Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Na o ka Rata go Tseba Therešo?

Na o ka Rata go Tseba Therešo?

Therešo mabapi le’ng? Mabapi le tše dingwe tša dipotšišo tše bohlokwa kudu tšeo batho ba kilego ba di botšiša. Mohlomongwe o kile wa ipotšiša dipotšišo tše bjalo ka tše:

  • Na Modimo ruri o na le taba le rena?
  • Na ntwa le tlaišego di tla ka tša fela?
  • Go direga’ng go rena ge re e-hwa?
  • Na go na le kholofelo le ge e le efe ka bahu?
  • Nka rapela bjang le go kwewa ke Modimo?
  • Nka hwetša lethabo bjang bophelong?

Ke kae moo o bego o ka tsoma dikarabo tša dipotšišo tše? Ge o ka ya makgobapukung goba mabenkeleng a go rekiša dipuku, o ka hwetša dipuku tše dikete tšeo di bolelago gore di nea dikarabo. Lega go le bjalo, dipuku tše gantši di a ganetšana. Tše dingwe di bonagala di kwagala ka nakwana eupša ka morago di šiiwa ke nako gomme tša ngwalwa lefsa goba tša tšeelwa legato ke tše dingwe.

Lega go le bjalo, go na le puku e tee yeo e huperego dikarabo tše di kgotsofatšago. Ke puku yeo e huperego therešo. Jesu Kriste o boditše Modimo ka thapelo gore: “Lentšu la gago ke therešo.” (Johane 17:17) Lehono re tseba Lentšu leo e le Beibele e Kgethwa. Matlakaleng a latelago, o tla hwetša dikarabo tše di kwagalago le tše di rerešago tšeo di theilwego Beibeleng tša dipotšišo tše di lego ka mo godimo.

Na Modimo Ruri o na le Taba le Rena?

Monna yo a dikologilwego ke lešaba la batho

LEBAKA LEO KA LONA GO ROTOGAGO POTŠIŠO YE: Re phela lefaseng le le tletšego bošoro le go hloka toka. Madumedi a mantši a ruta gore tlaišego yeo e re welago ke thato ya Modimo.

SEO BEIBELE E SE RUTAGO: Modimo ga se yena a bakago bokgopo. Jobo 34:10 e re: “Modimo ó kxolê le bokxôpô; Yo-matla-ohle ó kxolê le xo foša.” Modimo o na le morero o lerato bakeng sa batho. Ke ka baka leo Jesu a re rutilego go rapela ka gore: “Tatago rena wa magodimong, … Mmušo wa gago a o tle. Thato ya gago a e direge le mo lefaseng bjalo ka ge e direga legodimong.” (Mateo 6:9, 10) Modimo o tshwenyega kudu ka rena moo a ilego a ba a dira mediro e megolo bakeng sa go kgonthišetša gore morero wa gagwe o a phethagala.—Johane 3:16.

Bona le Genesi 1:26-28; Jakobo 1:13; le 1 Petro 5:6, 7.

Na Ntwa le Tlaišego di tla ka tša Fela?

Mašole

LEBAKA LEO KA LONA GO ROTOGAGO POTŠIŠO YE: Batho ba bantši kudu ba tšwela pele ba bolawa ke dintwa. Ka moka ga rena re kgomilwe ke tlaišego ya batho.

SEO BEIBELE E SE RUTAGO: Modimo o bolela e sa le pele ka nako yeo ka yona a tlago go dira gore go be le khutšo lefaseng ka bophara. Mmušong wa gagwe, e lego pušo ya legodimong, batho ba “tlo lesa xo ithuta xo hlabana.” Ge e le gabotse, ba tla “tšea dithšoša ba rula mexomá ka tšôna.” (Jesaya 2:4) Modimo o tla fediša go hloka toka ka moka le tlaišego. Beibele e nea kholofetšo e rego: “[Modimo] o tla phumola megokgo ka moka mahlong a bona, gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele [go akaretša le go hloka toka le tlaišego tša lehono] di fetile.”—Kutollo 21:3, 4.

Bona le Psalme 37:10, 11; 46:9; le Mika 4:1-4.

Go Direga’ng go Rena ge re E-hwa?

Mabitla

LEBAKA LEO KA LONA GO ROTOGAGO POTŠIŠO YE: Madumedi a mantši a lefase le a ruta gore ka gare ga motho go na le selo seo se tšwelago pele se phela ka morago ga lehu. Ba bangwe ba dumela gore bahu ba ka gobatša bao ba phelago goba gore Modimo o otla bakgopo ka go ba ahlolela tlaišo ya sa ruri mollong wa dihele.

SEO BEIBELE E SE RUTAGO: Ge motho a e-hwa, o kgaotša go ba gona. Mmoledi 9:5 e re: “Xo bahu xa xo se se tsebyaxo.” Ka ge bahu ba sa tsebe selo, ba sa kwe selo goba go diragalelwa ke selo, ba ka se ke ba gobatša—goba go thuša bao ba phelago.—Psalme 146:3, 4.

Bona le Genesi 3:19; le Mmoledi 9:6, 10.

Na go na le Kholofelo le ge e le Efe ka Bahu?

Ngwana yo a llelago moratiwa yo a hwilego

LEBAKA LEO KA LONA GO ROTOGAGO POTŠIŠO YE: Re nyaka go phela, gomme re nyaka go thabela bophelo re e-na le bao re ba ratago. E fo ba e le ga tlhago gore re fagahlele go bona gape baratiwa ba rena ba hwilego.

SEO BEIBELE E SE RUTAGO: Batho ba bantši bao ba hwilego ba tla tsošwa. Jesu o holofeditše gore “bao ba lego mabitleng a kgopotšo ba [tla] … tšwa.” (Johane 5:28, 29) Ka go dumelelana le morero wa Modimo wa mathomong, batho bao ba tsošitšwego ba tla ba le sebaka sa go phela lefaseng la paradeise. (Luka 23:43) Bokamoso bjo bjo bo holofeditšwego bo akaretša boemo bjo bo phethagetšego bja tša maphelo le bophelo bjo bo sa felego bakeng sa batho bao ba kwago. Beibele e re: “Baloki e ba beng ba naxa, ba dula mo xo yôna ka mehla le ka mehla.”—Psalme 37:29.

Bona le Jobo 14:14, 15; Luka 7:11-17; le Ditiro 24:15.

Nka Rapela Bjang le go Kwewa ke Modimo?

Monna yo a rapelago

LEBAKA LEO KA LONA GO ROTOGAGO POTŠIŠO YE: Mo e ka bago batho ba madumedi ka moka ba a rapela. Lega go le bjalo, ba bantši ba nagana gore dithapelo tša bona ga di arabje.

SEO BEIBELE E SE RUTAGO: Jesu o re rutile go phema go touta ge re rapela. O itše: “Ge o rapela, o se ke wa boa-boetša dilo tše di swanago.” (Mateo 6:7) Ge e ba re nyaka gore Modimo a theetše dithapelo tša rena, re swanetše go rapela ka tsela yeo a e amogelago. E le gore re dire bjalo, re swanetše go ithuta seo thato ya Modimo e lego sona gomme re rapele ka go dumelelana le yona. Johane wa Pele 5:14 e hlalosa gore: “Go sa šetšwe seo re se kgopelago go ya ka thato ya [Modimo], o a re kwa.”

Bona le Psalme 65:2; Johane 14:6, 14; le 1 Johane 3:22.

Nka Hwetša Lethabo Bjang Bophelong?

Mosadi yo a tsomago lethabo ka go bala Beibele

LEBAKA LEO KA LONA GO ROTOGAGO POTŠIŠO YE: Batho ba bantši ba dumela gore tšhelete, botumo goba bobotse di tla dira gore ba thabe. Ka baka leo, ba phegelela dilo tše bjalo—eupša ga ba hwetše lethabo.

SEO BEIBELE E SE RUTAGO: Jesu o boletše ka selo seo se tlišago lethabo ge a be a re: “Go thaba bao ba lemogago go nyaka ga bona dilo tša moya.” (Mateo 5:3) Lethabo la kgonthe le ka hwetšwa feela ge re gata megato ya go kgotsofatša senyakwa sa rena se segolo—tlala ya rena ya go nyaka go tseba therešo ya moya mabapi le Modimo le morero wa gagwe bakeng sa rena. Therešo yeo e hwetšwa ka Beibeleng. Go tseba therešo yeo go ka re thuša go lemoga seo se tlogago se le bohlokwa le seo se sego bjalo. Go dumelela therešo ya Beibele e hlahla diphetho le ditiro tša rena go lebiša bophelong bjo bo nago le morero kudu.—Luka 11:28.

Bona le Diema 3:5, 6, 13-18; le 1 Timotheo 6:9, 10.

Ye e be e fo ba tlhahlobo e kopana ya dikarabo tše di theilwego Beibeleng tša dipotšišo tše tshela. Na o ka rata go tseba go feta moo? Ge e ba o le gare ga “bao ba lemogago go nyaka ga bona dilo tša moya,” ga go pelaelo gore o ka rata go dira bjalo. O ka ipotšiša dipotšišo tše dingwe, tše bjalo ka tše rego: ‘Ge e ba Modimo a tshwenyega ka rena, ke ka baka la’ng a dumeletše bokgopo bjo bokaakaa le tlaišego gore di be gona go theoša le histori? Nka kaonefatša bjang boemo bja bophelo bja lapa la-ka?’ Beibele e nea dikarabo tše tletšego le tše di kgotsofatšago tša dipotšišo tše le tše dingwe tše dintši.

Lega go le bjalo, ba bantši lehono ba dika-dika go hlahloba Beibele. Ba e bona e le puku e kgolo yeo ka dinako tše dingwe go lego thata go e kwešiša. Na o ka rata go thušwa go hwetša dikarabo ka Beibeleng? Dihlatse tša Jehofa di na le didirišwa tše pedi tšeo di ka go thušago.

Sa pele ke puku ya Ke Eng Seo ge e le Gabotse Beibele e se Rutago? yeo e hlametšwego go thuša batho bao ba dulago ba swaregile go hlahloba dikarabo tše di kwagalago tše di theilwego Beibeleng tša dipotšišo tše bohlokwa. Sedirišwa sa bobedi ke lenaneo leo le sa lefelelwego la thuto ya legae ya Beibele. Ka ntle le tefo, yo mongwe wa baagišani ba gago yo a nago le bokgoni bja go ruta Beibele a ka go etela legaeng la gago goba lefelong le lengwe le le swanetšego gomme a fetša nako e kopana beke e nngwe le e nngwe a boledišana le wena ka Beibele. Batho ba dimilione lefaseng ka bophara ba thušitšwe ke lenaneo le. Ba bantši ba bona ba fihleletše phetho ye: “Ke hweditše therešo!”

Ga go na lehumo le legolo go feta le leo le ka hwetšwago. Therešo ya Beibele e re lokolla ditumela-khweleng, kgakanegong le poifong e tšhošago. E re nea kholofelo, morero le lethabo. Jesu o itše: “Le tla tseba therešo, gomme therešo e tla le lokolla.”—Johane 8:32.

1. Monna yo a ithutago seo Beibele e se rutago; 2. Mosadi yo a ithutago seo Beibele e se rutago

Ithute ka mo go oketšegilego

Ke ka Baka la Eng o Swanetše go Ithuta Beibele?

Beibele e nea dikarabo tša dipotšišo tša bohlokwa go batho ba dimillione lefaseng ka bophara. Na o ka rata go ba yo mongwe wa bona?

Na Modimo e fo ba Matla a Itšego ao e Sego Motho?

Beibele e re Modimo o bopile dilo ka moka a diriša matla a magolo, eupša na o a tseba gore re gona?

Go Direga’ng ge o Ehwa?

Na bahu ba tseba seo se diregago?

Tsogo ya Bahu ke Eng?

O ka makatšwa ke go tseba gore ke bomang bao ba tlago go tsošwa.

Ke ka Baka La’ng ke Rapela? Na Modimo o tla Nkaraba?

Ge o rapela, go ithekgile ka wena gore Modimo a go arabe.