Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Ditaba tše Dibotse tše di Tšwago go Modimo!

 Thuto 10

O ka Lemoga Borapedi bja Therešo Bjang?

O ka Lemoga Borapedi bja Therešo Bjang?

“Phafogelang baporofeta ba maaka.”—MATEO 7:15.

“Ba bolela phatlalatša gore ba tseba Modimo, eupša ba mo latola ka mediro ya bona.”—TITO 1:16

1. Na go na le bodumedi bjo tee feela bja therešo?

Jesu o rutile balatedi ba gagwe bodumedi bjo tee feela, e lego bodumedi bja therešo. Bo swana le tsela e išago bophelong. Jesu o itše: ‘Ke ba sego kae ba ba hwetšago’ tsela yeo. (Mateo 7:14) Modimo o amogela feela borapedi bjoo bo theilwego Lentšung la gagwe la therešo. Barapedi ka moka ba therešo ke batee tumelong.Bala Johane 4:23, 24; 14:6; Baefeso 4:4, 5.

2. Jesu o boletše eng ka Bakriste ba maaka?

Jesu o ile a nea temošo ya gore baporofeta ba maaka ba be ba tla senya Bokriste. Ba bonagala eka ke barapedi ba therešo. Dikereke tša bona di ipolela gore ke tša Bokriste. Eupša o ka lemoga seo ge e le gabotse batho ba bjalo ba lego sona. Bjang? Ke borapedi bja therešo feela bjoo bo tšweletšago Bakriste ba kgonthe bao dika le ditsela tša bona di lemogegago.Bala Mateo 7:13-23.

3. O ka lemoga barapedi ba therešo bjang?

Ela hloko maswao a a mahlano:

  • Barapedi ba therešo ba hlompha Beibele ka ge e le Lentšu la Modimo. Ba katanela go phela ka melao ya yona ya motheo. Ka gona, bodumedi bja therešo bo fapane le bodumedi bjoo bo theilwego dikgopolong tša batho. (Mateo 15:7-9) Barapedi ba therešo ga ba rute selo se itšego gomme ba dira se se fapanego.Bala Johane 17:17; 2 Timotheo 3:16, 17.

  •   Balatedi ba kgonthe ba Jesu ba hlompha leina la Modimo, e lego Jehofa. Jesu o ile a hlompha leina la Modimo ka go le tsebatša. O thušitše batho gore ba tsebe Modimo le go ba ruta go rapelela gore leina la Modimo le kgethagatšwe. (Mateo 6:9) Ke bodumedi bofe bjoo bo tsebatšago leina la Modimo moo o dulago gona?Bala Johane 17:26; Baroma 10:13, 14.

  • Bakriste ba therešo ba bolela ka Mmušo wa Modimo. Modimo o romile Jesu gore a bolele ditaba tše dibotse tša Mmušo. Mmušo wa Modimo ke kholofelo e nnoši ya batho. Jesu o tšwetše pele a bolela ka wona go fihlela letšatšing la lehu la gagwe. (Luka 4:43; 8:1; 23:42, 43) O boletše gore balatedi ba gagwe ba be ba tla bolela ka wona. Ge motho a etla go bolela le wena ka Mmušo wa Modimo, gantši e ba e le wa bodumedi bofe?Bala Mateo 24:14.

  • Balatedi ba Jesu ga se karolo ya lefase le le kgopo. O ka ba lemoga ka go se tšee karolo ga bona ditabeng tša dipolitiki goba dintweng tša selegae. (Johane 17:16; 18:36) E bile ga ba ekiše mekgwa e gobatšago ya lefase gaešita le dikgopolo tša lona.Bala Jakobo 4:4.

  • Bakriste ba therešo ba ratana kudu. Ba ithuta Lentšung la Modimo go hlompha merafo ka moka. Gaešita le ge madumedi a maaka a thekgile dintwa tša ditšhaba gantši, barapedi ba therešo bona ba gana go dira bjalo. (Mika 4:1-3) Go e na le moo, Bakriste ba therešo ba diriša nako ya bona le dilo tša bona ka go hloka boithati ba thuša le go kgothatša ba bangwe.Bala Johane 13:34, 35; 1 Johane 4:20.

4. Na o ka hlaola bodumedi bja therešo?

Ke bodumedi bofe bjo bo theilego dithuto tša bjona Lentšung la Modimo, bo hlomphago leina la Modimo le go tsebatša gore Mmušo wa Modimo ke kholofelo e nnoši ya batho? Ke sehlopha sefe seo se bontšhago lerato le go phema ntwa? O nagana’ng?Bala 1 Johane 3:10-12.

 

Ithute ka mo go oketšegilego

Borapedi Bjoo Modimo a bo Amogelago

Hlahloba ditsela tše tshelelago tšeo di hlaolago bodumedi feela bjo Modimo a bo amogelago.