Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Ditaba tše Dibotse tše di Tšwago go Modimo!

 Thuto 2

Modimo ke Mang?

Modimo ke Mang?

1. Ke ka baka la eng re swanetše go rapela Modimo?

Modimo wa therešo ke Mmopi wa dilo tšohle. Ga a na mathomo gomme a ka se be le mafelelo. (Psalme 90:2) Ke Mothopo wa ditaba tše dibotse tšeo di hwetšwago ka Beibeleng. (1 Timotheo 1:11) Ka ge Modimo a re neile bophelo, re swanetše go rapela yena feela.Bala Kutollo 4:11.

2. Modimo o bjang?

Ga go na motho yo a kilego a bona Modimo ka gobane ke Moya, e lego seo se bolelago gore ke mohuta wa bophelo wo o phagametšego wa diphedi ka moka tše di bonagalago tšeo di phelago lefaseng. (Johane 1:18; 4:24) Lega go le bjalo, re ka lemoga semelo sa Modimo dilong tšeo a di bopilego. Ka mohlala, mehutahuta ya dienywa le matšoba di re bontšha lerato la Modimo le bohlale bja gagwe. Bogolo bja legohle bo re bontšha matla a gagwe.Bala Baroma 1:20.

Ka Beibeleng re ka ba ra ithuta go gontši ka semelo sa Modimo. Ka mohlala, e re botša seo Modimo a se ratago le seo a sa se ratego, kamoo a swarago batho le kamoo a arabelago ka gona maemong a fapafapanego.Bala Psalme 103:7-10.

3. Na Modimo o na le leina?

Jesu o itše: “Tatago rena wa magodimong, leina la gago a le kgethagatšwe.” (Mateo 6:9) Gaešita le ge Modimo a ena le direto tše dintši, o na le leina letee feela. Lelemeng le lengwe le le lengwe, le bitšwa ka mo go fapanego. Gantši ka Sepedi re re “Jehofa.”Bala Psalme 83:18.

Leina la Modimo le ntšhitšwe ka Dibeibeleng tše dintši gomme sebakeng sa lona gwa ngwalwa direto Morena goba Modimo. Eupša ge Beibele e be e ngwalwa, leina la Modimo le be le tšwelela go yona ka makga a e ka bago a 7 000. Jesu o ile a  dira gore leina la Modimo le tsebje ka go le diriša ge a be a ruta batho Lentšu la Modimo.Bala Johane 17:26.

Go swana le tate yo lerato, Modimo o dira dilo bakeng sa go hola rena

4. Na Jehofa o na le taba le rena?

Na go ata ga tlaišego go bolela gore Modimo ga a na taba le rena? Batho ba bangwe ba bolela gore Modimo o dira gore re tlaišege e le gore a re leke, eupša seo ga se therešo.Bala Jakobo 1:13.

Modimo o neile batho seriti ka go ba nea tokologo ya boikgethelo. Na ga re tšeele godimo tokologo ye ya rena ya go ikgethela go hlankela Modimo? (Joshua 24:15) Eupša, tlaišego e a oketšega ka gobane batho ba bantši ba kgetha go dira bobe bathong ba bangwe. Jehofa o kwa bohloko ge a bona ditiro tše bjalo tša go hloka toka.Bala Genesi 6:5, 6.

Jehofa ke Modimo yo a nago le taba le rena. O nyaka gore re thabele bophelo. Kgauswinyane o tla fediša tlaišego le bao ba e bakago. Re sa dutše re letetše seo, o na le lebaka le le kwagalago la go dumelela tlaišego ka nakwana. Go Thuto 8, re tla ithuta mabapi le lebaka leo.Bala 2 Petro 2:9; 3:7, 13.

5. Re ka batamela kgauswi le Modimo bjang?

Jehofa o re laletša gore re mmatamele ka go bolela le yena ka thapelo. O kgahlegela yo mongwe le yo mongwe wa rena. (Psalme 65:2; 145:18) O ikemišeditše go lebalela. O lemoga maiteko a rena a go mo kgahliša, gaešita le ge ka dinako tše dingwe re palelwa. Ka gona, ruri re ka ba le tswalano ya kgauswi le Modimo, go sa šetšwe go se phethagale ga rena.Bala Psalme 103:12-14; Jakobo 4:8.

Ka ge Jehofa a re neile bophelo, re swanetše go mo rata go feta motho le ge e le ofe. (Mareka 12:30) Ge o dutše o bontšha gore o rata Modimo ka go ithuta ka mo go oketšegilego ka yena le go dira seo a se nyakago, o tla batamela kgauswi kudu le yena.Bala 1 Timotheo 2:4; 1 Johane 5:3.

Ithute ka mo go oketšegilego

Na Modimo o na le Leina?

Modimo o na le direto tše dintši tše swanago le Ramatlaohle, Mmopi gotee le Morena. Eupša leina la gagwe le dirišwa ka makga a fetago a 7 000 ka Beibeleng.