloka. Ka go se fele pelo le ka botho, o ka mo thuša gore le yena a ipone a le bohlokwa gomme a na le karolo go godišeng ngwana wa lena.

“Lena banna, tšwelang pele le dula le bona . . . go ya ka tsebo.” (1 Petro 3:7) Gopola gore mosadi wa gago o tla diriša matla a gagwe a mantši ngwaneng wa lena. O na le boikarabelo bjo bofsa gomme bo ka mo gateletša, bja mo fetša matla goba go mmakela kgateletšego ya monagano. Ka dinako tše dingwe, a ka ba a go galefela, eupša leka go thekga ditho, ka gobane “yo a diegago go galefa o phala mogale.” (Diema 16:32) Bontšha temogo, gomme o mo nee thekgo yeo a e hlokago.—Diema 14:29.

SEO SE KA DIRWAGO:

  • Botate: Thuša mosadi wa gago go hlokomela ngwana, gaešita le bošego. Lekanyetša nako yeo o e dirišago medirong e mengwe e le gore o fetše nako e oketšegilego le mosadi wa gago le ngwana

  • Bomma: Amogela thušo yeo monna wa gago a go neago yona ya go hlokomela ngwana. Ge e ba a sa dire dilo gabotse, o se mo sole, eupša ka botho mmontšhe gore go dirwa bjang

 2 MATLAFATŠANG TSWALANO YA LENA

SEO BEIBELE E SE BOLELAGO: “E tla ba nama e tee.” (Genesi 2:24) Le ge le na le setho se sefsa lapeng la lena, gopola gore wena le molekane wa gago le sa le “nama e tee.” Dirang sohle seo le ka se kgonago go matlafatša tswalano ya lena.

Basadi, tšeelang godimo thušo le thekgo ya banna ba lena. Go bontšha ga lena tebogo go ka “fodiša.” (Diema 12:18) Banna, botšang basadi ba lena kamoo le ba ratago le go ba tšea e le ba bohlokwa ka gona. Mo rete mabapi le kamoo a hlokomelago lapa ka gona.—Diema 31:10, 28.

“Anke yo mongwe le yo mongwe a tšwele pele a tsoma seo se holago motho yo mongwe, e sego seo se holago yena a nnoši.” (1 Bakorinthe 10:24) Direla molekane wa gago se sekaonekaone ka dinako tšohle. Ka ge le le banyalani, ebang le nako ya go bolela, go retana le go theetšana. Le se ke la timana ge go tliwa tabeng ya thobalano. Ela hloko dinyakwa tša molekane wa gago. Beibele e re: “Le se ke la e timana, ge e se ka go dumelelana ka nako e beilwego.” (1 Bakorinthe 7:3-5) Ka gona boledišanang ka taba ye ka bolokologi. Tswalano ya lena e tla matlafala ge e ba le sa felelane pelo e bile le kwešišana.

SEO SE KA DIRWAGO:

  • O se ke wa lebala go ipha nako ya gore le be ba babedi feela

  • Dira dilo tše dinyenyane tšeo di dirago gore molekane wa gago a ikwe a ratwa, tše bjalo ka go mo romela molaetša goba go mo nea mpho e nyenyane

 3 GO TLWAETŠA NGWANA WA GAGO

SEO BEIBELE E SE BOLELAGO: “Go tloga boseeng o tsebile mangwalo a makgethwa, ao a kgonago go go hlalefišetša phologo.” (2 Timotheo 3:15) Rulaganyang seo le tlago go se dira go ruta ngwana wa lena. Gaešita le ge a sešo a belegwa, o na le bokgoni bjo bo makatšago bja go ithuta. Le ge a sa le ka popelong, ngwana wa gago a ka kgona go tseba lentšu la gago le go arabela maikwelong a gago. Mmalele le ge e sa le lesea. Le ge a ka se kwešiše seo o mmalelago sona, se se tla mo thuša gore a thabele go bala ge a godile.

Ngwana wa gago a ka kgona go go theetša ge o bolela ka Modimo, le ge e sa le yo monyenyane. Dira gore a go kwe ge o rapela Jehofa. (Doiteronomio 11:19) Gaešita le ge le bapala, bolela ka dilo tšeo Modimo a di dirilego. (Psalme 78:3, 4) Ge ngwana wa gago a dutše a gola, o tla bona kamoo o ratago Jehofa gomme le yena o tla ithuta go mo rata.

SEO SE KA DIRWAGO:

  • Ka go lebanya rapelela bohlale bja go ruta ngwana wa gago

  • Bušeletša mantšu le dikgopolo tše bohlokwa gore ngwana wa gago a thome go ithuta e sa le yo monyenyane

Ithute ka mo go oketšegilego

Go Godiša Bana ba Botho Lefaseng le Nago le Moya wa Nna Pele

Ela hloko dikarolo tše tharo tšeo go tšona o ka thušago bana ba gago go phema go ba le moya wa nna pele.

Kamoo o ka Bago Tate yo Botse

Ela hloko melao ya motheo ya Beibele e mehlano yeo e ka go thušago go ba tate yo lerato le yo a nago le tekatekano.