Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Lapa la Gago le ka Thaba

 KAROLO 8

Ge o Welwa ke Masetlapelo

Ge o Welwa ke Masetlapelo

“Le thabile kudu . . . , le ge ka nakwana le ka ba le gateletšwe ke meleko e fapafapanego.”—1 Petro 1:6

Le ge o leka ka thata gore o be le lenyalo le lapa leo le thabilego, go ka direga dilo tšeo di sa letelwago tšeo di ka dirago gore o thatafalelwe ke go thaba. (Mmoledi 9:11) Ka lerato Modimo o re nea thušo ge re lebana le mathata. Ge e ba o diriša melao ye ya motheo ya Mangwalo, wena le lapa la gago le ka kgona go lebeletšana le maemo a thata kudu.

 1 ITHEKGE KA JEHOFA

SEO BEIBELE E SE BOLELAGO: ‘Lahlela dipelaelo tša gago ka moka go yena, gobane o a go hlokomela.’ (1 Petro 5:7) Dula o gopola gore Modimo ga se yena a ikarabelago ka diteko tšeo di go welago. (Jakobo 1:13) Ge o dutše o batamela kgauswi le yena, o tla go thuša ka tsela e di phalago tšohle. (Jesaya 41:10) ‘Tšhollela pelo ya gago o le pele ga gagwe.’—Psalme 62:8.

Le gona o tla homotšega ge o bala le go ithuta Beibele ya gago ka mehla. Ka go re’alo, o tla ithuta kamoo Jehofa “a re homotšago ditlaišegong tša rena tšohle.” (2 Bakorinthe 1:3, 4; Baroma 15:4) O holofetša go go nea “khutšo ya Modimo yeo e fetago kwešišo yohle.”—Bafilipi 4:6, 7, 13.

SEO SE KA DIRWAGO:

  • Rapelela thušo ya Jehofa gore o dule o theošitše maswafo le go nagana gabotse

  • Hlahloba dikgetho tša gago ka moka gomme o kgethe yeo e ka go holago

2 HLOKOMELA WENA LE LAPA LA GAGO

SEO BEIBELE E SE BOLELAGO: “Pelo ya yo a nago le tlhaologanyo e hwetša tsebo, gomme tsebe ya ba bohlale e tsoma tsebo.” (Diema 18:15) Hwetša dintlha ka botlalo. Hwetša seo setho se sengwe le se sengwe sa lapa la gago se se hlokago. Boledišana le bona. Ba theetše.—Diema 20:5.

Go thwe’ng ge e ba motho yo o mo ratago a ehwa? O se ke wa tšhaba go ntšha maikwelo a gago. Gopola gore gaešita le Jesu o ile “a ntšha megokgo.” (Johane 11:35; Mmoledi 3:4) Go khutša le go robala ka mo go lekanego go bohlokwa. (Mmoledi 4:6) Se se tla dira gore go be bonolo go lebeletšana le boemo bjo bo gateletšago.

SEO SE KA DIRWAGO:

  • Pele o welwa ke masetlapelo, itlwaetše go boledišana le ba lapa la gago. Ge go e ba le mathata, ba tla ikwa ba lokologile go boledišana le wena

  • Boledišana le ba bangwe bao ba ka bago ba ile ba lebana le boemo bjo bo swanago

 3 HWETŠA THUŠO YEO O E HLOKAGO

SEO E BEIBELE E SE BOLELAGO: “Mogwera wa kgonthe o dula a na le lerato ka dinako tšohle, e bile ke ngwanabo motho yo o ka ithekgago ka yena mohlang wa tlalelo.” (Diema 17:17) Bagwera ba gago ba ka nyaka go go thuša, eupša ba ka no ba ba sa tsebe gore ba dire eng. O se ke wa dikadika go ba botša seo o se hlokago. (Diema 12:25) Gape, nyaka thušo ya moya go bao ba kwešišago Beibele. Tlhahlo yeo ba ka go neago yona go tšwa ka Beibeleng e tla go thuša.—Jakobo 5:14.

O tla hwetša thekgo yeo o e hlokago ge ka mehla o phela le batho bao ba nago le tumelo e tiilego go Modimo le go bota dikholofetšo tša gagwe. Le gona o tla homotšwa kudu ke go thuša bao ba nyakago kgothatšo. Boledišana le bona ka tumelo yeo o nago le yona go Jehofa le dikholofetšo tša gagwe. Dula o swaregile ka go nea ba bangwe thušo yeo ba e hlokago, gomme o se ke wa ipea kgole le bao ba go ratago le bao ba tshwenyegilego ka wena.—Diema 18:1; 1 Bakorinthe 15:58.

SEO SE KA DIRWAGO:

  • Boledišana le mogwera wa kgauswi gomme o mo dumelele go go thuša

  • Bolela seo o tlogago o se hloka

Ithute ka mo go oketšegilego

PHAFOGA!

Ge Ngwana wa Gago a Botšiša ka Lehu

Megato e mene e ka go thuša go araba dipotšišo tša bona gomme wa ba bontšha kamoo ba ka lebeletšanago le boemo bja ge motho yo ba mo ratago hwile.

DITABA TŠE DIBOTSE TŠE DI TŠWAGO GO MODIMO!

Ke ka Baka la Eng Modimo a Dumelela Bobe le Tlaišego?

Bobe bo thomile bjang, gona ke ka baka la eng Modimo a ile a dumelela gore bo tšwele pele? Na tlaišego e tla ka ya fela?

PHAFOGA!

Ge o Welwa ke Masetlapelo—Go Hwelwa ke Motho yo o mo Ratago

Ditho tše hlano tša lapa labo Ronaldo di hwile kotsing ya koloi nywaga e 16 e fetilego. Le ge a sa ikwa a lahlegetšwe, o hweditše khutšo ya ka gare.